Qe tbʼanel noticia kubʼ ttzʼibʼin Juan

6 Tej tbʼaj jlu, xiʼ Jesús toj juntl plaj mar te Galilea moqa Tiberíades. 2 Ex e ok lepeʼ nim xjal tiʼj, porke kyil qe milagro* e bʼant tuʼn tej tkubʼ tqʼanin qe yabʼ. 3 Tuʼntzunju, jax Jesús twi jun witz ex kubʼ qeʼ kyukʼil tdiscípulo. 4 Ex chʼinxtoq tpon ambʼil tuʼn tkubʼ kyikʼsaʼn judiy jun fiesta aju Pascua tbʼi. 5 Tej tjaw keʼyin Jesús, e til nim xjal otoq che pon tukʼil. Tuʼntzunju xi tqanin te Felipe: «¿Jatumel ktzajel qlaqʼoʼn pan tuʼn kywan kykyaqil xjal lu?». 6 Xi tqanin Jesús jlu te Felipe tuʼn tel tnikʼ tiʼj tiʼ t-xim, porke ojtzqiʼntoq tuʼn tiʼ kxel tbʼinchaʼn. 7 Xi ttzaqʼweʼn Felipe te: «Ni porke ma tzaj qlaqʼoʼn 200 denario* pan, mlay kanun tuʼn t-xi qʼet chʼinaq te junjun». 8 Jun kyxol qe tdiscípulo Jesús aju Andrés tbʼi, terman Simón Pedro xi tqʼamaʼn te: 9 «Tzalu at jun kʼwal qʼiʼn jweʼ pan te cebada tuʼn ex kabʼe tal pescad. Pero ¿jakupe kanun tuʼn kywan kykyaqil xjal?».

10 Xi tqʼamaʼn Jesús kye: «Kyqʼamanxe kye xjal tuʼn kykubʼ qeʼ». Toj lugar aju otoq tzaj chʼiy nim kʼul ex e kubʼ qeʼ xjal tibʼaj. Ex otoq che pon junlo 5 mil xinaq.* 11 Entonces tzaj ttzyuʼn Jesús pan ex tej t-xi tqʼoʼn chjonte te Dios, xi tsipen kye qeju otoq che kubʼ qeʼ. Axju bʼant tuʼn kyukʼil tal pescad ex xi kywaʼn xjal aju jakutoq bʼaj kyuʼn. 12 Tej otoq che noj xjal, xi tqʼamaʼn Jesús kye tdiscípulo: «Kychmoʼnktze wabʼj mintiʼ ma bʼaj tuʼntzun miʼn tbʼaj naj».* 13 Jawtzun kychmoʼn tsobril wabʼj kyaj kyqʼoʼn xjal e waʼn kyiʼj jweʼ pan te cebada ex noj 12 chiʼl kyuʼn.

14 Tej tok kykeʼyin xjal aju milagro bʼant tuʼn Jesús, kyqʼama: «Qʼanchaʼlxix qa a Profeta lu il tiʼj tuʼn tul twitz txʼotxʼ». 15 Tej tel tnikʼ Jesús tiʼj qa kubʼ kyximen xjal tuʼn t-xi kyiʼn ex tuʼn tok kyqʼoʼn te rey, el tpan tibʼ kyiʼj ex xiʼ twi jun witz tjunalx.

16 Tej ttzaj qlolj, e kuʼtz tdiscípulo Jesús ttzi mar. 17 E jax toj jun bark ex e ikʼx toj mar tuʼn kypon toj tnam Capernaúm. Ya otoq tzaj qlolj ex naʼmxtoq tpon Jesús kyukʼil. 18 Pero xi tzyet tuʼn tpulin mar porke tzaj jun kyqʼiqʼ kyuw. 19 Tej otoq che ikʼx jweʼ moqa seis kilómetros* toj mar, kyil Jesús in bʼet tibʼaj aʼ ex pon laqʼeʼ kyukʼil toj bark ex e tzaj xobʼ. 20 Pero xi tqʼamaʼn Jesús kye: «¡Miʼn che xobʼe! ¡Aqine ma chin ul!». 21 Entonces e jaw tzalaj tej tokx Jesús kyukʼil toj bark, ex tej tikʼ chʼin ambʼil e pon toj lugar jatumel kubʼ kyximen.

22 Toj juntl qʼij, kyil xjal e kyaj ten toj juntl plaj mar qa oʼkx jun tal bark at ttzi aʼ. Ex kyil qa mintiʼ jax Jesús kyukʼil tdiscípulo toj bark tej kyikʼ bʼet. 23 Entonces e pon junjun bark e tzaj toj Tiberíades nqayin tiʼj lugar jatumel xi tqʼoʼn Qajaw chjonte te Dios ex jatumel e waʼn xjal tiʼj pan. 24 Tej tok kykeʼyin xjal qa mi aʼl Jesús ex qe tdiscípulo, e jax kyoj bark ex e xiʼ jyolte Jesús toj Capernaúm.

25 Tej tkanet kyuʼn toj juntl plaj mar, xi kyqanin te: «Xnaqʼtzal,* ¿jtoje tula tzalu?». 26 Xi ttzaqʼweʼn Jesús kye: «Ax tok kxel nqʼamaʼne kyeye, noq in che jyone wiʼje tuʼnju e noje tuʼn pan xi nqʼoʼne kyeye ex nya kyuʼn milagro o kyile. 27 Miʼn che aqʼunane tiʼj wabʼj in bʼaj, sino che aqʼunane tiʼj wabʼj mlay bʼaj ex tzul tqʼoʼn kychwinqlale te jumajx. Tzul tqʼoʼn Tkʼwal Xinaq wabʼj lu kyeye ex jaku bʼant jlu tuʼn porke o tzaj qʼoʼn toklen tuʼn Dios aju Mambʼaj».

28 Tuʼntzunju xi kyqanin xjal te Jesús: «¿Tiʼ aqʼuntl il tiʼj tuʼn t-xi qbʼinchaʼne tuʼn ttzalaj Dios qiʼje?». 29 Xi ttzaqʼweʼn Jesús kye: «Atzun aqʼuntl lu in tzaj tqʼamaʼn Dios tuʼn t-xi kybʼinchaʼne: tuʼn tok qeʼ kykʼuʼje tiʼj xjal tzaj tsamaʼn». 30 Entonces xi kyqʼamaʼn xjal te Jesús: «¿Alkyetzun milagro kbʼel tbʼinchaʼna tuʼn tok qkeʼyine ex tuʼn tok qeʼ qkʼuʼje tiʼja? ¿Alkye aqʼuntl in bʼant tuʼna? 31 Por ejemplo, e waʼn qtzan qchmane tiʼj maná toj desierto, ik tzeʼn tkuʼx toj tyol Dios: ‹Tzaj tqʼoʼn Dios kywa kuʼtz toj kyaʼj›». 32 Entonces xi tqʼamaʼn Jesús kye: «Ax tok kxel nqʼamaʼne kyeye, nya a Moisés xi qʼonte wabʼj kuʼtz toj kyaʼj kyeye, sino a Nmane in xi qʼonte wabʼj axix tok kyeye aju in kuʼtz toj kyaʼj. 33 Porke aju wabʼj in tzaj tqʼoʼn Dios, aju o kuʼtz toj kyaʼj ex in xi tqʼoʼn kychwinqlal xjal». 34 Tuʼntzunju xi kyqʼamaʼn xjal te: «Tat, kukx qʼontza wabʼj lu qeye».

35 Xi tqʼamaʼn Jesús kye: «Aqine wabʼj in tqʼoʼn chwinqlal. Alkye ma tzul wukʼile ya mlay tzaj weʼyaj tiʼj ex alkye ma tzʼok qeʼ tkʼuʼj wiʼje ya mlay tzaj kʼaj tiʼj. 36 Pero ik tzeʼn ma txi nqʼamaʼne kyeye, ma chin kyile pero mintiʼ in nok qeʼ kykʼuʼje wiʼje. 37 Kykyaqil qeju in tzaj tqʼoʼn Mambʼaj weye che ul wukʼile, ex alkye ma tzul wukʼile mlay tzʼel wikʼune. 38 Porke mintiʼ ma chin kuʼtze toj kyaʼj tuʼn t-xi nbʼinchaʼne aju wajbʼile, sino tuʼn t-xi nbʼinchaʼne tajbʼil Dios aju tzaj samante weye. 39 Ex atzun jlu tajbʼil Dios aju tzaj samante weye: nya taj tuʼn tel tzpet jun kyxol qeju tzaj tqʼoʼn weye, noq oʼkx tuʼn kyjaw anqʼin wuʼne toj bʼajsbʼil qʼij. 40 Porke atzun jlu tajbʼil Nmane: taj tuʼn tten kychwinqlal te jumajx kykyaqil xjal in nel kynikʼ tiʼj Kʼwalbʼaj ex noq qeʼ kykʼuʼj tiʼj, ex che jawil anqʼin wuʼne toj bʼajsbʼil qʼij».

41 Entonces e ok ten judiy yolil kyxolx tiʼj Jesús porke tqʼama jlu: «Aqine wabʼj ma kuʼtz toj kyaʼj». 42 Ex kyqʼama kyxolx: «¿Nyapetzun a Jesús lu aju tkʼwal José? ¿Nyapetzun ojtzqiʼn tman ex ttxuʼ quʼn? ¿Entonces tiquʼn in tzaj tqʼamaʼn jaʼlo ‹Ma chin kuʼtze toj kyaʼj›?». 43 Tej tok tkeʼyin Jesús jlu, xi tqʼamaʼn kye: «Miʼn che yoline nya bʼaʼn wiʼje. 44 Mlay tzul jun xjal wukʼile qa nya a Mambʼaj saj qʼinte, aju tzaj samante weye, ex kjawil anqʼin wuʼne toj bʼajsbʼil qʼij. 45 Kubʼ kytzʼibʼin Profeta jlu: ‹Tzul tqʼoʼn Jehová* xnaqʼtzbʼil kye kykyaqil xjal›. Kykyaqil qeju in xi kybʼiʼn Mambʼaj ex in nel kynikʼ tiʼj in che ul wukʼile. 46 Ni jun xjal o til Mambʼaj, noq oʼkx aju o tzaj tukʼil Dios, atzunte o til Mambʼaj. 47 Ax tok kxel nqʼamaʼne kyeye, alkye ma tzʼokslan wiʼje ktel tchwinqlal te jumajx.

48 Aqine wabʼj in tqʼoʼn chwinqlal. 49 E waʼn qtzan kychmane tiʼj maná toj desierto, pero e bʼaj kyim. 50 Pero alkye ma txi twaʼn wabʼj in kuʼtz toj kyaʼj mlay kyim. 51 Aqine wabʼj itzʼ kuʼtz toj kyaʼj. Qa ma txi twaʼn jun xjal wabʼj lu, kʼanqʼil te jumajx. Ex aju wabʼj kxel nqʼoʼne tuʼn kyanqʼin xjal atzun nchibʼjale».

52 Entonces e ok ten judiy qʼojil kyxolx ex kyqʼama: «¿Tzeʼn tten tzul tqʼoʼn xinaq lu tchibʼjal qe tuʼn t-xi qwaʼn?». 53 Tuʼntzunju xi tqʼamaʼn Jesús kye: «Ax tok kxel nqʼamaʼne kyeye, qa mintiʼ ma txi kywaʼne tchibʼjal Tkʼwal Xinaq ex qa mintiʼ ma txi kykʼaʼne tchkʼel, mlayx ten kychwinqlale.* 54 Alkye ma txi twaʼn nchibʼjale ex ma txi tkʼaʼn nchkʼele ktel tchwinqlal te jumajx, ex kjawil anqʼin wuʼne toj bʼajsbʼil qʼij. 55 Porke aju nchibʼjale wabʼj axix tok ex aju nchkʼele kʼabʼj axix tok. 56 Alkye ma txi twaʼn nchibʼjale ex ma txi tkʼaʼn nchkʼele, kukx ktel wukʼile ex kukx chin tele tukʼil. 57 Ik tzeʼn weye at nchwinqlale tuʼn Mambʼaj itzʼ, aju tzaj samante weye, ax ikx kyeye ktel kychwinqlale wuʼne qa ma txi kywaʼne nchibʼjale. 58 Atzun wabʼj lu ma kuʼtz toj kyaʼj. Junxitl twitzju xi kywaʼn qtzan kychmane aju yajxitl e kyim. Alkye ma txi twaʼn wabʼj lu ktel tchwinqlal te jumajx». 59 Tqʼama Jesús tkyaqil jlu tej t-xi tqʼoʼn xnaqʼtzbʼil toj jun ja te kʼulbʼil* toj Capernaúm.

60 Tej tok kybʼiʼn jlu, nim qe tdiscípulo Jesús kyqʼama: «Kyuw qe yol xbʼaj tqʼamaʼn. ¿Alkye jaku txi bʼinte?». 61 Pero tuʼnju ojtzqiʼntoq tuʼn Jesús tiʼ kubʼ kyximen tdiscípulo toj kyanmi, xi tqʼamaʼn kye: «¿Nyape bʼaʼn ma che ela nyole toj kywitze? 62 Qa ikju, ¿tiʼ jaku bʼaj qa ma tzʼok kykeʼyine Tkʼwal Xinaq in jax jatumel ma tzaj? 63 Tuʼn espíritu santo at chwinqlal, atzunte chibʼj mintiʼ tajbʼen. Aqeju yol ma txi nqʼamaʼne kyeye at toklen tukʼil espíritu santo ex in tzaj tqʼoʼn chwinqlal. 64 Pero ateʼ junjun kyxole mintiʼ in che okslan». Tqʼama Jesús jlu porke ojtzqintoq tuʼn atxix t-xe tnejel alkyeqe mintiʼ xi kyokslaʼn, ex alkye kxel qʼonte toj kyqʼabʼ xjal. 65 Xi tqʼamaʼntl Jesús kye: «Tuʼntzunju ma txi nqʼamaʼne kyeye, mi aʼl jun xjal jaku tzul wukʼile qa nya a Mambʼaj ma txi qʼonte ambʼil te».

66 Tej tbʼaj tqʼamaʼn Jesús jlu, nim qe tdiscípulo e meltzʼaj tiʼjju bʼant kyuʼn ojtxe ex ya mintiʼ e bʼet tukʼil. 67 Tuʼntzunju xi tqanin Jesús kye qeju Doce: «Yajtzun kyeye, ¿nyapetzun kyaje tuʼn kyxi lepeʼye kyiʼj?». 68 Xi ttzaqʼweʼn Simón Pedro te: «Tat, ¿alqukʼil qo xeʼle? Porke oʼkx tukʼila ateʼ yol in tzaj kyqʼoʼn chwinqlal te jumajx. 69 Ojtzqiʼn quʼne qa xjan teya ex qa ma tzaj samaʼna tuʼn Dios, ex ma qo okslane tiʼja». 70 Xi ttzaqʼweʼn Jesús kye: «¿Nyapetzun 12 kybʼete jaw nskʼoʼne? Pero jun kyxole ma tzʼokx tajaw il toj tanmi». 71 Atztoq in yolin Jesús tiʼj Judas aju tkʼwal Simón Iscariote, porke kxeltoq tqʼoʼn Jesús toj kyqʼabʼ xjal maske ten kyxol qeju Doce.