Qe tbʼanel noticia kubʼ ttzʼibʼin Mateo

14 Toj ambʼil aju, el tqanil tiʼj Jesús ex ok tbʼiʼn Herodes* aju gobernador te Galilea. 2 Xitzun tqʼamaʼn Herodes kye qeju in che ajbʼen te: «A Juan el Bautista. Ma jaw anqʼin kyxol kyimni, por eso in che bʼant qe milagro lu tuʼn». 3 Tej naʼmxtoq tbʼaj jlu, xi tqʼamaʼn Herodes tuʼn tokx qʼoʼn Juan pres ex tuʼn tok kʼaloʼn tuʼn cadena tuʼn tpaj Herodías aju t-xuʼjil Filipo, aju terman Herodes. 4 Kukx xi tqʼamaʼn Juan jlu te Herodes: «Mintiʼ qʼoʼn permis teya tuʼn tok Herodías te t-xuʼjila». 5 Tuʼntzunju, tajtoq Herodes tuʼn tkubʼ tbʼyoʼn Juan, pero tzaj xobʼ kywitz xjal tuʼnju ok kyqʼoʼn te jun profeta. 6 Pero tej tkubʼ celebrarin tcumpleaño Herodes, bʼixin tal Herodías toj qʼij aju. Ex tbʼanel ela toj twitz Herodes aju ok tkeʼyin, 7 tuʼntzunju xi tqʼamaʼn te txin qa kxeltoq tqʼoʼn alkyexku tiʼ ma txi tqanin te. 8 Pero tnejel xi tqanin txin te ttxuʼ tiʼ tuʼn t-xi tqanin. Yajxitl xi tqʼamaʼn te Herodes: «Qʼontza twiʼ Juan el Bautista weye toj jun bandeja». 9 Tej tok tbʼiʼn rey lu, tzaj tbʼis. Pero xi tqʼoʼn orden tuʼn t-xi qʼoʼn te txin aju xi tqanin te, porke ya otoq txi tprometerin kywitz xjal xi tqʼoʼn invitación kyiʼj.* 10 Tuʼntzunju, xi tqʼamaʼn tuʼn tel txʼemin twiʼ Juan toj cárcel. 11 Tzajtzun qʼiʼn twiʼ Juan toj jun bandeja ex xi qʼoʼn te txin, atzunte txin xi tiʼn ex xi tqʼoʼn te ttxuʼ. 12 Yajxitl, e pon tdiscípulo Juan qʼilte t-xmilal ex kux kymaquʼn. Ax ikx e xi qʼamalte te Jesús aju otoq bʼaj. 13 Tej tok tbʼiʼn Jesús jlu, ikʼ bʼet toj lugar jatumel taʼ, jax toj jun bark ex xiʼ toj jun lugar najchaq tuʼn tten tjunalx. Tej tok kybʼiʼn xjal lu, e etz kyoj tnam ex e xi lepeʼ tiʼj Jesús tuʼn kyqan.

14 Tej tpon Jesús ttzi mar, ok tkeʼyin nim qe xjal otoq che pon. Ex tzaj qʼaqʼin tkʼuʼj kyiʼj, tuʼntzunju e kubʼ tqʼanin kykyaqil qeju at jun yabʼil kyiʼj. 15 Tej chʼixtoq ttzaj qlolj, e pon tdiscípulo Jesús tukʼil ex xi kyqʼamaʼn te: «Aju lugar lu najchaq taʼ ex ma txiʼ or. Qʼamanxa kye xjal tuʼn kymeltzʼaj ex tuʼn kyxiʼ loqʼel chʼin kywa kyoj aldea». 16 Pero xi tqʼamaʼn Jesús kye: «Nya il tiʼj tuʼn kymeltzʼaj, kyqʼonxe chʼin kywa». 17 Atzun kye tdiscípulo kyqʼama: «Nya nim wabʼj qʼiʼn quʼne, oʼkx jweʼ pan ex kabʼe pescad». 18 Xi tqʼamaʼn Jesús kye: «Bʼaʼn tuʼn ttzaj kyiʼne wukʼile». 19 Entonces xi tqʼamaʼn Jesús kye xjal tuʼn kykubʼ qeʼ tibʼaj kʼul. Tzaj ttzyuʼn jweʼ pan ex kabʼe pescad, jaw tkeʼyin twitz kyaʼj ex ok tqʼoʼn jun naʼj Dios.* Yajxitl, kubʼ tpiẍun Jesús qe pan e xi tqʼoʼn kye tdiscípulo, atzun kye tdiscípulo xi kyqʼoʼn kye xjal. 20 Kykyaqil xjal e waʼn ex e noj. Yajxitl, jaw kychmoʼn wabʼj kyaj sobrarin ex noj 12 chiʼl kyuʼn. 21 E waʼn junlo 5 mil xinaq,* pero mintiʼ e xi ajlaʼn xuʼj* ex qe kʼwal. 22 Yajxitl, xi tqʼamaʼn Jesús kye tdiscípulo tuʼn kyjax toj bark ex tuʼn kyxi nej toj juntl plaj mar akux in bʼaj yolin kyukʼil xjal.

23 Tej tbʼaj yolin Jesús kyukʼil xjal, jax twi jun witz naʼl Dios tjunalx. Ex kukxtoq at tjunalx tej ttzaj qlolj. 24 Toj ambʼil lu, ya otoq tzʼokx laqʼeʼ* bark toj mar. Ex ok tilil kyuʼn tdiscípulo Jesús tuʼn miʼn t-xi mulqʼaj bark toj aʼ porke atz tzaj kyqʼiqʼ kywitz. 25 Tej naʼmxtoq qsqix,* ikʼx bʼet Jesús tibʼaj mar tuʼn tpon kyukʼil tdiscípulo. 26 Tej tok kykeʼyin tdiscípulo qa in bʼet tibʼaj aʼ, tzaj nim kyxobʼil ex kyqʼama: «¡Jun fantasma!». Ex e jaw schʼin tuʼnju otoq che tzaj xobʼ. 27 Tuʼntzunju, jurat xi tqʼamaʼn Jesús kye: «¡Miʼn che xobʼe! Aqine ma chin ul». 28 Xitzun tqʼamaʼn Pedro te: «Tat, qa aya, qʼamantza weye tuʼn nxi bʼete tibʼaj aʼ tuʼn npone tukʼila». 29 Xi ttzaqʼweʼn Jesús te: «Tzaja». Tuʼntzunju, kuʼtz Pedro toj bark ex xi bʼet tibʼaj aʼ tuʼn tpon tukʼil Jesús. 30 Pero tej tok tkeʼyin qa nim tipumal kyqʼiqʼ, tzaj nim t-xobʼil. Ex tuʼnju ya otoq txi tzyet tuʼn t-xi mulqʼaj toj aʼ, jaw schʼiʼn ex tqʼama: «¡Tat, chin tkloma!». 31 Ex jurat xi tnuqpiʼn Jesús tqʼabʼ, tzaj ttzyuʼn Pedro ex xi tqʼamaʼn te: «Aya xinaq noq chʼin qʼuqbʼil tkʼuʼj, ¿tiquʼn ma tzaj xobʼa?». 32 Tej otoq che jax toj bark, weʼ kyqʼiqʼ. 33 Atzun qeju ateʼtoq toj bark, jaw kynimsaʼn* Jesús ex xi kyqʼamaʼn te: «Ax tok aya Tkʼwal Dios». 34 E pontzun toj juntl plaj mar toj txʼotxʼ te Genesaret.

35 Tej tel kynikʼ xinaq te lugar aju tiʼj Jesús, xi kyqʼamaʼn kye xjal in che anqʼin nqayin ex pon kyiʼn tukʼil Jesús kykyaqil qeju at jun yabʼil kyiʼj. 36 Ex e kubʼsan xjal twitz Jesús tuʼn t-xi tqʼoʼn ambʼil kye maske oʼkx tuʼn tok kytzyuʼn ttxaʼn t-xbʼalun. Ex kykyaqil qeju bʼant jlu kyuʼn e bʼant.