Qe tbʼanel noticia kubʼ ttzʼibʼin Juan
21 Tej tbʼaj jlu, kubʼ tyekʼin tibʼ Jesús juntl maj kywitz tdiscípulo ttzi mar te Tiberíades. Kubʼ tyekʼin tibʼ kjalu. 2 Junxtoq taʼ Simón Pedro tukʼil Tomás aju ok qʼoʼn tbʼi te el Gemelo, tukʼil Natanael te Caná te Galilea, qe tkʼwal Zebedeo ex kabʼetl tdiscípulo Jesús. 3 Xi tqʼamaʼn Simón Pedro kye: «Ma chinxe tzyul pescad». Atzun kye xi kyqʼamaʼn te: «Ma qoʼxe tukʼila». E ikʼtzun bʼet ex e jax toj bark, pero mintiʼ tzyet nijun pescad kyuʼn toj qonikʼen aju.
4 Tej qsqix, waʼltoq Jesús ttzi mar, pero mintiʼ el kynikʼ tdiscípulo tiʼj qa atoq Jesús. 5 Entonces xi tqʼamaʼn Jesús kye: «Aqeye nkʼwal, ¿atpe jun tiʼ* tuʼn t-xi kywaʼne?». «Mintiʼ», xi kytzaqʼweʼn te. 6 Xi tqʼamaʼn Jesús kye: «Kyqʼonkuxe red toj aʼ ttxlaj bark toj lado derecho ex kkanetel pescad kyuʼne». Tej tkux kyqʼoʼn red, ya mintiʼ bʼant tuʼn tjatz kyiʼn porke nim pescad tzyet kyuʼn. 7 Entonces xi tqʼamaʼn discípulo kʼujlaʼn tuʼn Jesús te Pedro: «¡A Qajaw!». Tej tok tbʼiʼn Simón Pedro qa atoq Qajaw, ok tqʼoʼn* t-xbʼalun porke otoq tzʼel tiʼn* ex kux t-xoʼn tibʼ toj aʼ. 8 Atzun kye txqantl discípulo ateʼ toj tal bark e tzaj lepeʼ tiʼj ex tzaj kyjukʼuʼn red nojni tuʼn pescad, porke nyatoq najchaq ateʼ tiʼj txʼotxʼ ex otoq che okx como 90 metro* toj mar.
9 Tej kymeltzʼaj ttzi mar, kyil qa otoq bʼaj bʼinchaʼn qʼaqʼ. Tibʼaj ttxal qʼaqʼ otoq kubʼ qʼoʼn pescad ex pan. 10 Xi tqʼamaʼn Jesús kye: «Kyiʼntze junjun pescad tzma ẍe tzyet kyuʼne». 11 Tuʼntzunju jax Simón Pedro toj bark ex tzaj tjukʼuʼn red twitz txʼotxʼ. Nojnitoq kyuʼn 153 matij* pescad. Pero mintiʼ el laq red maske otoq noj kyuʼn nim pescad. 12 Xi tqʼamaʼn Jesús kye: «Che tzaje waʼl». Pero nijun kyxol discípulo tnimarin tibʼ tuʼn t-xi tqanin te: «¿Alkyetzuna?», porke ojtzqintoq kyuʼn qa a Qajaw. 13 Xi laqʼeʼ Jesús kyukʼil, tzaj ttzyuʼn pan ex xi tqʼoʼn kye ex axju bʼant tuʼn kyukʼil pescad. 14 Atzun toxin maj lu kubʼ tyekʼin tibʼ Jesús kywitz tdiscípulo tej otoq jaw anqʼin kyxol kyimni.
15 Tej kybʼaj waʼn te prim, xi tqanin Jesús te Simón Pedro: «Aya Simón tkʼwal Juan, ¿maspe kʼujlaʼn qine tuʼna kywitz qe jlu?». Xi ttzaqʼweʼn Pedro te: «Ikju Tat, ojtzqiʼn tuʼna qa kʼujlaʼna wuʼne». Xi tqʼamaʼn Jesús te: «Qʼonxa kywa nrite».* 16 Xitzun tqanin Jesús tkabʼin maj te: «Aya Simón tkʼwal Juan, ¿kʼujlaʼn qine tuʼna?». Xi ttzaqʼweʼn Pedro te: «Ikju Tat, ojtzqiʼn tuʼna qa kʼujlaʼna wuʼne». Xi tqʼamaʼn Jesús te: «Pastorina kyiʼj tal nrite». 17 Xi tqanin Jesús toxin maj te: «Aya Simón tkʼwal Juan, ¿kʼujlaʼn qine tuʼna?». Tzajtzun tbʼis Pedro tej tok tbʼiʼn qa xi tqanin Jesús toxin maj te «¿Kʼujlaʼn qine tuʼna?». Tuʼntzunju xi tqʼamaʼn te: «Tat, tkyaqil ojtzqiʼn tuʼna, ojtzqiʼn tuʼna qa kʼujlaʼna wuʼne». Xi tqʼamaʼn Jesús te: «Qʼonxa kywa tal nrite. 18 Ax tok kxel nqʼamaʼne teya, tej tzmatoq kʼwalxa, axa ok qʼonte t-xbʼaluna ex xiʼya noq jaxku tumel taja. Pero aj ttijena, kjawil tiʼn tqʼabʼa ex juntl kʼokel qʼonte t-xbʼaluna ex kxel qʼiʼna tuʼn jatumel nya taja tuʼn t-xiʼya». 19 Tqʼama Jesús qe yol lu tuʼn ttzaj tqʼamaʼn tzeʼn tuʼn tkyim Pedro tuʼn tjaw nimsaʼn Dios. Ex tej tbʼaj yolin tukʼil, xi tqʼamaʼntl jlu te: «Kukx lepeka wiʼje».
20 Entonces ajtz tkeʼyin Pedro ex til qa lepch discípulo kʼujlaʼn tuʼn Jesús ttzel kyiʼj, aju discípulo xi kuẍe ttzi tkʼuʼj* Jesús ex xi tqanin te «Tat, ¿alkye kxel qʼonte teya toj kyqʼabʼ xjal?». 21 Tuʼntzunju, tej til Pedro discípulo lu, xi tqanin te Jesús: «Tat, ¿yajtzun te jlu? ¿Tiʼ kbʼajel tiʼj?». 22 Xi tqʼamaʼn Jesús te: «Qa waje tuʼn tkyaj ten tzalu tzmaxi aj wule, ¿tiʼ toklena tiʼj? Oʼkx lepeka wiʼje». 23 Tuʼntzunju, el yol kyxol erman qa mlaytoq kyim discípulo lu. Pero mintiʼ tqʼama Jesús qa mlaytoq kyim. Noq oʼkx tqʼama: «Qa waje tuʼn tkyaj ten tzalu tzmaxi aj wule, ¿tiʼ toklena tiʼj?».
24 Atzun discípulo lu in yolin tiʼj tkyaqil jlu ex a kubʼ tzʼibʼinte, ex ojtzqiʼn quʼn qa in yolin axix tok.
25 Ex at txqantl tiʼ bʼant tuʼn Jesús. Noqwit che kubʼ tzʼibʼin teyele junjun tbʼinchbʼen Jesús, toj nwitze mlay chex bʼaj uʼj lu twitz tkyaqil txʼotxʼ.