Carta xi ttzʼibʼin Pablo te Filemón
1 Aqine Pablo, tokx qine pres tuʼnju in chin ajbʼene te Cristo Jesús, ex junx tukʼil qerman Timoteo in xi ntzʼibʼine carta lu teya Filemón, aya jun erman kʼujlaʼn quʼne ex in nonin qiʼje. 2 Ax ikx te ermana Apfia ex te Arquipo, aju in naqʼunan junx qukʼile ik tzeʼn jun soldad ex te tkyaqil congregación in nok kychmon kyibʼ toj tjaya:
3 Kuchiwt kubʼ tyekʼin Qman Dios junx tukʼil Qajaw Jesucristo t-xtalbʼil kyiʼje ex tuʼn ttzaj tqʼoʼn mujbʼabʼil kyxole.
4 Kukx in xi nqʼoʼne chjonte te Dios tiʼja aj ttzaj nnaʼna kyoj nnaʼj Diose. 5 Porke kukx in nok nbʼiʼne qa in nok qeʼ tkʼuʼja tiʼj Qajaw Jesús ex qa kʼujlaʼn tuʼna, ex qa ax jlu in bʼant tuʼna kyukʼil kykyaqil erman.* 6 In chin naʼne Dios tiʼj qʼuqbʼil tkʼuʼja aju junx taʼ ik tzeʼn qeye, tuʼn tonin tiʼja tuʼn tel tnikʼa tiʼj tkyaqil kʼiwlabʼil in tzaj qʼoʼn qe noq tuʼn Cristo. 7 In jaw tzalaje ex qeʼ nkʼuʼje tej tok nbʼiʼne qa kʼujlaʼn qe erman tuʼna. Porke chjonte teya werman, ma qeʼ kykʼuʼj kykyaqil erman tuʼna.*
8 Tuʼntzunju, jaku txi nqʼamaʼne teya tuʼn tkubʼ tbʼinchaʼna aju bʼaʼn noq tuʼnju okslal qoʼ tiʼj Cristo. 9 Pero mas bʼaʼn chin kubʼsale twitza porke ojtzqiʼn wuʼne qa in kubʼ tyekʼina tkʼujlabʼila. Porke ya ma chin tijene, aqine Pablo ex tokx qine pres tuʼnju in nok qeʼ nkʼuʼje tiʼj Cristo Jesús. 10 Chin kubʼsale twitza tiʼj Onésimo aju o tzʼok ik tzeʼn jun nkʼwale ex o chin oke ik tzeʼn tman tzalu toj cárcel. 11 Toj ambʼil ojtxe mintiʼtoq tajbʼen teya, pero jaʼlo at tajbʼen teya ex weye. 12 Ok kxel nsamaʼne juntl maj Onésimo tukʼila aju kʼujlaʼnxix wuʼne.
13 Wajbʼile tuʼn kukx tkyaj ten wukʼile te t-xela ex tuʼn tajbʼen weye akux pres qine tuʼnju in chin yoline tiʼj tbʼanel noticia.* 14 Pero nya waje tuʼn t-xi nbʼinchaʼne jun tiʼ naʼmxtoq ttzaj tqʼoʼna permis weye. Porke wajbʼile tuʼn ttzaj anqʼin toj tanmiya tuʼn t-xi tbʼinchaʼna xtalbʼil lu weye ex nya tuʼnju in xi nqanine teya. 15 Malo tzʼel oq tiʼja toj jun ambʼil* tuʼntzun tten juntl maj tukʼila te jumajx. 16 Pero jaʼlo nya oʼkx ik tzeʼn jun tmajena, sino ik tzeʼn jun erman. Nim kʼujlaʼn wuʼne, pero maslo kʼokel tkʼujlaʼna nwitze porke che ajbʼele junx te Qajaw ex nya oʼkx kʼokel te jun tmajena. 17 Qa in chin ok tqʼoʼna te jun tamiwa, qʼonxa jun bʼaʼn tulen ik tzeʼn jaku bʼant tuʼna wukʼile. 18 Ex qa o tzʼok tbʼinchaʼn jun nya bʼaʼn tiʼja moqa at tkʼas tukʼila, jaku txi nchjoʼne teya. 19 Aʼyine Pablo ex in xi ntzʼibʼine teya tukʼil nqʼabʼe qa kxel nchjoʼne tkʼas Onésimo. Pero miʼn tzikʼ tnaʼl tuʼna qa mas nim tkʼasa at wukʼile. 20 Ikju werman, bʼinchama xtalbʼil lu weye porke okslal qoʼ tiʼj Qajaw. Qʼuqbʼama nkʼuʼje porke okslal qoʼ tiʼj Cristo.
21 In xi ntzʼibʼine teya porke qʼuqli nkʼuʼje tiʼj qa kxel tbʼiʼna nyole ex qa kxel tbʼinchaʼna mas twitzju ma txi nqʼamaʼne teya. 22 Nya oʼkxju, ax ikx bʼinchama jun lugar jatumel tuʼn nkyaj tene, porke qʼuqli nkʼuʼje tiʼj qa chin kʼelex tzaqpiʼne noq tuʼn kynaʼj Diose.
23 In xi tsamaʼn Epafras qʼolbʼebʼil teya, aju tokx pres ik tzeʼn weye noq tuʼnju in nok qeʼ tkʼuʼj tiʼj Cristo Jesús. 24 Ax ikx, in xi qʼolbʼena tuʼn Marcos, Aristarco, Demas ex Lucas aqeju in che onin wiʼje.
25 Kuchiwt kubʼ tyekʼin Qajaw Jesucristo t-xtalbʼil kyiʼje tuʼnju at jun tbʼanel kyanmiye.