Qe tbʼanel noticia kubʼ ttzʼibʼin Juan

15 Aqine tqan uva axix tok ex a Nmane aqʼunal tiʼj. 2 In nel ttxʼemin tkyaqil tqʼabʼ uva mintiʼ in nel twitz tok wiʼje, ex kbʼajel tlimpiarin kykyaqil tqʼabʼ in nel kywitz tuʼn tel mas kywitz. 3 Atzun kyeye ya ma che bʼaj limpiarine kyuʼn yol ma txi nqʼamaʼne kyeye. 4 Che tenkje wukʼile ex chin tele kyukʼile. Il tiʼj tuʼn tten jun tqʼabʼ uva tiʼj tqan porke mlay tzʼel twitz tuʼnx tibʼ, ax ikx kyeye mlay tzʼel kywitze qa mintiʼ ma che kyaj tene wukʼile. 5 Aqine tqan uva, atzun kyeye tqʼabʼ. Alkye in kyaj ten wukʼile, ex in chin kyaj tene tukʼil, in nel nim twitz. Porke qa ma tzʼel kypan kyibʼe wiʼje, mlay bʼant jun tiʼ kyuʼne. 6 Alkye mintiʼ ma kyaj ten wukʼile, kʼelex xoʼn ik tzeʼn jun tqʼabʼ uva ex kbʼel tzqij. Yajxitl in che jaw skʼoʼn kyuʼn xjal ex in che okx qʼoʼn toj qʼaqʼ tuʼn kybʼaj tzʼeʼy. 7 Qa ma che kyaj tene wukʼile ex qa ma txi kykʼuʼne nyole toj kyanmiye, tkyaqilju kyajbʼile tuʼn t-xi kyqanine tzul qʼoʼn kyeye. 8 Tuʼn jlu in jaw nimsaʼn Nmane: qa kukx ma tzʼel nim kywitze ex qa ma kubʼ kyyekʼine qa nxnaqʼtzbʼen qeye. 9 Ik tzeʼn kʼujlaʼn qine tuʼn Mambʼaj, ax ik kyeye kʼujlaʼn qeye wuʼne. Che tenkje toj nkʼujlalile. 10 Qa ma che japun nmandamyente kyuʼne, kukx che okel nkʼujlaʼne. Ik tzeʼn weye ma che japun tmandamyent Nmane wuʼne ex kukx kʼujlaʼn qine tuʼn.

11 Ma txi nqʼamaʼne tkyaqil jlu kyeye tuʼn kytzalaje junx wukʼile* ex tuʼn kytzalaje nimxix. 12 Atzun nmandamyente jlu: tuʼn tok kykʼujlan kyibʼe kyxolxe ik tzeʼn ma che ok nkʼujlaʼne. 13 Mintiʼ jun xjal mas nim tkʼujlabʼil twitzju in xi tqʼoʼn tchwinqlal tuʼn kyklet tamiw. 14 Aqeye wamiwe qa in xi kybʼinchaʼne aju in xi nqʼamaʼne kyeye. 15 Mlay tzʼok nqʼoʼntle kybʼiye te majen, porke mintiʼ ojtzqiʼn tuʼn jun majen tiʼ in bʼant tuʼn tpatrón. Jaʼlo kʼokel nqʼoʼne kybʼiye te wamiwe, porke ma txi nqʼamaʼne kyeye tkyaqilju ma tzʼok nbʼiʼne tiʼj Nmane. 16 Nya aqeye ma che jaw skʼonte weye, sino aqine ma chin jaw skʼoʼn kyeye. Ma txi nqʼoʼne kyoklene tuʼn kyxiʼye ex tuʼn tok kywitze, ex tuʼn kukx tel kywitze. Iktzun tten tzul tqʼoʼn Mambʼaj kyeye tkyaqilju ma txi kyqanine te toj nbʼiye.

17 In xi nqʼamaʼne tkyaqil jlu kyeye tuʼn tok kykʼujlan kyibʼe kyxolxe. 18 Qa ma che el ikʼune kyuʼn xjal te twitz txʼotxʼ, miʼn tzikʼ tnaʼl kyuʼne qa tnejel ma chin el ikʼune kyuʼn. 19 Noqwit in che oke ik tzeʼn kye xjal te twitz txʼotxʼ, mawtlo che ok kʼujlaʼne kyuʼn ik tzeʼn in nok kykʼujlaʼn kyukʼil. Pero como mintiʼ in che oke ik tzeʼn kye xjal te twitz txʼotxʼ ex ma che jaw nskʼoʼne kyxol, in che el ikʼune kyuʼn. 20 Miʼn tzikʼ tnaʼl kyuʼne aju ma txi nqʼamaʼne kyeye: nya mas nim toklen majen twitz tpatrón. Qa ma chin el ikʼune kyuʼn, ax ikx kyeye che elel ikʼune kyuʼn. Qa ma txi kybʼiʼn nyole, ax ikx kxel kybʼiʼn kyyole. 21 Kʼokel bʼinchaʼn tkyaqil jlu kyiʼje noq tuʼn tpaj nbʼiye, porke mintiʼ ojtzqiʼn kyuʼn alkye ma tzaj samante weye. 22 Noqwit mintiʼ ma chin ule ex noqwit mintiʼ ma chin yoline kyukʼil, mintiʼwtlo kyil. Pero jaʼlo mlay bʼant tuʼn tkubʼ kyewin kyil. 23 Alkye in chin el ikʼune tuʼn, ax ikx in nel tikʼun Nmane. 24 Noqwit mintiʼ ma kubʼ nbʼinchaʼne aqʼuntl kywitz, aju mi aʼl jun xjal o bʼant tuʼn, mintiʼwtlo kyil. Pero jaʼlo ma chin ok kykeʼyine* ex ma chin el ikʼune kyuʼn, ex ma tzʼel kyikʼun Nmane. 25 Pero ma bʼaj tkyaqil jlu tuʼn tjapun kywi yol tzʼibʼin toj Kyley: ‹Ma chin el ikʼune kyuʼn ex mintiʼ wile kywitz›. 26 Aj ttzaj nsamaʼne onil kyeye aju ktzajel tukʼil Mambʼaj, kxel tqʼamaʼn kyeye alkye qine. Aju onil kyeye atzun espíritu santo aju in tzaj tyekʼin axix tok ex atz in tzaj tukʼil Mambʼaj. 27 Ax ikx kyeye il tiʼj tuʼn t-xi kyqʼamaʼne alkye qine, porke ma che tene wukʼile atxix tnejel.