Qe tbʼanel noticia kubʼ ttzʼibʼin Juan

18 Tej tbʼaj tqʼamaʼn Jesús jlu, xiʼ kyukʼil tdiscípulo toj juntl plaj tqan xaq Cedrón tbʼi ex okx kyukʼil toj jun jardín toj lugar aju. 2 Ax ikx ojtzqintoq lugar lu tuʼn Judas aju xi qʼonte Jesús toj kyqʼabʼ xjal, porke kukx ok tchmon tibʼ Jesús kyukʼil tdiscípulo toj lugar aju. 3 Ex pon Judas tukʼil jun grupo soldad ex qe guardia kye pal nim kyoklen ex qe fariseo. Qʼiʼntoq antorcha kyuʼn, qe kandil qe espada ex qe tzeʼ. 4 Ojtzqintoq tuʼn Jesús tiʼ il tiʼj tuʼn tbʼaj tiʼj, tuʼntzunju e kyaj tqʼoʼn tdiscípulo ttzel tiʼj ex xi tqanin kye: «¿Alqiʼj in che jyone?». 5 Xi kytzaqʼweʼn te: «In qo jyone tiʼj Jesús te Nazaret». «Aqine», chi Jesús xi ttzaqʼweʼn. Ex attoq Judas kyukʼil, aju xi qʼonte Jesús toj kyqʼabʼ xjal.

6 Tej t-xi tqʼamaʼn Jesús kye «Aqine», e jel laqʼeʼ ex e kubʼ tzʼaq twitz txʼotxʼ. 7 Entonces xi tqanin Jesús juntl maj kye: «¿Alqiʼj in che jyone?». Xi kytzaqʼweʼn te: «In qo jyone tiʼj Jesús te Nazaret». 8 Xi ttzaqʼweʼn Jesús kye: «Ma txi nqʼamaʼne kyeye qa aqine. Qa in che jyone wiʼje, kyqʼonxe ambʼil kye xinaq* lu tuʼn kyikʼ bʼet». 9 Tqʼama Jesús jlu tuʼn tjapun twi yol otoq tqʼama: «Mintiʼ ma tzʼel tzpet jun kyxol qeju ma tzaj tqʼoʼna weye».

10 Entonces jatz tiʼn Simón Pedro jun espada qʼiʼntoq tuʼn, ok tzoqpaj tiʼj tmajen nejenel kye pal ex el ttxʼemin tẍkyin derecho. Aju majen lu Malco tbʼi. 11 Pero xi tqʼamaʼn Jesús te Pedro: «Qʼonkuxa espada toj tjayil. Porke il tiʼj tuʼn tel nkʼane tiʼj copa ma tzaj tqʼoʼn Nmane weye».

12 Entonces tzaj tzyuʼn Jesús kyuʼn soldad, tuʼn capitán kye soldad ex kyuʼn guardia kye judiy ex ok kykʼalon tqʼabʼ. 13 Tnejel xi qʼiʼn twitz Anás aju tjiʼ Caifás, porke atoq nejenel kye pal toj abʼqʼi aju. 14 Ex a Caifás xi qʼamante kye judiy qa mas bʼaʼn tuʼn tkyim jun xjal te kyxel kykyaqil.

15 Xi lepeʼ Simón Pedro ex juntl discípulo tiʼj Jesús. Ex okx discípulo lu tukʼil Jesús twi tpeʼn nejenel kye pal, porke ojtzqintoq twitz tuʼn nejenel kye pal. 16 Atzunte Pedro mintiʼ okx ex atz kyaj ten ttzi pwert.* Tuʼntzunju, etz discípulo ojtzqintoq twitz tuʼn nejenel kye pal yolil tukʼil txin in xqʼuqin ttzi pwert tuʼn tokx Pedro. 17 Ex xi tqanin criada te Pedro, aju txin in xqʼuqin ttzi pwert: «¿Nyapetzun aya jun kyxol qeju tdiscípulo xjal lu?». Xi ttzaqʼweʼn Pedro te: «Nya, nya aqine». 18 Ex otoq kubʼ kybʼinchaʼn majen ex qe guardia jun qʼaqʼ tukʼil carbón tuʼn tbʼaj kymeqʼtzan kyibʼ porke attoq nim cheʼw. Waʼl qetoq tiʼj qʼaqʼ ex attoq Pedro kyukʼil.

19 Xi tqanin pal nim toklen* te Jesús kyiʼj tdiscípulo ex kyiʼj t-xnaqʼtzbʼil. 20 Xi ttzaqʼweʼn Jesús te: «Ma chin yoline kywitz kykyaqil xjal. Kukx ma txi nqʼoʼne xnaqʼtzbʼil kyoj ja te kʼulbʼil* ex toj templo jatumel in nok kychmon kyibʼ kykyaqil judiy, ex mintiʼ jun tiʼ ma txi nqʼamaʼne toj ewaj. 21 ¿Tiquʼn in tzaj tqanina weye? Qaninxa kye qeju ma tzʼok kybʼiʼn nyole. Ojtzqiʼn kyuʼn tiʼ ma txi nqʼamaʼne». 22 Tej tbʼaj yolin Jesús, ok tzʼajin toj ttziʼ tuʼn jun guardia waʼl ttxlaj ex xi tqʼamaʼn te: «¿Ma iktzun in xi ttzaqʼweʼna te pal nim toklen?». 23 Xi ttzaqʼweʼn Jesús te: «Qa nya bʼaʼn nyole ma txi nqʼamaʼne, qʼamantza weye. Qatzun bʼaʼn, ¿tiquʼn in chin ok tbʼyoʼna?». 24 Yajxitl ok kʼaloʼn tqʼabʼ Jesús ex xi samaʼn tuʼn Anás tukʼil Caifás aju nejenel kye pal.

25 Atzunte Simón Pedro kukx waʼltoq tiʼj qʼaqʼ in tmeqʼtzan tibʼ. Xitzun kyqanin xjal te: «¿Nyapetzun ax ikx teya jun kyxol qeju tdiscípulo?». Pero kubʼ tewin Pedro Jesús ex tqʼama: «Nya, nya aqine». 26 Yajxitl xi tqʼamaʼn jun kyxol qeju tmajen nejenel kye pal te Pedro, jun tfamiliar xinaq el ttxʼemin Pedro tẍkyin: «¿Nyapetzun aya jun kyxol qeju ma tzʼok nkeʼyine toj jardín junx tukʼil?». 27 Pero kubʼ tewin Pedro juntl maj Jesús ex de repente jaw oqʼ jun tman ekʼ.*

28 Te prim, etz kyiʼn Jesús toj tja Caifás ex xi kyiʼn toj tja gobernador. Pero mintiʼ e okx judiy toj tja gobernador tuʼn miʼn tbʼaj kytzʼilsaʼn kyibʼ ex tuʼntzun kywan tiʼj Pascua. 29 Tuʼntzunju etz Pilato jatumel ateʼ ex xi tqanin kye: «¿Alkye til xjal lu toj kywitze?». 30 Xi kytzaqʼweʼn te: «Noqwit mintiʼ in bʼinchan xjal lu il, mintiʼwtlo ma tzaj qiʼne tukʼila». 31 Xi ttzaqʼweʼn Pilato kye: «Kinxe ex kyqʼonkuye tsentens ik tzeʼn in tzaj tqʼamaʼn kyeye kyley». Xi kytzaqʼweʼn judiy te: «Nya qʼoʼn ambʼil qeye tuʼn tkubʼ qbʼiyoʼne jun xjal». 32 Bʼaj jlu tuʼn kyjapun kywi yol tzaj tqʼamaʼn Jesús tzeʼn tuʼn tkyim.

33 Okx Pilato juntl maj toj palacio, tzaj ttxkoʼn Jesús ex xi tqanin te: «¿Ma aya rey kye judiy?». 34 Xi ttzaqʼweʼn Jesús te: «¿Aya ma kubʼ ximante tuʼn ttzaj tqanina xjel lu weye moqa juntl ma txi qʼamante teya?». 35 Xi ttzaqʼweʼn Pilato te: «¿Ma judiy qine toj twitza? Ma tzaj qʼiʼna nwitze kyuʼn t-xjalila ex kyuʼn pal nim kyoklen. ¿Tiʼ ma tbʼinchaya?». 36 Xi ttzaqʼweʼn Jesús te: «Nya te twitz txʼotxʼ weye Ngobierno. Noqwit te twitz txʼotxʼ weye Ngobierno, mawtlo che qʼojin wukʼile tuʼn miʼn nxi qʼoʼne toj kyqʼabʼ judiy. Pero nya te tzalu weye Ngobierno». 37 Xi tqanin Pilato te: «¿Jun reytzuna?». Xi ttzaqʼweʼn Jesús te: «Ikju, axa ma tzaj qʼamante qa rey qine. Porke ma chin ul itzʼje ex ma chin ule twitz txʼotxʼ tuʼn nyoline tiʼj axix tok. Ex kykyaqil qeju in xi kybʼiʼn axix tok in xi kybʼiʼn nyole». 38 Xi tqanin Pilato te: «¿Tiʼtzun axix tok?».

Tej tqʼama Pilato jlu, etz juntl maj kyukʼil judiy ex xi tqʼamaʼn kye: «Mintiʼ jun til xjal lu ma kanet wuʼne. 39 Ax ikx naqʼli qeye tuʼn tex ntzaqpiʼne jun pres toj Pascua. ¿Kyajbʼile tuʼn tex ntzaqpiʼne rey kye judiy?». 40 Pero e jaw schʼin ex kyqʼama: «¡Miʼn tzʼetz ttzaqpiʼna, tzaqpiʼmetza Barrabás!». Ex jun eleqʼ Barrabás.