Qe tbʼanel noticia kubʼ ttzʼibʼin Lucas
16 Yajxitl xi tqʼamaʼn Jesús jlu kye tdiscípulo: «Jun maj, xi qʼamaʼn te jun xinaq* qʼinun qa otoq bʼaj malgastarin tqʼinumabʼil tuʼn encargado tiʼj tja. 2 Tuʼntzunju tzaj ttxkoʼn xinaq encargado tiʼj tja ex xi tqʼamaʼn te: ‹¿Tiʼtzun tzʼelpun aju in nok nbʼiʼne tiʼja? Txiʼya ex tzʼibʼinkuya tzeʼn ma tzʼajbʼen nqʼinumabʼile tuʼna, porke ya mlay tzʼoka te encargado tiʼj njaye›. 3 Entonces kubʼ t-ximen encargado toj tanmi: ‹¿Tiʼ kbʼantel wuʼne jaʼlo porke kʼelel tiʼn npatróne waqʼune te encargado tiʼj tja? Ya mintiʼ wipune tuʼn waqʼunane tiʼj txʼotxʼ ex in tzaj nchʼixwiye tuʼn t-xi nqanine nkotze kye xjal. 4 ¡Aaa!, ya ma tzul toj nwiʼye tiʼ kxel nbʼinchaʼne aj tel qʼiʼn waqʼune te encargado ex tuʼn wokx qʼiʼne kyuʼn xjal toj kyja›. 5 Entonces tzaj ttxkoʼn teyele junjun xjal at tkʼas tukʼil tpatrón. Xi tqanin te tnejel: ‹¿Tiʼ xi tmajen npatróne teya?›. 6 Xi ttzaqʼweʼn xjal te: ‹Tzaj tmajen 2 mil doscientos litr* aseyt te olivo weye›. Entonces xi ttzaqʼweʼn encargado te: ‹Lu uʼj lu jatumel tzʼibʼin tkʼasa ex oʼkx tzʼibʼinkuxa mil cien›.* 7 Yajxitl xi tqanin te juntl xjal: ‹Yajtzun teya, ¿tiʼ xi tmajen npatróne teya?›. Atzunte xjal xi ttzaqʼweʼn te: ‹Tzaj tmajen 170 quintal* triw weye›. Pero xi ttzaqʼweʼn encargado te: ‹Lu uʼj lu jatumel tzʼibʼin tkʼasa ex tzʼibʼinkuya 136›.* 8 Jaw labʼin patrón tiʼj encargado tiʼj tja, porke ten tnabʼil maske nya bʼaʼn. Porke qe xjal in che anqʼin toj ambʼil jaʼlo* mas nim kynabʼil kywitz qeju in che ajbʼen te Dios.*
9 Ax ikx kxel nqʼamaʼne kyeye: bʼaʼn tuʼn tajbʼen qʼinumabʼil te twitz txʼotxʼ* kyuʼne tuʼn tkanet kyamiwe. Porke aj tkubʼaj, jaku che okx qʼiʼne kyuʼn toj najbʼil te jumajx. 10 Porke alkye in japun tuʼn toj chʼin, ax ikx in japun tuʼn toj nim. Ex alkye mintiʼ in japun tuʼn toj chʼin, ax ikx mlay japun tuʼn toj nim. 11 Qa nya toj tumel ma tzʼajbʼen qʼinumabʼil te twitz txʼotxʼ kyuʼne, ¿tzeʼn tzul qʼoʼn axix tok qʼinumabʼil kyeye? 12 Ex qa nya toj tumel ma tzʼajbʼen aju ma tzaj oqxenin kyeye tuʼn juntl, ¿tzulpe qʼoʼn kyeye aju at kyoklene tiʼj? 13 Mlay bʼant tuʼn tajbʼen jun majen te kabʼe patrón porke kʼokel tkʼujlaʼn jun, atzun juntl kʼelel tikʼun. Ktel tzʼaqli twitz jun, atzun juntl mlay tzʼok tqʼoʼn toklen. Ax ikx kyeye, mlay bʼant tuʼn kyoke te tmajen Dios ex tuʼn kyjyone tiʼj qʼinumabʼil».
14 Ax ikx in che bʼintoq fariseo tiʼjju tqʼama Jesús ex e ok ten xmayil tiʼj porke kʼujlaʼntoq pwaq kyuʼn. 15 Tuʼntzunju xi tqʼamaʼn Jesús kye: «In kubʼ kyyekʼine kywitz xjal qa bʼaʼn xjal qeye, pero ojtzqiʼn tuʼn Dios tiʼ tkuʼx toj kyanmiye. Porke alkyeju nim toklen toj kywitz xjal, tzʼil toj twitz Dios.
16 Tej naʼmxtoq tul Juan, tzaj tqʼamaʼn Ley ex aju kubʼ kytzʼibʼin Profeta tiʼ tuʼn tbʼaj. Pero tej tul Juan, in xi qʼamet tbʼanel noticia tiʼj Tgobierno Dios ex in nok tilil kyuʼn kykyaqil xjal tuʼn kyokx toj. 17 Mas jurat jaku kubʼ naj kyaʼj ex txʼotxʼ twitzju tuʼn tkubʼ naj jun tal letra tzʼibʼin toj Ley aju il tiʼj tuʼn tjapun twi.
18 Alkye ma tzʼel tdivorciarin tibʼ tiʼj t-xuʼjil ex in kubʼ mojeʼ tukʼil juntl xuʼj,* in kubʼ tbʼinchaʼn aj pajil. Ex alkye in kubʼ mojeʼ tukʼil jun xuʼj otoq tzʼel tdivorciarin tibʼ tiʼj tchmil, ax ikx in kubʼ tbʼinchaʼn aj pajil».
19 Ex tqʼamatl Jesús jlu: «Jun maj, ten jun xinaq qʼinun in noktoq tqʼoʼn tbʼanel t-xbʼalun morado* ex bʼinchaʼn tuʼn lino, ex tzalaj tiʼj tqʼinumabʼil tkyaqil qʼij. 20 Pero ttzi tpwert xjal qʼinun, in kyajtoq qʼoʼn jun xjal prow nojni t-xmilal tuʼn úlcera aju Lázaro tbʼi. 21 Tajbʼiltoq xjal lu tuʼn t-xi twaʼn tkyaqilju in nel tzʼaq tibʼaj tmes xjal qʼinun tuʼntzun tel weʼyaj tiʼj. Hasta e ul txʼyan tukʼil ex el kyleqʼun tiʼj t-úlcera. 22 Tej tikʼ ambʼil, kyim xjal prow ex xi qʼiʼn kyuʼn anjel ttxlaj Abrahán.
Ax ikx kyim xjal qʼinun ex kux maquʼn. 23 Ex tej in sufririn nim toj Muqbʼil,* jaw tiʼn twiʼ ex ok tkeʼyin Abrahán najchaq junx tukʼil Lázaro ttxlaj. 24 Tuʼntzunju tzaj ttxkoʼn ex xi tqʼamaʼn te: ‹Tat Abrahán, qʼaqʼantz tkʼuʼja wiʼje ex qʼamanxa te Lázaro tuʼn tkux tqʼoʼn twi tqʼabʼ toj aʼ ex tuʼn tkubʼ tqʼoʼn tibʼaj waqʼe tuʼn tchewix, porke nim in chin sufririne toj qʼaqʼ lu›. 25 Pero xi ttzaqʼweʼn Abrahán te: ‹Nkʼwal, naʼntza qa tej naʼmxtoq tkyima ten jun tbʼanel tanqʼibʼila, atzunte Lázaro sufririn nim. Jaʼlo in qʼuqbʼanjtz tkʼuʼj Lázaro tzalu, atzun teya in sufririna. 26 Nya oʼkxju, ax ikx tkubʼ jun xaq nim t-xeʼ qxol tuʼntzun miʼn kyikʼx xjal ateʼ tzalu kyukʼile ex tuʼn miʼn kyikʼtz xjal ateʼ kyukʼile tzalu›. 27 Entonces xi tqʼamaʼn xjal qʼinun te Abrahán: ‹Tat, qa ikju, entonces qʼamanxa te Lázaro tuʼn t-xiʼ tja nmane 28 ex tuʼn t-xi tqʼamaʼn kye jweʼ wermane aju ma bʼaj tuʼntzun miʼn kyul sufriril tzalu›. 29 Xi ttzaqʼweʼn Abrahán te: ‹Nya il tiʼj, kybʼinx aju kyaj tqʼamaʼn Moisés ex qe Profeta›. 30 Pero xi tqʼamaʼn xinaq te: ‹Tat Abrahán, mlay che bʼin. Oʼkx jaku tzʼajtz tiʼj kyanmi qa ma jaw anqʼin jun xjal kyxol kyimni ex qa ma yolin kyukʼil›. 31 Xi ttzaqʼweʼn Abrahán te: ‹Qa mintiʼ ma txi kybʼiʼn aju kyaj tqʼamaʼn Moisés ex qe Profeta, mlay che bʼin maske ma jaw anqʼin jun xjal kyxol kyimni›».