Qe tbʼanel noticia kubʼ ttzʼibʼin Juan
13 Ojtzqiʼntoq tuʼn Jesús qa otoq pon or tuʼn tikʼ tzalu twitz txʼotxʼ ex tuʼn tmeltzʼaj tukʼil Tman tej naʼmxtoq tkubʼ kyikʼsaʼn Pascua. Porke e ok tkʼujlaʼn Jesús tdiscípulo e ten tukʼil tzalu twitz txʼotxʼ ex kukx e ok tkʼujlaʼn tzmaxi tej tkyim. 2 Tzmatoq in che waʼn te qale ex otoq kuʼx tqʼoʼn Tajaw il toj tanmi Judas Iscariote aju tkʼwal Simón tuʼn t-xi tqʼoʼn Jesús toj kyqʼabʼ xjal. 3 Ojtzqiʼntoq tuʼn Jesús qa otoq tzaj tqʼoʼn Mambʼaj tkyaqil toj tqʼabʼ ex qa atz tzaj tukʼil Dios ex qa kmeltzʼajel tukʼil Dios. 4 Tuʼntzunju, jaw weʼ Jesús tiʼj mes, el tiʼn tmant, tzaj tiʼn jun toalla ex ok tkʼaloʼn tiʼj tkʼuʼj. 5 Yajxitl kux tqʼoʼn aʼ toj jun palangana ex el ttxʼajoʼn kyqan tdiscípulo. Ax ikx el tsuʼn kyqan tukʼil toalla ok tkʼaloʼn tiʼj tkʼuʼj. 6 Tej tpon tukʼil Simón Pedro, xi tqanin Pedro te: «Tat, ¿ma aya kʼelel txʼajonte tiʼj nqane?». 7 Xi ttzaqʼweʼn Jesús te: «Mintiʼ in nel tnikʼa tiʼjju in bʼant wuʼne jaʼlo, pero kʼelel tnikʼa tiʼj mas yajxitl». 8 Xi tqʼamaʼn Pedro te: «Mlayx txi nqʼoʼne ambʼil teya tuʼn tel ttxʼajoʼna tiʼj nqane». Atzunte Jesús xi ttzaqʼweʼn te: «Qa mintiʼ ma tzʼel ntxʼajoʼne tiʼj tqana, mintiʼ toklena wukʼile». 9 Xi tqʼamaʼn Simón Pedro te Jesús: «Qa ikju Tat, nya oʼkx txʼajoʼmila tiʼj nqane, ax ikx txʼajoʼmila nqʼabʼe ex nwiʼye». 10 Xi ttzaqʼweʼn Jesús te: «Alkye ma bañarin, mintiʼ tzʼil tiʼj ex oʼkx qe tqan tuʼn tel txʼajet. Atzun kyeye mintiʼ tzʼil kyiʼje, pero nya kykyaqile». 11 Porke ojtzqiʼntoq tuʼn Jesús alkye kxel qʼonte toj kyqʼabʼ xjal. Tuʼntzunju tqʼama: «Nya kykyaqile mintiʼ tzʼil kyiʼje».
12 Tej tbʼaj ttxʼajoʼn Jesús kyqan, ok tqʼoʼn tmant, ok qeʼ* juntl maj tiʼj mes ex xi tqʼamaʼn kye: «¿Ma tzʼel kynikʼe tiʼjju ma bʼant wuʼne? 13 In tzaj kyqʼamaʼne Xnaqʼtzal ex Tat weye ex toj tumel porke aqine. 14 Qa ma tzʼel ntxʼajoʼne kyqane ex aqine Xnaqʼtzal ex Tat kyeye, ax ikx kyeye il tiʼj tuʼn tel kytxʼajoʼne kyqane kyxolxe. 15 Ma kubʼ nqʼoʼne ejemplo kywitze tuʼntzun t-xi kybʼinchaʼne aju ma bʼant wuʼne kyiʼje. 16 Ax tok kxel nqʼamaʼne kyeye, nya mas nim toklen majen twitz tpatrón ex nya mas nim toklen jun xjal twitzju tzaj samante. 17 Jaʼlo que ya ojtzqiʼn tkyaqil jlu kyuʼne, at tzalajbʼil kyeye qa ma txi kybʼinchaʼne. 18 Nya kyiʼje kykyaqile in chin yoline, porke ojtzqiʼn wuʼne alkyeqe ma che jaw nskʼoʼne. Pero ma bʼaj jlu tuʼn tjapun kywi yol lu kubʼ tzʼibʼin toj tyol Dios: ‹Aju in waʼn wukʼile tiʼj pan, ma tzʼok te aj qʼoj wiʼje›. 19 In xi nqʼamaʼne kyeye jaʼlo tiʼ kbʼajel naʼmxtoq tbʼaj tuʼntzun t-xi kyokslaʼne alkye qine aj tbʼaj. 20 Ax tok kxel nqʼamaʼne kyeye, alkye ma tzʼokx tiʼn jun xjal ma txi nsamaʼne, ax ikx in chin okx qʼiʼne tuʼn. Ex alkye ma chin okx qʼiʼne tuʼn, ax ikx in nokx tiʼn aju tzaj samante weye».
21 Tej tbʼaj tqʼamaʼn Jesús jlu, tzaj nim tbʼis ex tqʼama: «Ax tok kxel nqʼamaʼne kyeye, jun kyxole kxel qʼonte weye toj kyqʼabʼ xjal». 22 Atzun kye tdiscípulo Jesús bʼaj kykeʼyin toj kywitz ex mintiʼ el kynikʼ tiʼj alqiʼj in yolin. 23 Jun kyxol tdiscípulo Jesús, aju kʼujlaʼnxix tuʼn, qʼuqlitoq ttxlaj tiʼj mes. 24 Entonces xi tbʼinchaʼn Simón Pedro jun señ tukʼil twiʼ te discípulo lu ex xi tqanin te: «¿Alqiʼj in yolin?». 25 Xitzun kuẍe discípulo lu ttzi tkʼuʼj* Jesús ex xi tqanin te: «Tat, ¿alqiʼj in yolina?». 26 Atzunte Jesús tqʼama: «Kbʼelex wakʼsaʼne* jun piẍ pan ex alkye ma txi nqʼoʼne te, atzunju». Ex tej tkux takʼsaʼn pan, xi tqʼoʼn te Judas aju tkʼwal Simón Iscariote. 27 Tej t-xi ttzyuʼn Judas piẍ pan, okx Satanás toj tanmi. Entonces xi tqʼamaʼn Jesús te: «Aju kbʼantel tuʼna, bʼinchanxa jaʼloxix». 28 Pero nijun kyxol qeju ateʼ tiʼj mes* el tnikʼ tiʼj tiquʼn xi tqʼamaʼn Jesús jlu te. 29 Tuʼntzunju, ateʼ junjun kubʼ kyximen qa xi tqʼamaʼn Jesús te Judas, «Txiʼya laqʼol tkyaqilju at tajbʼen qe toj fiesta» moqa tuʼn t-xi tqʼoʼn chʼin pwaq kye prow, porke xi qʼoʼn tkubʼil pwaq toj tkwent. 30 Entonces ikʼ bʼet Judas tej t-xi ttzyuʼn piẍ pan. Ex ya otoq tzaj yupj twitz kyaʼj.
31 Tej tikʼ bʼet Judas, xi tqʼamaʼn Jesús jlu kye: «Jaʼlo in jaw nimsaʼn Tkʼwal Xinaq* ex kjawil nimsaʼn Dios tuʼn. 32 Kjawil nimsaʼn tuʼn Dios ex lwey kjawil tnimsaʼn. 33 Aqeye tal nkʼwal, noq chʼintl ambʼil chin tele kyukʼile. Che jyole wiʼje, pero jaʼlo kxel nqʼamaʼne kyeye aju xi nqʼamaʼne kye judiy: ‹Mlay bʼant tuʼn kyxiʼye jatumel chin xeʼle›. 34 Kxel nqʼoʼne jun akʼaj mandamyent kyeye: kykʼujlam kyibʼe kyxolxe. Ik tzeʼn ma che ok nkʼujlaʼne, ax ikx kyeye kykʼujlam kyibʼe kyxolxe. 35 Qa ma tzʼok kykʼujlan kyibʼe kyxolxe, kʼelel kynikʼ kykyaqil tiʼj qa nxnaqʼtzbʼen qeye».
36 Xi tqanin Simón Pedro te Jesús: «Tat, ¿jatumel ma txiʼya?». Xi ttzaqʼweʼn Jesús te: «Mlay bʼant tuʼn t-xi lepeʼya wiʼje jaʼlo jatumel chin xeʼle, pero kxel lepeʼya wiʼje yajxitl». 37 Xi tqʼamaʼn Pedro te: «Tat, ¿tiquʼn mlay bʼant tuʼn nxi lepeʼye tiʼja jaʼlo? Jaku txi nqʼoʼne nchwinqlale tiʼja». 38 Xi ttzaqʼweʼn Jesús te: «¿In tzajpe tqʼamaʼna qa kxel tqʼoʼna tchwinqlala wiʼje? Ax tok kxel nqʼamaʼne teya, naʼmxtoq tjaw oqʼ jun tman ekʼ* jaʼlo, kbʼel tewina oxe maj qa ojtzqiʼn qine tuʼna».