Qe tbʼanel noticia kubʼ ttzʼibʼin Mateo

19 Tej tbʼaj yolin Jesús, etz toj Galilea ex pon toj frontera te Judea toj juntl plaj río Jordán. 2 E ok lepeʼ nim xjal tiʼj ex toj lugar lu e kubʼ tqʼanin qeju at jun yabʼil kyiʼj.

3 E pontzun laqʼeʼ junjun fariseo tukʼil Jesús tuʼn tok kyqʼoʼn toj prueba ex xi kyqanin te: «¿In tzajpe tqʼoʼn ley ambʼil te jun xinaq* tuʼn tel tdivorciarin tibʼ tiʼj t-xuʼjil noq tuʼn alkyexku tiʼ?». 4 Xi ttzaqʼweʼn Jesús kye: «¿Naʼmxpe tjaw kyleerine qa tej tkubʼ tbʼinchaʼn Dios qe xjal tnejel, xinaq ex xuʼj* e kubʼ tbʼinchaʼn? 5 Ex tqʼamatl Dios jlu: ‹Tuʼntzunju kjel tqʼoʼn xinaq tman ex ttxuʼ, kbʼel mojeʼ tukʼil t-xuʼjil ex che okel te junx›. 6 Tuʼntzunju ya nya kabʼe kybʼet, sino in che ok te junx. Ex aju o tzʼok tmojbʼan* Dios, mintiʼ tuʼn tkubʼ tpaʼn ni jun xjal». 7 Xi kyqʼamaʼn fariseo te: «Qa ikju, ¿tiquʼn xi tqʼamaʼn Moisés tuʼn t-xi tqʼoʼn xinaq jun uʼj te divorcio te t-xuʼjil ex tuʼn tex tlajoʼn?». 8 Xi ttzaqʼweʼn Jesús kye: «Xi tqʼoʼn Moisés permis kyeye tuʼn tel kydivorciarin kyibʼe tiʼj kyxuʼjile porke kyuw kyanmiye. Pero tnejel nya iktoq jlu. 9 Tuʼntzunju kxel nqʼamaʼne kyeye, alkye jun xinaq in nel tdivorciarin tibʼ tiʼj t-xuʼjil ex in kubʼ mojeʼ tukʼil juntl xuʼj, in yaẍin. Oʼkx jaku tzʼel tdivorciarin tibʼ tiʼj t-xuʼjil qa ma kubʼ tbʼinchaʼn xuʼj aj pajil».*

10 Xi kyqʼamaʼn tdiscípulo Jesús te: «Qa ik tanqʼibʼil jun xinaq tukʼil t-xuʼjil, maslo bʼaʼn tuʼn miʼn tkubʼ mojeʼ». 11 Xi ttzaqʼweʼn Jesús kye: «Nya kykyaqil xjal jaku* t-xi kynimen qe yol lu, sino oʼkx qeju ma tzaj qʼoʼn oyaj kye. 12 Ateʼ junjun xjal mlay bʼant tuʼn kykubʼ mojeʼ tuʼnju nya cabal kyxmilal tej kyul itzʼj ex junjuntl tuʼnju el qʼiʼn jun part kyxmilal.* Atzun junjuntl in kubʼ kyximen tuʼn miʼn kykubʼ mojeʼ porke kyajbʼil tuʼn kyonin tiʼj Gobierno in tzaj toj kyaʼj. Alkye jaku* bʼant jlu tuʼn, bʼincham».

13 E pontzun qʼiʼn junjun tal kʼwal tukʼil Jesús tuʼn tkubʼ tqʼoʼn tqʼabʼ kyibʼaj* ex tuʼn tnaʼn Dios kyiʼj. Pero xi kykawin tdiscípulo Jesús qeju pon kyiʼn qe tal kʼwal. 14 Atzunte Jesús xi tqʼamaʼn kye: «Kyqʼonkje qe tal kʼwal ex kyqʼonxe ambʼil kye tuʼn kytzaj wukʼile. Porke aju Gobierno in tzaj toj kyaʼj kxel qʼoʼn kye xjal in che ok ik tzeʼn kye». 15 Yajxitl kubʼ tqʼoʼn Jesús tqʼabʼ kyibʼaj ex ikʼ bʼet toj lugar aju.

16 Pontzun laqʼeʼ jun xinaq tukʼil Jesús ex xi tqanin te: «Xnaqʼtzal, ¿alkyeqe tbʼanel tiʼchaq il tiʼj tuʼn tbʼant wuʼne tuʼntzun ttzaj nkʼamoʼne chwinqlal te jumajx?». 17 Xi ttzaqʼweʼn Jesús te: «¿Tiquʼn in tzaj tqanina weye alkyeju bʼaʼn? Mi al jun xjal bʼaʼn, sino oʼkx te Dios bʼaʼn. Pero qa taja tuʼn ttzaj tkʼamoʼna chwinqlal te jumajx, kukx nimanxa qe mandamyent». 18 Xi tqanin xinaq te: «¿Alkyeqe?». Atzunte Jesús xi ttzaqʼweʼn te: «Miʼn kubʼ tbʼyoʼna jun xjal, miʼn kubʼ tbʼinchaʼna aj pajil, miʼn tzʼelqʼana, miʼn t-xi tqʼamaʼna nya ax tok yol tiʼj juntl, 19 qʼonka toklen tmana ex ttxuʼya, ex kʼujlama qe txqantl ik tzeʼn in nok tkʼujlan tibʼa». 20 Xi ttzaqʼweʼn kuʼxun te Jesús: «Kukx o t-xi nnimane qe mandamyent jlu, ¿tiʼtzun mas il tiʼj tuʼn tbʼant wuʼne?». 21 Atzunte Jesús xi tqʼamaʼn te: «Qa taja tuʼn toka te tzʼaqli,* kʼayinxa tkyaqilju at teya ex qʼonxa pwaq kye xjal prow. Qa ma bʼant jlu tuʼna, kchmetel tqʼinumabʼila toj kyaʼj. Yajxitl tzaja wukʼile ex lepeka wiʼje». 22 Tej tok tbʼiʼn kuʼxun jlu, tzaj nim tbʼis porke attoq nim tqʼinumabʼil. 23 Xitzun tqʼamaʼn Jesús kye tdiscípulo: «Ax tok kxel nqʼamaʼne kyeye, kwest kʼelel te jun xjal qʼinun tuʼn tokx toj Gobierno in tzaj toj kyaʼj. 24 Juntl maj kxel nqʼamaʼne kyeye, mas fácil tuʼn tokx jun kamey toj twitz jun bʼaq twitzju tuʼn tokx jun qʼinun toj Tgobierno Dios».

25 Tej tok kybʼiʼn tdiscípulo Jesús jlu, e jaw sekʼpaj ex kyqʼama: «Qa ikju, ¿alkye jun xjal jaku klet?». 26 Xi tkeʼyin Jesús toj kywitz ex xi tqʼamaʼn kye: «Toj kywitz xjal mlay bʼant jlu, pero ate Dios tkyaqil jaku bʼant tuʼn».

27 Xitzun ttzaqʼweʼn Pedro jlu te: «Tat, o kyaj qqʼoʼne tkyaqilju at qeye ex o qo ok lepeʼye tiʼja. ¿Tiʼtzun ktzajel qʼoʼn qeye?». 28 Xi ttzaqʼweʼn Jesús kye: «Ax tok kxel nqʼamaʼne kyeye, kpol ambʼil tuʼn tok tkyaqil te akʼaj juntl maj ex tuʼn tkubʼ qeʼ Tkʼwal Xinaq toj tqʼuqbʼil in qoptzʼaj. Aj tpon ambʼil lu, ax ikx kyeye che kbʼel qeʼye toj 12 qʼuqbʼil, che kawile ex che juzgarile kyibʼaj 12 tnam te Israel tuʼnju ma che ok lepeʼye wiʼje. 29 Ex alkye jun xjal ma kyaj tqʼoʼn tja, qe terman, qe tanabʼ, aju tman ex ttxuʼ, qe tkʼwal ex ttxʼotxʼ noq tuʼn tok te nxnaqʼtzbʼene, ktzajel qʼoʼn 100 maj t-xel te ex ktzajel qʼoʼn tchwinqlal te jumajx.

30 Ex nim qeju in che ok te tnejel che okel te último ex nim qeju in che ok te último che okel te tnejel.