Qe tbʼanel noticia kubʼ ttzʼibʼin Juan

10 «Ax tok kxel nqʼamaʼne kyeye, alkye mintiʼ ma tzʼokx ttzi kyja rit* ex in nokx toj juntl plaj, jun eleqʼ. 2 Pero alkye in nokx ttzi kyja rit atzun pastoril kye. 3 Ex in nokx tjaqoʼn xjal in xqʼuqin tiʼj kyja rit pwert twitz pastor ex in xi kybʼiʼn rit tqʼajqʼajel twiʼ. In tzaj ttxkoʼn pastor teyele junjun trit tukʼil tbʼi ex in che etz tiʼn. 4 Ex aj tetz tiʼn kykyaqil trit, in kubʼ nej kywitz. In che ok lepeʼ rit tiʼj porke ojtzqiʼn tqʼajqʼajel twiʼ kyuʼn. 5 Mlayx che ok lepeʼ rit tiʼj juntl xjal nya ojtzqiʼn kyuʼn, sino che elel oq tiʼj porke nya ojtzqiʼn tqʼajqʼajel twiʼ kyuʼn». 6 Xi tqʼamaʼn Jesús ejemplo lu kye, pero mintiʼ el kynikʼ tiʼjju tqʼama.

7 Xi tqʼamaʼn Jesús juntl maj kye: «Ax tok kxel nqʼamaʼne kyeye, aqine pwert jatumel in che okx rit. 8 Kykyaqil qeju in xi kyqʼamaʼn qa aʼye pastor axix tok, eleqʼ qe ex mintiʼ in xi kybʼiʼn rit kyyol. 9 Aqine pwert. Alkye ma tzul wukʼile tuʼn tokx toj kyja rit, kkletel. Ok kʼokex ex kʼeletz, ex kkanetel twa. 10 Atzunte eleqʼ oʼkx in nul tuʼn tex tiʼn qe rit, tuʼn kykubʼ tbʼyoʼn ex tuʼn kynaj tuʼn. Atzun weye ma chin ule tuʼn tten kychwinqlale mlayx bʼaj.* 11 Aqine tbʼanel pastor ex aju tbʼanel pastor in xi tqʼoʼn tchwinqlal tuʼn kyklet rit. 12 Atzunte majen* como nya a pastor ex nya a tajaw rit, in che kyaj tqʼoʼn qe rit aj tok tkeʼyin jun xoʼj ex in nel oq. Tuʼn jlu in che tzyet rit tuʼn xoʼj ex in che el oq. 13 In nel oq majen tuʼnju oʼkx in naqʼunan tiʼj twi tkʼuʼj ex nya tuʼn kyklet rit tuʼn. 14 Aqine tbʼanel pastor. Ojtzqiʼn qe nrite wuʼne ex ojtzqiʼn qine kyuʼn nrite, 15 ik tzeʼn weye ojtzqiʼn qiʼne tuʼn Mambʼaj, ax ikx weye ojtzqiʼn Mambʼaj wuʼne, ex in xi nqʼoʼne nchwinqlale tuʼn kyklet rit.

16 Ex ateʼ junjuntl nrite mintiʼ ateʼ toj kyja rit tzalu. Ax ikx kye il tiʼj tuʼn kytzaj wiʼne ex kxel kybʼiʼn tqʼajqʼajel nwiʼye. Che tel junx kykyaqil ex oʼkx jun pastoril kye. 17 Kʼujlaʼn qine tuʼn Mambʼaj porke in xi nqʼoʼne nchwinqlale tuʼn nkyime ex chin jawil anqʼine juntl maj. 18 Ni jun xjal jaku tzʼel qʼinte nchwinqlale, sino aqine in chinx qʼonte tuʼn nkyime. At woklene tuʼn t-xi nqʼoʼne nchwinqlale ex at woklene tuʼn ttzaj qʼoʼn juntl maj weye. Atzun mandamyent lu ma tzaj tqʼoʼn Nmane weye».

19 Ex jun xitl kyximbʼetz judiy ten juntl maj tiʼj Jesús kyuʼn tyol lu. 20 Nim qe kyxol kyqʼama: «Ma tzʼokx jun demonio toj tanmi ex ma tzʼel tzpet tnabʼil. ¿Tiquʼn in che bʼine tiʼj?». 21 Atzun junjuntl kyqʼama: «Mlay bʼant tuʼn ttzaj tqʼamaʼn jun xjal tokx jun demonio toj tanmi qe yol lu. ¿Jakupe jaqet kywitz xjal moẍ tuʼn jun demonio?».

22 Toj ambʼil aju, kubʼ kyikʼsaʼn xjal jun fiesta tuʼn ttzaj kynaʼn tej tok inauracion tiʼj templo. Bʼaj jlu toj jbʼalil 23 ex in bʼettoq Jesús toj templo twitz jun Corredor* Salomón tbʼi. 24 Entonces ok kytxolin kyibʼ judiy tiʼj Jesús ex xi kyqʼamaʼn te: «¿Tiquʼn mintiʼ in tzaj tqʼamaʼna axix tok qeye? Qʼamantza klar qeye qa aya Cristo moqa nya». 25 Xi ttzaqʼweʼn Jesús kye: «Ma txi nqʼamaʼne kyeye, pero mintiʼ in xi kyokslaʼne. Aju aqʼuntl tzaj tqʼamaʼn Nmane weye tuʼn tkubʼ nbʼinchaʼne, in tzaj tyekʼin alkye qine. 26 Pero mintiʼ in chinx kyokslaʼne, porke mintiʼ ateʼye kyxol nrite. 27 In xi kybʼiʼn nrite tqʼajqʼajel nwiʼye. Ojtzqiʼn qe wuʼne ex in che ok lepeʼ wiʼje. 28 In xi nqʼoʼne kychwinqlal te jumajx, mlay che naj ex ni jun xjal kʼelel qʼinte kye toj nqʼabʼe. 29 Aqeju rit ma che tzaj tqʼoʼn Nmane weye, mas nim kyoklen twitz alkyexku juntl tiʼ. Ex ni jun xjal jaku tzʼel qʼiʼn kye rit toj tqʼabʼ Nmane. 30 Aqine tukʼil Nmane junx qoʼye».*

31 Entonces jaw kyskʼoʼn judiy abʼj juntl maj tuʼn tok kyxoʼn tiʼj Jesús. 32 Atzunte Jesús xi tqʼamaʼn kye: «Tukʼil Nmane in che tzaj nim tbʼanel aqʼuntl o bʼant wuʼne kywitze. Kyxol kykyaqil tbʼanel aqʼuntl lu, ¿alkye kyxol kyajbʼile tuʼn tok kyxoʼne abʼj wiʼje tuʼn?». 33 Xi kytzaqʼweʼn judiy te: «Mlay tzʼok qxoʼne abʼj tiʼja kyuʼn tbʼanel taqʼuna, noq oʼkx tuʼnju in yolina nya bʼaʼn tiʼj Dios. Porke jun xjal teya ex in nok tqʼon tibʼa ik tzeʼn te Dios». 34 Xi tqʼamaʼn Jesús kye: «In tzaj tqʼamaʼn kyleye qa ‹Tzaj tqʼamaʼn Dios jlu kyeye: «dios qeye»›. 35 Ex ojtzqiʼn quʼn qa mlay bʼant tuʼn tkubʼ chʼixpet tyol Dios. Qa ‹dios› qe xjal toj twitz Dios aqeju in tzaj tyekʼin tyol qa at kyil, 36 ¿tiquʼn in tzaj kyqʼamaʼne weye qa ‹in chin yoline nya bʼaʼn tiʼj Dios› aj t-xi nqʼamaʼne qa ‹Tkʼwal Dios qine›? Porke a Mambʼaj ma jaw skʼoʼn weye tuʼn wajbʼene te ex a ma tzaj samante weye twitz txʼotxʼ. 37 Qa mintiʼ in xi nbʼinchaʼne taqʼun Nmane, miʼn chinx kyokslaʼne. 38 Pero qa in xi nbʼinchaʼne, che okslaʼne tiʼj aqʼuntl in bʼant wuʼne maske mintiʼ in xi kyokslaʼne nyole. Iktzun tten kʼokel kyojtzqiʼne ex kukx kʼelel kynikʼe tiʼj qa at Mambʼaj wukʼile ex qa atine tukʼil Mambʼaj». 39 Ex ok tilil juntl maj kyuʼn tuʼn ttzyet Jesús, pero mintiʼ tzyet kyuʼn.

40 Xiʼ Jesús juntl maj jlajxi río Jordán jatumel e bautisarin xjal tuʼn Juan tnejel ex atz kyaj ten toj lugar aju. 41 Nim qe xjal e pon keʼyilte ex kyqʼama: «Mintiʼ jun milagro* bʼant tuʼn Juan, pero axix tok tkyaqilju tqʼama tiʼj xinaq* lu». 42 Ex nim qe xjal ok qeʼ kykʼuʼj tiʼj Jesús toj lugar aju.