Qe tbʼanel noticia kubʼ ttzʼibʼin Mateo

5 Tej tok tkeʼyin Jesús qa nim kybʼet xjal, jax laqʼeʼ tiʼj witz ex tej tkubʼ qeʼ, e pon tdiscípulo tukʼil. 2 Xitzun tzyet tuʼn tyolin Jesús ex xi tqʼoʼn xnaqʼtzbʼil kye. Tqʼama jlu:

3 «At tzalajbʼil kye qeju in nel kynikʼ tiʼj qa at tajbʼen Dios kye, porke at kyoklen tiʼj Gobierno in tzaj toj kyaʼj.

4 At tzalajbʼil kye qeju in tzaj kybʼis porke kxel qʼuqbʼaʼn kykʼuʼj.

5 At tzalajbʼil kye xjal mans porke kxel qʼoʼn txʼotxʼ te ky-erencia.

6 At tzalajbʼil kye qeju at weʼyaj ex kʼaj kyiʼj tuʼn t-xi bʼinchet aju tzʼaqli, porke tzul tqʼoʼn Dios aju kyajbʼil.

7 At tzalajbʼil kye qeju in kubʼ kyyekʼin qʼaqʼbʼil kykʼuʼj kyiʼj txqantl, porke ktzajel qʼaqʼin kykʼuʼj txqantl kyiʼj.*

8 At tzalajbʼil kye qeju at jun tbʼanel kyanmi porke kʼokel kykeʼyin Dios.*

9 At tzalajbʼil kye qeju in che jyon tiʼj mujbʼabʼil, porke kʼokel kyqʼoʼn txqantl kybʼi te tkʼwal Dios.

10 At tzalajbʼil kye qeju in nok bʼinchaʼn nya bʼaʼn kyiʼj aj t-xi kybʼinchaʼn aju tzʼaqli,* porke at kyoklen tiʼj Gobierno in tzaj toj kyaʼj.

11 At tzalajbʼil kyeye qa ma che bʼaj insultarine kyuʼn xjal, qa ma tzʼok bʼinchaʼn nya bʼaʼn kyiʼje kyuʼn ex qa ma tzaj kyqʼamaʼn alkyexku nya ax tok yol kyiʼje noq tuʼnju in che ok lepeʼye wiʼje. 12 Che tzalaje ex che tenxe alegr tuʼnju tbʼanelxix oyaj tzul qʼoʼn kyeye toj kyaʼj.* Porke iktzun tten ok bʼinchaʼn nya bʼaʼn kyiʼj profeta kyuʼn xjal toj ambʼil ojtxe.

13 In che oke ik tzeʼn atzʼin te twitz txʼotxʼ. ¿Pero jakupe ten tkʼokʼjal atzʼin juntl maj qa ma naj? Ya mintiʼ tajbʼen. Sino in nex xoʼn tiʼjxi tuʼntzun kybʼet xjal tibʼaj.

14 In che oke ik tzeʼn spikʼun kyxol xjal.* Mlay bʼant tuʼn tkubʼ ewit jun tnam at twi jun witz. 15 Ex mintiʼ in nok txqet jun kandil tuʼn tkubʼ jpet tukʼil chiʼl,* sino in kubʼ qʼoʼn toj jun lugar qʼanchaʼl tuʼntzun tten spikʼun kye kykyaqil qeju ateʼ toj ja. 16 Ax ikx kyeye, bʼaʼn tuʼn tkubʼ kyyekʼine kyspikʼumale tukʼil tbʼanel kybʼinchbʼene tuʼntzun tok kykeʼyin xjal ex tuʼn tjaw kynimsaʼn Kymane at toj kyaʼj.

17 Miʼn kubʼ kyximane qa ma chin ule tuʼn tnaj Tley Moisés ex aju kubʼ kytzʼibʼin Profeta. Mintiʼ ma chin ule tuʼn tnaj, sino oʼkx tuʼn kyjapun kywi wuʼne. 18 Ax tok kxel nqʼamaʼne kyeye qa jaku naj kyaʼj ex txʼotxʼ, pero mlayx naj ni jun letra nix jun plaj Ley porke kjapunel twi tkyaqil. 19 Tuʼntzunju, qa ma tzikʼ jun xjal tibʼaj jun kyxol qe mandamyent tal chʼin toklen toj kywitz xjal ex qa ma txi t-xnaqʼtzaʼn kye txqantl tuʼn tbʼant axju kyuʼn, tal chʼin toklen ktel toj Gobierno in tzaj toj kyaʼj. Pero alkye ma txi tnimen ex ma txi tqʼoʼn xnaqʼtzbʼil kye txqantl kyiʼj, ktel nim toklen toj Gobierno in tzaj toj kyaʼj. 20 Ax tok kxel nqʼamaʼne kyeye, mlayx che okxe toj Gobierno in tzaj toj kyaʼj qa mintiʼ ma che oke mas tzʼaqli* kywitz escriba ex fariseo.

21 Toj ambʼil ojtxe xi qʼamaʼn jlu kye xjal: ‹Miʼn che bʼiyune, ex alkye jun xjal ma kubʼ tbʼyoʼn juntl kxel tqʼoʼn kwent kywitz jwes›. 22 Pero kxel nqʼamaʼne kyeye qa kxel tqʼoʼn jun xjal kwent kywitz jwes* qa kukx in qʼojin tiʼj terman. Ex qa at jun xjal in nel tikʼun terman ex in nok ten insultarilte, kxel tqʼoʼn kwent kywitz Nim Kyajlal Jwes.* Pero jaku naj jun xjal toj Gehena* te qʼaqʼ qa ma txi tqʼamaʼn te juntl: ‹¡Xnaka ex mintiʼ tajbʼena!›.

23 Tuʼntzunju, qa ma tzaj tnaʼna qa at jun nya bʼaʼn kyxole tukʼil termana aj txiʼya qʼol jun ofrenda twitz altar, 24 bʼaʼn tuʼn tkyaj tqʼoʼna ofrenda twitz altar ex txiʼya yolil tukʼil. Tnejel, bʼinchanxa tiʼj nya bʼaʼn tukʼil termana ex yajxitl meltzʼaja tuʼn t-xi tqʼoʼna ofrenda.

25 Qa ma txiʼ jun xjal qʼol part tiʼja twitz jwes, bʼaʼn tuʼn t-xi tbʼinchaʼna tiʼj nya bʼaʼn toj bʼe naʼmxtoq kypone twitz jwes. Si no jaku txi qʼoʼna toj tqʼabʼ jwes tuʼn, atzunte jwes jaku txi tqʼoʼn teya toj tqʼabʼ xqʼuqil pres tuʼn tokx qʼoʼna toj cárcel. 26 Ax tok kxel nqʼamaʼne teya, mlayx tzʼetz tzaqpiʼna toj cárcel tzmaxi aj t-xi tchjoʼna último centav.*

27 Ojtzqiʼn kyuʼne qa tzaj qʼamaʼn jlu ojtxe: ‹Miʼn kybʼinchaye aj pajil›. 28 Atzun weye kxel nqʼamaʼne kyeye, qa kukx in xi tkeʼyin jun xjal jun xuʼj aju nya t-xuʼjil ex in ten nya bʼaʼn t-ximbʼetz tiʼj, in nok jlu ik tzeʼn ya o kubʼ tbʼinchaʼn aj pajil tukʼil toj tanmi. 29 Tuʼntzunju, qa in kubʼ tzʼaqa toj il tuʼn tpaj tbʼaqʼ twitza toj lado derecho, bʼaʼn tuʼn tetz tiʼna ex tuʼn t-xi t-xoʼna najchaq. Mas bʼaʼn tuʼn tnaj jun part t-xmilala twitzju tuʼn tnaj tkyaqil toj Gehena.* 30 Ax ikx qa in kubʼ tzʼaqa toj il tuʼn tpaj tqʼabʼa derecha, bʼaʼn tuʼn tel ttxʼemina ex tuʼn t-xi t-xoʼna najchaq. Mas bʼaʼn tuʼn tnaj jun part t-xmilala twitzju tuʼn tnaj tkyaqil toj Gehena.

31 Ax ikx tzaj qʼamaʼn jlu ojtxe: ‹Qa ma kubʼ t-ximen jun xjal tuʼn tel tdivorciarin tibʼ tiʼj t-xuʼjil, bʼaʼn tuʼn tbʼaj tbʼinchaʼn jun uʼj te divorcio ex tuʼn t-xi tqʼoʼn te›. 32 Atzun weye kxel nqʼamaʼne kyeye qa oʼkx jaku tzʼel tdivorciarin tibʼ xinaq* qa ma kubʼ tbʼinchaʼn t-xuʼjil aj pajil.* Pero qa mintiʼ ma kubʼ tbʼinchaʼn xuʼj* aj pajil ex in nel tdivorciarin tibʼ xinaq tiʼj, jaku kubʼ tbʼinchaʼn xuʼj il tukʼil juntl xinaq noq tuʼn tpaj tchmil. Ex alkye xinaq ma kubʼ mojeʼ tukʼil xuʼj jlu ax ikx in kubʼ tbʼinchaʼn aj pajil.

33 Ax ikx xi qʼamaʼn jlu kye xjal toj ambʼil ojtxe: ‹Miʼn txi tjurarina jun tyola qa mlay japun twi tuʼna ex bʼinchanxa tkyaqilju in xi ttziyena te Jehová›.* 34 Atzun weye kxel nqʼamaʼne kyeye tuʼn miʼn t-xi kyjurarine jun kyyole. Aj t-xi kyjurarine jun kyyole, miʼn tzaj kynaʼne kyaʼj porke atzun tqʼuqbʼil Dios. 35 Ex miʼn tzaj kynaʼne txʼotxʼ tuʼnju tkubʼ tqan Dios tibʼaj, nix tuʼn ttzaj kynaʼne tnam Jerusalén porke atzun tnam etzan tuʼn Rey* nim toklen. 36 Ax ikx miʼn tzaj kynaʼne kywiʼye aj t-xi kyjurarine jun kyyole porke mlay bʼant tuʼn tok ttzmal kywiʼye kyuʼne te saq moqa te qʼeq. 37 Qa ma txi kyqʼamaʼne ok, kybʼinchanxe. Pero qa ma txi kyqʼamaʼne mlay, miʼn txi kybʼinchaʼne. Porke qa mintiʼ ma japun twi kyyole, at toklen jlu tukʼil Tajaw il.

38 O kybʼiye qa tzaj qʼamaʼn jlu toj ambʼil ojtxe: ‹Qa ma tzʼetz tbʼaqʼ twitz jun xjal tuʼn juntl, ax ikx te il tiʼj tuʼn tetz tbʼaqʼ twitz. Ex qa ma tzʼetz twitz teʼ tuʼn, ax ikx te il tiʼj tuʼn tetz twitz teʼ›. 39 Atzun weye kxel nqʼamaʼne kyeye qa mintiʼ tuʼn kyqʼojine tukʼil jun xjal nya bʼaʼn. Tuʼntzunju, qa ma tzʼok tzʼajin toj kytziʼye toj lado derecho, ax ikx kyqʼonxe ambʼil tuʼn tok tzʼajin juntl plaj. 40 Ex qa taj jun xjal tuʼn t-xi tiʼn teya twitz jwes tuʼn t-xi tqʼoʼna t-xbʼaluna* te, ax ikx qʼonxa juntl t-xbʼaluna te aju in najbʼen tuʼna tiʼjxi. 41 Qa in nok obligarina tuʼn jun xjal at toklen tuʼn t-xi tiʼna tiqatz jun kilómetro,* txiʼya ex iqenxa kabʼe kilómetro. 42 Ax ikx qa in xi tqanin jun xjal jun tiʼ teya, bʼaʼn tuʼn t-xi tqʼoʼna te. Ex qa at jun xjal in xi tqanin pwaq* te majen teya, miʼn kubʼ t-xkʼayin tibʼa tuʼn t-xi tqʼoʼna te.

43 O kybʼiye qa tzaj qʼamaʼn jlu toj ambʼil ojtxe: ‹Kykʼujlame kyukʼile ex bʼaʼn tuʼn tel kyikʼune aj qʼoj kyiʼje›. 44 Atzun weye kxel nqʼamaʼne kyeye tuʼn tok kykʼujlaʼne* qe aj qʼoj kyiʼje ex che naʼne Dios* kyiʼj qeju in che ok ten perseguiril kyeye. 45 Qa ma bʼant jlu kyuʼne, kbʼel kyyekʼine qa in che oke te tkʼwal Kymaʼne at toj kyaʼj. Porke in netz qʼij tuʼn Dios kyibʼaj xjal bʼaʼn ex nya bʼaʼn, ex in tzaj tqʼoʼn jbʼal kyibʼaj xjal tzʼaqli ex nya tzʼaqli. 46 Qa oʼkx ma che ok kykʼujlaʼne qeju in che ok kʼujlaʼne kyuʼn, ¿tiquʼn kbʼel tyekʼin Dios t-xtalbʼil kyiʼje? ¿Nyape ax jlu in bʼant kyuʼn qeju in che cobrarin impuesto? 47 Ex qa oʼkx ma txi kyqʼolbʼeʼne qe kyermane, ¿maspe tbʼanel kybʼinchbʼene kywitz txqantl? ¿Nyapetzun ax jlu in bʼant kyuʼn xjal kye txqantl nasyon? 48 Tuʼntzunju, che oke tzʼaqli ik tzeʼn te Kymane at toj kyaʼj tzʼaqli te.