Qe tbʼanel noticia kubʼ ttzʼibʼin Mateo
11 Tej tbʼaj yolin Jesús kyukʼil 12 tdiscípulo tiʼjju tuʼn tbʼant kyuʼn, ikʼ bʼet toj lugar jatumel taʼ ex xiʼ predicaril ex qʼol xnaqʼtzbʼil kyoj junjuntl tnam.
2 Tej tpon noticia tukʼil Juan el Bautista toj cárcel tiʼj tbʼinchbʼen Cristo, xi tsamaʼn qe tdiscípulo tuʼn t-xi kyqanin jun xjel te. 3 Xi kyqanin te: «¿Aya in qo ayone tiʼj tuʼn tul moqa il tiʼj tuʼn qayoʼne tiʼj juntl xjal?». 4 Xi ttzaqʼweʼn Jesús kye: «Kyxiʼye ex kyqʼamanxe te Juan aju in nok kybʼiʼne ex in nok kykeʼyine. 5 In jaqet kywitz xjal moẍ jaʼlo, in che bʼet qe kox, in che bʼant* qeju at lepra kyiʼj, in che bʼin qeju chkin kywiʼ ex in che jaw anqʼin* kyimni. Ax ikx in xi predicarin tbʼanel noticia kye xjal prow. 6 At tzalajbʼil te xjal mintiʼ in dudarin wiʼje».*
7 Tej kyikʼ bʼet tdiscípulo Juan, xi tzyet tuʼn tyolin Jesús tiʼj Juan kyukʼil xjal ex xi tqʼamaʼn kye: «¿Alkye ma tzʼok kykeʼyine toj desierto? ¿Ape jun xjal in nok ik tzeʼn jun caña in yukch tuʼn kyqʼiqʼ? Miʼn. 8 Qa ikju, ¿entonces alkyetzun? ¿Junpe xjal tok tbʼanel* t-xbʼalun? Miʼn. ¡Porke aqeju xjal tok tbʼanel kyxbʼalun atz in che anqʼin toj kyja rey! 9 ¿Entonces alkyetzun ma tzʼok kykeʼyine? ¿Junpe profeta? Ikju, jun profeta ex mas nim toklen twitz jun profeta. 10 Ex atz in yolin tyol Dios tiʼj aj ttzaj tqʼamaʼn: ‹Kxel nsamaʼne jun xjal tuʼn tkubʼ nej twitza tuʼn t-xi tqʼamaʼn qe nyole ex kbʼajel tbʼinchaʼn tbʼeya›. 11 Ax tok kxel nqʼamaʼne kyeye, mintiʼ jun xjal* o ten nim toklen ik tzeʼn te Juan el Bautista. Pero aju xjal mas chʼin toklen toj Gobierno in tzaj toj kyaʼj, mas nim toklen twitz. 12 Atxix toj tqʼijlalil Juan el Bautista, in nok tilil kyuʼn xjal tuʼn kyokx toj Gobierno in tzaj toj kyaʼj. Ex alkye qeju in nok tilil kyuʼn, ok che okex toj.* 13 Tej naʼmxtoq tul Juan, tzaj tqʼamaʼn Ley ex aju kubʼ kytzʼibʼin Profeta tiʼ tuʼn tbʼaj. 14 Qa kyaje tuʼn t-xi kynimane moqa miʼn, a Juan in nok te ‹Elías kyaj qʼamaʼn tuʼn tul›. 15 Alkye at tẍkyin, bʼaʼn tuʼn t-xi tbʼiʼn qe yol lu.
16 ¿Alqukʼil jaku che ok nmojbʼane qe xjal lu? In che ok ik tzeʼn qe tal kʼwal qʼuqli ateʼ toj plas ex in che saqchan. In che schʼin kye kyukʼil ex in xi kyqʼamaʼn kye: 17 ‹Ma qo tokarine tiʼj flauta, pero mintiʼ ma che bʼixine. Ma qo cantarine tiʼj jun canción te bʼis, atzun kyeye mintiʼ ma kubʼ kyyekʼine qa ma tzaj kybʼise›.* 18 Tej tul Juan mintiʼ waʼn ex mintiʼ kʼan ik tzeʼn kye txqantl, pero kyqʼama jlu tiʼj: ‹At jun demonio toj tanmi›. 19 Atzunte Tkʼwal Xinaq* in waʼn ex in kʼan, pero in kyqʼamaʼn xjal tiʼj: ‹Kykeʼyinxe, jun xjal nim waʼn ex in xi tkʼaʼn nim vin. Ex tamiw tibʼ kyukʼil qeju in che cobrarin impuesto ex qe xjal in che bʼinchaʼn il›. Tuʼntzunju, tuʼn tbʼinchbʼen jun xjal in qʼanchaʼlix qa at tnabʼil moqa miʼn».*
20 Ex ok ten Jesús kawil kye tnam jatumel otoq che bʼant nim milagro tuʼn porke mintiʼ ajtz tiʼj kyanmi xjal. 21 Tqʼama jlu: «¡Lasmi twitza Corazín! ¡Ex lasmi twitza Betsaida! Porke noqwit aʼye xjal te Tiro ex Sidón ok keʼyinte qe milagro lu, owtlo tzikʼ nim ambʼil tajtzlen tiʼj kyanmi, e kubʼwitlo qeʼ toj tzaʼj ex okwitlo kyqʼoʼn kyxbʼalun tuʼn tkubʼ kyyekʼin kybʼis. 22 Ax tok kxel nqʼamaʼne kyeye, toj Qʼij te Juicio mas nim kʼixkʼoj kbʼel kynaʼne twitz tnam Tiro ex Sidón. 23 Atzun kyeye xjal te Capernaúm, ¿okpe che xeʼle toj kyaʼj? Miʼn. Sino atz che xeʼle toj Muqbʼil.* Porke noqwit aʼye xjal te Sodoma ok keʼyinte qe milagro e bʼant wuʼne toj kytname, mintiʼwtlo naj tnam. 24 Ax tok kxel nqʼamaʼne kyeye, toj Qʼij te Juicio mas nim kʼixkʼoj kbʼel kynaʼne twitz tnam Sodoma».
25 Toj ambʼil aju, ax ikx tqʼama Jesús: «Kjawil nnimsaʼna Nman kywitz txqantl, aya Tajaw kyaʼj ex txʼotxʼ, porke ma kubʼ tewina qe xnaqʼtzbʼil lu kywitz xjal list ex qeju at kynabʼil, ex ma txi tyekʼina kye tal kʼwal. 26 Ikju Nman, ma bʼant jlu tuʼna porke atzun mas bʼaʼn toj twitza». 27 Ex tqʼamatl Jesús: «Ma tzaj tqʼoʼn Nmane tkyaqil weye. Oʼkx Mambʼaj ojtzqilte tkyaqil tiʼj Kʼwalbʼaj ex oʼkx Kʼwalbʼaj ojtzqilte tkyaqil tiʼj Mambʼaj. Ex kykyaqil qeju ma txi qʼoʼn xnaqʼtzbʼil kye tuʼn Kʼwalbʼaj, kʼelel kynikʼ tiʼj alkye Mambʼaj. 28 Che tzaje wukʼile aqeye ma che sikt tuʼn aqʼuntl ex ma che sikt tjaqʼ iqtz, ex ktel kyipumale wuʼne juntl maj. 29 Kyqʼonkx kyibʼe tjaqʼ nyuwe ex kyqʼontze ambʼil weye tuʼn t-xi nqʼoʼne xnaqʼtzbʼil kyeye, porke mans qiʼne ex mintiʼ in jaw nnimsan wibʼe.* Ex ktel kyipumale wuʼne juntl maj.* 30 Porke nya kwest tuʼn t-xi kyiʼne nyuwe ex nya aʼl wiqatze».