Qe tbʼanel noticia kubʼ ttzʼibʼin Juan
17 Tej tbʼaj tqʼamaʼn Jesús jlu, jaw tkeʼyin twitz kyaʼj ex tqʼama: «Nman, ma pon or. Nimsanktza tkʼwala tuʼntzun tjaw nimsaʼna tuʼn. 2 Porke ma txi tqʼoʼna toklen tkʼwala kyibʼaj kykyaqil xjal tuʼn t-xi tqʼoʼn chwinqlal te jumajx kye kykyaqil qeju ma che tzaj tqʼoʼna te. 3 Ex atzun chwinqlal jlu te jumajx, tuʼn tel kynikʼ tiʼja* oʼkx aya Dios axix tok ex tuʼn tel kynikʼ wiʼje aqine Jesucristo ma chin tzaj tsamaʼna. 4 Ma kyaj bʼant aqʼuntl wuʼne ma tzaj tqʼamaʼna weye, ex ma jaw nnimsaʼna tzalu twitz txʼotxʼ. 5 Jaʼlo Nman, chin tnimsaʼnktza ttxlaja ik tzeʼn o chin jaw tnimsaʼna ttxlaja tej naʼmxtoq tbʼant twitz txʼotxʼ.
6 Ma txi nyekʼine tbʼiya kye qeju ma che tzaj tqʼoʼna weye kyxol xjal twitz txʼotxʼ. Teya qe tnejel, pero ma che tzaj tqʼoʼna weye ex ma txi kybʼiʼn tyola. 7 Jaʼlo ma tzʼel kynikʼ tiʼj qa tukʼila in tzaj tkyaqilju ma tzaj tqʼoʼna weye. 8 Porke ma txi nqʼamaʼne kye aju ma tzaj tqʼamaʼna weye. Ma txi kynimen ex ma tzʼel kynikʼ tiʼj qa tukʼila ma chin tzaje, ex ma txi kyokslaʼn qa aya ma tzaj samante weye. 9 Chin kubʼsale twitza kyiʼj. Mlay chin kubʼsane twitza kyiʼj txqantl xjal, sino kyiʼj qeju ma che tzaj tqʼoʼna weye porke teya qe. 10 Tkyaqilju at weye teya ex tkyaqilju at teya weye, ex ma chin jaw nimsaʼne kyuʼn.
11 Mlay chin tentle twitz txʼotxʼ porke ma chinxe tukʼila, atzun kye ax che tel twitz txʼotxʼ. Aya Nman, xjan teya, xqʼuqina kyiʼj* noq tuʼn tbʼiya, aju tbʼiya ma tzaj tqʼoʼna weye, tuʼntzun kyok junx ik tzeʼn qe junx qoʼ. 12 Tej ma chin tene kyukʼil ma che ok nxqʼuqine noq tuʼn tbʼiya, aju tbʼiya ma tzaj tqʼoʼna weye. Ex ma che ok nxqʼuqine, porke nijun kyxol ma tzʼel tzpet. Pero tuʼn tjapun twi tyol Dios, oʼkx jun ma tzʼel tzpet, aju il tiʼj tuʼn tnaj. 13 Pero jaʼlo ma chinxe tukʼila ex in chin yoline tiʼj jlu akux atine twitz txʼotxʼ, tuʼntzun tnoj kyanmi tuʼn tzalajbʼil ik tzeʼn weye. 14 Ma txi nqʼamaʼne tyola kye, pero ma che el ikʼun kyuʼn xjal porke junxitl qe kywitz xjal te twitz txʼotxʼ ik tzeʼn weye junxitl qine kywitz xjal te twitz txʼotxʼ.
15 Mintiʼ in xi nqanine teya tuʼn kyetz tiʼna kyxol xjal te twitz txʼotxʼ, sino tuʼn kyok t-xqʼuqina* tiʼj Tajaw il. 16 Junxitl qe kywitz xjal te twitz txʼotxʼ ik tzeʼn weye junxitl qine kywitz xjal te twitz txʼotxʼ. 17 Xjansama* qe tuʼn tyola axix tok, porke aju tyola axix tok. 18 Ik tzeʼn weye ma chin tzaj tsamaʼna kyxol xjal, ax ikx weye ma chex nsamaʼne kyxol xjal. 19 Ex kukx ma chin tene xjan tuʼntzun kyok xjan tuʼn tyola, aju tyola axix tok.
20 Nya oʼkx kyiʼj in chin kubʼsane twitza, sino ax ikx kyiʼj qeju kʼokel qeʼ kykʼuʼj wiʼje noq tuʼn kyyol. 21 Nman, iktzun tten che okel kykyaqil te junx ex tuʼn kyten qukʼil ik tzeʼn teya ata wukʼile ex atine tukʼila, tuʼntzun t-xi kyokslaʼn xjal qa aya ma tzaj samante weye. 22 Ma che jaw nnimsaʼne ik tzeʼn teya ma chin jaw tnimsaʼna tuʼntzun kyok te junx ik tzeʼn qe junx qoʼ. 23 Junx atine kyukʼil ex junx ata wukʼile tuʼntzun kyokxix te junx. Iktzun tten kʼelel kynikʼ xjal tiʼj qa aya ma tzaj samante weye ex qa kʼujlaʼn qe tuʼna ik tzeʼn kʼujlaʼn qine tuʼna. 24 Nman, in chin kubʼsane twitza kyiʼj qeju ma che tzaj tqʼoʼna weye, wajbʼile tuʼn kyten wukʼile jatumel chin tele tuʼntzun tok kykeʼyin woklene ma tzaj tqʼoʼna. Porke kʼujlaʼn qine tuʼna atxix ojtxe tej naʼmxtoq tbʼant twitz txʼotxʼ. 25 Nman, tzʼaqlixix teya. Naʼmx tel kynikʼ xjal tiʼja, atzun weye ojtzqiʼna wuʼne. Ax ikx ma tzʼel kynikʼ qeju ma che tzaj tqʼoʼna weye qa aya ma tzaj samante weye. 26 Ma txi nyekʼine tbʼiya kye ex kukx kxel nyekʼine kye, tuʼntzun tkubʼ kyyekʼin kykʼujlabʼil ik tzeʼn ma kubʼ tyekʼina tkʼujlabʼila wiʼje ex tuʼn ntene junx kyukʼil».