Qe tbʼanel noticia kubʼ ttzʼibʼin Lucas

22 Chʼixtoq tpon qʼij tuʼn tkubʼ kyikʼsaʼn xjal Fiesta tiʼj Pan Mintiʼ Levadura toj, aju tok tbʼi te Pascua. 2 Atzun kye pal nim kyoklen ex qe escriba xi kyjyoʼn jun tumel tzeʼn tuʼn tkubʼ kybʼyoʼn Jesús porke e tzaj xobʼ kywitz xjal. 3 Entonces okx Satanás toj tanmi Judas Iscariote, jun kyxol qeju Doce. 4 Ex xiʼ yolil kyukʼil pal nim kyoklen ex qe nejenel kye guardia toj templo tuʼn t-xi tqʼamaʼn kye tzeʼn tuʼn t-xi tqʼoʼn Jesús toj kyqʼabʼ. 5 E jaw tzalaj tuʼn jlu ex xi kyqʼamaʼn te Judas qa kxel kyqʼoʼn pwaq* te. 6 Bʼaʼn ela jlu toj twitz Judas ex ok ten jyol jun tbʼanel ambʼil tuʼn t-xi tqʼoʼn Jesús toj kyqʼabʼ, pero nyatoq taj tuʼn tok kykeʼyin xjal.

7 Entonces pon qʼij tuʼn tkubʼ kyikʼsaʼn xjal Fiesta tiʼj Pan Mintiʼ Levadura toj ex tuʼn t-xi kyqʼoʼn sacrificio te Pascua. 8 Tuʼntzunju, xi tsamaʼn Jesús Pedro tukʼil Juan ex xi tqʼamaʼn kye: «Kyxiʼye ex kybʼinchame tkyaqil tuʼn qwaʼn tiʼj Pascua». 9 Xi kyqanin te Jesús: «¿Jatumel taja tuʼn tkubʼ qbʼinchaʼne?». 10 Xi ttzaqʼweʼn kye: «Aj kyokxe toj tnam, kkanetel jun xinaq* kyuʼne qʼiʼn jun xar aʼ tuʼn. Che lepeke tiʼj ex che okxe toj ja jatumel kʼokex. 11 Ex kyqʼamanxe te tajaw ja: ‹Chi Xnaqʼtzal teya: «¿Alkye kwart ktzajel tqʼoʼna weye tuʼn nwaʼne tiʼj Pascua junx kyukʼil weye ndiscípulo?»›. 12 Ex tzul tyekʼin xinaq jun kwart matij* kyeye toj tkabʼin nivel ja ex ya at tkyaqil toj. Kybʼinchame tkyaqil tuʼn qwaʼn tiʼj Pascua toj lugar aju». 13 Ikʼtzun bʼet Pedro ex Juan ex kanet tkyaqil kyuʼn ik tzeʼn xi tqʼamaʼn Jesús kye ex bʼaj kybʼinchaʼn tkyaqil tuʼn kywaʼn tiʼj Pascua.

14 Entonces tej tpon or, ok qeʼ Jesús tiʼj mes junx kyukʼil t-apóstol. 15 Ex xi tqʼamaʼn kye: «In chin ayontoqe tuʼn nwaʼne junx kyukʼile tiʼj Pascua lu naʼmxtoq wikʼe toj nim sufrimiento. 16 Porke kxel nqʼamaʼne kyeye, mlay chin waʼne juntl maj tiʼj tzmaxi aj tjapun twi toj Tgobierno Dios». 17 Entonces tzaj ttzyuʼn Jesús jun copa, xi tqʼoʼn chjonte te Dios ex tqʼama: «Kykʼamile tiʼj ex kyqʼonxe kyxole, 18 porke kxel nqʼamaʼne kyeye qa mlay txi nkʼaʼne taʼl twitz uva juntl maj tzmaxi aj tul Tgobierno Dios».

19 Yajxitl tzaj ttzyuʼn jun pan ex xi tqʼoʼn chjonte te Dios. Kubʼ tpiẍun, xi tqʼoʼn kye ex tqʼama jlu: «Aju pan lu in nok ik tzeʼn nxmilale kxel qʼoʼn tuʼn kyklete. Kukx kybʼinchame jlu te nabʼl weye». 20 Ax ikx tzaj ttzyuʼn jun copa tej tbʼaj waʼn ex xi tqʼamaʼn kye: «Aju copa lu, atzun akʼaj trat kxel tzyet aj tel chitj nchkʼele tuʼn kyklete.

21 Pero aju kxel qʼonte weye toj kyqʼabʼ xjal at wukʼile tzalu tiʼj mes. 22 Porke il tiʼj tuʼn tjapun twi tkyaqilju kyaj tzʼibʼin tiʼj Tkʼwal Xinaq. ¡Pero lasmi twitz aju kxel qʼonte toj kyqʼabʼ xjal!». 23 Ex e ok ten qanilte kyxolx alkye kxel qʼonte Jesús toj kyqʼabʼ xjal.

24 Entonces tzaj jun qʼoj kyxol discípulo tuʼn tel kynikʼ tiʼj alkye mas nim toklen. 25 Pero xi tqʼamaʼn Jesús kye: «In che kawin rey kyibʼaj xjal ex aqeju xjal nim kyoklen in nok ojtzqiʼn kywitz tuʼnju in xi kybʼinchaʼn bʼaʼn kyiʼj txqantl. 26 Atzun kyeye miʼn che oke ik tzeʼn kye. Sino aju mas nim toklen kyxole, qʼonk tibʼ ik tzeʼn mas kʼwalx, ex aju nejenel kyxole ik tzeʼn aju in najbʼen kye txqantl. 27 Porke ¿alkye mas nim toklen? ¿Aju in waʼn moqa aju in najbʼen kye txqantl? ¿Nyapetzun aju xjal in waʼn? Pero atzun weye atine kyxole ik tzeʼn aju in najbʼen.

28 Kukx ma che tene wukʼile kyoj prueba ma chin ok weʼye twitz. 29 Tuʼntzunju, kbʼantel jun trat wuʼne kyukʼile tuʼn kykawine toj jun gobierno ik tzeʼn jun trat o bʼant tuʼn Nmane wukʼile. 30 Che wale ex che kʼale tiʼj nmese toj weye Ngobierno ex che kbʼel qeʼye kawil kyibʼaj 12 tribu te Israel ex che okele te jwes kyibʼaj».

31 Ex xi tqʼamaʼn Jesús te Simón: «Simón, Simón, ma che tzaj qanine tuʼn Satanás tuʼn kybʼaj sarandiarine ik tzeʼn triw. 32 Pero ma chin kubʼsane twitz Dios tiʼja tuʼn miʼn tkubʼ numja toj tokslabʼila. Ex aj tjaw twabʼan tibʼa juntl maj, qʼuqbʼanxa kykʼuʼj termana». 33 Atzunte Simón xi ttzaqʼweʼn te: «Tat, lu qine lu tuʼn nxiʼye pres tukʼila ex tuʼn nkyime junx tukʼila». 34 Pero xi ttzaqʼweʼn Jesús te: «Pedro, kxel nqʼamaʼne teya qa naʼmxtoq tjaw oqʼ jun tman ekʼ* jaʼlo, kbʼel tewina oxe maj qa ojtzqiʼn qiʼne tuʼna».

35 Ax ikx xi tqʼamaʼn Jesús kye: «Tej t-xi nqʼamaʼne kyeye tuʼn miʼn txi kyiʼne bolsa tkubʼil kypwaqe, ni morral tkubʼil kywaye nix kyxjabʼe, ¿atpe jun tiʼ mintiʼ kanin kyeye?». Xi kytzaqʼweʼn te: «Mintiʼ». 36 Xi tqʼamaʼntl Jesús kye: «Pero jaʼlo kxel nqʼamaʼne kyeye alkye at jun tbols tkubʼil tpwaq, bʼaʼn tuʼn t-xi tiʼn junx tukʼil tmorral tkubʼil twa. Ex alkye mintiʼ t-espada, kʼayinx tmant tuʼn ttzaj tlaqʼoʼn jun. 37 Porke kxel nqʼamaʼne kyeye, il tiʼj tuʼn kyjapun yol lu wiʼje e kyaj tzʼibʼin toj tyol Dios: ‹Ok qʼoʼn ik tzeʼn jun xjal bʼinchal nya bʼaʼn›. Ex ma japun kywi yol lu wiʼje jaʼlo». 38 Entonces xi kyqʼamaʼn te Jesús: «Tat, tzalu at kabʼe espada». Xi ttzaqʼweʼn Jesús kye: «Cabalx kyukʼil».

39 Tej tetz Jesús, xiʼ twi witz Olivos ik tzeʼn kukx bʼant tuʼn ex e ok lepeʼ tdiscípulo tiʼj. 40 Tej kypon, xi tqʼamaʼn kye: «Che kyaje tzalu ex che naʼne Dios tuʼn miʼn kyoke toj prueba». 41 Entonces el laqʼeʼ Jesús chʼin kyiʼj ik tzeʼn jatumel jaku pon jun abʼj tuʼn jun xjal aj t-xi t-xoʼn. Kubʼ ẍmejeʼ ex tej t-xi tzyet tuʼn tnaʼn Dios 42 tqʼama jlu: «Nman, qa taja, miʼn txi tqʼoʼna ambʼil tuʼn tel nkʼaʼne tiʼj copa lu. Pero nya tuʼn tbʼant aju weye wajbʼil, sino aju teya tajbʼil». 43 Ex kubʼ tyekʼin tibʼ jun anjel tzaj toj kyaʼj tuʼn t-xi tqʼuqbʼaʼn tkʼuʼj. 44 Pero kubʼ tnaʼn Jesús nimxix bʼis ex mas naʼn Dios tuʼn tkyaqil tipumal. Ex aju aʼ el tiʼj ok ik tzeʼn chikʼ kubʼ txʼatj twitz txʼotxʼ. 45 Tej tbʼaj naʼn Dios, jaw weʼ ex xiʼ kyukʼil tdiscípulo. Pero in che jtan tej tpon kyukʼil porke otoq che sikt tuʼn nim bʼis. 46 Xi tqʼamaʼn kye: «¿Tiquʼn in che jtane? Che weʼktze ex kukx che naʼne Dios tuʼn miʼn kyoke toj prueba».

47 Tej in yolin Jesús, e pon nim xjal. Nejli Judas kywitz, jun kyxol qeju Doce ex pon laqʼeʼ tukʼil Jesús tuʼn tel ttzʼubʼan twitz. 48 Pero xi tqʼamaʼn Jesús te: «Judas, ¿in nelpe ttzʼubʼina twitz Tkʼwal Xinaq tuʼn t-xi tqʼoʼna toj kyqʼabʼ xjal?». 49 Tej tok kykeʼyin qeju ateʼ ttxlaj Jesús aju chʼixtoq tbʼaj, xi kyqʼamaʼn te: «Tat, ¿okpe qo okel tzaqpaje kyiʼj tukʼil espada?». 50 Ex ok tzaqpaj jun kyxol tiʼj tmajen nejenel kye pal ex el ttxʼemin tẍkyin toj lado derecho. 51 Tej til Jesús jlu, tqʼama: «Nya il tiʼj tuʼn tbʼant jlu tuʼna». Ex kubʼ tqʼanin tẍkyin majen tej tok tmakoʼn. 52 Entonces xi tqʼamaʼn Jesús jlu kye pal nim kyoklen, kye nejenel kye guardia toj templo ex kye ansyan e pon jyolte toj lugar aju: «¿Mape che ule tukʼil espada ex tzeʼ tuʼn ntzyete kyuʼne ik tzeʼn jun eleqʼ? 53 Tkyaqil qʼij in tene kyukʼile toj templo ex mintiʼ tzaj kytzyuʼne qine. Pero ma pon or kyeye ex ma pon or tuʼn tkawin tipumal qlolj».

54 Tzajtzun kytzyuʼn Jesús ex xi kyiʼn toj tja nejenel kye pal. Ex najchaq xi lepeʼ Pedro kyiʼj. 55 Kubʼ kybʼinchaʼn junjun xjal qʼaqʼ toj nikʼjan* peʼn ex e kubʼ qeʼ junx. Ex kubʼ qeʼ Pedro kyxol. 56 Pero til jun criada qa qʼuqli Pedro tiʼj qʼaqʼ, xi tkeʼyin ex tqʼama jlu: «Ax ikx te xinaq lu bʼet junx tukʼil». 57 Pero kubʼ tewin Pedro Jesús ex tqʼama: «Xuʼj,* mintiʼ ojtzqiʼn wuʼne». 58 Tej tikʼ jun rat, til juntl xjal Pedro ex xi tqʼamaʼn te: «Ax ikx teya bʼeta junx kyukʼil». Pero xi ttzaqʼweʼn Pedro te: «Hombre, nya aqine». 59 Tej tikʼ jun or, tqʼama jun xjal jun ex juntl maj: «¡Mlayx kubʼ tewin xinaq lu qa bʼet junx tukʼil! Qʼanchaʼl qa te Galilea te». 60 Pero xi tqʼamaʼn Pedro te: «Hombre, mintiʼ ojtzqiʼn wuʼne tiʼ in tqʼamaʼna». Tej tzmatoq in yolin jaw oqʼ jun tman ekʼ. 61 Tej tbʼaj jlu, ajtz tkeʼyin Qajaw toj twitz Pedro. Ex tzaj tnaʼn Pedro aju xi tqʼamaʼn Qajaw te tej tqʼama jlu: «Naʼmxtoq tjaw oqʼ jun tman ekʼ te qʼij jaʼlo, kbʼel tewina oxe maj qa ojtzqiʼn qine tuʼna». 62 Etztzun Pedro tiʼjxi ex jaw oqʼ tuʼnju kubʼ tnaʼn nimxix bʼis.

63 Atzun kye xjal in che xqʼuqin tiʼj Jesús, e ok ten xmayil tiʼj ex bʼaj kygolpearin. 64 Ok kymaqsiʼn twitz* ex kukx xi kyqanin te: «Qa aya jun profeta, qʼamantza qeye alkye ma tzʼok golpearin teya». 65 Ex xi kyqʼamaʼn nim yol nya bʼaʼn tuʼn kyxmayin tiʼj.

66 Tej qsqix, ok kychmon kyibʼ ansyan toj tnam, toj juntl yol aqeju pal nim kyoklen ex qe escriba. Xi kyiʼn Jesús twitz Sanedrín ex xi kyqʼamaʼn te: 67 «Qʼamantza qeye qa aya Cristo». Xi ttzaqʼweʼn Jesús kye: «Maske ma txi nqʼamaʼne kyeye mlay txi kyokslaʼne. 68 Ex qa ma txi nqanine jun xjel kyeye mlay tzaj kytzaqʼweʼne. 69 Pero tex qʼij jaʼlo, kbʼel qeʼ Tkʼwal Xinaq toj lado derecho ttxlaj Dios nim tipumal». 70 Tej tok kybʼiʼn jlu, kykyaqil xi kyqanin te: «¿Entonces aya Tkʼwal Dios?». Xi ttzaqʼweʼn Jesús kye: «Ikju, ax qeye in che tzaj qʼamante qa aqine». 71 Atzun kye kyqʼama: «¿Ilpe tiʼj tuʼn kyul mas testiw? Ma tzʼok qbʼiʼn aju saj tqʼamaʼn».