Qe tbʼanel noticia kubʼ ttzʼibʼin Mateo
3 Xitzun tzyet tuʼn tpredicarin Juan el Bautista toj desierto te Judea. 2 Xi tqʼamaʼn jlu kye xjal: «Tzʼajtz tiʼj kyanmiye porke ya ma tzul laqʼeʼ Gobierno in tzaj toj kyaʼj». 3 Ex atz tiʼj Juan yolin profeta Isaías tej tqʼama jlu: «In jaw tqʼajqʼajel twiʼ jun xjal toj desierto ex in tqʼamaʼn jlu: ‹Kybʼinchame tbʼe Jehová* ex bʼaʼn tuʼn tbʼaj kybʼinchane jun tbʼe recto tiʼj›». 4 Aju xbʼalun ajbʼen tuʼn Juan, bʼinchaʼn tuʼn ttzmal kamey ex ajbʼen jun cinturón te cuero tuʼn te kʼalbʼil tkʼuʼj. Ax ikx waʼn kyiʼj langosta* ex tiʼj miel kanet tuʼn kyxol tzeʼ. 5 E pon nim xjal te Jerusalén tukʼil Juan, kykyaqil xjal te Judea ex kykyaqil xjal e anqʼin nqayin tiʼj Jordán. 6 Jatz kyqʼamaʼn kyil kywitz txqantl ex e bautisarin* tuʼn toj río Jordán.
7 Tej tok tkeʼyin Juan qa e pon nim fariseo ex saduceo toj lugar jatumel in che bautisarin xjal tuʼn, xi tqʼamaʼn jlu kye: «Aqeye tkʼwal kan,* ¿alkye xi qʼamante kyeye qa jaku che klete tiʼj juicio chʼix tul? 8 Bʼaʼn tuʼn tkubʼ kyyekʼine tukʼil kybʼinchbʼene qa o tzʼajtz tiʼj kyanmiye. 9 Ex miʼn kubʼ kyximane toj kyanmiye: ‹A qmane Abrahán›. Porke kxel nqʼamaʼne kyeye qa jaku che ok abʼj lu tuʼn Dios te tkʼwal Abrahán. 10 Ya ma pon kʼuxbʼil t-xe tlokʼ tzeʼ. Tuʼntzunju, tkyaqil tzeʼ mintiʼ in nel tbʼanel twitz kjawel txʼemin ex kʼokex qʼoʼn toj qʼaqʼ. 11 In che bautisarine wuʼne toj aʼ tuʼnju o tzʼajtz tiʼj kyanmiye. Pero aju xjal lepchitz wiʼje mas nim toklen ex mintiʼ woklene tuʼn tel wiʼne t-xjabʼ. Ok che bautisarile tuʼn tukʼil espíritu santo ex tukʼil qʼaqʼ.* 12 Ex qʼiʼn jun pala tuʼn toj tqʼabʼ ex kbʼajel tlimpiarin tkyaqil lugar jatumel in nel twitz triw. Kjawil tchmoʼn twitz triw ex kxel tkʼuʼn toj bodega, atzun tqan triw kbʼel tpatin tukʼil qʼaqʼ mintiʼ in kubʼ yupj».
13 Tej tikʼ ambʼil, etz Jesús toj Galilea tuʼn tpon toj Jordán tuʼn tbautisarin tuʼn Juan. 14 Pero mintiʼ kubʼ toj twitz Juan ex xi tqʼamaʼn jlu te: «Aqine il tiʼj tuʼn nbautisarine tuʼna, ¿tiquʼn in tzaj tqʼamaʼna weye tuʼn tkux nbautisarina?». 15 Xitzun ttzaqʼweʼn Jesús te: «Bʼaʼn tuʼn tbʼant quʼn oʼkx jaʼlo tuʼntzun t-xi qbʼinchaʼn aju tajbʼil Dios». Ex bʼaʼn ela jlu toj twitz Juan. 16 Tej tbautisarin Jesús ex tej tjatz toj aʼ, ok tkeʼyin Juan qa jaqet kyaʼj ex qa kuʼtz espíritu santo tibʼaj Jesús ik tzeʼn jun paloma. 17 Ex tzaj yolin Dios tzmax toj kyaʼj ex tqʼama: «Atzun Nkʼwale lu, kʼujlaʼn wuʼne ex in chin tzalaje tiʼj».