Qe tbʼanel noticia kubʼ ttzʼibʼin Marcos

13 Tej tetz Jesús toj templo xi tqʼamaʼn jun kyxol tdiscípulo te: «Xnaqʼtzal, ¡keʼyinxa qe tbʼanel abʼj ex qe tbʼanel ja!». 2 Pero xi tqʼamaʼn Jesús te: «¿In nokpe tqʼoʼna twitza kyiʼj nintz ja lu? Mlay kyaj ten jun abʼj tibʼaj juntl abʼj ex kbʼel xitj tkyaqil».

3 Tej qʼuqli Jesús twi witz Olivos jatumel qʼanchaʼl templo, pon Pedro, Santiago, Juan ex Andrés tukʼil. Ex tej ateʼtoq kyjunalx xi kyqanin te: 4 «Qʼamantza qeye, ¿toj alkye ambʼil kbʼajel tkyaqil jlu ex alkye señal kʼokel qkeʼyine qa chʼixtoq tkubʼaj?». 5 Xi tqʼamaʼn Jesús kye: «Kyxqʼuqink kyibʼe tuʼn miʼn kykubʼ sbʼuʼne* kyuʼn xjal. 6 Porke che ul nim xjal kʼajbʼel nbʼiye kyuʼn ex tzul kyqʼamaʼn: ‹Aqine Cristo›. Ex che kbʼel sbʼuʼn nim xjal kyuʼn. 7 Ex aj tok kybʼiʼne qa in che ok guerra ex qe noticia tiʼj guerra, miʼn che tzaj xobʼe. Porke il tiʼj tuʼn tbʼaj tkyaqil jlu, pero naʼmxtoq tpon ambʼil tuʼn tul fin.

8 Porke qe xjal te jun nasyon che qʼojil tukʼil juntl nasyon, ex qe xjal te jun tnam che qʼojil tiʼj juntl tnam. Ax ikx tzul weʼyaj ex qe terremoto noq jaxku tumel. Tkyaqil jlu tzul tyekʼin qa tzma in xi tzyet sufrimiento.*

9 Atzun kyeye kyxqʼuqink kyibʼe. Porke che kxel qʼiʼne kywitz jwes ex che bʼajel golpearine toj ja te kʼulbʼil.* Ex tuʼnju in che ok lepeʼye wiʼje, che xel qʼiʼne kywitz gobernador ex qe rey tuʼntzun kyoke te testiw wiʼje. 10 Pero tnejel il tiʼj tuʼn t-xi qʼamet tbʼanel noticia kyoj kykyaqil nasyon. 11 Aj kyxi qʼiʼne kywitz jwes, miʼn tzaj bʼaj kykʼuʼje tiʼjju kxel kyqʼamaʼne. Porke nya aqeye che yolil, sino kʼonil espíritu santo kyiʼje tuʼn tel kynikʼe tiʼj tiʼ tuʼn t-xi kyqʼamaʼne toj ambʼil aju. 12 Porke che xel qʼoʼn xjal kyuʼn kyerman tuʼn kykubʼ bʼyoʼn ex ax jlu kbʼantel kyuʼn mambʼaj kyukʼil kykʼwal. Atzun kye kʼwalbʼaj che okel meltzʼaj kyiʼj kyman ex che kxel kyqʼoʼn tuʼn kykubʼ bʼyoʼn. 13 Che elel ikʼune kyuʼn xjal tuʼn tpaj nbʼiye. Pero alkye ma tzikʼx tuʼn* tzmaxi aj tul fin, atzun ok kkletel.

14 Aj tok kykeʼyine cosa tzʼil ex in tzaj tiʼn kʼixkʼoj waʼl toj lugar jatumel tuʼn miʼn tten, alkye ma jaw leerinte jlu tzʼelx tnikʼ tiʼj, aqeju in che anqʼin toj Judea kyxi oq kywi witz. 15 Atzunte xjal tjax twi tja,* miʼn kuʼtz ex miʼn tzʼokx toj tja qʼilte tkyaqilju at te. 16 Ex aju xjal in naqʼunan toj ttxʼotxʼ, miʼn meltzʼaj qʼilte t-xbʼalun. 17 ¡Lasmi kywitz xuʼj* kʼokel ten kyal toj ambʼil aju ex qe xuʼj kxel kyqʼoʼn tchʼuʼ kyal! 18 Tuʼntzunju, kukx che naʼne Dios tuʼn miʼn tbʼaj jlu toj jbʼalil.* 19 Porke kyoj qʼij lu ktel sufrimiento. Tzul jun ambʼil jatumel ktel sufrimiento, bʼajx tzaj jun maj ikju atxix tej tkubʼ tbʼinchaʼn Dios txʼotxʼ ex mlay tzaj juntl maj. 20 Noqwit nim kyoj qʼij lu, nijun xjal jaku klet. Pero mlay txi tqʼoʼn Jehová* ambʼil tuʼn tten nim kyoj qʼij lu noq kyuʼn qeju o che jaw tskʼoʼn.

21 Ax ikx qa ma txi tqʼamaʼn jun xjal kyeye, ‹¡Kykeʼyintze lu Cristo at tzalu!› moqa ‹¡Lu at chix!› miʼn txi kyokslaʼne tyol. 22 Porke che ul nya ax tok cristo ex qe falso profeta. Che bʼantel milagro kyuʼn ex qe señal tuʼn kysbʼun kyiʼj xjal, axpe ikx kyiʼj qeju skʼoʼn maj. 23 Tuʼntzunju kyxqʼuqink kyibʼe. Ma txi nqʼamaʼne tkyaqil jlu kyeye naʼmxtoq tbʼaj.

24 Pero aj tkubʼaj sufrimiento kyoj qʼij lu, kʼokel qlolj twitz qʼij, mlay qoptzʼaj xjaw, 25 che tzajel tzʼaq cheʼw twitz kyaʼj ex qeju at kyipumal toj kyaʼj che tzajel luʼlun. 26 Entonces kʼokel kykeʼyin Tkʼwal Xinaq* aj ttzaj tibʼaj muj tukʼil nim tipumal ex in qoptzʼaj. 27 Ex tzul tsamaʼn qe t-anjel tuʼn kyok tchmoʼn qe skʼoʼn maj kyoj qeju kyaje part te twitz txʼotxʼ, jatumel in xi tzyet txʼotxʼ ex jatumel in pon bʼaj kyaʼj.

28 Atzun jaʼlo, che ximane tiʼj xnaqʼtzbʼil lu tiʼj ejemplo* tiʼj tqan higo. Aj tchʼiy t-xuʼl tqʼabʼ ex aj tel t-xaq, in nel kynikʼe tiʼj qa ya chʼix ttzaj jbʼalil. 29 Atzun kyeye aj tok kykeʼyine tkyaqil jlu, tzʼelx kynikʼe tiʼj qa chʼinx tul Tkʼwal Xinaq ik tzeʼn ya otoq tzul ttzi pwert. 30 Ax tok kxel nqʼamaʼne kyeye, mlay che kyim xjal toj ambʼil jaʼlo tzmaxi aj tjapun bʼaj twi tkyaqil jlu. 31 Jaku kubʼ naj kyaʼj ex txʼotxʼ, pero mlayx che kubʼ naj nyole.

32 Mi al jun xjal ojtzqilte alkye qʼij ex alkye or, nix qe anjel toj kyaʼj nix Kʼwalbʼaj, sino oʼkx Mambʼaj. 33 Tuʼntzunju ten kykwente kyiʼje ex kukx che xqʼuqine, porke mintiʼ ojtzqiʼn kyuʼne jtoj bʼaj tkyaqil jlu. 34 In nok jlu ik tzeʼn jun xjal kyaj tqʼoʼn tja ex xiʼ toj juntl tnam. Xi tqʼamaʼn kye tmajen tuʼn kyxqʼuqin tiʼj tja ex xi tqʼoʼn taqʼun teyele junjun kye, atzun te kwentil ttzi pwert xi tqʼamaʼn te tuʼn kukx t-xqʼuqin. 35 Tuʼntzunju kukx che xqʼuqine porke mintiʼ ojtzqiʼn kyuʼne jtoj tzul tajaw ja, qa chʼinxtoq ttzaj qlolj, qa chʼinxtoq ttzaj medianoche, aj tjaw oqʼ tman ekʼ ex qa te prim. 36 Qa mintiʼ ma che xqʼuqine, aj tul, jaku che kanete tuʼn in che jtane. 37 Aju in xi nqʼamaʼne kyeye ax ikx in xi nqʼamaʼne kye kykyaqil: kukx che xqʼuqine».