Qe tbʼanel noticia kubʼ ttzʼibʼin Juan

8 12 Yolin Jesús juntl maj kyukʼil ex xi tqʼamaʼn kye: «In chin oke ik tzeʼn jun spikʼun kye xjal. Alkye ma tzʼok lepeʼ wiʼje, mlay bʼet toj qlolj, noq oʼkx ktel toj spikʼun in tzaj tqʼoʼn chwinqlal». 13 Atzun kye fariseo xi kyqʼamaʼn te: «Mintiʼ tajbʼen tyola porke axa in yolina tiʼja». 14 Xi ttzaqʼweʼn Jesús kye: «Maske in chin yoline wiʼjxe, axix tok aju in xi nqʼamaʼne porke ojtzqiʼn wuʼne jatumel ma chin tzaje ex jatumel chin xeʼle. Pero atzun kyeye mintiʼ ojtzqiʼn kyuʼne jatumel ma chin tzaje ex jatumel chin xeʼle. 15 In che ok lepeʼye tiʼj kyximbʼetze aj kyok xjal toj xjel kyuʼne, atzun weye mintiʼ in che ok xjal toj xjel wuʼne. 16 Pero qa ma tzʼok jun xjal toj xjel wuʼne, toj tumelxix tsentens kbʼel nqʼoʼne. Porke nya njunalxe kbʼel nqʼoʼne tsentens, sino ktel Mambʼaj wukʼile aju tzaj samante weye. 17 Ax ikx tzʼibʼin jlu toj Ley tzaj qʼoʼn kyeye: ‹Qa junx kyyol kabʼe xjal, ax tok aju in tzaj kyqʼamaʼn›. 18 In chin yoline wiʼjxe, pero ax ikx in nok Mambʼaj tzaj samante weye te jun testiw wiʼje». 19 Entonces xi kyqanin te Jesús: «¿Jatumel taʼ Tmana?». Xi ttzaqʼweʼn Jesús kye: «Mintiʼ ojtzqiʼn qine kyuʼne ex mintiʼ ojtzqiʼn Nmane kyuʼne. Noqwit ojtzqiʼn qine kyuʼne, ax ikx mawtlo tzʼok kyojtzqiʼne Nmane». 20 Xi tqʼamaʼn Jesús qe yol lu tej t-xi tqʼoʼn xnaqʼtzbʼil toj templo jatumel ateʼ tkubʼil pwaq. Pero mintiʼ tzyet tuʼn jun xjal porke naʼmxtoq tpon or.

21 Xi tqʼamaʼn Jesús juntl maj kye: «Ok chin xeʼle ex che jyole wiʼje, pero che kyimele tojx kyile. Jatumel chin xeʼle, mlay bʼant tuʼn kyxiʼye». 22 Entonces kyqʼama judiy jlu: «Tiquʼn in tqʼamaʼn: ‹Jatumel chin xeʼle, mlay bʼant tuʼn kyxiʼye›. ¿In kubʼpe t-ximen tuʼn tkubʼ tbʼyon tibʼ?». 23 Xi tqʼamaʼntl Jesús kye: «Atz ateʼye tzalu twitz txʼotxʼ, atzun weye ma chin tzaje toj kyaʼj. Te twitz txʼotxʼ qeye, atzun weye nya te twitz txʼotxʼ qine. 24 Tuʼntzunju ma txi nqʼamaʼne kyeye: ‹Che kyimele tojx kyile›. Porke qa mintiʼ ma txi kyokslaʼne qa aqine iltoq tiʼj tuʼn tul, che kyimele tojx kyile». 25 Xitzun kyqanin te Jesús: «¿Alkyetzuna?». Atzunte Jesús xi ttzaqʼweʼn kye: «Noqx gan in chin yoline kyukʼile. 26 At nimku nyole jaku txi nqʼamaʼne kyiʼje ex nimku tiʼ tuʼn t-xi nqʼamaʼne qa bʼaʼn moqa nya bʼaʼn. Ex aju tzaj samante weye axix tok tyol ex in xi nqʼamaʼne kye xjal aju o tzʼok nbʼiʼne tiʼj». 27 Pero mintiʼ el kynikʼ tiʼj qa atztoq in yolin Jesús tiʼj Mambʼaj. 28 Entonces xi tqʼamaʼn Jesús kye: «Aj tjaw kyqʼoʼne Tkʼwal Xinaq* twitz tzeʼ, kʼelel kynikʼe tiʼj alkye qine ex qa mintiʼ in chin yoline wiʼjxe, sino in chin yoline tiʼjju tzaj t-xnaqʼtzaʼn Mambʼaj weye. 29 Ex aju tzaj samante weye at wukʼile ex mintiʼ o chin kyaj tqʼoʼne njunalxe, porke kukx in xi nbʼinchaʼne aju bʼaʼn in nela toj twitz». 30 Tej t-xi tqʼamaʼn Jesús tkyaqil jlu, ok qeʼ kykʼuʼj nim xjal tiʼj.

31 Entonces xi tqʼamaʼn Jesús kye judiy ok qeʼ kykʼuʼj tiʼj: «Qa kukx ma txi kybʼiʼne nyole,* axix tok che okele te weye ndiscípulo. 32 Kʼelel kynikʼe tiʼj axix tok ex che tzaqpetele tuʼn». 33 Xi kytzaqʼweʼn te: «Tzajni qoʼye tiʼj Abrahán ex bʼajx qo tene te tmajen jun xjal. ¿Tiquʼn in tzaj tqʼamaʼna qeye ‹Che tzaqpetele tuʼn›?». 34 Xi ttzaqʼweʼn Jesús kye: «Ax tok kxel nqʼamaʼne kyeye, kykyaqil qeju in che bʼinchaʼn il, tmajen il qe. 35 Porke mintiʼ in kyaj ten jun majen te jumajx tja tpatrón, atzunte kʼwalbʼaj in kyaj ten te jumajx tja tman. 36 Tuʼntzunju, qa ma che etz tzaqpiʼne tuʼn Kʼwalbʼaj, axix tok che tzaqpetele. 37 Ojtzqiʼn wuʼne qa ma che tzaje tiʼj Abrahán, pero in nok tilil kyuʼne tuʼn nkubʼ kybʼyoʼne porke mintiʼ in xi kyokslaʼne nyole. 38 In chin yoline tiʼjju ma wile tej ẍin tene tukʼil Nmane, atzun kyeye in xi kybʼinchaʼne aju o tzʼok kybʼiʼne tiʼj kymane». 39 Xi kyqʼamaʼn te Jesús: «A qmane Abrahán». Xi ttzaqʼweʼn Jesús kye: «Noqwit tkʼwal Abrahán qeye, axwitlo in bʼant kyuʼne ik tzeʼn te. 40 Pero atzun kyeye in che jyone wiʼje tuʼn nkubʼ kybʼyoʼne, porke ma txi nqʼamaʼne axix tok kyeye aju ma tzʼok nbʼiʼne tiʼj Dios. Atzunte Abrahán mintiʼ bʼant jlu tuʼn. 41 Atzun kyeye in xi kybʼinchaʼne aju in bʼant tuʼn kymane». Xi kyqʼamaʼn te Jesús: «Nya sikʼaj kʼwal qoʼye,* junx Qmane at, a Dios».

42 Xi ttzaqʼweʼn Jesús kye: «Noqwit a Dios Kymane, mawtlo chin ok kykʼujlaʼne. Ex ma chin ule tzalu porke a Dios ma tzaj samante weye. Mintiʼ ma chin ule wuʼnx wibʼe, sino a Dios ma tzaj samante weye. 43 ¿Ojtzqiʼnpe kyuʼne tiquʼn mintiʼ in nel kynikʼe tiʼjju in xi nqʼamaʼne kyeye? Porke mintiʼ in xi kybʼiʼne nyole. 44 A kymane Tajaw il ex in kubʼ kyximane tuʼn t-xi kybʼinchaʼne tajbʼil. Atxix tnejel o tzʼok te jun bʼyol xjal. El tpan tibʼ tiʼj axix tok porke mintiʼ axix tok toj tanmi. Tkyaqil maj aj txi tqʼamaʼn jun yol nya ax tok, in kubʼ tyekʼin alkye tmod. Porke mintiʼ in yolin tiʼj axix tok ex a kyman xjal in che yolin nya ax tok. 45 Atzun weye mintiʼ in xi kyokslaʼne nyole porke in xi nqʼamaʼne axix tok kyeye. 46 ¿Alkye jun kyxole jaku tzaj tqʼamaʼn weye qa at wile? Qa in xi nqʼamaʼne axix tok, ¿tiquʼn mintiʼ in xi kyokslaʼne nyole? 47 Qa te Dios jun xjal, in xi tbʼiʼn tyol Dios. Pero atzun kyeye mintiʼ in che bʼine porke nya te Dios qeye».

48 Tej tok kybʼiʼn judiy jlu, xi kyqʼamaʼn te: «¿Nyapetzun toj tumel aj t-xi qqʼamaʼne qa ‹Jun samaritano teya ex qa ma tzʼokx jun demonio toj tanmiya›?». 49 Xi ttzaqʼweʼn Jesús kye: «Mintiʼ jun demonio toj wanmiye. Oʼkx in jaw nnimsaʼne Nmane, pero atzun kyeye mintiʼ in chin jaw kynimsaʼne. 50 Ex mintiʼ in nok tilil wuʼne tuʼn njaw nnimsan wibʼe, sino a Dios in nok tilil tuʼn tuʼn njaw nimsaʼne, ex toj tkwent taʼ alkye tuʼn tjaw nimsaʼn. 51 Ax tok kxel nqʼamaʼne kyeye, alkye ma txi tbʼiʼn nyole, mlayx til kamik». 52 Xi kyqʼamaʼn judiy te: «Ma tzʼel qnikʼe tiʼj jaʼlo qa ma tzʼokx jun demonio toj tanmiya. Kyim Abrahán ex qe profeta, atzun teya in tzaj tqʼamaʼna ‹Alkye ma txi tbʼiʼn nyole, mlayx kyim›. 53 ¿In kubʼpe t-ximana qa mas nim toklena twitz Abrahán aju qmane? Kyim Abrahán ex qe profeta. Yajtzun teya, ¿alkyetzuna toj twitza?». 54 Xi ttzaqʼweʼn Jesús kye: «Qa aqine ma jaw nnimsan wibʼe, noqx gan in jaw nnimsan wibʼe. Pero a Nmane in jaw nimsante weye aju in tzaj kyqʼamaʼne qa a Kydiose. 55 Ex mintiʼ ojtzqiʼn kyuʼne, atzun weye ojtzqiʼn wuʼne. Ex qa ma txi nqʼamaʼne qa mintiʼ ojtzqiʼn wuʼne, jaku txi nqʼamaʼne nya ax tok yol ik tzeʼn kyeye. Pero ax tok ojtzqiʼn wuʼne ex in xi nbʼiʼne tyol. 56 Tajbʼiltoq Abrahán aju kymane tuʼn tok tkeʼyin qʼij tuʼn wule. Ximen tiʼj* ex nim jaw tzalaj». 57 Entonces xi kyqʼamaʼn judiy te: «Mintiʼ qʼiʼn 50 años tuʼna, ¿ex in tzaj tqʼamaʼna qeye qa o tila Abrahán?». 58 Xi tqʼamaʼn Jesús kye: «Ax tok kxel nqʼamaʼne kyeye, ya in chin nanqʼintoqe naʼmxtoq tul itzʼj Abrahán». 59 Entonces jaw kyiʼn abʼj tuʼn tok kyxoʼn tiʼj Jesús, pero xi tewin tibʼ Jesús kywitz ex etz toj templo.