Qe tbʼanel noticia kubʼ ttzʼibʼin Juan

5 Tej tbʼaj jlu, kubʼ kyikʼsaʼn judiy jun fiesta ex jax Jesús toj Jerusalén. 2 Ex toj Jerusalén attoq jun piscina ttxlaj jun pwert tok tbʼi Pwert kye Rit.* Toj hebreo aju tbʼi piscina Betzata ex tiʼjele kubʼ bʼinchaʼn jweʼ corredor.* 3 Toj lugar lu, e kubʼ kuẍe nim xjal yabʼ, qe moẍ, qe kox ex qe xjal otoq tzʼok tzqij kyqʼabʼ moqa kyqan. 4* —— 5 Ax ikx otoq pon jun xinaq* qʼiʼn 38 años tuʼn yabʼ. 6 Tej til Jesús xinaq lu kuẍli, el tnikʼ tiʼj qa otoq tzikʼ nim ambʼil toklen yabʼil tiʼj ex xi tqanin te: «¿Taja tuʼn tbʼanta?». 7 Xi ttzaqʼweʼn xinaq te: «Tat, mintiʼ jun xjal jaku tzʼonin wiʼje tuʼn nkuʼxe toj piscina aj tyukch aʼ. Tkyaqil maj, in kubʼ nej juntl xjal nwitze ex tnejel in kuʼx». 8 Xi tqʼamaʼn Jesús te: «¡Weʼktza! Qʼinxa tcamilla* ex bʼeta». 9 Ex toj rat aju bʼant xinaq, xi tiʼn tcamilla ex xiʼ bʼet.

Bʼaj tkyaqil jlu toj qʼij sábado. 10 Entonces xi kyqʼamaʼn judiy te xinaq otoq kubʼ qʼanin: «Sábado jaʼlo. Mintiʼ qʼoʼn ambʼil teya tuʼn t-xi tiʼna tcamilla». 11 Pero xi ttzaqʼweʼn xinaq kye: «Aju xjal ma chin bʼante tuʼn ma tzaj tqʼamaʼn weye ‹Qʼinxa tcamilla ex bʼeta›». 12 Xitzun kyqanin te: «¿Alkye ma txi qʼamante teya ‹Qʼinxa tcamilla ex bʼeta›?». 13 Pero nyatoq ojtzqiʼn tuʼn xinaq alkye kubʼ qʼaninte porke otoq kubʼ naj Jesús kyxol xjal.

14 Yajxitl kanet xinaq tuʼn Jesús toj templo ex xi tqʼamaʼn te: «Jaʼlo que ma bʼanta miʼn kubʼ tbʼinchana il juntl maj, si no mas peor nya bʼaʼn tzul tibʼaja». 15 Entonces ikʼ bʼet xinaq ex xi tqʼamaʼn kye judiy qa a Jesús kubʼ qʼaninte. 16 Tuʼntzunju ok kybʼinchaʼn judiy nya bʼaʼn tiʼj Jesús tuʼnju e kubʼ tqʼanin xjal toj qʼij sábado. 17 Pero in xitoq ttzaqʼweʼn Jesús kye: «Kukx in naqʼunan Nmane jaʼlo, ax ikx weye kukx in chin aqʼunane». 18 Tuʼn jlu mas ok tilil kyuʼn judiy tuʼn tkubʼ kybʼyoʼn. Porke nya oʼkx mintiʼ ok tqʼoʼn toklen qʼij sábado, sino ax ikx tuʼnju ok tqʼoʼn Dios te Tman ex ok tqʼon tibʼ ik tzeʼn te Dios.

19 Tuʼntzunju xi tqʼamaʼn Jesús kye: «Ax tok kxel nqʼamaʼne kyeye, mlayx bʼant jun aqʼuntl tuʼn Kʼwalbʼaj tuʼnx tibʼ, oʼkx in xi tbʼinchaʼn aju in nok tkeʼyin tiʼj Mambʼaj. Porke tkyaqilju in bʼant tuʼn Mambʼaj axju in bʼant tuʼn Kʼwalbʼaj. 20 Porke kʼujlan Kʼwalbʼaj tuʼn Mambʼaj ex in xi tyekʼin te tkyaqilju in tbʼinchan. Ex kxel tyekʼin Mambʼaj te Kʼwalbʼaj aqʼuntl mas nim toklen twitz jlu tuʼntzun kyjaw labʼine tiʼj. 21 Porke ik tzeʼn te Mambʼaj in che jaw anqʼin kyimni tuʼn ex in xi tqʼoʼn kychwinqlal, ax ikx te Kʼwalbʼaj kxel tqʼoʼn kychwinqlal xjal tajbʼil tuʼn t-xi tqʼoʼn kye. 22 Porke mlay tzʼok jun xjal toj juicio tuʼn Mambʼaj, sino o txi tqʼoʼn toklen Kʼwalbʼaj tuʼn kyok kykyaqil xjal toj juicio tuʼn. 23 Tuʼntzun tok qʼoʼn toklen Kʼwalbʼaj kyuʼn kykyaqil xjal ik tzeʼn in nok kyqʼoʼn toklen Mambʼaj. Qa mintiʼ in nok tqʼoʼn jun xjal toklen Kʼwalbʼaj ax ikx mintiʼ in nok tqʼoʼn toklen Mambʼaj, aju tzaj samante. 24 Ax tok kxel nqʼamaʼne kyeye, alkye ma txi tbʼiʼn nyole ex ma tzʼokslan tiʼjju tzaj samante weye ktel tchwinqlal te jumajx. Ex mlay tzʼok toj juicio* porke ma tzʼetz toj kamik tuʼn ttzaj qʼoʼn tchwinqlal.

25 Ax tok kxel nqʼamaʼne kyeye, tzul tqʼijlalil ex ya ma tzul, kʼokel kybʼiʼn kyimni tqʼajqʼajel twiʼ Tkʼwal Dios ex alkye qeju ma txi kybʼiʼn tyol che anqʼil. 26 Porke ik tzeʼn te Mambʼaj at tchwinqlal tuʼnx tibʼ,* ax ikx o txi tqʼoʼn toklen Kʼwalbʼaj tuʼn tten tchwinqlal tuʼnx tibʼ. 27 Ex o txi tqʼoʼn toklen tuʼn kyok xjal toj juicio tuʼn porke atzun Tkʼwal Xinaq. 28 Miʼn che jaw labʼine tiʼj jlu, porke tzul tqʼijlalil kʼokel kybʼiʼn kykyaqil xjal maquʼn toj camposant tqʼajqʼajel twiʼ 29 ex che jawil anqʼin. Aqeju kubʼ kybʼinchaʼn bʼaʼn, che jawil anqʼin tuʼn tten kychwinqlal, atzun qeju kubʼ kybʼinchaʼn nya bʼaʼn, che jawil anqʼin tuʼn kyok toj juicio. 30 Mlayx bʼant jun tiʼ wuʼne wuʼnx wibʼe. Ex in che ok xjal toj juicio wuʼne ik tzeʼn in tzaj tqʼamaʼn Mambʼaj weye. Toj tumel in che ok xjal toj juicio wuʼne, porke mintiʼ in xi nbʼinchaʼne aju wajbʼile, sino in xi nbʼinchaʼne aju tajbʼil tzaj samante weye.

31 Noqwit in chin yoline wiʼjxe, mlay txi kyokslaʼn xjal nyole. 32 Pero at juntl in yolin wiʼje kyukʼil xjal ex ojtzqiʼn wuʼne qa axix tok tyol. 33 Xi kysamaʼne junjun xjal tukʼil Juan ex aju tzaj tqʼamaʼn Juan wiʼje axix tok. 34 Nya il tiʼj tuʼn tyolin jun xjal wiʼje, pero in xi nqʼamaʼne tkyaqil jlu tuʼntzun kyklete. 35 Ok Juan ik tzeʼn jun kandil in kʼant ex in qoptzʼaj. Pero noq chʼin ambʼil e jaw tzalaje tiʼj tspikʼumal. 36 Xi tqʼamaʼn Juan kye xjal qa atz in tzaje tukʼil Mambʼaj. Pero qʼanchaʼlxix qa a Mambʼaj tzaj samante weye, tuʼnju in xi nbʼinchaʼne aqʼuntl tzaj tqʼamaʼn weye tuʼn t-xi nbʼinchaʼne. 37 Ex o tzaj tyekʼin Mambʼaj qa a tzaj samante weye. Bʼajx tzʼok kybʼiʼne tqʼajqʼajel twiʼ Mambʼaj ex bʼajx kyile tzeʼn keʼyin. 38 Ex mintiʼ in xi kykʼuʼne tyol toj kyanmiye porke mintiʼ in che okslane tiʼjju tzaj tsamaʼn.

39 In che xnaqʼtzane tiʼj tyol Dios porke in kubʼ kyximane qa ktzajel tqʼoʼn kychwinqlale te jumajx. Ex atz wiʼje in yolin tyol Dios. 40 Maske ikju, nya kyaje tuʼn kytzaje wukʼile tuʼn tten kychwinqlale. 41 Nya waje tuʼn njaw nimsaʼne kyuʼn xjal. 42 Pero ojtzqiʼn wuʼne qa nya kʼujlaʼn Dios kyuʼne. 43 Ma chin ule toj tbʼi Nmane ex mintiʼ ma che okslane wiʼje. Pero noqwit tzul juntl xjal tuʼnx tibʼ, jaku che okslane tiʼj. 44 ¿Tzeʼn jaku che okslane wiʼje qa oʼkx in jaw kynimsaʼn kyibʼe kyxolxe ex mintiʼ in nok tilil kyuʼne tuʼn kytene bʼaʼn twitz oʼkxku jun Dios? 45 Miʼn kubʼ kyximane qa kxel nqʼamaʼne kyile twitz Nmane. Alkye in xi qʼamante kyile atzun Moisés aju in nok qeʼ kykʼuʼje tiʼj. 46 Porke noqwit ma txi kyokslane tyol Moisés, ax ikx mawtlo che okslane wiʼje, porke aju kubʼ ttzʼibʼin Moisés wiʼje in yolin. 47 Pero qa mintiʼ ma txi kyokslane aju kubʼ ttzʼibʼin, ¿tzeʼn jaku che okslane tiʼj nyole?».