Qe tbʼanel noticia kubʼ ttzʼibʼin Mateo

9 Jax Jesús toj jun bark, ikʼx toj mar ex pon toj ttnam.* 2 Tzajtzun qʼiʼn jun xjal tukʼil Jesús twitz jun camilla porke mintiʼ in bʼant tyukch. Tej tok tkeʼyin Jesús qa at nim qʼuqbʼil kykʼuʼj, xi tqʼamaʼn jlu te xjal: «¡Miʼn bʼaj tkʼuʼja nkʼwal! Ma che kubʼ najsaʼn tila». 3 Ex kubʼ kyximen junjun escriba toj kyanmi: «In xmayin xjal lu tiʼj Dios». 4 Tuʼnju ojtzqiʼntoq tuʼn Jesús alkye kyximbʼetz, xi tqʼamaʼn jlu kye: «¿Tiquʼn in kubʼ kyximane nya bʼaʼn toj kyanmiye? 5 Kyqʼamantze weye, ¿alkye mas fácil tuʼn tbʼant? ¿Aju tuʼn t-xi qʼamet ‹ma che kubʼ najset tila› moqa aju tuʼn t-xi qʼamet ‹weʼktza ex bʼeta›? 6 Pero tuʼn tok kykeʼyine qa at toklen Tkʼwal Xinaq* tuʼn tkubʼ tnajsaʼn kyil xjal tzalu twitz txʼotxʼ...». Tuʼntzunju, xi tqʼamaʼn jlu te xjal mintiʼ in bʼant tyukch: «Weʼktza, qʼinxa tcamilla ex meltzʼaja tjaya». 7 Jawtzun weʼ xjal ex meltzʼaj tja. 8 Tej tok kykeʼyin xjal lu, e jaw labʼin* ex jaw kynimsaʼn Dios tuʼnju otoq tzaj tqʼoʼn kyoklen xjal tuʼn tbʼant jlu kyuʼn.

9 Tej tikʼ bʼet Jesús toj lugar aju, ok tkeʼyin jun xjal aju Mateo tbʼi, qʼuqlitoq toj lugar jatumel in che cobrarin xjal impuesto. Ex xi tqʼamaʼn Jesús jlu te: «Lepeka wiʼje». Jawtzun weʼ Mateo ex ok lepeʼ tiʼj. 10 Yajxitl, tej tzmatoq in waʼn* Jesús toj tja Mateo, e pon nim xjal in che cobrarin impuesto ex junjuntl xjal in che bʼinchan il. Ex e kubʼ qeʼ wal ttxlaj Jesús ex qe tdiscípulo. 11 Pero tej tok kykeʼyin fariseo jlu, xi kyqanin kye tdiscípulo Jesús: «¿Tiquʼn in waʼn xnaqʼtzal kyeye kyukʼil qeju in che cobrarin impuesto ex qe xjal in che bʼinchan il?». 12 Tuʼnju xi tbʼiʼn Jesús aju kyqʼama, xi ttzaqʼweʼn kye: «Qe xjal mintiʼ yabʼil kyiʼj, nya il tiʼj tuʼn kyxiʼ tukʼil jun doctor, sino oʼkx qe xjal yabʼ. 13 Tuʼntzunju kyxiʼye ex tzʼelx kynikʼe kyiʼj yol lu tzʼibʼin toj tyol Dios: ‹Waje tuʼn tkubʼ kyyekʼin xjal qʼaqʼbʼil kykʼuʼj ex nya tuʼn ttzaj kyqʼoʼn ofrenda weye›. Porke mintiʼ ma chin ule txkol kye xjal tzʼaqli, sino aqe xjal in che bʼinchan il».

14 E pontzun laqʼeʼ tdiscípulo Juan tukʼil Jesús ex xi kyqanin te: «¿Tiquʼn nya naqʼli qe teya tdiscípulo tuʼn tok ayuno kyuʼn ik tzeʼn qeye ex qe fariseo?». 15 Xi ttzaqʼweʼn Jesús kye: «Aj tok jun boda, nya il tiʼj tuʼn ttzaj kybʼis tamiw novio porke kukx at kyukʼil. Pero kpol qʼij jatumel ya mlay ten* kyukʼil tamiw ex toj ambʼil lu kxel tzyet tuʼn tok ayuno kyuʼn. 16 Mintiʼ in nok tslepin* jun xjal jun piẍ tela akʼaj tiʼj jun ttxʼaqin xbʼalun. Qa ma bʼant jlu tuʼn, mas kbʼajel laq ttxʼaqin xbʼalun aj ttzaj jukʼuʼn tuʼn tela akʼaj porke mas kyuw. 17 Ax ikx mintiʼ in kux tqʼoʼn jun xjal akʼaj vin toj jun ttxʼaqin bolsa te cuero. Qa ma bʼant jlu tuʼn, jaku tzʼel laq cuero ex jaku tzʼel qojl vin ex ya mintiʼ tajbʼen cuero. Tuʼntzunju, in kux kyqʼoʼn xjal akʼaj vin kyoj akʼaj bolsa te cuero tuʼntzun miʼn kynaj».

18 Tej naʼmxtoq tbʼaj yolin Jesús, pon laqʼeʼ jun xjal nim toklen tukʼil, kubʼ ẍmejeʼ twitz* ex xi tqʼamaʼn jlu te: «Ya malo kyim nmeʼjele, pero qoʼ wukʼile tuʼn tkubʼ tqʼoʼna tqʼabʼa tibʼaj ex kʼanqʼil juntl maj».

19 Tuʼntzunju, jaw weʼ Jesús kyukʼil tdiscípulo ex e xi lepeʼ tiʼj xjal. 20 Pero de repente pon laqʼeʼ jun xuʼj* tiʼjxi Jesús ex ok ttzyuʼn ttxaʼn t-xbʼalun. Otoq tzikʼ 12 abʼqʼi toklen jun yabʼil* tiʼj ex otoq tzʼel nim tchkʼel tuʼn. 21 Xi tbʼinchaʼn jlu tuʼnju kubʼ t-ximen: «Ok chin bʼantele maske oʼkx t-xbʼalun ma tzʼok ntzyuʼne». 22 Ex ajtz tkeʼyin Jesús tiʼjxi ex tej tok tkeʼyin xuʼj xi tqʼamaʼn jlu te: «¡Miʼn xobʼa nmeʼjel! Ma bʼanta tuʼnju at qʼuqbʼil tkʼuʼja». Ex toj ambʼil aju bʼant xuʼj.

23 Yajxitl tej tokx Jesús toj tja xjal nim toklen, ok tkeʼyin qa in che oqʼ xjal ex qa in che schʼin. Ax ikx ok tkeʼyin qa ateʼ junjun xjal in che tokarin tiʼj flauta. 24 Xitzun tqʼamaʼn Jesús kye xjal: «Kyexe, porke mintiʼ ma kyim tal txin, sino in jtan». Atzun kye xjal e jaw tzeʼn tiʼj ex e ok ten xmayil tiʼj. 25 Tejtzun kyetz xjal, okx Jesús jatumel taʼ tal txin, tzaj ttzyuʼn tqʼabʼ ex jaw weʼ txin tuʼn. 26 Ex e ok ten xjal yolil tiʼjju bʼant tuʼn Jesús kyoj lugar ateʼ nqayin atz.

27 Tej tikʼ bʼet Jesús toj lugar aju, e ok lepeʼ kabʼe xjal moẍ tiʼj ex tukʼil tqʼajqʼajel kywiʼ xi kyqʼamaʼn te: «¡Aya Tkʼwal David, qʼaqʼantz tkʼuʼja qiʼje!». 28 Tej tokx Jesús toj jun ja, e pon laqʼeʼ moẍ tukʼil. Xitzun tqanin Jesús kye: «¿Qʼuqlipe kykʼuʼje tiʼj qa jaku che kubʼ nqʼanine?». Atzun kye xjal moẍ xi kytzaqʼweʼn: «Ikju Tat, qʼuqli qkʼuʼje tiʼj». 29 Oktzun tmakoʼn Jesús kywitz ex xi tqʼamaʼn kye: «Tuʼnju at qʼuqbʼil kykʼuʼje, che jaqetel kywitze». 30 Ex jaqet kywitz xjal moẍ. Pero xi tqʼamaʼn Jesús jlu kye: «Ten kykwente kyiʼje tuʼn miʼn tok kybʼiʼn txqantl aju ma bʼant wuʼne». 31 Pero tej kyetz bʼet xjal lu, e ok ten yolil tiʼj Jesús kyoj lugar nqayin ateʼ atz.

32 Tej kyikʼ bʼet, pon kyiʼn xjal jun xinaq tukʼil Jesús aju mintiʼ in bʼant tyolin ex at jun demonio toj tanmi. 33 Tej tetz tiʼn Jesús demonio toj tanmi xjal, bʼant tyolin. Tuʼn jlu, e jaw labʼin nim xjal ex kyqʼama: «Naʼmxtoq tok qkeʼyine jlu toj tnam Israel». 34 Atzun kye fariseo kyqʼama: «Tuʼn tipumal nejenel kye demonio in che ex tlajoʼn qe demonio».

35 Bʼaj tbʼetin Jesús toj tkyaqil tnam ex kyoj kykyaqil aldea. Xi tqʼoʼn xnaqʼtzbʼil kyoj ja te kʼulbʼil ex predicarin tiʼj tbʼanel noticia tiʼj Tgobierno Dios. Ax ikx kubʼ tqʼanin alkyexku yabʼil ex kʼixkʼoj kyiʼj xjal. 36 Tej tok tqʼoʼn twitz kyiʼj nim xjal e pon tukʼil, tzaj qʼaqʼin tkʼuʼj kyiʼj tuʼnju e ok ik tzeʼn qe rit* mintiʼ pastoril kye ex otoq tzʼok bʼinchaʼn nya bʼaʼn kyiʼj. 37 Ex xi tqʼamaʼn Jesús kye tdiscípulo: «At nim twitz awal tuʼn tjaw chmet, pero nya nim qe aqʼunal ateʼ. 38 Tuʼntzunju, che kubʼsane twitz Tajaw awal tuʼn ttzaj tsamaʼn mas aqʼunal».