Qe tbʼanel noticia kubʼ ttzʼibʼin Lucas

14 Juntl maj, toj qʼij sábado, xiʼ Jesús wal toj tja jun nejenel kye fariseo. Ex ok bʼaj kywitz kykyaqil qeju ateʼ toj ja tiʼj. 2 Porke twitz Jesús otoq kubʼ weʼ jun xinaq* otoq txi mal t-xmilal tuʼn jun yabʼil.* 3 Entonces xi tqanin Jesús jlu kye qeju ojtzqiʼn Ley kyuʼn ex kye fariseo: «¿In tzajpe tqʼoʼn Ley ambʼil tuʼn tkubʼ qʼanin jun xjal toj sábado moqa miʼn?». 4 Pero mintiʼ jun kyyol xi kytzaqʼweʼn te Jesús. Entonces tzaj ttzyuʼn Jesús xinaq, kubʼ tqʼanin ex xi tmaʼn te tuʼn tmeltzʼaj tja. 5 Ex xi tqʼamaʼn jlu kye: «¿Alkye jun kyxole mlay jatz tiʼn jun tkʼwal moqa jun tman twakx qa ma kux tzʼaq toj jun pozo toj qʼij sábado?». 6 Ex mintiʼ bʼant ttzaqʼwet xjel lu kyuʼn.

7 Tej tok tqʼoʼn Jesús twitz tiʼj qa e kubʼ qeʼ xjal xi qʼoʼn invitación kyiʼj kyoj lugar mas tbʼanel, xi tqʼamaʼn xnaqʼtzbʼil* lu kye: 8 «Qa ma tzaj qʼoʼn invitación tiʼja tuʼn t-xiʼya wal toj jun boda, miʼn kubʼ qeʼya* toj lugar mas tbʼanel. Porke jaku pon juntl invitad mas nim toklen twitza. 9 Qa ma bʼaj jlu, kpol xjal xi tqʼoʼn invitación kyiʼje ex kxel tqʼamaʼn jlu teya: ‹¿Jakupe txi tqʼoʼna tlugara te xinaq lu?›. Ex kbʼel tchʼixwiya kywitz txqantl aj txiʼya de último. 10 Tuʼntzunju, aj ttzaj qʼoʼn jun invitación tiʼja, mas bʼaʼn tuʼn tkubʼ qeʼya de último. Entonces kpol xjal xi tqʼoʼn invitación tiʼja ex kxel tqʼamaʼn jlu teya: ‹Wamiw, qeʼkuya toj juntl lugar mas tbʼanel›. Iktzun tten kʼokel qʼoʼn toklena kywitz txqantl invitad. 11 Porke alkye in jaw tnimsan tibʼ, kbʼel tchʼixwi, pero alkye in kubʼ tiʼn tibʼ, kjawil nimsaʼn».

12 Yajxitl xi tqʼamaʼn te xinaq otoq txi tqʼoʼn invitación tiʼj: «Aj tkubʼ tbʼinchaʼna jun almuerzo moqa jun wabʼj te qale, miʼn txi tqʼoʼna invitación kyiʼj tamiwa, kyiʼj termana, kyiʼj tfamiliara ex kyiʼj tvecina qʼinun. Qa ma bʼant jlu tuʼna, ax ikx tzul kyqʼoʼn invitación tiʼja ex atzun t-xel tzul qʼoʼn teya. 13 Mas bʼaʼn qʼonxa invitación kyiʼj prow, kyiʼj impedido, kyiʼj kox ex kyiʼj moẍ aj tkubʼ tbʼinchaʼna jun wabʼj. 14 Ex kbʼel tnaʼna nim tzalajbʼil porke mlay kanet tumel kyuʼn tuʼn taj kyqʼoʼn t-xel teya. Qa ma bʼant jlu tuʼna, tzul qʼoʼn t-xel teya aj kyjaw anqʼin xjal tzʼaqli».

15 Tej tok tbʼiʼn jun kyxol qeju xi qʼoʼn invitación kyiʼj aju tma Jesús, xi tqʼamaʼn te: «At tzalajbʼil te xjal kwaʼl* toj Tgobierno Dios».

16 Xi tqʼamaʼn Jesús te: «Jun maj, kubʼ tbʼinchaʼn jun xinaq jun wabʼj ex xi tqʼoʼn invitación kyiʼj nim xjal. 17 Tej tpon or tuʼn tetz qʼoʼn wabʼj, xi tqʼamaʼn xinaq te jun tmajen tuʼn t-xi tqʼamaʼn jlu kye invitad: ‹Che tzaje, ya ma bʼant tkyaqil›. 18 Pero xi kyqʼamaʼn kykyaqil te tiquʼn mlay che pon. Xi tqʼamaʼn tnejel te: ‹Ma tzaj nlaqʼoʼne jun piẍ ntxʼotxʼe ex il tiʼj tuʼn nxiʼye keʼyilte. Najsama, mlay chin pone›. 19 Atzun juntl xi tqʼamaʼn te: ‹Ma tzaj nlaqʼoʼne jweʼ par tman nwakxe ex ma chinxe keʼyilte qa bʼaʼn qe. Najsama, mlay chin pone›. 20 Ex xi tqʼamaʼn juntl te: ‹Tzma ẍin kubʼ mojeʼye ex mlay bʼant tuʼn npone›. 21 Tej tmeltzʼaj majen, xi tqʼamaʼn tkyaqil te tpatrón. Tzajtzun tqʼoj patrón ex xi tqʼamaʼn te tmajen: ‹Ku txiʼya kyoj kay principal ex qe callejón toj tnam ex qʼintza qe xjal prow tukʼila, qe impedido, qe moẍ ex qe kox›. 22 Yajxitl xi tqʼamaʼn majen te tpatrón: ‹Patrón, ma txi nbʼinchaʼne aju ma tzaj tqʼamaʼna, pero atx junjuntl lugar›. 23 Tuʼntzunju xi tqʼamaʼn patrón te tmajen: ‹Txiʼya kyoj bʼe ex kyoj tqʼabʼ bʼe ex qʼamanxa kye xjal tuʼn kyoktz toj njaye tuʼntzun tnoj. 24 Porke kxel nqʼamaʼne kyeye, mlay txi tnikʼbʼeʼn jun xjal ma txi nqʼoʼne invitación tiʼj aju wabʼj ma kubʼ nbʼinchaʼne›».

25 E ok lepeʼ nim xjal tiʼj Jesús. Ajtz tkeʼyin Jesús qe xjal ex xi tqʼamaʼn jlu kye: 26 «Qa taj jun xjal tuʼn tok lepeʼ wiʼje, il tiʼj tuʼn tel tikʼun* tman, ttxuʼ, t-xuʼjil, qe tkʼwal, qe terman, qe tanabʼ ex aju tchwinqlal. Si no, mlay tzʼok te weye ndiscípulo. 27 Ex oʼkx jaku tzʼok jun xjal te weye ndiscípulo qa ma txi tiʼn ttzeʼ te kʼixbʼisabʼil* ex qa ma tzʼok lepeʼ wiʼje. 28 Kbʼel nqʼoʼne jun ejemplo kywitze. Qa tajbʼil jun xjal kyxole tuʼn tjaw tbʼinchaʼn jun ja,* ¿mintiʼpe in kubʼ qeʼ ximel tnejel jteʼ kbʼajel tuʼn ex qa kjel bʼant tuʼn? 29 Porke si no oʼkx kbʼel tqʼoʼn tsimyentil ex mlay kyaj bʼant tuʼn. Ex aj tok kyqʼoʼn xjal kywitz tiʼj, che okel ten xmayil tiʼj 30 ex kxel kyqʼamaʼn: ‹Noq sok ttzyuʼn xjal lu ja ex mintiʼ ma kubʼaj tuʼn›. 31 Ex qa tajbʼil jun rey tuʼn t-xiʼ qʼojil tukʼil juntl rey, ¿mintiʼpe in kubʼ qeʼ tnejel ex in xi tqanin qa jaku kubʼ kyiʼj 20 mil tsoldad juntl rey tuʼn kyukʼil 10 mil tsoldad? 32 Porke qa mlay xkye kyiʼj, mas bʼaʼn tuʼn t-xi tqʼamaʼn kye junjun xjal tuʼn kyxiʼ tukʼil juntl rey ex tuʼn t-xi kyqanin te tuʼn miʼn kyqʼojin. 33 Ax jlu in bʼaj kyukʼile, qa mintiʼ ma kyaj kyqʼoʼne tkyaqilju at kyeye, mlay che oke te weye ndiscípulo.

34 Tbʼanel te atzʼin. Pero qa ma naj tkʼokʼjal, ¿tzeʼn jaku ten tkʼokʼjal juntl maj? 35 Ya mintiʼtl tajbʼen, ni te txʼotxʼ nix te tzʼis ex tuʼntzunju nex xoʼn kyuʼn xjal. Alkye at tẍkyin tuʼn tbʼin, bʼinx qe yol lu».