Qe tbʼanel noticia kubʼ ttzʼibʼin Lucas

10 Tej tbʼaj tkyaqil jlu, jaw tskʼoʼn Qajaw juntl 70 kyxol tdiscípulo. Xi tqʼamaʼn kye tuʼn kyxiʼ nej twitz kakabʼ kybʼet kyojele tnam ex qe lugar jatumel tuʼn t-xiʼ. 2 Ex xi tqʼamaʼn jlu kye: «Nimxix twitz awal tuʼn tjaw chmet, pero nya nim kybʼet aqʼunal. Tuʼntzunju, che kubʼsane twitz Tajaw awal tuʼn ttzaj tsamaʼn mas aqʼunal tuʼn tjaw chmet. 3 ¡Kyxiʼye! Che xel nsamaʼne ik tzeʼn qe rit* kyxol xoʼj. 4 Miʼn txi kyiʼne bolsa tkubʼil pwaq kyukʼile, ni morral tkubʼil wabʼj nix kyxjabʼe, ex miʼn tzʼok kyqʼolbʼeʼne jun xjal* toj bʼe. 5 Aj kyokxe toj alkyexku ja, tnejel kyqʼamanxe: ‹Tenwt mujbʼabʼil toj ja lu›. 6 Qa mintiʼ jun tamiw mujbʼabʼil at, bʼaʼn tuʼn tmeltzʼaj mujbʼabʼil juntl maj kyukʼile. Pero qa at jun tamiw mujbʼabʼil, bʼaʼn tuʼn tkyaj ten mujbʼabʼil tukʼil aju ma txi kyqanine. 7 Ex ax che tenkje tja. Kywaʼnxe ex kykʼanxe tkyaqilju tzul qʼoʼn kyeye, porke il tiʼj tuʼn tchjet twi tkʼuʼj aqʼunal. Ex miʼn che jyone kyposade toj juntl ja.

8 Qa ma che okx qʼiʼne toj alkyexku tnam jatumel ma che okxe, kywaʼnxe tkyaqilju tzul qʼoʼn kyeye. 9 Ex kyqʼaninkuye qe xjal yabʼ toj lugar aju ex kyqʼamanxe jlu kye: ‹Ma tzul laqʼeʼ Tgobierno Dios kyukʼile›. 10 Pero qa mintiʼ ma che okx qʼiʼne toj alkyexku tnam jatumel ma che okxe, che etze kyoj kay principal ex kyqʼamanxe: 11 ‹Tuʼn tel kynikʼe tiʼj qa o kubʼ kybʼinchaʼne jun nya bʼaʼn, ax ikx in nel qchtoʼne quq ma tzʼok tiʼj qqane toj tnam lu. Pero tzʼelx kynikʼe tiʼj qa ya ma tzul laqʼeʼ Tgobierno Dios›. 12 Ex kxel nqʼamaʼne jlu kyeye, toj Qʼij te Juicio mas nim kʼixkʼoj kbʼel tnaʼn tnam lu twitz tnam te Sodoma.

13 ¡Lasmi twitza Corazín! ¡Ex lasmi twitza Betsaida! Porke noqwit aʼye xjal te Tiro ex Sidón ok keʼyinte milagro ma bʼant kyxole, owtlo tzikʼ nim ambʼil tajtzlen tiʼj kyanmi, e kubʼwitlo qeʼ toj tzaʼj ex okwitlo kyqʼoʼn kyxbʼalun tuʼn tkubʼ kyyekʼin kybʼis.* 14 Tuʼntzunju mas nim kʼixkʼoj kbʼel kynaʼne twitz tnam te Tiro ex Sidón toj Qʼij te Juicio. 15 Yajtzun teya Capernaúm, ¿okpe kxeʼla toj kyaʼj? ¡Mlay! Sino kxeʼla toj Muqbʼil.*

16 Alkye ma txi tbʼiʼn kyyole, ax ikx in xi tbʼiʼn nyole, ex alkye mintiʼ ma txi tbʼiʼn kyyole, ax ikx mintiʼ in xi tbʼiʼn nyole. Ex alkye mintiʼ ma txi tbʼiʼn nyole, ax ikx mintiʼ in xi tbʼiʼn aju ma tzaj samaʼn weye».

17 Entonces e meltzʼaj 70 tdiscípulo Jesús, in che tzalaj ex xi kyqʼamaʼn te: «Tat, ax ikx ma txi kybʼiʼn demonio aju xi qqʼamaʼne kye tej sajbʼen tbʼiya quʼne». 18 Tej tok tbʼiʼn Jesús jlu, xi tqʼamaʼn kye: «Ma wile Satanás in kutz tzʼaq twitz kyaʼj ik tzeʼn jun qʼankyoq. 19 Ma txi nqʼoʼne kyoklene tuʼn kykubʼ weʼye kyibʼaj kan* ex qe alacrán, ex tuʼn tkubʼ tiʼj tkyaqil tipumal aj qʼoj kyuʼne. Ex mintiʼ jun tiʼ jaku tzʼok tbʼinchaʼn nya bʼaʼn kyiʼje. 20 Pero miʼn che jaw tzalaje tuʼnju in che bʼin demonio kyeye. Sino che tzalaje tuʼnju ma kubʼ tzʼibʼin kybʼiye toj kyaʼj». 21 Toj ax or aju, kubʼ tnaʼn Jesús nim tzalajbʼil tuʼn espíritu santo ex tqʼama: «Aya Nman Tajaw kyaʼj ex txʼotxʼ, in jaw nnimsaʼna kywitz xjal porke ma kubʼ tewina qe xnaqʼtzbʼil lu kywitz qeju at kynabʼil ex list qeʼ ex ma txi tyekʼina kye qeju in che ok ik tzeʼn qe tal kʼwal. Ikju Nman, ma bʼant jlu tuʼna porke atzun mas bʼaʼn toj twitza». 22 Ex xi tqʼamaʼntl Jesús jlu kye: «Ma tzaj qʼoʼn tkyaqil weye tuʼn Nmane. Oʼkx Mambʼaj ojtzqilte Kʼwalbʼaj. Ex oʼkx Kʼwalbʼaj ojtzqilte Mambʼaj. Ex kykyaqil qeju ma txi qʼoʼn xnaqʼtzbʼil kye tuʼn Kʼwalbʼaj, kʼelel kynikʼ tiʼj alkye Mambʼaj».

23 Tej tbʼaj jlu, ajtz tkeʼyin Jesús qe tdiscípulo ex xi tqʼamaʼn jlu kye tej ateʼtoq kyjunalx: «At tzalajbʼil kye xjal in nok kykeʼyin tkyaqilju in kyile. 24 Porke ax tok kxel nqʼamaʼne kyeye, e ten nim profeta ex qe rey kyajtoq tuʼn tok kykeʼyin aju in nok kyqʼoʼne kywitze tiʼj jaʼlo, pero mintiʼ ok kyqʼoʼn kywitz tiʼj. Ex kyajtoq tuʼn tok kybʼiʼn aju in nok kybʼiʼne, pero mlay bʼant tuʼn tok kybʼiʼn».

25 Entonces jaw weʼ jun xinaq* attoq nim tojtzqibʼil tiʼj Ley ex xi tqanin jlu te Jesús tuʼn tok tqʼoʼn toj prueba: «Xnaqʼtzal, ¿tiʼ il tiʼj tuʼn tbʼant wuʼne tuʼn tkambʼet chwinqlal te jumajx?». 26 Xi tqʼamaʼn Jesús te: «¿Tiʼ tzʼibʼin toj Ley? ¿Tiʼ in jaw tleerina toj?». 27 Atzunte xinaq xi ttzaqʼweʼn te: «‹Kʼujlama Jehová* aju Tdiosa tuʼn tkyaqil tanmiya, tuʼn tkyaqil tchwinqlala, tuʼn tkyaqil tipumala ex tuʼn tkyaqil tnabʼila›, ex ‹kʼujlama qe txqantl ik tzeʼn in nok tkʼujlan tibʼa›». 28 Xi tqʼamaʼn Jesús te: «Bʼaʼn aju ma tzaj tqʼamaʼna. Kukx bʼinchama jlu ex kkambʼetel chwinqlal tuʼna».

29 Pero tajbʼiltoq xinaq tuʼn tkubʼ tyekʼin qa tzʼaqli. Tuʼntzunju xi tqanin te Jesús: «¿Pero alkyeqe txqantl?». 30 Xi ttzaqʼweʼn Jesús te: «Jun maj, kuʼtz jun xinaq toj Jerusalén toj bʼe in pon toj Jericó, pero tzyet kyuʼn eleqʼ ex el kyiʼn tkyaqilju at te tukʼix t-xbʼalun. Bʼaj golpearin kyuʼn eleqʼ ex chʼixme kubʼ bʼyoʼn kyuʼn ex yajxitl e jel oq. 31 Pero cabal kuʼtz jun pal toj bʼe. Tej tok tkeʼyin xinaq, ikʼx toj juntl plaj ex mintiʼ kubʼ weʼ. 32 Ex ax jlu bʼant tuʼn jun levita. Tej tpon toj lugar jatumel taʼ xinaq ex tej tok tkeʼyin, ikʼx toj juntl plaj bʼe ex mintiʼ kubʼ weʼ. 33 Pero de repente kuʼtz jun samaritano toj bʼe ex ikʼ jatumel taʼ xinaq. Tej tok tkeʼyin, tzaj qʼaqʼan tkʼuʼj tiʼj. 34 Xi laqʼeʼ ttxlaj xinaq ex ok tqʼoʼn aseyt ex vin tiʼj t-xmilal jatumel bʼaj kʼixbʼisaʼn ex yajxitl ok tpotzin tukʼil junjun piẍ tela. Yajxitl jax tqʼoʼn tibʼaj tbur, xi tiʼn toj jun posad* ex ok t-xqʼuqin. 35 Toj juntl qʼij, jatz tiʼn kabʼe denario,* xi tqʼoʼn te tajaw posad ex xi tqʼamaʼn te: ‹Keʼyinxa xjal lu, ex qa mas nim pwaq ma bʼaj tgastarina ok kxel nchjoʼne teya aj wule›. 36 Toj twitza, ¿alkye kyxol oxe xjal lu kubʼ tyekʼin tkʼujlabʼil tiʼj xinaq tzyet kyuʼn eleqʼ?». 37 Xi ttzaqʼweʼn xinaq te Jesús: «Aju tzaj qʼaqʼin tkʼuʼj tiʼj». Entonces xi ttzaqʼweʼn Jesús te: «Txiʼya ex ax jlu bʼinchama».

38 Tej in che bʼet, okx Jesús toj jun aldea. Toj lugar aju, xi qʼoʼn tposad tuʼn jun xuʼj* Marta tbʼi ex atz kyaj ten toj tja. 39 Ex attoq jun titzʼin Marta aju María tbʼi. Kubʼ qeʼ t-xeʼ tqan Qajaw ex kubʼ ten bʼilte. 40 Pero atzunte Marta xi bʼaj twiʼ tiʼj nim aqʼuntl tuʼn tbʼant tuʼn. Tuʼntzunju pon laqʼeʼ tukʼil Jesús ex xi tqʼamaʼn te: «Tat, ¿mintiʼpe in nok tqʼoʼna twitza tiʼj qa ma chin kyaj qʼoʼne njunalxe tuʼn María tiʼj aqʼuntl? Qʼamanxa te tuʼn ttzaj onil weye». 41 Atzunte Qajaw xi ttzaqʼweʼn te: «Marta, Marta, in tzaj bʼaj tkʼuʼja tiʼj nim taqʼuna tuʼn tbʼant. 42 Pero nya nim tiʼ at tajbʼen qe ex oʼkxlo jun. Atzun ma jaw tskʼoʼn María, aju mas tbʼanel ex mlay tzʼel qʼiʼn te».