Qe tbʼanel noticia kubʼ ttzʼibʼin Lucas

18 Entonces kubʼ tqʼoʼn Jesús jun ejemplo kywitz tuʼn tel kynikʼ tiʼj qa nim toklen tuʼn kukx kynaʼn Dios ex tuʼn miʼn tkyaj kytzaqpiʼn. 2 Xi tqʼamaʼn kye: «Toj jun tnam, ten jun jwes mintiʼ xobʼ twitz Dios ex mintiʼ xobʼ kywitz xjal. 3 Toj tnam lu, ax ikx anqʼin jun xuʼj* viud. Kukx xiʼ twitz jwes ex xi tqʼamaʼn te: ‹Toj tumel bʼinchanxa tiʼj nya bʼaʼn ma tzaj qxole tukʼil aj qʼoj wiʼje›. 4 Toj jun ambʼil, mintiʼ xi tbʼinchaʼn jwes aju xi tqanin xuʼj te, pero yajxitl kubʼ t-ximen toj tanmi: ‹Mintiʼ in chin xobʼe twitz Dios ex mintiʼ in chin xobʼe kywitz xjal, 5 pero ma chin sikte tiʼj xuʼj lu. Mas bʼaʼn kxel nbʼinchaʼne tiʼj nya bʼaʼn ma tzaj kyxol toj tumel, porke si no tzul mas nqʼoje tuʼn›». 6 Ex xi tqʼamaʼntl Qajaw kye: «¿Mape tzʼel kynikʼe tiʼjju xbʼant tuʼn jwes maske nya bʼaʼn? 7 Yajtzun te Dios, ¿mlaypetzulo tzʼonin kyiʼj qeju o che jaw tskʼoʼn aqeju in che kubʼsan twitz qʼijtl ex qonikʼen? ¿Ex mlaypetzulo ten tpasens kyiʼj? 8 Ax tok kxel nqʼamaʼne kyeye, jurat tzul tqʼoʼn Dios onbʼil kyeye. Pero aj tul Tkʼwal Xinaq,* ¿okpe che tel xjal tzalu twitz txʼotxʼ kʼokel qeʼ kykʼuʼj tiʼj Dios?».*

9 Ax ikx kubʼ tqʼoʼn Jesús jun ejemplo kywitz xjal kubʼ kyximen qa tzʼaqli qe ex mintiʼ ok kyqʼoʼn kyoklen txqantl. Tqʼama jlu: 10 «E jax kabʼe xinaq naʼl Dios toj templo, jun fariseo ex jun xjal in cobrarin impuesto. 11 Jaw weʼ fariseo ex ok ten naʼl Dios toj tanmi, tqʼama jlu: ‹Nman Dios, kxel nqʼoʼne chjonte teya porke nya ik qine ik tzeʼn qe txqantl, in che extorsionarin, nya bʼaʼn qe ex in che bʼinchaʼn aj pajil..., ex nya ik qine ik tzeʼn xjal lu in cobrarin impuesto. 12 In chin ayunarine kabʼe maj toj seman ex in xi nqʼoʼne diezmo tiʼj tkyaqilju in kambʼet wuʼne›. 13 Atzunte xjal in cobrarin impuesto najchaq kyaj weʼ ex nyatoq taj tuʼn tjaw keʼyin twitz kyaʼj. Oʼkx ok tjubʼin ttzi tkʼuʼj ex tqʼama: ‹Nman Dios, qʼaqʼantz tkʼuʼja wiʼje porke aj il qine›. 14 Ax tok kxel nqʼamaʼne kyeye, tej tmeltzʼaj xjal lu tja, toj twitz Dios mas tzʼaqli ok twitz fariseo. Porke alkye in jaw tnimsan tibʼ, kbʼel tchʼixwi, pero alkye in kubʼ tiʼn tibʼ, kjawil nimsaʼn».

15 Ax ikx tzaj kyiʼn xjal qe tal kʼwal tukʼil Jesús tuʼn kyok tmakoʼn.* Pero tej tok kykeʼyin tdiscípulo jlu, xi kyqʼamaʼn kye xjal tuʼn miʼn kypon kyiʼn. 16 Atzunte Jesús xi tqanin tuʼn kytzaj qʼiʼn kʼwal tukʼil ex tqʼama jlu: «Kyqʼonxe ambʼil kye tal kʼwal tuʼn kytzaj wukʼile ex miʼn tzʼel kyiʼne ambʼil kye. Porke kxel qʼoʼn Tgobierno Dios kye qeju in che ok ik tzeʼn qe tal kʼwal. 17 Ax tok kxel nqʼamaʼne kyeye, qa mintiʼ ma txi tokslaʼn jun xjal Tgobierno Dios ik tzeʼn jun tal kʼwal, mlayx tzʼokx toj».

18 Entonces xi tqanin jun gobernador kye judiy te Jesús: «Aya Xnaqʼtzal bʼaʼn, ¿tiʼ il tiʼj tuʼn tbʼant wuʼne tuʼn tkambʼet chwinqlal te jumajx?». 19 Atzunte Jesús xi ttzaqʼweʼn te: «¿Tiquʼn in chin ok tqʼoʼna te bʼaʼn? Mi al jun xjal bʼaʼn, sino oʼkx te Dios bʼaʼn. 20 Ojtzqiʼn qe mandamyent lu tuʼna: Miʼn kubʼ tbʼinchaʼna aj pajil, miʼn kubʼ tbʼyoʼna jun xjal, miʼn tzʼelqʼana, miʼn txi tqʼamaʼna nya ax tok yol tiʼj juntl ex qʼonka toklen tmana ex ttxuʼya». 21 Xi ttzaqʼweʼn gobernador te: «In che japun kykyaqil mandamyent lu wuʼne atxix tej kʼwalx qine». 22 Tej tok tbʼiʼn Jesús jlu, xi tqʼamaʼn te: «Atx juntl tiʼ tuʼn tbʼant tuʼna, kʼayinxa tkyaqilju at teya ex qʼonxa kye xjal prow. Qa ma bʼant jlu tuʼna, kchmetel tqʼinumabʼila toj kyaʼj. Yajxitl tzaja wukʼile ex lepeka wiʼje». 23 Tej tok tbʼiʼn xinaq aju xi tqʼamaʼn Jesús te, tzaj nim tbʼis porke attoq nim tqʼinumabʼil.

24 Entonces xi tkeʼyin Jesús xinaq ex tqʼama: «¡Kwest kʼelel kye qʼinun tuʼn kyokx toj Tgobierno Dios! 25 Mas fácil tuʼn tokx jun kamey toj twitz jun bʼaq twitzju tuʼn tokx jun qʼinun toj Tgobierno Dios». 26 Atzun qeju ok kybʼiʼn jlu xi kyqanin te: «Qa ikju, ¿alkye jun xjal jaku klet?». 27 Xi ttzaqʼweʼn Jesús kye: «Aju mlay bʼant toj kywitz xjal, jaku bʼant tuʼn Dios». 28 Xi tqʼamaʼn Pedro te: «Tat, o kyaj qqʼoʼne tkyaqilju at qeye ex ma qo ok lepeʼye tiʼja». 29 Xi tqʼamaʼn Jesús kye: «Ax tok kxel nqʼamaʼne kyeye, alkye jun xjal ma kyaj tqʼoʼn tja, t-xuʼjil, qe terman, qe tman ex qe tkʼwal noq tuʼn Tgobierno Dios, 30 tzul qʼoʼn mas t-xel te toj ambʼil jaʼlo ex toj ambʼil tzul tchwinqlal te jumajx».

31 Entonces xi tiʼn Jesús qeju Doce part ex xi tqʼamaʼn kye: «Ma qoʼx toj Jerusalén ex kjapunel twi tkyaqilju kubʼ kytzʼibʼin profeta tiʼj Tkʼwal Xinaq. 32 Kxel qʼoʼn toj kyqʼabʼ xinaq kye txqantl nasyon, che xmayil tiʼj, kʼokel kybʼinchaʼn nya bʼaʼn tiʼj ex kʼokel kytzubʼan tiʼj. 33 Ex aj tbʼaj kʼixbʼisaʼn tukʼil asyal, kbʼel bʼyoʼn pero kjawil anqʼin toj toxin qʼij». 34 Pero mintiʼ el kynikʼ apóstol tiʼjju tqʼama, porke otoq kubʼ ewin kywitz.

35 Tej chʼinxtoq tpon Jesús toj Jericó, qʼuqlitoq jun xinaq moẍ ttzi bʼe ex in qanin tpwaq kye xjal. 36 Tej tok tbʼiʼn qa e ikʼ nim xjal, xi tqanin kye tiʼ in bʼaj. 37 Xi kyqʼamaʼn xjal te: «¡Ma tzul Jesús te Nazaret!». 38 Tej tok tbʼiʼn jlu, jaw schʼin ex tqʼama: «¡Jesús, Tkʼwal David, qʼaqʼantz tkʼuʼja wiʼje!». 39 Pero aqeju xjal e kubʼ nej, e ok ten ilil tiʼj ex xi kyqʼamaʼn te tuʼn miʼn tyolin. Pero mas jaw schʼin xjal moẍ ex tqʼama: «¡Aya Tkʼwal David, qʼaqʼantz tkʼuʼja wiʼje!». 40 Tuʼntzunju kubʼ weʼ Jesús ex xi tqʼamaʼn tuʼn ttzaj qʼiʼn xinaq tukʼil. Tej tpon qʼiʼn xinaq tukʼil, xi tqanin te: 41 «¿Tiʼ tajbʼila tuʼn tbʼant wuʼne tiʼja?». Atzunte moẍ xi ttzaqʼweʼn te: «Tat, wajbʼile tuʼn tbʼant nkeʼyine». 42 Xi ttzaqʼweʼn Jesús te: «Kbʼantel tkeʼyina juntl maj, porke ma tzʼok qeʼ tkʼuʼja tiʼj Dios». 43 Ex jurat bʼant tkeʼyin juntl maj, xi lepeʼ tiʼj Jesús ex xi tzyet tuʼn tjaw tnimsaʼn Dios. Tej tok kykeʼyin kykyaqil xjal lu, ax ikx jaw kynimsaʼn Dios.