Qe tbʼanel noticia kubʼ ttzʼibʼin Mateo

10 Ok tchmoʼn Jesús qeju 12 tdiscípulo ex xi tqʼoʼn kyoklen tuʼn kyex kylajoʼn qe demonio toj kyanmi xjal. Ax ikx tuʼn tkubʼ kyqʼanin tkyaqil clase yabʼil ex kʼixkʼoj.

2 Atzun kybʼi qeju 12 apóstol jlu: tnejel a Simón aju ok qʼoʼn tbʼi te Pedro tukʼil Andrés aju terman, a Santiago tkʼwal Zebedeo tukʼil Juan aju terman, 3 a Felipe tukʼil Bartolomé, a Tomás tukʼil Mateo, aju cobrarin kyiʼj impuesto, a Santiago tkʼwal Alfeo tukʼil Tadeo, 4 ex a Simón el Cananita* tukʼil Judas Iscariote, aju yajxitl xi tqʼoʼn Jesús toj kyqʼabʼ xjal.

5 Xi tsamaʼn Jesús qeju 12 t-apóstol ex xi tqʼamaʼn jlu kye: «Miʼn cheʼxe kyoj bʼe in che pon kyoj junjuntl tnam ex miʼn che okxe toj ni jun tnam te Samaria. 6 Sino oʼkx kyxiʼye kyukʼil xjal* te Israel aqeju in che ok ik tzeʼn rit* o chex tzpet. 7 Aj kypredicarine kyqʼamanxe jlu: ‹Ya ma tzul laqʼeʼ Gobierno in tzaj toj kyaʼj›. 8 Bʼaʼn tuʼn tkubʼ kyqʼanine qe xjal yabʼ ex tuʼn kyjaw anqʼin* kyimni kyuʼne. Ax ikx bʼaʼn tuʼn tkubʼ kyqʼanine* qe xjal at lepra kyiʼj ex tuʼn tex kylajoʼne qe demonio toj kyanmi xjal. Miʼn tzʼel kycobrarine kyiʼj xjal porke noq kukx ma tzaj qʼoʼn kyoklene.* 9 Ax ikx miʼn txi kyiʼne oro, plata nix cobre toj kʼalbʼil kykʼuʼje.* 10 Ex miʼn txi kyiʼne jun bolsa tkubʼel kywaye porke aju aqʼunal il tiʼj tuʼn t-xi qʼoʼn twa. Ax ikx miʼn txi kyiʼne juntl kyxbʼalune nix juntl par kyxjabʼe ex ni juntl kybastone.

11 Aj kyokxe toj jun tnam moqa jun aldea, bʼaʼn tuʼn kyjyoʼne kyiʼj xjal kyajbʼil tuʼn tok kybʼiʼn noticia in che yoline tiʼj. Ex bʼaʼn tuʼn kykyaj tene tja tzmaxi aj kyikʼ bʼete toj lugar aju. 12 Aj kyokxe toj jun ja, kyqʼolbʼenxe tajaw. 13 Qa ma che okx kʼamoʼne toj ja, kyqaninxe jun kʼiwlabʼil tibʼaj. Pero qa mintiʼ, bʼaʼn tuʼn tmeltzʼaj kʼiwlabʼil kyukʼile. 14 Qa mintiʼ ma che okx kʼamoʼne toj jun tnam moqa toj jun ja ex mintiʼ ma che ok bʼiʼne kyuʼn, bʼaʼn tuʼn tel kychtoʼne quq tiʼj kyqane aj kyetze. 15 Ax tok kxel nqʼamaʼne kyeye, toj Qʼij te Juicio mas nim kʼixkʼoj kbʼel kynaʼn tnam lu twitz tnam te Sodoma ex Gomorra.

16 Che kxel nsamaʼne ex ik che okele ik tzeʼn qe rit kyxol xoʼj. Tuʼntzunju, tenx kynabʼile ik tzeʼn qe kan ex che oke mans ik tzeʼn qe paloma. 17 Ax ikx kyxqʼuqink kyibʼe kyiʼj xjal porke che xel qʼoʼne toj kyqʼabʼ jwes kyuʼn ex che okel kʼixbʼisane tuʼn asyal kyoj ja te kʼulbʼil. 18 Ex che xel qʼiʼne kywitz gobernador ex qe rey noq tuʼnju in che ok lepeʼye wiʼje. Iktzun tten kʼelel kynikʼ wiʼje ex qe xjal kye txqantl nasyon. 19 Ex aj kyxi qʼiʼne kywitz, miʼn tzaj bʼaj kykʼuʼje tiʼjju kxel kyqʼamaʼne ex tzeʼn kxel kyqʼamaʼne. Porke aj tpon ambʼil tuʼn kyyoline, kʼelel kynikʼe tiʼj tiʼ tuʼn t-xi kyqʼamaʼne. 20 Nya kyuʼnx kyibʼe kbʼantel kyyoline, sino kʼonil tipumal Kymane at toj kyaʼj kyiʼje. 21 Kxel tqʼoʼn xjal terman tuʼn tkubʼ bʼyoʼn ex kxel tqʼoʼn mambʼaj tkʼwal tuʼn tkubʼ bʼyoʼn. Atzun kye kʼwal che okel meltzʼaj kyiʼj kyman tzmaxi aj kykyim kyuʼn. 22 Ex che elel ikʼune kyuʼn kykyaqil xjal noq tuʼnju in che ok lepeʼye wiʼje. Pero alkye ma tzikʼx tuʼn tzmaxi aj tul fin, atzun ok kkletel. 23 Qa ma tzʼok bʼinchaʼn nya bʼaʼn kyiʼje, kyxi oqe toj juntl tnam. Porke ax tok kxel nqʼamaʼne kyeye qa tzul Tkʼwal Xinaq* naʼmxtoq kybʼaj predicarine toj kykyaqil tnam te Israel.

24 Nya mas nim toklen xjal in tzaj tkʼamoʼn xnaqʼtzbʼil twitzju in qʼon xnaqʼtzbʼil. Ex nya mas nim toklen majen twitz tpatrón. 25 At tzalajbʼil te xjal in tzaj tkʼamoʼn xnaqʼtzbʼil qa ma tzʼok ik tzeʼn in qʼon xnaqʼtzbʼil te. Ex at tzalajbʼil te majen qa ma tzʼok ik tzeʼn tpatrón. Qa o tzʼok qʼoʼn tbʼi tajaw ja te Belcebú,* ¿nyapetzulo ax jlu kbʼantel kyuʼn xjal kyukʼil toj tja? 26 Tuʼntzunju, miʼn che xobʼe kye xjal. Porke tkyaqilju ewin taʼ kʼelel toj qʼanchaʼl ex tkyaqilju nya ojtzqiʼn kʼelel nikʼbʼaj tiʼj. 27 Aju kxel nqʼamaʼne kyeye toj ewaj kyqʼamanxe kye txqantl ex aju kxel nqʼamaʼne kyeye t-xe kyẍkine kypakbʼanxe twi ja. 28 Ex miʼn che xobʼe kye qeju jaku che kubʼ bʼyoʼne kyuʼn, pero mlay tzʼel kyiʼn ambʼil kyeye tuʼn kyanqʼine juntl maj toj ambʼil tzul. Sino che xobʼe teju jaku kubʼ tnajsaʼn kyeye toj Gehena.* 29 In che kʼayinjtz kabʼe tal pájaro tuʼn jun tal moneda.* Pero ojtzqiʼn tuʼn Kymane toj alkye ambʼil in kubʼ tzʼaq jun kyxol twitz txʼotxʼ.* 30 Atzun kyeye ajlan kykyaqil ttzmal kywiʼye tuʼn. 31 Tuʼntzunju, miʼn che xobʼe porke mas nim kyoklene kywitz nim qe pájaro.

32 Ex alkye ma txi tqʼamaʼn kye txqantl qa nxnaqʼtzbʼene, ax ikx kxel nqʼamaʼne twitz Nmane at toj kyaʼj qa nxnaqʼtzbʼene. 33 Pero alkye ma kubʼ ewin weye kywitz xjal, ax ikx kbʼel wewine twitz Nmane at toj kyaʼj. 34 Miʼn kubʼ kyximane qa ma chin ule tuʼn tten mujbʼabʼil twitz txʼotxʼ, sino ma chin ule tukʼil jun espada tuʼn tnaj mujbʼabʼil. 35 Porke ma chin ule tuʼn tten qʼoj kyxol familia: kqʼojil mambʼaj tukʼil tkʼwal, kqʼojil txubʼaj tukʼil tal ex kqʼojil txin tukʼil tlibʼ xuʼj.* 36 Porke aʼyex toj tja jun xjal che okel te aj qʼoj tiʼj. 37 Mintiʼ toklen jun xjal tuʼn tok te nxnaqʼtzbʼene qa mas ma tzʼok tkʼujlaʼn tman moqa ttxuʼ nwitze. Ex qa mas ma tzʼok tkʼujlaʼn jun xjal tkʼwal moqa tmeʼjel* nwitze, mintiʼ toklen tuʼn tok te nxnaqʼtzbʼene. 38 Ex alkye jun xjal nya taj tuʼn t-xi tiʼn ttzeʼ te kʼixbʼisabʼil* tuʼn tok lepeʼ wiʼje, mintiʼ toklen tuʼn tok te nxnaqʼtzbʼene. 39 Alkye jun xjal taj tuʼn tklet tchwinqlal, ok kyimel. Ex alkye jun xjal ma kyim noq tuʼnju ma tzʼok te nxnaqʼtzbʼene, ktel tchwinqlal juntl maj.

40 Alkye ma tzʼokx kʼamonte kyeye, ax ikx in chin okx kʼamoʼne tuʼn. Ex alkye ma chin okx kʼamoʼne tuʼn, ax ikx in nokx tkʼamoʼn aju tzaj samante weye. 41 In tzaj tkʼiwlaʼn Dios profeta ex aju xjal tzʼaqli. Alkye ma tzʼokx kʼamoʼn kye tuʼnju in che ajbʼen te Dios, tzul tkʼamoʼn ax kʼiwlabʼil ik tzeʼn kye. 42 Ax tok kxel nqʼamaʼne kyeye, alkye jun xjal taj tuʼn tok tbʼinchaʼn aju bʼaʼn tiʼj jun kyxol nxnaqʼtzbʼene maske nya nim toklen, tzul tkʼamoʼn kʼiwlabʼil axpe ikx qa noq jun vas cheʼw aʼ ma txi tqʼoʼn te».