Qe tbʼanel noticia kubʼ ttzʼibʼin Lucas

13 Tojx qʼij aju, e jaw yolin junjun xjal kyxol qeju in che bʼin tiʼj Jesús ex xi kyqʼamaʼn te qa e kubʼ tbʼyoʼn Pilato junjun xjal te Galilea ex qa bʼaj tsmon tibʼ kychkʼel tukʼil kychkʼel alumaj xi kyqʼoʼn te sacrificio. 2 Tej tok tbʼiʼn Jesús jlu, xi tqʼamaʼn kye: «¿Tiʼ kyxime tiʼj? ¿E kubʼpe bʼyoʼn xjal lu tuʼnju mas aj il qe kywitz txqantl xjal te Galilea? 3 Kxel nqʼamaʼne kyeye qa nya ikju. Ex qa mintiʼ ma tzʼajtz tiʼj kyanmiye, ax ikx kyeye che kbʼel najsaʼne kykyaqile ik tzeʼn kye. 4 Yajtzun qeju 18 xjal e kyim tej ttzaj tzʼaq torre te Siloam kyibʼaj, ¿tiʼ kyxime kyiʼj? ¿Tzajpe nya bʼaʼn lu kyiʼj tuʼnju mas aj il qe kywitz txqantl xjal te Jerusalén? 5 Kxel nqʼamaʼne kyeye qa nya ikju. Ex qa mintiʼ ma tzʼajtz tiʼj kyanmiye, ax ikx kyeye che kbʼel najsaʼne kykyaqile ik tzeʼn kye».

6 Entonces xi tqʼamaʼn Jesús ejemplo lu kye: «Jun maj, ok tawaʼn jun xinaq* jun tqan higo txol tqan uva, xiʼ jyol twitz pero mintiʼ kanet tuʼn. 7 Yajxitl xi tqʼamaʼn xinaq te xjal in kwentin tiʼj tqan uva: ‹Ma tzikʼ oxe abʼqʼi in chin ule jyol twitz tqan higo lu, pero mintiʼ twitz in nel. ¡Txʼeminktza! Nokx gan awaʼn›. 8 Pero xi ttzaqʼweʼn xjal te: ‹Tat, qʼonkja juntl abʼqʼi, kbʼajel waqʼunane txʼotxʼ t-xeʼ ex kʼokel nqʼoʼne tzʼis t-xeʼ. 9 Qa ma tzʼel twitz, bʼaʼn, pero qa mintiʼ, jaku jaw ttxʼemina›».

10 Toj jun sábado, xi tqʼoʼn Jesús xnaqʼtzbʼil toj jun ja te kʼulbʼil.* 11 Ex otoq pon jun xuʼj* toj lugar aju, otoq tzikʼ 18 años toklen jun yabʼil tiʼj tuʼn jun demonio. Chʼok ttzel tiʼj ex mintiʼ bʼant tuʼn tkubʼ weʼ recto. 12 Tej til Jesús xuʼj, tzaj ttxkoʼn ex xi tqʼamaʼn te: «Aya xuʼj, ma tzaqpeta, ma tzʼel yabʼil tiʼja». 13 Kubʼ tqʼoʼn Jesús tqʼabʼ tibʼaj, jurat kubʼ weʼ recto ex xi tzyet tuʼn tjaw tnimsaʼn Dios. 14 Tej til nejenel toj ja te kʼulbʼil qa kubʼ tqʼanin Jesús jun xjal toj qʼij sábado, tzaj tqʼoj ex xi tqʼamaʼn kye xjal: «Ma tzaj qʼoʼn seis qʼij tuʼn qaqʼunan, che tzaje tuʼn kykubʼ qʼanine kyoj qʼij lu ex nya toj qʼij sábado». 15 Atzunte Qajaw xi ttzaqʼweʼn te: «Xmeletzʼ qeye, ¿alkye jun kyxole mintiʼ in nel ttzaqpiʼn tman twakx moqa tbur toj qʼij sábado tuʼn t-xi tiʼn kʼal aʼ? 16 Qa ikju, yajtzun te xuʼj lu tmeʼjel* Abrahán aju o tzikʼ 18 años ttzajlen jun yabʼil tiʼj tuʼn Satanás, ¿nyapetzun iltoq tiʼj tuʼn ttzaqpaj tiʼj yabʼil maske toj qʼij sábado?». 17 Tej tbʼaj yolin Jesús, tzaj kychʼixwi kykyaqil qeju in che qʼojin tiʼj. Atzun kye xjal e jaw tzalaj tiʼj tkyaqil tbʼinchbʼen Jesús tbʼanelxix.

18 Ex xi tqʼamaʼntl jlu kye: «¿Alqukʼil jaku tzʼok nmojbʼane Tgobierno Dios ex alkye ejemplo jaku tzʼajbʼen wuʼne? 19 In nok ik tzeʼn jun twitz mostaza tzaj tiʼn jun xinaq ex kux tawaʼn toj ttxʼotxʼ. Chʼiy ex ok ik tzeʼn jun tzeʼ, ex e pon pájaro te twitz kyaʼj bʼinchal kyja kyxol tqʼabʼ».

20 Xi tqʼamaʼn juntl maj kye: «¿Alqukʼil jaku tzʼok nmojbʼane Tgobierno Dios? 21 In nok ik tzeʼn levadura tzaj tiʼn jun xuʼj ex kux tsmoʼn tukʼil oxe malbʼil arin.* De último jaw mal twitz tkyaqil qʼotj».

22 Tej in bʼet Jesús tuʼn tpon toj Jerusalén, ikʼ kyojele tnam ex qe aldea ex xi tqʼoʼn xnaqʼtzbʼil kye xjal. 23 Entonces xi tqanin jun xinaq te: «Tat, ¿axpe tok qa oʼkx junjun xjal che kletel?». Pero xi tqʼamaʼn Jesús kye: 24 «Kyqʼonke tilil tuʼn kyokxe toj pwert chʼin twitz, porke kʼokel tilil kyuʼn nim xjal tuʼn kyokx pero mlay che okx. 25 Porke tzul qʼij kjawil weʼ tajaw ja ex kʼelex tlamoʼn pwert tukʼil tal, atzun kyeye che kjel weʼye tiʼjxi, kʼokex kytokarine pwert ex kxel kyqʼamaʼne te: ‹¡Tat, jaqonkxa pwert qwitze!›. Pero tzul ttzaqʼweʼn kyeye: ‹Mintiʼ ojtzqiʼn wuʼne jatumel ma che tzaje›. 26 Atzun kyeye kxel kyqʼamaʼne te: ‹O waʼne ex o kʼane junx tukʼila ex xi tqʼoʼna xnaqʼtzbʼil kyoj kay principal jatumel in qo anqʼine›. 27 Pero tzul tqʼamaʼn kyeye: ‹Mintiʼ ojtzqiʼn wuʼne jatumel ma che tzaje. ¡Kypaʼmil kyibʼe wiʼje aqeye bʼinchal nya bʼaʼn!›. 28 Ex che jawil oqʼe ex kbʼel kytxʼaʼne twitz kyeʼye* aj tok kyqʼoʼne kywitze tiʼj Abrahán, Isaac, Jacob ex kykyaqil profeta toj Tgobierno Dios, atzun kyeye otoq che kyaj tene tiʼjxi. 29 Ex che ul xjal twitz tkyaqil txʼotxʼ* ex che okel qeʼ* tiʼj mes junx kyukʼil toj Tgobierno Dios. 30 Porke ateʼ junjun xjal de último ateʼ pero che okel tnejel, ex ateʼ junjuntl tnejel ateʼ pero che okel de último».

31 Toj rat aju, e pon junjun fariseo tukʼil Jesús ex xi kyqʼamaʼn te: «Texa tzalu ex txiʼya, porke tajbʼil Herodes tuʼn tkubʼ bʼyoʼna tuʼn». 32 Xi ttzaqʼweʼn Jesús kye: «Kyxiʼye ex kyqʼamanxe jlu te Herodes aju in nok ik tzeʼn jun zorro: ‹Jaʼlo ex nchiʼj che elex nlajoʼne demonio toj kyanmi xjal ex che kbʼel nqʼanine, ex kabʼj kbʼel bʼaj waqʼune›. 33 Pero il tiʼj tuʼn t-xi nbʼinchaʼne waqʼune jaʼlo, nchiʼj ex kabʼj, porke nya toj tumel tuʼn tkyim jun profeta toj juntl tnam qa nya toj Jerusalén. 34 Ay Jerusalén, Jerusalén, in che kubʼ tbʼyoʼna profeta ex in nok t-xoʼna abʼj kyiʼj qeju in che pon samaʼn tukʼila..., ¡nimku maj wajtoqe tuʼn kyok nchmoʼne tala ik tzeʼn in nok tchmoʼn ttxuʼ ekʼ qe tal tjaqʼ t-xikʼ! Pero atzun kyeye nyatoq kyaje. 35 Atzun jaʼlo che kjel koline ex kjel kolin kyjaye. Porke kxel nqʼamaʼne kyeye, ya mlay chin nok kykeʼyine jaʼlo tzmaxi aj t-xi kyqʼamaʼne: ‹¡Kʼiwlaʼn xjal in nul toj tbʼi Jehová!›».*