Qe tbʼanel noticia kubʼ ttzʼibʼin Juan
14 Ax ikx tqʼama Jesús jlu: «Miʼn tzaj bʼaj kykʼuʼje. Qeʼk kykʼuʼje tiʼj Dios ex qeʼk kykʼuʼje wiʼje. 2 Toj tja Nmane, ateʼ nim lugar* jatumel tuʼn qanqʼin. Noqwit mintiʼ, mawtlo txi nqʼamaʼne kyeye. Pero jaʼlo ma chinxe bʼinchaʼl jun lugar kyeye. 3 Aj nxiʼye ex aj tbʼaj nbʼinchaʼne jun lugar kyeye, chin ule juntl maj ex che xel wiʼne wukʼile tuʼntzun kytene wukʼile jatumel chin tele. 4 Ex ojtzqiʼn bʼe kyuʼne jatumel chin xeʼle».
5 Xi tqʼamaʼn Tomás te: «Tat, mintiʼ ojtzqiʼn quʼne jatumel ma txiʼya. ¿Tzeʼntzun tten kʼelel qnikʼe tiʼj bʼe?».
6 Xi ttzaqʼweʼn Jesús te: «Aqine bʼe, aqine axix tok ex aqine chwinqlal. Mlay bʼant tpon jun xjal tukʼil Mambʼaj qa nya wuʼne. 7 Qa ojtzqiʼn qine kyuʼne, ax ikx ojtzqiʼn Nmane kyuʼne. Ex ojtzqiʼn kyuʼne jaʼlo ex ma kyile».
8 Xi tqʼamaʼn Felipe te: «Tat, yekʼuntza Mambʼaj qeye ex ktzalajel qanmiye».
9 Xi ttzaqʼweʼn Jesús te: «Felipe, ma bʼet qʼij atine kyukʼile, ¿ex naʼmxpe tel tnikʼa wiʼje? Alkye ma chin ok tkeʼyine, ax ikx ma tzʼok tkeʼyin Mambʼaj. Entonces, ¿tiquʼn in tzaj tqanina weye ‹Yekʼuntza Mambʼaj qeye›? 10 ¿Mintiʼpe in xi tokslaʼna qa atine tukʼil Mambʼaj ex qa at Mambʼaj wukʼile? Nya aqine in chin kubʼ ximente aju in xi nqʼamaʼne kyeye, sino in chin ajbʼene tuʼn Mambʼaj aju at wukʼile tuʼn t-xi nbʼinchaʼne taqʼun. 11 Chin kyokslanxe aj t-xi nqʼamaʼne kyeye qa atine tukʼil Mambʼaj ex qa at Mambʼaj wukʼile. Qa mintiʼ in xi kyokslaʼne nyole, che okslaʼne tuʼn aqʼuntl in bʼant wuʼne. 12 Ax tok kxel nqʼamaʼne kyeye, alkye ma tzʼok qeʼ tkʼuʼj wiʼje, kxel tbʼinchaʼn axju aqʼuntl in bʼant wuʼne. Ex mas nim aqʼuntl kbʼantel tuʼn porke ma chinxe tukʼil Mambʼaj. 13 Ex tkyaqilju kxel kyqanine toj nbʼiye, kxel nbʼinchaʼne tuʼntzun tjaw nimsaʼn tbʼi Mambʼaj wuʼne aqine Tkʼwal. 14 Qa at jun tiʼ ma txi kyqanine toj nbʼiye, kxel nbʼinchaʼne.
15 Qa kʼujlaʼn qine kyuʼne, che japunel qe nmandamyente kyuʼne. 16 Ex chin kubʼsale twitz Mambʼaj tuʼn ttzaj tqʼoʼn juntl onil kyeye* aju ktel kyukʼile te jumajx. 17 Tzul tqʼoʼn espíritu santo kyeye aju in tzaj tyekʼin axix tok, aju mlay tzaj qʼoʼn kye xjal porke mintiʼ in nok kykeʼyin ex mintiʼ ojtzqiʼn kyuʼn. Atzun kyeye ojtzqiʼn kyuʼne porke at kyukʼile ex ax kjel ten kyukʼile. 18 Mlay che kyaj nqʼoʼne kyjunalxe.* Chin ule juntl maj kyukʼile. 19 Noq chʼintl ambʼil kʼokel kykeʼyin xjal qine, atzun kyeye kukx chin okel kykeʼyine porke kukx chin anqʼile ex che anqʼile. 20 Toj tqʼijlalil tzul kʼelel kynikʼe tiʼj qa atine tukʼil Mambʼaj, qa ateʼye wukʼile ex qa atine kyukʼile. 21 Alkye ma tzʼel tnikʼ kyiʼj nmandamyente* ex ma txi tbʼiʼn, kʼujlaʼn qine tuʼn. Ex alkye kʼujlaʼn qine tuʼn, kʼokel kʼujlaʼn tuʼn Nmane, ex kʼokel nkʼujlaʼne ex kbʼel nyekʼin wibʼe twitz».
22 Xi tqanin Judas te, pero nya a Judas Iscariote: «Tat, ¿tzeʼntzun tten noq oʼkx qeye ktzajel tyekʼin tibʼa ex nya kye kykyaqil xjal?».
23 Xi ttzaqʼweʼn Jesús te: «Qa kʼujlaʼn qine tuʼn jun xjal, kxel tbʼiʼn nyole. Kʼokel kʼujlaʼn tuʼn Nmane, qo ule tukʼil ex qo anqʼile tukʼil.* 24 Alkye mintiʼ in chin ok tkʼujlaʼne, mintiʼ in xi tbʼiʼn nyole. Nya nyole in xi nqʼamaʼne kyeye, sino te Nmane aju tzaj samante weye.
25 In xi nqʼamaʼne tkyaqil jlu kyeye akux atine kyukʼile. 26 Atzun onil kyeye, aju espíritu santo ktzajel tsamaʼn Nmane toj nbʼiye, kxel tqʼoʼn xnaqʼtzbʼil kyeye tiʼj tkyaqil ex kʼonil kyiʼje tuʼn ttzaj kynaʼne tkyaqilju ma txi nqʼamaʼne kyeye. 27 Kukx kxel nqʼoʼne tzalajbʼil kyeye aju in che tzalaje tiʼj wukʼile jaʼlo. Junxitl tzalajbʼil kxel nqʼoʼne kyeye twitzju in kyqʼoʼn xjal. Miʼn tzaj bʼaj kykʼuʼje ex miʼn che xobʼe. 28 Naʼnx kyuʼne qa xi nqʼamaʼne kyeye: ‹Chin xeʼle ex chin ule juntl maj kyukʼile›. Qa kʼujlaʼn qine kyuʼne, che tzalajele tuʼnju chin xeʼle tukʼil Mambʼaj, porke mas nim toklen Mambʼaj nwitze. 29 Ma txi nqʼamaʼne jlu kyeye naʼmxtoq tbʼaj, tuʼntzun t-xi kyokslaʼne aj tbʼaj. 30 Mlay chin yolintle nim kyukʼile, porke tzul aju in kawin kyibʼaj xjal twitz txʼotxʼ. Pero mintiʼ tipumal* wibʼaje. 31 Pero tuʼn tel kynikʼ xjal tiʼj qa kʼujlaʼn Mambʼaj wuʼne, in xi nbʼinchaʼne tkyaqil ik tzeʼn in tzaj tqʼamaʼn Mambʼaj weye. Che weʼktze, qo ikʼ bʼet tzalu.