Qe tbʼanel noticia kubʼ ttzʼibʼin Mateo

21 Tej kypon toj jun lugar Betfagué tbʼi t-xe witz Olivos aju nqayin taʼ tiʼj Jerusalén, xi tsamaʼn Jesús kabʼe tdiscípulo 2 ex xi tqʼamaʼn jlu kye: «Kyxiʼye toj aldea qʼanchaʼl chix. Ex aj kypone, kʼokel kyqʼoʼne kywitze tiʼj jun ttxuʼ bur kʼaloʼn junx tukʼil jun tal bur. Kytzaqpiʼmele ex kyiʼntze wukʼile. 3 Qa ma tzaj tqʼamaʼn jun xjal jun tyol kyeye, kyqʼamanxe jlu te: ‹Ok che ajbʼel te Qajaw›. Ex kxel tqʼoʼn ambʼil kyeye tuʼn ttzaj kyiʼne».

4 Bʼaj tkyaqil jlu tuʼntzun tjapun kywi yol tzaj tqʼamaʼn Dios te profeta tej tqʼama jlu: 5 «Kyqʼamanxe te tmeʼjel* Sion:* ‹¡Keʼyinxa! Lu teya trey tzul tukʼila. Mans ex tjax tibʼaj jun bur. Ikju, tibʼaj jun tal bur, tal jun txkup in najbʼen iqil iqtz›».

6 Tuʼntzunju e xiʼ tdiscípulo Jesús toj lugar aju ex xi kybʼinchaʼn ik tzeʼn xi tqʼamaʼn kye. 7 Tzaj kyiʼn ttxuʼ bur junx tukʼil tal bur. Jax kyqʼoʼn kyxbʼalun kyibʼaj, atzunte Jesús jax tibʼaj tal bur. 8 Chʼixme kykyaqil xjal kubʼ kylikʼun kyxbʼalun toj bʼe, atzun junjuntl el kytoqin t-xaq tzeʼ ex kubʼ kyqʼoʼn toj bʼe. 9 Kykyaqil qeju e kubʼ nej twitz ex qeju e ok lepeʼ tiʼj in kyqʼamaʼntoq tukʼil tqʼajqʼajel kywiʼ: «¡Qman Dios, in qo kubʼsane* twitza tuʼn tklet Tkʼwal David tuʼna! ¡Kʼiwlaʼn aju in tzaj samaʼn toj tbʼi Jehová!* ¡In qo kubʼsane twitza, kloma, aya Dios at toj kyaʼj!».

10 Tej tokx toj Jerusalén, kykyaqil xjal toj tnam e jaw tilj ex in kyqʼamaʼntoq: «¿Alkyetzun xjal lu?». 11 Atzun kye xjal xi kytzaqʼweʼn: «¡Atzun Jesús te Nazaret te Galilea ex jun profeta!».

12 Okx Jesús toj templo ex etz tlajoʼn kykyaqil xjal in che kʼayin ex qeju in che laqʼon. Jaw tpichʼkuʼn kymes xjal in che cambiarin pwaq tukʼil kyqʼuqbʼil qeju in che kʼayin paloma. 13 Ex xi tqʼamaʼn Jesús kye: «Tzʼibʼin jlu toj tyol Dios ‹Kʼokel qʼoʼn tbʼi njaye te ja te naʼj Dios›, atzun kyeye ma tzʼok kyqʼoʼne te kyjul eleqʼ». 14 Ax ikx e pon laqʼeʼ xjal kox ex moẍ tukʼil Jesús toj templo ex e kubʼ tqʼanin.

15 Tej tok kykeʼyin pal nim kyoklen ex qe escriba qe milagro in che bʼant tuʼn Jesús, tzaj kyqʼoj. Ax ikx tej tok kykeʼyin qe tal kʼwal in che schʼin ex in kyqʼamaʼn jlu: «¡Qman Dios, in qo kubʼsane twitza tuʼn tklet Tkʼwal David tuʼna!». 16 Xitzun kyqʼamaʼn te Jesús: «¿Mape tbʼiya aju in kyqʼamaʼn tal kʼwal?». Atzunte Jesús xi ttzaqʼweʼn kye: «Ma nbʼiye. ¿Naʼmxpe tjaw kyleerine jatumel tkuʼx qe yol lu? ‹In jaw nimsaʼna kyuʼn qe tal kʼwal ex qeju tzma in che chʼuʼn›». 17 Ikʼtzun bʼet Jesús, kyaj tqʼoʼn qe xjal lu ex etz toj tnam Jerusalén. Xiʼ toj tnam Betania ex atz kyaj ten te qonikʼen.

18 Toj juntl qʼij, meltzʼaj Jesús toj tnam Jerusalén te prim ex tzaj weʼyaj tiʼj. 19 Tej tok tqʼoʼn twitz tiʼj jun tqan higo ttxlaj bʼe, xiʼ jyolte qa at twitz. Pero mintiʼ kanet twitz tuʼn, sino oʼkx t-xaq. Tuʼntzunju, xi tqʼamaʼn te tqan higo: «Kuchiwt miʼn tzʼel twitza juntl maj». Tej tqʼama jlu, kubʼ tzqij tqan higo. 20 Tej tok kykeʼyin tdiscípulo Jesús aju bʼaj, e jaw labʼin ex kyqʼama: «¿Tiquʼn jurat ma kubʼ tzqij tqan higo?». 21 Atzunte Jesús xi ttzaqʼweʼn kye: «Ax tok kxel nqʼamaʼne kyeye, qa ma ten qʼuqbʼil kykʼuʼje ex mintiʼ ma che dudarine, nya oʼkx kxel kybʼinchaʼne aju ma bʼant wuʼne tiʼj tqan higo. Sino ax ikx jaku txi kyqʼamaʼne te witz lu ‹Weʼktza ex xoʼnx tibʼa toj mar›, ex atzun jlu kbʼantel tuʼn. 22 Ex tkyaqilju ma txi kyqanine aj kynaʼne Dios, tzul qʼoʼn kyeye qa ma ten qʼuqbʼil kykʼuʼje».

23 Tej tokx Jesús toj templo ex tej in qʼon xnaqʼtzbʼil, e pon laqʼeʼ pal nim kyoklen tukʼil ex qe ansyan toj tnam ex xi kyqanin te: «¿Tiʼ toklena at tuʼn tbʼant tkyaqil jlu tuʼna? ¿Ex alkye ma tzaj qʼonte toklena?». 24 Xi ttzaqʼweʼn Jesús kye: «Ax ikx weye at jun nxjele kyeye. Qa ma tzaj kytzaqʼweʼne, kxel nqʼamaʼne kyeye alkye tzaj qʼonte woklene tuʼn tbʼant tkyaqil jlu wuʼne. 25 ¿Alkye xi qʼonte toklen Juan tuʼn tbautisarin? ¿A Dios at toj kyaʼj moqa aʼye xjal?». E oktzun ten yolil kyxol ex kyqʼama: «Qa ma txi qtzaqʼweʼn te qa a Dios tzaj qʼonte toklen Juan, tzul tqanin qe: ‹Qa ikju, ¿tiquʼn mintiʼ ma txi kynimane tyol?›. 26 Pero qa ma txi qqʼamaʼn qa aʼye xjal xi qʼonte toklen, mintiʼ ojtzqiʼn quʼn alkye kymod xjal kbʼel kyyekʼin qukʼil porke in nok kyqʼoʼn Juan te jun profeta». 27 Xitzun kytzaqʼweʼn te Jesús: «Mintiʼ ojtzqiʼn quʼne». Atzunte Jesús xi ttzaqʼweʼn kye: «Ax ikx weye mlay txi nqʼamaʼne kyeye alkye tzaj qʼonte woklene tuʼn tbʼant tkyaqil jlu wuʼne.

28 ¿Tiʼ kyxime tiʼj jlu? Ten jun xinaq* ten kabʼe tkʼwal. Pon laqʼeʼ tukʼil tzikbʼaj ex xi tqʼamaʼn te: ‹Nkʼwal, txiʼya aqʼunal toj tqan uva jaʼlo›. 29 Atzunte tzikbʼaj xi ttzaqʼweʼn te: ‹Nya waje tuʼn nxiʼye›. Pero yajxitl ajtz tiʼj tanmi ex xiʼ aqʼunal. 30 Ax ikx yolin xinaq tukʼil juntl tkʼwal ex axju xi tqʼamaʼn te. Atzunte tkʼwal xi ttzaqʼweʼn: ‹Bʼaʼn, ok chin xeʼle›. Pero mintiʼ xiʼ aqʼunal. 31 ¿Alkye kyxol kabʼe kʼwalbʼaj jlu xi tbʼinchaʼn tajbʼil tman?». Xi kytzaqʼweʼn te Jesús: «Aju tzikbʼaj». Atzunte Jesús xi tqʼamaʼn kye: «Ax tok kxel nqʼamaʼne kyeye, tnejel che okex qeju in che cobrarin impuesto ex qe prostituta kywitze toj Tgobierno Dios. 32 Porke ul Juan ex xi tyekʼin kyeye alkye bʼe* bʼaʼn, pero mintiʼ xi kynimane tyol. Atzun qeju in che cobrarin impuesto ex qe prostituta xi kynimen tyol. Ex maske ok kyqʼoʼne kywitze tiʼj jlu, mintiʼ ajtz tiʼj kyanmiye ex mintiʼ xi kyokslaʼne tyol.

33 Kybʼintze juntl ejemplo jlu.* Ten jun xinaq ok tawaʼn uva toj ttxʼotxʼ ex ok tcircularin tiʼj. Ax ikx kubʼ tbʼinchaʼn jun jul jatumel tuʼn tel tiʼn taʼl twitz uva ex jaw tbʼinchaʼn jun ja nim twaʼl tuʼn tok t-xqʼuqin tawal. Ex xi tqʼoʼn ttxʼotxʼ te majen kye junjun xjal ex viajarin toj juntl tnam. 34 Tej tpon ambʼil tuʼn tjaw chmet twitz uva, xi tsamaʼn xinaq qe tmajen kyukʼil xjal tuʼn ttzaj kyqʼoʼn tpart tiʼj twitz awal. 35 Pero e tzaj tzyuʼn majen kyuʼn xjal ex ok kykʼixbʼisaʼn jun, atzun juntl kubʼ kybʼyoʼn ex ok kyxoʼn abʼj tiʼj juntl. 36 Tej tbʼaj jlu, xi tsamaʼn xinaq junjuntl tmajen ex mas nim kybʼet twitz tnejel. Pero axju ok kybʼinchaʼn xjal kyiʼj ik tzeʼn qeju tnejel. 37 De último, xi tsamaʼn xinaq tkʼwal tuʼnju kubʼ t-ximen: ‹Ok che respetaril te nkʼwale›. 38 Pero tej tok kykeʼyin xjal tkʼwal xinaq, kyqʼama kyxolx: ‹A kʼwal lu kjel tajaw txʼotxʼ. ¡Qoʼqe ex qbʼiyonku tuʼntzun tkyaj ttxʼotxʼ te qe!›. 39 Tuʼntzunju, tzaj kytzyuʼn xjal kʼwal, etz kyiʼn tiʼjxi txʼotxʼ jatumel awaʼn uva ex kubʼ kybʼyoʼn. 40 Aj tpon xinaq tajaw txʼotxʼ jatumel awaʼn uva, ¿tiʼtzun kxel tbʼinchaʼn kyiʼj xjal lu?». 41 Aqeju in che bʼin tiʼj Jesús xi kytzaqʼweʼn te: «Tuʼnju kubʼ kyyekʼin nya bʼaʼn kymod, che kbʼel bʼyoʼn tuʼn xinaq ex kxel qʼoʼn tqan uva te majen kye junjuntl xjal. Atzun qe xjal lu kxel kyqʼoʼn tpart xinaq aj tel twitz awal».

42 Xi ttzaqʼweʼn Jesús kye: «¿Naʼmxpe tjaw kyleerine aju tzʼibʼin toj tyol Dios? In tmaʼn: ‹Aju abʼj nyatoq kyaj xjal tuʼn tajbʼen kyuʼn tuʼn tjaw kybʼinchaʼn ja, atzun abʼj mas nim toklen.* Atz tzaj tukʼil Jehová* ex tbʼanelxix toj qwitz›. 43 Tuʼntzunju, kxel nqʼamaʼne kyeye qa kʼelel tiʼn Dios Tgobierno kyeye ex kxel tqʼoʼn te juntl nasyon kxel tbʼinchaʼn aju tajbʼil.* 44 Ex alkye jun xjal ma jaw tolj tiʼj abʼj lu moqa ma kubʼ tzʼaq tibʼaj, kbʼajel kʼixbʼi ex grave kjel. Ax ikx qa ma kubʼ tzʼaq abʼj lu tibʼaj jun xjal, ok kbʼel petzʼj tuʼn».

45 Tej tok kybʼiʼn pal nim kyoklen ex qe fariseo qe ejemplo ajbʼen tuʼn Jesús, el kynikʼ tiʼj qa atztoq kyiʼj in yolin. 46 Tuʼntzunju kyajtoq tuʼn tokx kyqʼoʼn Jesús pres, pero e tzaj xobʼ kywitz xjal porke ok kyqʼoʼn te jun profeta.