Qe xnaqʼtzbʼil toj Tyol Dios
¿Tiʼ kbʼajel toj Qʼij te Juicio?
Kʼonil xnaqʼtzbʼil lu tiʼja tukʼil Tyol Dios tuʼn tel tnikʼa kyiʼj junjun xjel olo ximana tiʼj. Ax ikx qa tajbʼila, jaku che onin testigos de Jehová tiʼja tuʼn kykubʼ xnaqʼtzet xjel lu.
1. ¿Tiʼ aju Qʼij te Juicio?
Aju tnejel tilbʼilal toj xnaqʼtzbʼil lu in tzaj tyekʼin aju in kubʼ kyximen xjal tiʼj qʼij in nok tqʼoʼn Tyol Dios tbʼi te Qʼij te Juicio. In kubʼ kyximen qa at nim millón xjal che pol twitz tqʼuqbʼil Dios tuʼn kyok toj xjel tiʼjju kybʼinchbʼen. Ax ikx, in kubʼ kyximen qa ateʼ junjun xjal kxel qʼoʼn kychwinqlal toj kyaʼj ex atzun junjuntl che xeʼl toj qʼaqʼ. Atzunte Biblia in tzaj tqʼamaʼn qa kʼajbʼel Qʼij te Juicio tuʼn Dios tuʼn tel tiʼn nya bʼaʼn twitz Txʼotxʼ (Salmo 96:13). Ex o txi tqʼoʼn Dios toklen Jesús tuʼn tok te Jwes ex tuʼn t-xi tbʼinchaʼn tiʼj nya bʼaʼn in tzaj kyiʼj xjal (Uʼjinktza Isaías 11:1-5 ex Hechos 17:31).
2. ¿Tzeʼn kxel bʼinchet tiʼj nya bʼaʼn toj Qʼij te Juicio?
Aju tnejel xjal Adán, el tpan tibʼ tiʼj Qman Dios Jehová. Tuʼn jlu kykyaqil tkʼwal Adán, aj il qe, in tzaj nya bʼaʼn kyiʼj ex in che kyim (Romanos 5:12). Tuʼn t-xi bʼinchet tiʼj nya bʼaʼn lu, ok che jawil anqʼin nim millón xjal tuʼn Jesús aqeju o che kyim. Aju uʼj Apocalipsis tbʼi toj Tyol Dios, in tzaj tqʼamaʼn qa kbʼantel jlu tuʼn Jesucristo aj tkawin toj mil abʼqʼi (Uʼjinktza Apocalipsis 20:4, 11, 12).
Aqeju che jawil anqʼin ok che okel toj xjel, noqtzun tuʼnj, nya tiʼjju kybʼinchbʼen bʼant tej naʼmxtoq kykyim, sino tiʼjju kybʼinchbʼen kbʼantel otoqxi che jaqet qeju libro in yolin Apocalipsis capítulo 20 tiʼj (Romanos 6:7). Tqʼama apóstol Pablo qa che jawil anqʼin qe xjal «tzʼaqlxix, ax ikx qeju mya tzʼaqlxix» ex kxel qʼoʼn ambʼil kye tuʼn tok kyojtzqiʼn Dios (Uʼjinktza Hechos 24:15).
3. ¿Tiʼ mastl kbʼantel toj Qʼij te Juicio?
Aqeju xjal e kyim ex mintiʼ ok kyojtzqiʼn Jehová ex mintiʼ e ajbʼen te, ok kxel qʼoʼn ambʼil kye tuʼn tbʼant jlu kyuʼn. Qa ma tzʼajbʼen ambʼil lu kyuʼn tuʼn tok kyojtzqiʼn Jehová ex tuʼn kyajbʼen te, ok che jawil anqʼin «tuʼn tten kychwinqlal». Atzun qe xjal nya kyaj tuʼn kynimen te Dios ok che «jawil anqʼin tuʼn tkubʼ kysentens» (Uʼjinktza Juan 5:28, 29 ex Isaías 26:10; 65:20).
Mil abʼqʼi ktel Qʼij te Juicio ex aj tkubʼaj ambʼil lu, ya otoq che ok juntl maj xjal te tzʼaqli tuʼn Jehová (1 Corintios 15:24-28). ¡Tbʼanelxix oyaj lu kxel qʼoʼn kye xjal bʼaʼn che nimen! Atzunte Tajaw il otoq tzikʼ mil abʼqʼi tkuxlen jupuʼn toj jun jul nim t-xeʼ ex kjawitz tzaqpiʼn tuʼn Dios tuʼn tsbʼuʼn mankbʼil maj kyiʼj xjal. Kʼokel tilil tuʼn Tajaw il tuʼn kyel tpaʼn nim xjal tiʼj Jehová, pero aqeju kukx che ajbʼel te Jehová, ktel kychwinqlal te jumajx tzalu twitz Txʼotxʼ (Uʼjinktza Isaías 25:8 ex Apocalipsis 20:1, 7-9).
4. ¿Atpe juntl qʼij te juicio tzul tiʼn kʼiwlabʼil kye xjal?
In yolin Tyol Dios tiʼj juntl qʼij te juicio atz jatumel kbʼel najsaʼn tkyaqilju nya bʼaʼn at toj ambʼil jaʼlo. Noq minabʼen tzul qʼij lu, ik tzeʼn bʼaj toj tqʼijlalil Noé tej ttzaj Nim Jbʼal, jurat e kyim kykyaqil nya bʼaʼn xjal. Chʼixtl tpon ambʼil tuʼn kykubʼ najsaʼn kykyaqil «xjal mya nimal Dios qe» ex kxel qʼoʼn ambʼil tuʼn kyten tbʼanel xjal jatumel «kbʼinchetel aju tzʼaqlxix kyuʼn kykyaqil» (Uʼjinktza 2 Pedro 3:6, 7, 13).