Ex tewin Rahab kabʼe xjal

MA CHE ok weʼ xjal lu twitz jun mya bʼaʼn. Iltiʼj tuʼn kyel oq tuʼntzun miʼ kykubʼ bʼiyoʼn. Aj Israel qe xjal lu, atzunjo xuʼj nonin kyiʼj, Rahab tbʼi. Atztoq nanqʼina Rahab twiʼ tmuro Jericó. Qo xnaqʼtzal tiʼj tiʼ bʼaj.

Chʼixtl kyikʼx aj Israel toj nimaʼ Jordán tuʼntzen kyokx tuj Canaán. Tej naʼmxteq kyokx, xi tsamaʼn Josué kabʼe xjal. Ex xi tqʼamaʼn kye: ‹Cheʼxe kaʼyil txʼotxʼ ex aju tnam Jericó›.

Tej kyokx qeju xjal ex samaʼn tuj Jericó, atz i eʼxa toj tja Rahab. Pon jun xjal qʼamalte te ajkawil te Jericó ex xi tmaʼn jlu te: ‹Tej chʼinxtoq qok yupj ma che ul kabʼe aj Israel keʼyil tnam›. Tej tok tbʼiʼn kawil jlu, ex tsamaʼn xjal qʼmalte te Rahab: ‹¡Qʼiʼmetza qe xinaq ateʼkx tuj tjaya!› Atzunte Rahab otaq che jax tewen twiʼ ja. Tuʼntzejo, tqʼama: ‹Axtok, ma che ul kabʼe xjal njaye, mintiʼ bʼiʼn wuʼne jatumel tzajniqeʼ. Tej xqok yupj bʼiʼx ẍe ex tej naʼmxtaq tlamet tpwertil tnam. ¡Qa ma cheʼx lpeʼ naje kyiʼj, che tzyetil kyuʼne!› Extzun lepeʼ qe ichin kyiʼj.

Tej kyel bʼet xjal lu, jaxnaj Rahab twiʼ ja ex xi tqʼamaʼn kye qeju kabʼe xjal ex samaʼn. ‹Bʼiʼn wuʼne, qa kxel tqʼoʼn Jehová txʼotxʼ lu kyeye ax bʼiʼn quʼne qa tzqij mar Rojo tuʼn Jehová tej kyetze toj Egipto, ax ikx bʼiʼn quʼne, qa kyuʼne e naj qejo kawil Sehón ex Og. Tuʼnjo ma chin onine kyiʼje kytziyintze weye, qa miʼ kubʼ kybʼiyoʼne nmane ex ntxuʼye ex qe mastl wermane›.

Ok kbʼantel quʼne ikjo che chi, oʼkx iltaq tiʼj tuʼn tbʼant jun tiʼ tuʼn Rahab. ‹Yobʼankuxa aqwil (saqbʼaq) kyaq tiʼj ttzi ventan›, che chi qe xjal ex samaʼn, ‹ex chmonke tkyaqil at t-xilena kyukʼe atz tuj tjaya. Ajtzun qmeltzʼaje qkyaqile tuʼn qoke te tajawil txʼotxʼ lu ex oj qile (qlome) aqwil lu, nijun toj tjaya kybʼel qbʼiyoʼne›. Tejtzen kypon tukʼe Josué, xi kytxʼolbʼaʼn tkyaqil jlu.