¿Alkye Dios?

1. ¿Tiquʼn il tiʼj tuʼn tjaw qnimsaʼn Dios?

A Dios Bʼinchal tkyaqil. Kukx o ten, kukx at ex kukx ktel (Salmo 90:2). Tukʼe tzajniqe tbʼanel tqanil aʼyeju ateʼkux toj Tuʼjil Tyol (Biblia) (1 Timoteo 1:11). Tuʼnju o tzaj tqʼoʼn qchwinqlal, oʼkxku te qo ajbʼel ex oʼkxku te kjawil qnimsaʼn. Jyonkuxa Apocalipsis 4:11.

2. ¿Tzeʼnxix qMan Dios?

Mi aʼlx jun xjal o til, moqa o tlom, qMan Dios tuʼnju jun xewbʼaj te, aju nya qʼanchaʼl ex junxitl kywitz xjal twitz Txʼotxʼ (Juan 1:18; 4:24). Naqtzun tuʼnj, jaku tzʼel qnikʼ alkyeqe tmod Dios aj qximen tiʼjju o bʼaj tbʼinchaʼn. Jun techel, o kubʼ tbʼinchaʼn nim (bʼampo) wiq lobʼj ex bʼech aju in tzaj tyekʼun qe qa at tkʼuʼj qiʼj ex qa at nim tnabʼil. Ax ikx tkyaqil tbʼinchbʼen at twitz kyaʼj in tzaj tyekʼun qe qa at nimxix tipumal (tbʼalor). Jyonkuxa Romanos 1:20.

Juntl tten tuʼn tok qojtzqiʼn Dios aju qa ma qo uʼjin, moqa ma qo ẍchʼin, tiʼj Tuʼjil Tyol. Aju in yolin tiʼj qa tbʼanelxix te Dios kyukʼe xjal, tiʼj alkye bʼaʼn ex alkye nya bʼaʼn toj twitz, ex tiʼjju in bʼant tuʼn aj tikʼ jun tiʼ. Jyonkuxa Salmo 103:7-10.

3. ¿Atpe tbʼi Dios?

Tqʼama Jesús jlu: «Ay qMan Dios, ate toj kyaʼj, noqit tzʼel kynikyʼxjal qa xjanxixjo tbʼiy» (Mateo 6:9, ATM). At nim yol in najbʼen quʼn tuʼn qyolin tiʼj Dios, naqtzen tuʼnj, ik tzeʼn in tzaj tyekʼun Tyol Dios, at jun tbʼi tekuxix. Naq toj alkye yol in qo yolin, junxitl tten in xi qʼamet tbʼi Dios. Toj qyol in najbʼen aju «Jehová», naqtzun tuʼnj, ax ikx in najbʼen «Yavé». Jyonkuxa Isaías 42:8.

Kyoj nimku Tuʼjil Tyol Dios o che kubʼ qʼoʼn kyoj txqantl yol, o che kux qʼoʼn yol Qman moqa qAjaw te t-xel (tchʼixel) bʼibʼaj Jehová. Naqtzen tuʼnj, tej tkubʼku tzʼibʼen Tyol Dios tkuʼxtaq junlo wuq mil maj tbʼi Dios toj. Tej kykubʼ t-xnaqʼtzaʼn Jesús xjal tiʼj Dios, ajbʼen nim maj tbʼi Dios tuʼn. Jyonkuxa Juan 17:4.

Qʼonka twitza tiʼj video ¿Atpe tbʼi Dios?

4. ¿Atpe tkʼuʼj Dios qiʼj?

Qa at-xix tkʼuʼj Dios qiʼj, ¿tiquʼn in tzaj tqʼoʼn ambʼil tuʼn ttzaj nimxix yajbʼil? At junjun xjal in kubʼ ximinte qa in tzaj kʼixkʼej qiʼj tuʼn Dios tuʼn qok tuʼn toj malbʼil. Naqtzun tuʼnj, nya ik tten jlu. Jyonkuxa Santiago 1:13.

O tzaj tqʼoʼn Jehová ambʼil qe tuʼn tjaw qjyoʼn alkye bʼe kxel qiʼn. Tbʼanelxix qa ma tzʼajbʼen ambʼil lu quʼn tuʼn qajbʼen te (Josué 24:15). Naqtzen tuʼnj, nimku xjal in najbʼen ambʼil lu kyuʼn tuʼn tkubʼ kybʼinchaʼn aju nya bʼaʼn, tuʼntzun aju, in tzaj nimxix yajbʼil. In tzaj tbʼis Jehová tuʼn jlu. Jyonkuxa Génesis 6:5, 6.

Tuʼnju kʼujlaʼn qoʼ tuʼn Jehová ex taj (tgan) tuʼn qtzalaj, chʼixtl tpon ambʼil tuʼn tkubʼ tnajsaʼn nya bʼaʼn ex qeju bʼinchel nya bʼaʼn. Naqtzen tuʼnj, at tiquʼn kukx in tzaj tqʼoʼn Jehová ambʼil te nya bʼaʼn. Toj xnaqʼtzbʼil 8 ok ktzajel tzaqʼweʼn tiquʼn. Jyonkuxa 2 Pedro 2:9 ex 3:7, 13.

5. ¿Tzeʼn jaku qo ok laqʼeʼ ttxlaj Dios?

Nya oʼkx in tzaj tqʼoʼn Jehová ambʼil qe tuʼn qok laqʼeʼ ttxlaj aj qnaʼn Dios. Axpe ikx at tkʼuʼj tiʼjele junjun qe (Salmo 65:2; 145:18). Ax ikx taj tuʼn tkubʼ tnajsaʼn qil ex tbʼanel in nela toj twitz qa in nok tilil quʼn tuʼn tbʼant tajbʼil quʼn, inchq, moqa maske, at maj mitiʼ (tiloʼ) in bʼant quʼn. A jlu in tzaj tyekʼun qa inchq, moqa maske, aj il xjal qoʼ, jaku qo ok te tamiw. Jyonkuxa Salmo 103:12-14 ex Santiago 4:8.

Tuʼnju a Dios qʼol qchwinqlal, ilxix tiʼj tuʼn tok qkʼujlaʼn mas twitz alkyexku juntl (Marcos 12:30). In kubʼ qyekʼun qa kʼujlaʼn Dios quʼn aj tokxix qojtzqiʼn ex aj kyxi qbʼiʼn qeju tkawbʼil. Qa ma bʼant jlu quʼn, ok qo okel laqʼeʼxix ttxlaj. Jyonkuxa 1 Timoteo 2:4 ex 1 Juan 5:3.