¿Axpe tok qa tzajni tbʼanel tqanil tukʼe Dios?

1. ¿Alqe xim tkuʼx toj Tuʼjil Tyol Dios?

Atz tkuʼx toj Tyol Dios aju tbʼanel tqanil qa ok qo anqʼil te jun majx (juneleʼx) twitz Txʼotxʼ (Salmo 37:29). Aju uʼj lu tkuʼx 66 tal uʼj toj, e jaw tjyoʼn Dios junlo 40 xinaq, moqa ichan, tuʼn tkubʼ kytzʼibʼen Tuʼjil Tyol. Ma tzikʼ oxe mil tukʼe jweʼ syent abʼqʼi tkubʼlen ttzʼibʼen Moisés aʼyeju jweʼ tnejel uʼj, ex ma tzikʼ mil tukʼe bʼeljaj syent abʼqʼi tkubʼlen ttzʼibʼen apóstol Juan aju mankbʼil, moqa último uʼj. ¿Alqe xim tkuʼx toj Tyol Dios? Ajbʼen xewbʼaj xjan tuʼn Dios tuʼn tyolin kyukʼe qeju kubʼ kytzʼibʼen Tyol (2 Samuel 23:2). Aʼyeju xjal lu kubʼ kytzʼibʼen t-xim Dios, ex nya aju kye kyxim. Tuʼntzun aju, t-xim Jehová aju tkuʼx toj Xjan Uʼj. Jyonkuxa 2 Timoteo 3:16 ex 2 Pedro 1:20, 21.

Qʼonka twitza tiʼj video ¿Alqe xim tkuʼx toj Tuʼjil Tyol Dios?

2. ¿Tiquʼn jaku tzʼok qʼuqeʼ qkʼuʼj qa ax tok aju tkuʼx toj Tyol Dios?

Tuʼnju atz tzajni Xjan Uʼj tukʼe Dios. Qʼuqli qkʼuʼj tiʼj jlu tuʼnju in tzajxix tqʼamaʼn aju kbʼajel toj ambʼil tzul, aju mlayx tzaj tqʼamaʼn jun xjal (Josué 23:14). Oʼkx Dios aju nimxix tipumal (tbʼalor) jaku bʼant tuʼn ttzaj tqʼamaʼn jlu. Jyonkuxa Isaías 42:9 ex 46:10.

Qa atz tzajni jun uʼj tukʼil Dios, qʼuqli qkʼuʼj qa tuʼn jlu tbʼanelxix. O chex sipet nimxix Tuʼjil Tyol Dios kyoj nimku yol. Ojtxex tkubʼlen tzʼibʼen uʼj lu, naqtzun tuʼnj, ax tok (bʼaʼn ax) aju in tzaj tqʼamaʼn tiʼjju at twitz txʼotxʼ ex tiʼjju at twitz kyaʼj. Ax ikx at mojbʼabʼil kyxol ximbʼetz e kubʼ kytzʼibʼen qeju 40 xjal.a Ax ikx in tzaj tyekʼun Dios tkʼujlabʼil kyojele t-xaq uʼj lu ex kukx in chʼexpaj kyanqʼibʼil xjal tuʼn toj ambʼil jaʼlo. Tuʼn tkyaqil jlu, nimxix xjal qʼuqli kykʼuʼj qa axix tok Tyol Dios jlu. Jyonkuxa 1 Tesalonicenses 2:13.

Qʼonka twitza tiʼj video ¿Tiquʼn jaku tzʼok qʼuqeʼ qkʼuʼj qa ax tok aju tkuʼx toj Tyol Dios?

3. ¿Alqiʼj in yolin Tyol Dios?

In yolin Tyol Dios tiʼj tbʼanelxix t-xim Dios at kye xjal. In tzaj tqʼamaʼn qa tej ttzaj tzyet kyanqʼibʼil xjal twitz Txʼotxʼ xi tnajsaʼn tnejel xjal aju toklen tuʼn tanqʼin toj jun tbʼanel najbʼil ex in tzaj tqʼamaʼn alkye tten kbʼantel juntl maj tbʼanel najbʼil lu. Jyonkuxa Apocalipsis 21:4, 5.

Ateʼqe kawbʼil ex xnaqʼtzbʼil nim kyoklen toj Tyol Dios. Ax ikx in tzaj tqʼamaʼn alkye tmod Dios o ten kyukʼe xjal, a jlu in tzaj tyekʼun qe tzeʼnxix Dios. Tuʼntzen jlu, in qo tzaj tonin Xjan Uʼj tuʼn tok qojtzqiʼn Dios. Ax ikx in tzaj tqʼamaʼn tzeʼn jaku qo ok te tamiw qMan Dios. Jyonkuxa Salmo 19:7, 11; Santiago 2:23, ex 4:8.

4. ¿Tiʼ jaku tzʼonin tiʼja tuʼn tel tnikʼa tiʼj Tyol Dios?

Tuʼn «tkanun tuj kynabʼl aju tzʼibʼamaj tuj Tuʼjil» in xitaq tqʼamaʼn Jesús jun taqikʼ Tyol Dios ex in xitaq tqʼamaʼn tiʼ t-xilen. Axju kbʼantel tuʼn uʼj lu tuʼn tonin tiʼja tuʼn telxix tnikʼa kyiʼj xnaqʼtzbʼil toj Tyol Dios. Jyonkuxa Lucas 24:27, 45.

Qʼuqli qkʼuʼje qa tbʼanel ok kʼelel toj twitza tuʼn tel tnikʼa tiʼj Dios ex tiʼj t-xim. Naqtzun tuʼnj, at junjun xjal nya kyaj tuʼn tok kybʼiʼn Tyol Dios, axpe ikx at junjuntl in tzaj kyqʼoj qa ma qo yolin tiʼj Tyol Dios. Naqtzen tuʼnj, miʼ txi tqʼoʼna ambʼil tuʼn ttzaj bʼaj tkʼuʼja kyuʼn xjal lu. Ik tzeʼn in tzaj tqʼamaʼn Tyol Dios, aʼyeju in che xnaqʼtzan tuʼn tel kynikʼ tiʼj Dios jaku che anqʼin te jun majx. Jyonkuxa Juan 17:3.