¿Tiquʼn il tiʼj tuʼn kukx t-xnaqʼtzana tiʼj Tyol Dios?

1. ¿Tzeʼn jaku tzʼonin tiʼja qa kukx xkubʼ t-xnaqʼtzaʼna Tyol Dios?

Aʼyeju xnaqʼtzbʼil nim kyoklen tiʼj Tyol Dios ma xnaqʼtzana kyiʼj toj uʼj lu, male tzʼonin tiʼja tuʼn tchʼiy tkʼujlabʼila tiʼj Jehová. Naqtzun tuʼnj, ilxix tuʼn tok tilil tuʼna tuʼn kukx tchʼiy kʼujlabʼil lu (1 Pedro 2:2). Oʼkx jaku tzʼanqʼina te jun majx (juneleʼx) qa kukx sok laqʼeʼya ttxlaj Jehová aj t-xnaqʼtzana tiʼj Tyol. Jyonkuxa Juan 17:3 ex Judas 21.

Aj tel mastl tnikʼa tiʼj Dios, ok kchʼiyil qʼuqbʼil tkʼuʼja, ex a jlu kʼonil tiʼja tuʼn ttzalaj Dios tuʼna (Hebreos 11:1, 6). Aju qʼuqbʼil qkʼuʼj in nonin qiʼj tuʼn tajtz tiʼj qanmi ex tuʼn tkubʼ qchʼexpun qibʼ toj qanqʼibʼil. Jyonkuxa Hechos 3:19.

2. ¿Tzeʼn jaku tzʼonin teya kyiʼj txqantl?

Tajlo teya tuʼn t-xi tqʼamaʼna kye txqantl xjal aju ma tzʼel tnikʼa tiʼj, quʼn qkyaqil qajbʼil tuʼn t-xi qqʼamaʼn tbʼanel tqanil. Qa kukx xkubʼ t-xnaqʼtzana Tyol Dios, ok kʼelel tnikʼa alkye tten tuʼn tajbʼen Tuʼjil Tyol Dios tuʼna tuʼn tyolina tiʼj Jehová ex kyiʼj tbʼanel tqanil in tzaj tqʼamaʼn kye xjal. Jyonkuxa Romanos 10:13-15.

Jakule txi tqʼamaʼna tnejel kye toj tjaya ex kye tamiwoya, naqtzen tuʼnj, kyukʼe tbʼanel yol ex toj tumel. Mas bʼaʼn tuʼn tyolina tiʼjju in tzaj ttziyen Dios kye xjal ex nya tiʼjju qa nya ax tok (nya bʼaʼn ax) aju kyxnaqʼtzbʼil. Naʼntza qa mas nim toklen toj kywitz xjal aju tbʼinchbʼena ex nya aʼyeqe tyola. Jyonkuxa 2 Timoteo 2:24, 25.

3. ¿Tiʼ tbʼanel jaku ten kyxole tukʼe Jehová?

Qa ma xnaqʼtzana tiʼj Tyol Dios ok kchʼiyil qʼuqbʼil tkʼuʼja ex ok kʼokel laqʼeʼxix teya ttxlaj Jehová. Jaku tzʼoka ik tzeʼn jun tkʼwaʼl Dios. Jyonkuxa 2 Corintios 6:18.

4. ¿Tiʼ kʼonil tiʼja tuʼn kukx tel tnikʼa tiʼj Tyol Dios?

Miʼn kyaj ttzaqpiʼna tuʼn t-xnaqʼtzana tiʼj Tyol Dios (Hebreos 5:13, 14). Qʼamanxa te jun testigo de Jehová tuʼn ttzaj tqʼoʼn xnaqʼtzbʼil teya tiʼj Tyol Dios tukʼe uʼj ¿Tiʼ in tzaj t-xnaqʼtzaʼnxix Tyol Dios? Qa kukx sel tnikʼa tiʼj Tyol, mas ktzalajela. Jyonkuxa Salmo 1:1-3 ex 73:27, 28.

Naʼntza qa atz in tzaj tbʼanel tqanil tukʼe Jehová, aju Dios in tzalaj, ex qa jaku tzʼok laqʼeʼya ttxlaj qa ma tzʼok tchmon tibʼa kyukʼil qeju in che ajbʼen te (Hebreos 10:24, 25). Ex qa kukx sok tilil tuʼna tuʼn tbʼant tajbʼil Jehová tuʼna, jaku ten tchwinqlala (tanqʼibʼila) axix tok: aju chwinqlal mlay bʼaj. Aju mas bʼaʼn tuʼn tbʼant tuʼna, aju tuʼn tok laqʼeʼya ttxlaj Dios. Jyonkuxa 1 Timoteo 1:11 ex 6:19.