¿Tiquʼn at tajbʼen qe aju tej tkyim Jesús ex aju tej tjaw anqʼin?

Mintiʼ e kubʼ bʼinchaʼn xjal tuʼn kykyim

«Tejtzun tokx tqʼoʼn Qman Dios aju xinaq t-xol awal tuj Edén tuʼn tok ten aqʼnal tiʼj ex tuʼn tok tkʼujlaʼn, xi tmaʼn te kyjaʼ: Bʼaʼn t-xi tloʼna twitz tkyaqil tzeʼ at tuj tqan awal; atzunju twitz tzeʼ tuʼn tel nikʼbʼaj tiʼj bʼaʼn ex tiʼj mya bʼaʼn, miʼn txi tloʼna; qatzun ma txi tloʼna, ax tok kymela, chi Dios te.» (Génesis 2:15-17.)

Kubʼ tqʼoʼn Dios Adán, aju tnejel xjal, toj jun tbʼanel najbʼil aju Edén tbʼi twitz Txʼotxʼ atz jatumel attoq nim txkup (jil) ex tzeʼ ex kʼul. Kubʼ qʼoʼn Adán kyxol tzeʼ in nel kywitz ex jakutoq txi tloʼn kywitz. Noq oʼkx jun tzeʼ kubʼ tqʼoʼn Jehová aju xi tqʼamaʼn te Adán tuʼn miʼn txi tloʼn. Xi tqʼamaʼn Jehová te qa ok kkyimel qa miʼn xi tbʼiʼn tyol Jehová tiʼj jlu.

¿Elpe tnikʼ Adán tiʼjju tyol Jehová xi tqʼamaʼn te? Ojtzqiʼntoq tuʼn Adán tiʼ t-xilen kyimen. Otoq tzʼok tqʼoʼn twitz kyiʼj qe txkup in che kyim. Noqwit kubʼ bʼinchaʼn Adán tuʼn tkyim ik tzeʼn qe txkup, mintiʼxwitlo toklen aju xi qʼamaʼn te tuʼn Dios, tuʼnju okwitlo kyimel. Nya ik ttenju, quʼn el tnikʼ tnejel xjal tiʼj qa mlaytoq tzʼanqʼin te jumajx qa mintiʼtoq xi tbʼiʼn aju tzaj tqʼamaʼn Dios te tiʼj tzeʼ tuʼn miʼn txi tloʼn.

Ateʼ junjun xjal in kubʼ kyximen qa aju tzeʼ noq in nok te jun techel tiʼjju qa kubʼ koẍeʼ Adán tukʼil Eva, noqtzun tuʼnj, nya ik ttenju, tuʼnju xi tqʼamaʼn Jehová jlu kye kykabʼil: «Che kʼwaʼline, chmet-x kybʼaje, kynojsame twitz txʼotxʼ ex che kawine tibʼaj» (Génesis 1:28). Ax tokju tzeʼ lu. Ok tqʼoʼn Jehová tbʼi te «tzeʼ tuʼn tel nikʼbʼaj tiʼj bʼaʼn ex tiʼj mya bʼaʼn» tuʼnju ok tzeʼ lu te techel toklen Jehová tuʼn tzaj tqʼamaʼn alkye bʼaʼn ex alkye nya bʼaʼn kye xjal. Noqwit mintiʼ xi tloʼn Adán aju twitz tzeʼ, nya oʼkx jakutoq kubʼ tyekʼun qa bʼaʼn bʼiʼn, ax ikx jakutoq kubʼ tyekʼun qa in xi tqʼoʼn chjonte teju Bʼinchalte tkyaqilju tbʼanel otoq tzaj tqʼoʼn te.

Kyim Adán tuʼnju mintiʼ xi tbʼiʼn Dios

Xi tqʼamaʼn Dios te Adán kyjalu: «Ma txi tloʼna twitz tzeʼ aju xi nmaʼne teya: Miʼn txi tloʼna twitz, nchitzune». Tuʼntzun jlu, «kʼelel aʼ tiʼj twiʼya tuʼn tknet twaya okxi taj meltzʼaja tuj txʼotxʼ, porque tiʼj txʼotxʼ kubʼ bʼinchaʼna; tquqil txʼotxʼa, ex ax tquqil txʼotxʼ kʼokela ok tkyima, chi Dios» (Génesis 3:17, 19).

Xi tloʼn Adán twitz tzeʼ aju mintiʼtoq toklen tiʼj ex nya bʼaʼn ela jlu toj twitz Dios, tuʼnju nya chʼin il aju otoq bʼant tuʼn, quʼn tuʼn jlu kubʼ tyekʼun Adán qa mintiʼ in xi tqʼoʼn chjonte te Jehová tiʼj tkyaqilju otoq tzaj tqʼoʼn te. Tej t-xi tloʼn Adán twitz tzeʼ, el ikʼun Jehová tuʼn ex jaw t-skʼoʼn tex tbʼe aju tzultoq tiʼn nim nya bʼaʼn.

Tej tbʼet ambʼil kyim Adán ik tzeʼn otoq tqʼama Jehová te. Otoq kubʼ bʼinchaʼn Adán tiʼj tquqil txʼotxʼ ex xi tqʼamaʼn Dios te qa ok kʼokel juntl maj te tquqil txʼotxʼ. Mintiʼ xiʼ tnejel xjal anqʼil toj juntl tembʼil. Ok juntl maj te tquqil txʼotxʼ ik tzeʼn ajbʼen tuʼn Dios tuʼn tkubʼ bʼinchet (Génesis 2:7; Eclesiastés 9:5, 10).

In qo kyim tuʼnju atz tzajni qoʼ tiʼj Adán

«Noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il.» (Romanos 5:12.)

Tzaj nim nya bʼaʼn tuʼnju mintiʼ xi tbʼiʼn Adán Dios ex tuʼn jlu ilen. Tnejel, xi tnajsaʼn aju toklen tuʼn tanqʼin; ex nya jun anqʼibʼil te 70 moqa 80 abʼqʼi: xi tnajsaʼn aju tanqʼibʼil te jumajx. Ax ikx, mintiʼtl ok te jun xjal tzʼaqlixix ex tuʼn jlu, ax ikx kykyaqil tkʼwaʼl e ul itzʼj aj il qe.

Atz tzajni qoʼ qkyaqilx tiʼj Adán, tuʼntzunju, in qo ul itzʼji tukʼil jun qxmilal nya tzʼaqli ex aj il aju in qox tiʼn toj kamik. Tqʼama apóstol Pablo tzeʼnxix qoʼ tukʼil yol lu: «Atzun weye in nbʼinchaʼne aju tajbʼil nchibʼjale, kʼaʼyimaj qine tjaqʼ tipumal il. Bʼekʼbʼilxix nwitze. ¿Alkye ktzoqpilte weye teju nximlale lu in chinx tiʼn tuj kamik?». Ex tzaj ttzaqʼweʼn jlu: «Oʼkx te Dios tzoqpil weye noq tuʼn Jesucrist aju Qajaw» (Romanos 7:14, 24, 25).

Xi tqʼoʼn Jesús tchwinqlal tuʼntzun qanqʼin te jumajx

«Ma tzaj t-samaʼn Qman Dios aju Tkʼwaʼl tuʼn tok te Kolol kye xjal.» (1 Juan 4:14.)

Kubʼ t-ximen Jehová tzeʼn tuʼn qetz tzoqpaj tjaqʼ il ex tjaqʼ kamik. ¿Tiʼ bʼant tuʼn? Tzaj t-samaʼn aju Tkʼwaʼl kʼujlaʼnxix tuʼn, tuʼn tul itzʼj tzʼaqlixix ik tzeʼntoq Adán. Noqtzun tuʼnj, «mintiʼ jun il» kubʼ tbʼinchaʼn Jesús (1 Pedro 2:22). Kyjuʼtzun, mintiʼtoq tuʼn tkyim ex jakutoq tzʼanqʼin te jumajx.

Noqtzun tuʼnj, tzaj tqʼoʼn Jehová ambʼil tuʼn tkyim Jesús kyuʼn aj qʼoj tiʼj ex toj toxin qʼij, jaw anqʼin juntl maj tuʼn Jehová. Jaw anqʼin Jesús tukʼil jun t-xmilal aju mintiʼ qʼanchaʼl ex aj meltzʼaj juntl maj toj kyaʼj. Atz pon tyekʼun te Ttat aju nim toklen chwinqlal tzʼaqlixix tuʼn ttzaj qʼoʼn juntl maj aju otoq t-xi tnajsaʼn Adán. Xi tkʼamoʼn Jehová chojbʼil bʼant tuʼn Tkʼwaʼl, ex tuʼn jlu kykyaqil qeju in nok qʼuqeʼ kykʼuʼj tiʼj Jesús jaku tzaj kykʼamoʼn kychwinqlal te jumajx (Romanos 3:23, 24; 1 Juan 2:2).

Ikju, tzaj qʼoʼn juntl maj te Jesús aju xiʼ tnajsaʼn Adán. Kyim Jesús tuʼntzun qanqʼin te jumajx. In tzaj tqʼamaʼn Tyol Dios qa kyim Jesús «tuʼn qlaj qkyaqil noq tuʼn t-xtalbʼil Dios» (Hebreos 2:9).

A jlu in tzaj tyekʼun alkyeqe tmod Jehová. Tzʼaqlixix te Jehová, tuʼntzunju, mix aʼlxtoq jun xjal jakutoq klet tuʼnx tibʼ. Noqtzun tuʼnj, tuʼnju tzaj qʼaqʼin tkʼuʼj kyiʼj xjal ex tuʼn tkʼujlabʼil, ax kubʼ ximente alkye tten tuʼn tjapun twiʼ aju in tzaj tqanin. Iltoq tiʼj tuʼn ttzaj tqʼoʼn jun matij chojbʼil: aju chwinqlal Tkʼwaʼl tuʼntzun tchjet kyil xjal (Romanos 5:6-8).

Jaw anqʼin Jesús, ax ikx che jawil anqʼin junjuntl xjal

«O jatz anqʼin Crist kyxol kyimni; ate Crist o jatz anqʼin nej, tuʼntzun kyjaw anqʼin qeju o che kyim ik tzaʼnx te, ik tten jlu ik tzaʼn tnejel twitz awal in tyekʼun qa tzul mastl twitz. Porque noq tuʼn jun xjal tzaj kamik, ax ikxtzun noq tuʼn jun xjal ok che jawil anqʼin xjal kyxol kyimni. Porque ik tzaʼn in che kyim kykyaqil xjal noq tuʼnju tiyjil Adán qe, ikxtzun ok che jawil anqʼin kykyaqil qeju o che okslan tiʼj Crist.» (1 Corintios 15:20-22.)

Ax tok anqʼin Jesús tzalu twitz Txʼotxʼ ex kyim, noqtzun tuʼnj, ¿tzeʼn in nel qnikʼ tiʼj qa jaw anqʼin juntl maj? Jun yekʼbʼil tiʼj qa ax tok jaw anqʼin Jesús, aju qa nim maj kubʼ tyekʼun tibʼ kywitz nim xjal ex kyoj nimku tembʼil. Jun maj kubʼ tyekʼun tibʼ Jesús kywitz mas te 500 xjal. Xi tqʼamaʼn apóstol Pablo jlu toj uʼj xiʼ ttzʼibʼin kye okslal te tnam Corinto. Axpe ikx tqʼama qa kukx itzʼ junjun kyxol qe ok kyqʼoʼn kywitz tiʼj Jesús otoq jaw anqʼin, tuʼn t-xi tqʼamaʼn kye qa ojtzqiʼn kyuʼn aju otoq tzʼok kyqʼoʼn kywitz tiʼj ex aju otoq tzʼok kybʼiʼn (1 Corintios 15:3-8).

Nim toklen aju tqʼama apóstol Pablo qa a Jesús «jatz anqʼin nej», tuʼn jlu in nel qnikʼ tiʼj qa ok che jawil anqʼin mas xjal. Ax Jesús qʼamante qa tzul tqʼijlalil jatumel «kykyaqil xjal maquʼn tuj kamposant ok kybʼiʼ tqʼajqʼajel» twiʼ Jesús (Juan 5:28, 29).

Qa qajbʼil tuʼn qanqʼin te jumajx, il tiʼj tuʼn tok qʼuqeʼ qkʼuʼj tiʼj Jesús

«Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx.» (Juan 3:16.)

Kyoj qe tnejel t-xaq Tuʼjil Tyol Dios, in tzaj tqʼamaʼn tzeʼn tzaj tzyet kamik ex tzeʼn naj tbʼanel najbʼil Edén. Atzun kyoj bʼajsbʼil t-xaq Tuʼjil Tyol Dios, in yolin tiʼj tzeʼn kbʼel naj kamik ex tzeʼn tten kʼokel Txʼotxʼ tuʼn Dios te jun tbʼanel najbʼil. Aj tpon ambʼil lu, kykyaqil xjal che anqʼil toj tzalajbʼil ex ktel tbʼanel kye te jumajx. Toj Apocalipsis 21:4 in tzaj tqʼamaʼn qa miʼn tentl «kamik»; ex tuʼn tok qe qkʼuʼj tiʼjju o tzaj ttziyen Dios lu, toj versículo 5 in tqʼamaʼntl jlu: «Aqeju yol lu axix tok ex bʼaʼn tuʼn tqeʼ kykʼuʼje kyiʼj» chi. Tkyaqilju in tzaj ttziyen Jehová in japun twiʼ tuʼn.

¿In nok qʼuqeʼ teya tkʼuʼj qa «axix tok» qe yol lu? Qa ikju, bʼaʼn tuʼn tok tilel tuʼna tuʼn tel mas tnikʼa tiʼj Jesús ex tuʼn tok qʼuqe tkʼuʼja tiʼj tuʼntzun ttzaj tkʼamoʼna t-xtalbʼil Jehová. Nya oʼkx tzul kʼiwlaʼna tuʼn toj ambʼil jaʼlo, ax ikx jaku tzʼanqʼina tuʼn te jumajx toj jun tbʼanel najbʼil tzalu twitz Txʼotxʼ, jatumel miʼn tentl «kamik», «bʼis», «oqʼel» ex «kʼixkʼoj».