In tzaj tqʼuqbʼaʼn Jehová qkʼuʼj toj tkyaqil joybʼil in tzaj qiʼj

1, 2. ¿Alkye tten in tzaj tqʼuqbʼaʼn Jehová qkʼuʼj ex tiʼ qʼuqbʼil qkʼuʼj in tzaj tqʼoʼn Tyol?

XI TQʼAMAʼN jun kuʼxun aju kʼokel qqʼoʼn tbʼi te Eduardo qa in bʼaj tkʼuʼj tiʼj jun tiʼ te jun ansyan ma tijen, aju Stephen tbʼi. In ximentoq tiʼj 1 Corintios 7:28, aju in tzaj tqʼamaʼn qa «tzul yajbʼil» toj kychwinqlal qe in che kubʼ mojeʼ. Tuʼntzunju, xi tqanin Eduardo te Stephen, aju otoq kubʼ mojeʼ, alkye «yajbʼil» lu ex alkye tten jaku tzʼex twitz qa ma pon jun qʼij tuʼn tmojeʼ. Naʼmxtoq t-xi ttzaqʼweʼn Stephen t-xjel Eduardo, xi tqʼamaʼn te tuʼn t-ximen mas tiʼjju kubʼ ttzʼibʼin apóstol Pablo qa a Jehová «kukx in tqʼuqbʼaʼn qkʼuʼj. In tqʼuqbʼaʼn Dios qkʼuʼj tuj tkyaqil yajbʼil qe» (2 Cor. 1:3, 4).

² A Jehová aju Mambʼaj nim tkʼujlabʼil qiʼj ex in tzaj tqʼuqbʼaʼn qkʼuʼj aj qok weʼ kywitz nya bʼaʼn. Bʼalo jaku tzaj tnaʼna alkye tten tzaj tyekʼun Jehová tbʼeya ex alkye tten onin tiʼja mas te jun maj, ajbʼenlo Tyol tuʼn tej tonin tiʼja. Jaku tzʼok qeʼ qkʼuʼj tiʼj qa oʼkx taj Jehová aju mas tbʼanel te qe ik tzeʼn kubʼ tyekʼun kyiʼj tmajen toj ambʼil ojtxe (kjawil uʼjit Jeremías 29:11, 12).

3. ¿Alkyeqe xjel che xel qtzaqʼweʼn?

³ Ik tzeʼn toj alkyexku juntl ambʼil, qa ojtzqiʼn quʼn tiquʼn in che tzaj joybʼil ex nya bʼaʼn toj mejebʼleʼn, ex toj jun ja xjal, mas nya kwest kʼelel toj qwitz tuʼn qex twitz. Qa ikju, ¿tiʼ jaku tzaj qʼinte «yajbʼil» toj qchwinqlal, aju yolin Pablo tiʼj? ¿Alkyeqe techel ateʼ toj Tyol Dios ex toj ambʼil jaʼlo jaku tzaj qʼonte qʼuqbʼil qkʼuʼj? Qa ma tzʼok qbʼiʼn tzaqʼwebʼil kyiʼj xjel lu, jaku che onin qiʼj tuʼn kukx tikʼx quʼn.

AJU «YAJBʼIL» TOJ KYCHWINQLAL MEJEBʼLEʼN

4, 5. Qʼamantza junjun tiʼ jaku tzaj qʼinte «yajbʼil» toj kychwinqlal mejebʼleʼn.

⁴ Tej tkubʼ tmojbʼaʼn Jehová qe tnejel xjal, tqʼama jlu: «Tuʼntzun jlu, kyjel tqʼoʼn xinaq tman ex ttxuʼ, kʼokeltzun mojeʼ tukʼil t-xuʼjil, ex kykabʼil che okel te junx» (Gén. 2:24). Noqtzun tuʼnj, jaku che tzaj nya bʼaʼn qiʼj aj qkubʼ mojeʼ ex aj tten juntl qja tuʼnju aj il qoʼ (Rom. 3:23). In nok toklen chmilbʼaj ik tzeʼn in bʼant tuʼn tman, tuʼnju o tzaj qʼoʼn toklen tuʼn Dios tuʼn tok te wibʼaj te t-xuʼjil (1 Cor. 11:3). Kwestlo jaku tzʼela toj kywitz junjun chmilbʼaj tuʼn tbʼant oklenj lu kyuʼn. Ex ateʼ junjun xuʼjilbʼaj kwest jaku tzʼela toj kywitz tuʼn tokx kyqʼon kyibʼ tjaqʼ tkawbʼil kychmil twitzju kykawbʼil kytat. Nya oʼkxju, ax ikx jaku tzaj nya bʼaʼn kyiʼj qeju tzma in che kubʼ mojeʼ tuʼn kypaj qeju at kyxilen kyukʼil.

⁵ Ex mas jaku tzaj bʼaj kykʼuʼj aj t-xi tqʼamaʼn xuʼjilbʼaj te tchmil qa tzul jun kykʼwaʼl. Maske in kubʼ kynaʼn tzalajbʼil, ax ikx in che ximen tiʼj qa jaku tzaj yabʼil tiʼj xuʼjilbʼaj akux in nayon tiʼj tal moqa aj tul itzʼji. Ex kʼajbʼel-lo mas pwaq kyuʼn aj tel chʼin ambʼil moqa mas yajxitl. Noqtzun tuʼnj, nya oʼkx chʼixpubʼil lu kbʼajel. Kʼokel tqʼoʼn txubʼaj mas ambʼil ex twiʼ tiʼj tal. Atzunte mambʼaj kaqʼunal mas tuʼnju il tiʼj tuʼn tel tnikʼ tiʼj qa in xi tqʼoʼn aju at tajbʼen kye toj tja. Tuʼntzunju, ya mlay ten nim ambʼil tiʼj txubʼaj ex mambʼaj tuʼn kyten junx ik tzeʼn tnejel.

6-8. ¿Tiʼ jaku kubʼ tnaʼn jun mejebʼleʼn qa mintiʼ in nul jun kykʼwaʼl maske kyaj tuʼn tul?

⁶ Ateʼ junjun mejebʼleʼn in che ok weʼ twitz juntl nya bʼaʼn: aju qa mintiʼ in nul kykʼwaʼl maske kyajbʼil tuʼn tul. Mintiʼ in tzaj ttziyen mejebʼleʼn ex qe kʼwaʼl jun qanqʼibʼil toj txubʼtxaj, noqtzun tuʼnj, qa qaj tuʼn tul jun qkʼwaʼl ex mintiʼ in nul, jaku tzʼok jlu te jun yajbʼil toj qchwinqlal. Ateʼ junjun xuʼjilbʼaj in kubʼ kynaʼn nim bʼis qa mintiʼ in nok ten jun kyal (Prov. 13:12). Toj ambʼil ojtxe, mintiʼ in nok qʼoʼn toklen jun xuʼj qa mintiʼ in nul tal. Tzaj nim tbʼis Raquel, aju t-xuʼjil Jacob, tej tok tqʼoʼn twitz tiʼj qa in che ultoq tal terman, atzunte mintiʼ (Gén. 30:1, 2). Ateʼ junjun erman o chex samaʼn pakbʼal toj juntl tnam jatumel in nul nim kykʼwaʼl xjal ex in xi kyqanin xjal kye tiquʼn naʼmx tul jun kykʼwaʼl. Maske toj tumel in xi kychikʼbʼaʼn kye tiquʼn, at maj in tzaj qʼamaʼn jlu kye: «¡Bʼisbʼajilxix! Qo naʼle Dios kyiʼje tuʼn tul jun kykʼwaʼle».

⁷ Qbʼinx aju ikʼ tiʼj jun ermana te Inglaterra aju mintiʼ bʼant tuʼn tul jun tal, maske tajxix tuʼn tten. Tejtzun tpon toj abʼqʼi jatumel ya mlaytoq tzul itzʼji tal, tzaj nim tbʼis tuʼnju el tnikʼ tiʼj qa mlaytoq bʼant aju tajbʼil toj tanqʼibʼil. Tuʼntzunju, kubʼ kyximen tukʼil tchmil tuʼn ttzaj kyiʼn jun kʼwaʼl te kymebʼa. Noqtzun tuʼnj, tqʼama jlu: «Kubʼ nnaʼne jun ambʼil ik tzeʼn otoq kyim jun xjal. Ojtzqiʼn wuʼne qa nya junx taʼ tuʼn tul itzʼji jun wale twitzju tuʼn ttzaj jun te nmebʼe».

⁸ Ax tok in tzaj tqʼamaʼn Tyol Dios qa «che kletel qe xuʼj, qa bʼaʼn che chʼiysan kyal» (1 Tim. 2:15). Noqtzun tuʼnj, mintiʼ in yolin jlu tiʼj qa jaku kanet kychwinqlal te jumajx, sino atz in yolin tiʼj qa ma tzʼok jun xuʼj te txubʼaj ex at jun tja tuʼn tkwentin tiʼj, jaku tzʼonin tiʼj tuʼn miʼn tyolin kyiʼj txqantl ex tuʼn miʼn tokx tqʼon tibʼ toj kyanqʼibʼil (1 Tim. 5:13). Maske ikju, che ul nya bʼaʼn kyiʼj aju at toklen tukʼil mejebʼleʼn ex tiʼj kyanqʼibʼil tukʼil qe toj kyja.

9. ¿Alkye joybʼil mas kwest in che ok weʼ junjun xjal twitz?

⁹ Aj qximen kyiʼj nya bʼaʼn jaku che tzaj toj jun mejebʼleʼn, at jun mintiʼ in nul toj qwiʼ: aju qa ma kyim qukʼil. Aju joybʼil kwest lu, bʼalo mintiʼ jun in ximen tiʼj qa tuʼn tbʼaj jlu tiʼj toj ambʼil jaʼlo. Qʼuqlixix kykʼuʼj okslal tiʼj yol kyaj ttziyen Jesús qa tuʼn kyjaw anqʼin kyimni, a jlu jun qʼuqbʼil kykʼuʼj xjal in che kyaj mebʼa (Juan 5:28, 29). Atzun juntl tten jlu tzeʼn in xi tqʼoʼn Qtat toj kyaʼj qʼuqbʼil kykʼuʼj qeju in che ok weʼ twitz nya bʼaʼn tukʼil Tyol tuʼntzun tonin kyiʼj. Qo xnaqʼtzan tzeʼn o txi tqʼoʼn Dios qʼuqbʼil kykʼuʼj junjun tmajen ex tzeʼn o tzʼonin jlu kyiʼj.

ALKYE TTEN JAKU KANET QʼUQBʼIL QKʼUʼJ AJ KYTZAJ YAJBʼIL QIʼJ

10. ¿Tiʼ xi tqʼuqbʼaʼn tkʼuʼj Ana? (Qʼonka twitza tiʼj tnejel tilbʼilal).

¹⁰ Ikʼ Ana aju t-xuʼjil Elqaná toj jun joybʼil kwest: mintiʼtoq in nul itzʼji tal, atzunte Peniná, aju juntl t-xuʼjil Elqaná, in nultoq itzʼji tal (kjawil uʼjit 1 Samuel 1:4-7). In tzaj bʼajtoq tkʼuʼj Ana tuʼnju in xmayintoq Peniná tiʼj junjun abʼqʼi. ¿Tiʼ xi tqʼuqbʼaʼn tkʼuʼj? In tzaj tqʼamaʼn Tyol Dios qa nim «naʼn Ana Dios» te Jehová tuʼn t-xi tqʼamaʼn te aju nya bʼaʼn in nok weʼ twitz. Ax tok, in yontoq tuʼn ttzaj ttzaqʼweʼn Jehová tnaʼj Dios. Noq tzeʼnxku, «mintiʼtl o bʼisun» (1 Sam. 1:12, 17, 18). Qʼuqlitoq tkʼuʼj tiʼj qa jakutoq tzaj tqʼoʼn Jehová ambʼil te tuʼn tul itzʼji jun tal moqa jakutoq tzaj tqʼuqbʼaʼn tkʼuʼj toj juntl tten.

11. ¿Alkye tten in tzaj tqʼuqbʼaʼn naʼj Dios qkʼuʼj?

¹¹ Kukx tzul yajbʼil qiʼj akux aj il qoʼ ex akux in qo anqʼin twitz jun txʼotxʼ jatumel in kawin Satanás (1 Juan 5:19). Noqtzun tuʼnj, ojtzqiʼn quʼn qa jaku tzʼok qeʼ qkʼuʼj tiʼj Dios «in tqʼuqbʼaʼn [...] qkʼuʼj tuj tkyaqil yajbʼil qe». Jaku tzʼonin qiʼj aj qok weʼ twitz nya bʼaʼn qa ma qo naʼn Dios tuʼn tkyaqil qkʼuʼj ik tzeʼn te Ana. Nya oʼkx tuʼn t-xi qqʼamaʼn qe nya bʼaʼn in che tzaj qiʼj te Jehová, ax ikx il til tiʼj tuʼn t-xi qqʼamaʼn tiʼxix in kubʼ qnaʼn ex tuʼn qkubʼsan twitz tuʼn tkyaqil qkʼuʼj tuʼn tonin qiʼj (Filip. 4:6, 7).

12. ¿Tiʼ onin tiʼj Ana tuʼn ttzalaj?

¹² Jaku kanet qʼuqbʼil qkʼuʼj maske in kubʼ qnaʼn nim bʼis tuʼnju mintiʼ in nul jun qkʼwaʼl ex qa tuʼnju o kyim jun xjal kʼujlaʼnxix quʼn. Bʼaʼn tuʼn ttzaj qnaʼn Ana, aju tsanjel Dios ten toj ambʼil tej tten Jesús. Tzmatoq wuq abʼqʼi tkubʼlen mojeʼ tej tkyim tchmil ex mintiʼ in tzaj tqʼamaʼn Tyol Dios qa ul jun tal. Tej tjapun twiʼ 84 abʼqʼi, mintiʼ el «tpaʼn tibʼ Ana tiʼj tja Dios, atzun in ajbʼen te Qman qonikʼan ex qʼijtl, in kubʼ tyoʼn weʼyaj ex in naʼn Dios» (Luc. 2:37). Tuʼnju kʼulin Ana te Jehová, tzaj qʼuqbʼaʼn tkʼuʼj ex tzalaj tuʼn jlu.

13. Qʼamantza jun techel tiʼj alkye tten in tzaj kyqʼuqbʼaʼn qe tbʼanel qamiw qkʼuʼj qa mintiʼ in bʼant kyuʼn toj qja.

¹³ Ax ikx jaku tzaj kyqʼoʼn tbʼanel qamiw o che kanet toj Ja te Chmabʼil qʼuqbʼil qkʼuʼj (Prov. 18:24). Qo xnaqʼtzan tiʼj jun techel. Kubʼ tnaʼn Paula nim bʼis tej tel tpan tibʼ ttxuʼ tiʼj axix tok. Kwest ela jlu toj twitz tuʼnju tzma qʼiʼntoq jweʼ abʼqʼi tuʼn. Noqtzun tuʼnj, tej tel mas ambʼil onin Ann tiʼj, jun precursora at jatumel in noktoq tchmon tibʼ, kubʼ tyekʼun tkʼujlabʼil ex ximen tiʼj. In tzaj tqʼamaʼn Paula jlu: «Onin tkʼujlabʼil ex tej t-ximen Ann wiʼje, maske nya jun toj njaye». Ex tqʼamatl jlu: «Onin jlu wiʼje tuʼn kukx wajbʼene te Jehová». Meltzʼaj ttxuʼ Paula toj ttnam Jehová ex nim in tzalaj tuʼn jlu. Ax ikx in tzalaj Ann tuʼnju onin tiʼj Paula tuʼn kukx tajbʼen te Jehová.

14. ¿Alkye tten in nonin qiʼj aj t-xi qqʼuqbʼaʼn kykʼuʼj txqantl?

¹⁴ Bʼaʼn tuʼn ttzaj qnaʼn qa aj tkubʼ qyekʼun axix tok qkʼujlabʼil kyiʼj txqantl, in nonin jlu qiʼj tuʼn tetz qiʼn junjun ximbʼetz nya toj tumel toj qwiʼ. Ateʼ nim ermana, o che mojeʼ moqa naʼmx, ojtzqiʼn kyuʼn qa in tzaj tqʼoʼn nim tzalajbʼil kye qa in che onin tiʼj aqʼuntl tuʼn tpakbʼet tbʼanel tqanil. Kyaj tuʼn tjaw kynimsaʼn ex tuʼn tkubʼ kybʼinchaʼn tajbʼil Jehová. Axpe ikx in nok pakbʼabʼil te jun terapia te junjun. Jaku tzʼok qeʼ qkʼuʼj tiʼj qa in qo onin tuʼn kyten erman toj mujbʼabʼil qa ma qo ximen kyiʼj ex kyiʼj xjal jatumel in qo pakbʼan (Filip. 2:4). Atzun jlu bʼant tuʼn apóstol Pablo. E ok t-xqʼuqin qe erman te tnam Tesalónica «ik tzaʼn jun txuybʼaj kwentinxix qe tal tuʼn» ex ok tqʼuqbʼaʼn kykʼuʼj toj kyokslabʼil (kjawil uʼjit 1 Tesalonicenses 2:7, 11, 12).

QʼUQBʼIL KYKʼUʼJ JA XJAL

15. ¿Alkyeqe at kyoklen tuʼn t-xi kyxnaqʼtzaʼn axix tok kye kykʼwaʼl?

¹⁵ Ax ikx nim toklen tuʼn qximen tiʼj aj t-xi qqʼoʼn qʼuqbʼil kykʼuʼj ex onbʼil kye txqantl ja xjal. At maj, in xi kyqanin junjun erman tzma in che oktz toj ttnam Jehová onbʼil kye txqantl erman o che chʼiy toj kyokslabʼil tuʼn t-xi kyqʼoʼn xnaqʼtzbʼil tiʼj axix tok kye kykʼwaʼl, axpe ikx tuʼn kyxnaqʼtzan tiʼj Tyol Dios kyukʼil. In tzaj tqʼamaʼn Xjan Uʼj qa aqe mambʼaj at kyoklen tuʼn t-xi kyqʼoʼn xnaqʼtzbʼil kye kykʼwaʼl (Prov. 23:22; Efes. 6:1-4). Ex kukx at kyoklen tiʼj jlu maske at maj jaku chex onit, ex in kyqʼoʼn chjonte tiʼj jlu. Tuʼntzunju, nim toklen tuʼn kyyolin mambʼaj nim maj kyukʼil kykʼwaʼl.

16. ¿Tiʼ il tiʼj tuʼn ttzaj qnaʼn aj ttzaj qanin qe tuʼn qonin tiʼj jun kʼwaʼl?

¹⁶ Qa ma tzaj tqʼamaʼn jun mambʼaj qe tuʼn qxnaqʼtzan tiʼj Tyol Dios tukʼil tkʼwaʼl, il tiʼj tuʼn ttzaj qnaʼn qa mintiʼ in nel qiʼn toklen. Axpe ikx jaku tzaj qʼamaʼn qe tuʼn t-xi qqʼoʼn xnaqʼtzbʼil te tkʼwaʼl jun xjal mintiʼ in kubʼ tyekʼun tajbʼil tiʼj axix tok. Kyoj ambʼil ik tzeʼn jlu, il tiʼj tuʼn tel qnikʼ tiʼj qa mintiʼ in qo ok te kyman moqa te kytxuʼ. Ax ikx tbʼanel qa ma t-xi qqʼoʼn xnaqʼtzbʼil kye atz kyja, ex aj kyten kyman moqa juntl erman. Ax ikx bʼaʼn tuʼn t-xi qqʼoʼn xnaqʼtzbʼil kye jatumel jaku tzʼok kyqʼoʼn kywitz txqantl qiʼj, iktzun tten mlay kubʼ kyximen jun nya bʼaʼn qiʼj. Aj tbʼet ambʼil, tbʼanel qa aʼyex mambʼaj lu kxel kyxnaqʼtzaʼn kykʼwaʼl tuʼn tten tbʼanel kyamiwbʼil tukʼil Jehová ik tzeʼn in tzaj tqʼamaʼn kye.

17. ¿Alkye tten jaku tzaj kyiʼn kʼwaʼl tzalajbʼil toj kyja?

¹⁷ Aqeju kuʼxun kʼujlaʼn Jehová kyuʼn ex in che nimen te, in nok kyqʼuqbʼaʼn kykʼuʼj kyman aj kynimen kye, aj kyonin kyiʼj tukʼil pwaq moqa toj juntl tten, ax ikx in che onin tuʼn tten jun tbʼanel kyamiwbʼil toj kyja tukʼil Jehová. Lamec, jun t-xeʼchel Set, aju anqʼin tej naʼmxtoq ttzaj Nim Jbʼal ex kʼulin te Jehová. Kyaj tqʼamaʼn qe yol lu tiʼj Noé, aju tkʼwaʼl: «Tzaj tqʼoʼn Qman sentens tibʼaj txʼotxʼ. Tuʼntzun jlu in qo aqʼnan nimxix. Atzunte kʼwaʼl lu kʼelel qʼinte aqʼuntl qiʼj, ex kqebʼel qkʼuʼj tuʼn». E japun twiʼ tyol tej tel tiʼn Jehová yajbʼil kyiʼj xjal (Gén. 5:29; 8:21). Toj ambʼil jaʼlo, aqeju kʼwaʼl in che kolin tiʼj axix tok, jaku tzʼok kyqʼuqbʼaʼn kykʼuʼj toj kyja. Jaku che onin kyiʼj toj kyja tuʼn kyikʼx joybʼil kyuʼn ex tuʼn kykyaj anqʼin tojju xitbʼil chʼix tul, aju mas matij ik tzeʼn tej ttzaj Nim Jbʼal.

18. ¿Tiʼ jaku tzʼonin qiʼj tuʼn kyikʼx nya bʼaʼn quʼn?

¹⁸ Toj ambʼil jaʼlo, at nim millón xjal in kanet qʼuqbʼil kykʼuʼj aj kynaʼn Dios, aj kyximen kyiʼj techel ateʼ toj Xjan Uʼj ex aj kyjyon tiʼj kyamiwbʼil kyukʼil txqantl tmajen Jehová (kjawil uʼjit Salmo 145:18, 19). Ojtzqiʼn quʼn qa oʼkx Jehová tzul qʼonte qʼuqbʼil qkʼuʼj te jumajx, ex kʼonil jlu qiʼj tuʼn tikʼx alkyexku joybʼil moqa nya bʼaʼn quʼn, qa toj ambʼil jaʼlo ex qa toj ambʼil tzul.