¿Tiʼ teya t-ximbʼetz tiʼj?

¿Jakupe tzʼonin Xjan Uʼj tiʼja tuʼn toka te tamiw Dios?

AJU IN KUBʼ KYXIMEN JUNJUN XJAL

Ateʼ junjun in kubʼ kyximen qa mlay che ok te tamiw Dios tuʼnju in kubʼ kyximen qa tzʼil ateʼ twitz tuʼn il o bʼant kyuʼn. Junjuntl in kyqʼamaʼn qa mintiʼ tkʼuʼj Dios qiʼj. ¿Tiʼ t-ximbʼetza tiʼj?

AJU IN TZAJ TQʼAMAʼN TYOL DIOS

In nok Dios te kyamiw xjal tzʼaqliqe twitz (Proverbios 3:32). Qa ma qo nimen te, jaku qo ok te tamiw.

¿TIʼ MASTL IN TZAJ TQʼAMAʼN TYOL DIOS?

Taj Dios tuʼn qok te tamiw (Santiago 4:8).
Ik tzeʼn jun tbʼanel amiw, taj Dios tuʼn qtzaj tonin ex tuʼn tkubʼ tnajsaʼn qil (Salmo 86:5).
Aʼyeju tamiw Dios in nel kyikʼen aju ikʼun tuʼn ex in nok kykʼujlaʼn aju kʼujlaʼn tuʼn (Romanos 12:9).

Qa tajbʼila chʼintl tqanil tiʼj tzeʼn tuʼn qanqʼin ik tzeʼn tajbʼil Dios, bʼaʼn tuʼn tkux tjyoʼna xnaqʼtzbʼil 12 toj uʼj ¿Tiʼ in tzaj t–xnaqʼtzaʼnxix Tyol Dios?, aju bʼinchan kyuʼn testigos de Jehová. Ax ikx at toj www.pr2711.com/mam.