¿O tzʼok tbʼiʼna?

¿Tiquʼn mintiʼ tzaj bʼaj tkʼuʼj Esteban tej tpon qʼiʼn kywitz aj qʼoj?

ATTOQ Esteban twitz jun kʼloj xjal nya bʼaʼn, aqeju 71 xjal at kyoklen toj Sanedrín. Atzun junjun xjal lu at kyoklen toj tnam. Otoq che pon txkoʼn tuʼn nejenel kye pal, aju Caifás tbʼi, ex ax xjal lu qʼamante tuʼn tkubʼ qʼoʼn tkastiw Jesús tuʼn tkyim kyoj qe xjaw otoq che ikʼ (Mat. 26:57, 59; Hech. 6:8-12). In pon jun ex juntl, ex juntl nya ax tok testiw. Tejtzun tpon Esteban, e jaw labʼin qe xjal ateʼ toj Sanedrín tuʼnju ok kykeʼyin qa ik keʼyin twitz Esteban ik tzeʼn jun anjel (Hech. 6:13-15).

¿Tiʼ onin tiʼj Esteban tuʼn miʼn ttzaj bʼaj tkʼuʼj toj nya bʼaʼn ambʼil lu? Tej naʼmxtoq tpon qʼiʼn kywitz xjal toj Sanedrín, atztoq tok twiʼ tiʼj tajbʼebʼil toj kʼloj okslal tuʼn tonbʼil xewbʼaj xjan (Hech. 6:3-7). Tejtzun kyxi qanin xjel te, onin xewbʼaj xjan tiʼj tuʼn ttzaj tnaʼn junjun xnaqʼtzbʼil te (Juan 14:16). Nya oʼkxju, tej mintiʼ tzaj xobʼ kywitz xjal at kyoklen, ax xewbʼaj xjan onin tiʼj tuʼn ttzaj tnaʼn junlo 20 txʼolbʼabʼil toj Tyol Dios otoq kubʼ tzʼibʼin toj yol hebreo ex atz in kanet jlu quʼn toj capítulo 7 toj uʼj te Hechos (Juan 14:26). Ax ikx chʼiy qʼuqbʼil tkʼuʼj Esteban tej ttzaj yekʼin te qa qʼuqlitoq Jesús toj tbʼanqʼabʼ Jehová (Hech. 7:54-56, 59, 60).

Ax ikx qe, jakulo pon jun qʼij jatumel jaku qo el ikʼun kyuʼn aj qʼoj (Juan 15:20). Qa naqʼli qoʼ tuʼn quʼjin tiʼj Tyol Dios ex qa atz tok qwiʼ tiʼj pakbʼabʼil, kyxel qqʼoʼn ambʼil te xewbʼaj xjan tuʼn tonin qiʼj. Ax ikx tzul tqʼoʼn qipumal tuʼn tikʼx ikʼbʼil quʼn ex tuʼn tten tzalajbʼil toj qanmi (1 Ped. 4:12-14).