¿Tiʼ kbʼantel tuʼn Tkawbʼil Dios?

AJU O BʼANT TUʼN TKAWBʼIL DIOS

Toj xnaqʼtzbʼil ma kyaj, ma qo xnaqʼtzan tiʼj techel tqʼama Jesús. In tzaj tyekʼin techel lu qa o txi tzyet tuʼn tkawin Tkawbʼil Dios toj kyaʼj ex a Jesús aj Kawil.

In tzaj tqʼamaʼn Tyol Dios qa tej t-xi tzyet tuʼn tkawin Jesús toj kyaʼj, etz tlajoʼn Tajaw il kyukʼix nya bʼaʼn anjel. Tuʼntzunju, oʼkx jaku bʼant nya bʼaʼn kyuʼn tzalu twitz Txʼotxʼ ex atzun jun tiquʼn o tzaj nim nya bʼaʼn atxix toj abʼqʼi 1914 (Apocalipsis 12:7, 9).

Maske in che bʼaj nim tiʼchaq nya bʼaʼn twitz Txʼotxʼ, o bʼant nim tbʼanel tiʼchaq kyiʼj xjal tuʼn Jesús, aju aj Kawil toj Tkawbʼil Dios. A nejni twitz aqʼuntl tiʼj xnaqʼtzbʼil in xi qʼet kye xjal tiʼj Tyol Dios twitz tkyaqil Txʼotxʼ, aju kyaj tqʼamaʼn, ex o tzʼonin jlu kyiʼj nim millón xjal tuʼn tel kynikʼ kyiʼj nabʼil ateʼkux toj ex tuʼn tkubʼ kyanqʼiʼn (Isaías 2:2-4). At tbʼanel kyximbʼetz xjal lu tiʼj aqʼuntl, in che tzalaj kyukʼil toj kyja ex in che tzalaj kyiʼj junjun tiʼchaq, pero nya aʼye tiʼchaq mas nim toklen te kye. In nonin Tyol Dios kyiʼj tuʼn tten tbʼanel kyanqʼibʼil ex in chex t-xnaqʼtzaʼn tuʼn kyok te tbʼanel xjal, ik tzeʼn qe xjal taj Dios tuʼn kyten tjaqʼ Tkawbʼil.

¿TIʼ KBʼANTEL TUʼN TKAWBʼIL DIOS TOJ CHʼINTL AMBʼIL?

Kukx in che kawin xjal twitz Txʼotxʼ maske o txi tzyet tuʼn tkawin Jesús toj kyaʼj. Xi tqʼamaʼn Dios jlu te Jesús: «Bʼaʼn tuʼn tkubʼ kyiʼj qe aj qʼoj tuʼna» (Salmo 110:2). Toj chʼintl ambʼil kbʼel tnajsaʼn Jesús qe aj qʼoj tiʼj ex kʼelel tiʼn tkyaqil nya bʼaʼn in tzaj kyiʼj xjal kyaj tuʼn kynimen te Dios.

Toj ambʼil aju, kbʼantel jlu tuʼn Tkawbʼil Dios:

• Kbʼel tnajsaʼn qe nya ax tok okslabʼil. In nok tmojbʼaʼn Tyol Dios nya ax tok okslabʼil tukʼil jun xuʼj jawni twitz kyukʼil xinaq, aju toj chʼintl ambʼil kbʼel najsaʼn. Tuʼntzunju, che kbʼel najsaʼn okslabʼil o tzaj kyiʼn nim nya bʼaʼn kyiʼj xjal ex o txi kyyekʼin nya ax tok xnaqʼtzbʼil tiʼj Dios kye. Nim xjal che jawil labʼin aj tkubʼ najsaʼn (Apocalipsis 17:15, 16).

• Kbʼel tnajsaʼn kykawbʼil xjal. Kʼelel tiʼn Tkawbʼil Dios kykawbʼil xjal (Apocalipsis 19:15, 17, 18).

• Kbʼel tnajsaʼn qe xjal nya bʼaʼn. ¿Tiʼ kbʼajel kyiʼj xjal in kubʼ kybʼinchaʼn nya bʼaʼn ex mintiʼ in che nimen te Dios? «Atzun qeju bʼinchal mya bʼaʼn [...] bʼiʼx che elex lajoʼn» (Proverbios 2:22).

• Kbʼel tnajsaʼn Tajaw il ex qe nya bʼaʼn anjel. Ya mlay sbʼun Satanás kyukʼix qe nya bʼaʼn anjel kyiʼj qe nasyon (Apocalipsis 20:3, 10).

¿Tiʼ kbʼajel kyiʼj xjal kyaj tuʼn kyanqʼin tjaqʼ Tkawbʼil Dios?

¿TIʼ KBʼANTEL TUʼN TKAWBʼIL DIOS KYIʼJ XJAL?

Kbʼantel nim tiʼchaq tuʼn Jesús tzmax toj kyaʼj, aju mintiʼ o bʼant kyuʼn xjal in che kawin. Ax ikx, che onil 144,000 aj kawil tukʼil, aʼyeju o che jaw skʼoʼn kyxol xjal (Apocalipsis 5:9, 10; 14:1, 3). Kʼokel tilil tuʼn tuʼn tbʼant tajbʼil Dios tzalu twitz Txʼotxʼ. ¿Tiʼ kbʼantel tuʼn Tkawbʼil Dios kyiʼj xjal?

• Kʼelel tiʼn yabʼil ex kamik. «Mi jun xjal najl tuj tnam ok tmaʼ kyjaʼ: Yabʼ qine, chiwt» ex «mintiʼtl kamik» (Isaías 33:24; Apocalipsis 21:4).

• Ktel mujbʼabʼil tuʼn ex mlay tentl nya bʼaʼn. «Kykyaqil che tel tuj txubʼtxaj». «Kykyaqil xjal che anqʼil mintiʼtl kyxobʼil, ex teylex te junjun kʼojlal tjaqʼ t-xlekumal tqan t-uva ex tqan t-higo» (Isaías 54:13; Miqueas 4:4).

• Kxel tqʼoʼn tbʼanel kyaqʼun xjal. «Qe xjal skʼoʼmaj wuʼne che tzalajel tiʼj taqʼunbʼen kyqʼabʼ. Mya noqx gan che aqʼnal» (Isaías 65:22, 23).

• Kʼelel tiʼn xitbʼil in tzaj twitz txʼotxʼ. «Ktzalajel aju lugar mintiʼ kynajbʼil xjal tuj, ex aju tzqij txʼotxʼ ktzalajel nimxix ex che jawil poqʼl nim bʼech twitz» (Isaías 35:1).

• Kxel t-xnaqʼtzaʼn kye xjal tiʼ tuʼn tbʼant kyuʼn tuʼn kyanqʼin te jumajx. «Ex atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3).

Taj Dios tuʼn ttzalaja kyiʼj kʼiwlabʼil lu (Isaías 48:18). Toj juntl xnaqʼtzbʼil kʼelel tnikʼa tiʼj tiʼ jaku bʼant tuʼna jaʼlo tuʼntzun tanqʼina te jumajx toj ambʼil tzul.