¿In nok tilil tuʼna tuʼn tajbʼena mas toj Ja te Chmabʼil?
1. ¿Toj alkye ambʼil jaku txi tzyet tuʼn tjapun tuʼn jun qʼa aju tkuʼx toj 1 Timoteo 3:1?
1 In tzaj tqʼamaʼn 1 Timoteo 3:1 jlu: «Qa at jun erman taj tuʼn tok te nejenel kyxol okslal, bʼaʼn ju aqʼuntl lu qa taj tuʼn taqʼnan tiʼj». Aju taqikʼ Tyol Dios lu, in tzaj tqʼuqbʼaʼn kykʼuʼj qe ermano tuʼn tok tilil kyuʼn tuʼn kyaqʼunan toj ttnam Dios. ¿Il tiʼj tuʼn tayona tzmaxi aj tten nim (bʼampo) tabʼqʼiya? Nya il tiʼj, quʼn mas bʼaʼn tuʼn t-xi tzyet naj tuʼn ttzaj tkʼamoʼna xnaqʼtzbʼil jaʼlo ex tuʼn tbʼant junjun tiʼ tuʼna aju at tajbʼen tuʼn toka te onil kye ansyan (1 Tim. 3:10). ¿O jaw aʼ twiʼya? Qo xnaqʼtzan chʼin tiʼj tiʼ kbʼantel tuʼna tuʼn tajbʼena toj Ja te Chmabʼil.
2. ¿Alkye tten jaku ten tajbʼila tuʼn tonina kyiʼj txqantl, ex tiʼ onbʼil jaku txi tqʼoʼna kye?
2 Tzʼok tililx tuʼna tuʼn tten tajbʼila tuʼn tonina. Bʼaʼn tuʼn ttzaj tnaʼna qa in nok tilil tuʼna tuʼn tbʼant jun tbʼanel aqʼuntl, aju jaku tzʼonin kyiʼj txqantl, ex nya tuʼn ttzaj qʼoʼn jun matij toklena toj Ja te Chmabʼil. Tuʼn tbʼant jlu, ilxix tiʼj tuʼn tok tilil tuʼna tuʼn tten tajbʼila tuʼn tonina kyiʼj qerman. Aju jaku tzʼonin tiʼja tuʼn tbʼant jlu, aju qa ma ximana tiʼj tbʼanel techel kyaj tqʼoʼn Jesús (Mat. 20:28; Juan 4:6, 7; 13:4, 5). Qa kwest in nela toj twitza tuʼn tonina kyiʼj txqantl, qaninxa te Jehová tuʼn ttzaj onina tuʼn (1 Cor. 10:24). ¿Jaku txi tqʼoʼna jun onbʼil kye qerman yabʼ ex kye qeju ma che tijen? Bʼaʼn tuʼn t-xi tqʼamaʼna qa jaku bʼaj t-saqina tiʼjxi Ja te Chmabʼil moqa tuʼn tbʼant junjuntl aqʼuntl. Ax ikx jaku txi tqʼamaʼna qa jaku tzikʼx tqʼoʼna jun oklenj toj Xnaqʼtzbʼil tuʼn Tbʼant Qpakbʼan qa at jun mitiʼ sul. Qa ma tzʼajbʼena kye txqantl qerman ok kʼelel tnikʼa qa nimxix ok ktzalajela tuʼn jlu (Hech. 20:35).
3. ¿Tiʼ ilxix tiʼj tuʼn tten teya tuʼn tajbʼena kye qerman, ex tzeʼn jaku ten jlu teya?
3 Il tiʼj tuʼn tchʼiy tamiwbʼila tukʼil Dios. Tuʼn tajbʼena toj ttnam Dios, mas ilxix tiʼj tuʼn tten tamiwbʼila tukʼe Dios twitzju qa in bʼant-xix junjun tiʼ tuʼna. Aju xjal at tamiwbʼil tukʼil Jehová in nok tilil tuʼn tuʼn tten t-ximbʼetz ik tzeʼn t-ximbʼetz Jehová ex Jesús (1 Cor. 2:15, 16). In kubʼ tyekʼun junjun tmod aju «in tqʼoʼn Xewbaj Xjan» (Gál. 5:22, 23). In kubʼ tqʼoʼn tnejel aju tKawbʼil Dios ex in nok tilil tuʼn tuʼn tpakbʼan (Mat. 6:33). Jaku chʼiy tamiwbʼila tukʼe Dios qa ma tzʼel tpaʼna ambʼil tuʼn t-xnaqʼtzana tjunalxa tiʼj Tyol Dios. Toj ambʼil aju, jaku kubʼ tuʼjina Tyol Dios tkyaqil qʼij, jaku che kubʼ tuʼjina uʼj La Atalaya ex ¡Despertad! in che etz tkyaqil xjaw, jaku kubʼ tbʼinchaʼn tena tukʼe xnaqʼtzbʼil in kubʼ xnaqʼtzet kyoj chmabʼil ex tuʼn t-xiʼya kyoj kykyaqil chmabʼil (Sal. 1:1, 2; Heb. 10:24, 25). Tej t-xi tqʼamaʼn apóstol Pablo te kuʼxun Timoteo tuʼn tchʼiy tamiwbʼel tukʼe Dios, tqʼama jlu: «Qʼoʼnka kwent tiʼj ju xnaqʼtzbʼil» (1 Tim. 4:15, 16). Kyjuʼtzun, aj ttzaj qʼoʼn junjun toklena toj Xnaqʼtzbʼil tuʼn Tbʼant Qpakbʼan bʼinchankuxix ttena. Bʼinchanku ttena naʼmxtaq texa pakbʼal ex kukx tzʼexa pakbʼal. Ximana tiʼj alkye tten jaku tzʼajbʼena mas te Dios —ik tzeʼn tuʼn toka te precursor, tuʼn t-xiʼya aqʼunal toj Betel, tuʼn t-xiʼya toj Xnaqʼtzbʼil kye qeju mitiʼ kyxuʼjil— ex tzʼok tililx tuʼna tuʼn tbʼant aju kbʼajel t-ximana. Qa ma tzʼok tilil tuʼna tuʼn tchʼiy tamiwbʼila tukʼil Dios, a jlu ok kʼonil tiʼja tuʼn «tel oqa tiʼj kyachbʼil kuʼxun» (2 Tim. 2:22).
4. ¿Tiquʼn nimxix toklen tuʼn tkubʼ tbʼinchaʼna ikxix tzeʼn in tzaj qʼamaʼn teya ex tuʼn tkubʼ tyekʼuna qa jaku tzʼok qʼuqeʼ kykʼuʼj txqantl tiʼja?
4 Bʼinchankuya ex yekʼunkuya qa jaku tzʼok qʼuqeʼ kykʼuʼj txqantl tiʼja. Toj tnejel syent abʼqʼi tzaj nim waʼyij, tuʼntzunju e jaw kyjyoʼn qe apóstol junjun okslal aʼyeju «bʼaʼnxix kyten», toj juntl yol, aʼyeju in bʼanttaq kyaqʼun ex jakutaq tzʼok qʼuqeʼ kykʼuʼj kyiʼj tuʼn t-xi kysipen wabʼj. A jlu onin kyiʼj apóstol tuʼn tok kyqʼoʼn kywiʼ tiʼj junjuntl tiʼchaq mas nim toklen (Hech. 6:1-4). ¿Tiʼ in tzaj tyekʼun jlu teya? Qa ma tzaj qʼoʼn jun taqʼuna, il tiʼj tuʼn tok tilil tuʼna tuʼn tbʼant jun tbʼanel aqʼuntl. Bʼaʼn tuʼn tel tkanoʼna techel kyaj tqʼoʼn Noé, aju kubʼ tbʼinchaʼn ark ikxix tzeʼn tzaj qʼamaʼn te (Gén. 6:22). Mas nim toklen toj twitz Jehová qa ma kubʼ tbʼinchaʼna ikxix tzeʼn in tzaj qʼamaʼn teya ex a jlu jun yekʼbʼil tiʼj qa ma tzʼok tnabʼila (1 Cor. 4:2; jyonkuxa aju «¿Jniʼ toklen xnaqʼtzbʼil?»).
5. ¿Tiquʼn il tiʼj tuʼn tok tilil kyuʼn qʼa tuʼn kyajbʼen mas toj ttnam Jehová?
5 Ik tzeʼn kyaj qʼamaʼn, in che oktz tiʼn Jehová nimxix xjal toj ttnam (Is. 60:22). Junlo 250.000 xjal in jaw aʼ kywiʼ tkyaqil abʼqʼi. Tuʼnju nimxix xjal in che oktz toj ttnam Jehová, ilxix tiʼj tuʼn kyten ermano aʼyeju ma tzʼok kynabʼil tuʼn tbʼant aqʼuntl kyuʼn kyoj Ja te Chmabʼil. At-xix aqʼuntl tuʼn tbʼant toj taqʼun Jehová toj ambʼil jaʼlo (1 Cor. 15:58). Kyjuʼtzun, aʼyeqe qʼa in nok tilil kyuʼn tuʼn kyajbʼen mas toj ttnam Jehová, jun tbʼanel aqʼuntl aju kyaj tuʼn tbʼant kyuʼn.
[Yol 2]
Tuʼnju nimxix xjal in che oktz toj ttnam Jehová, ilxix tiʼj tuʼn kyten ermano aʼyeju ma tzʼok kynabʼil tuʼn tbʼant aqʼuntl kyuʼn kyoj Ja te Chmabʼil
[Aju recuadro tkuʼx toj t-xaq 3]
¿Jniʼ toklen xnaqʼtzbʼil?
Aʼye qeju qʼa at tbʼanel kymod, tbʼanel qa ma txi kyqʼoʼn ansyan junjun kyaqʼun ex tuʼn kyxi kyxnaqʼtzan tuʼn tbʼant kyuʼn. Jun techel, tzaj tqʼamaʼn jun ansyan in bʼet toj jun kʼloj Ja te Chmabʼil qa tej tel bʼaj jun chmabʼil, kubʼ qʼuqeʼ jatumel in che etz qʼoʼn chikʼbʼabʼil tuʼn tok tqʼuqbʼaʼn tkʼuʼj jun pakbʼal. Oktzun tqʼoʼn twitz tiʼj jun qʼa aju waʼltaq nqa kytxlaj ex xi tqanin te qa in nayontaq tuʼn tyolin tukʼil. Tzaj ttzaqʼweʼn qʼa qa otaq tzaj qʼoʼn toklen tuʼn tbʼaj aspirarit aju jatumel in che etz qʼoʼn chikʼbʼabʼil aj tel bʼaj junjun chmabʼil. Otaq bʼant kyten ttat tuʼn kyaj kyja, naqtzun tuʼnj, nya tajtaq qʼa tuʼn taj tuʼnju tajtaq tuʼn tbʼant taqʼun tnejel. Tbʼanel ela jlu toj twitz ansyan in bʼet toj jun kʼloj Ja te Chmabʼil ex xiʼ qʼuqebʼil toj juntl plaj. Yajxitl tqʼama jlu: «Aʼye ansyan toj Ja te Chmabʼil lu kukx in chex kyxnaqʼtzaʼn qe qʼa ma chʼiy kyamiwbʼil tukʼe Dios aj t-xi kyqʼoʼn kyaqʼun toj Ja te Chmabʼil. Tuʼntzunju, chʼixme toj tkyaqil maj aj npone toj Ja te Chmabʼil aju, in tzaj kyqʼamaʼn ansyan weye qa bʼaʼn tuʼn t-xi qʼet toklen jun kuʼxun tuʼn tok te onil kye ansyan».