Aju Xnaqʼtzbʼil tuʼn Tbʼant Qpakbʼan toj abʼqʼi 2015 kʼonil qiʼj tuʼn tbʼant-xix qqʼon xnaqʼtzbʼil

¹ Kubʼ ttzʼibʼen David jlu: «Bʼaʼnwt tzʼela nyole ex nximbʼetze tuj twitza, aya Nman klol weye ex tzoqpil weye» (Sal 19:14). Ax ikx qe qaj tuʼn tel bʼaʼn qyol toj twitz Jehová ex nim toklen toj qwitz tuʼn qyolin tiʼj axix kywitz txqantl toj Ja te Chmabʼil ex toj pakbʼabʼil. Tuʼn qtzaj t-xnaqʼtzaʼn Jehová tuʼn qpakbʼan, in najbʼen, kyxol junjuntl onbʼil, aju Xnaqʼtzbʼil tuʼn Tbʼant Qpakbʼan. Aju xnaqʼtzbʼil lu in xi qʼet kyoj mas twitz 111,000 kʼloj okslal kye testigos de Jehová twitz tkyaqil Txʼotxʼ ex ma tzʼonin kyiʼj xjal alkyexku kyoklen tuʼn kyok te tbʼanel aj xnaqʼtzal tuʼn t-xi kyqʼamaʼn tbʼanel tqanil kyukʼe yol in che kuʼpin toj kyanmi xjal, tukʼe tbʼanel yol ex mintiʼ in che tzaj xobʼ tuʼn tbʼant jlu kyuʼn (Hech. 19:8; Col. 4:6).

² Toj tajlal xnaqʼtzbʼil tuʼn tbʼant qpakbʼan toj abʼqʼi 2015 ok che kbʼel xnaqʼtzet xnaqʼtzbʼil che jawitz toj uʼj Wuʼje te txʼolbʼabʼil tiʼj Tyol Dios [my], ¿Tiʼ in tzaj t-xnaqʼtzaʼnxix Tyol Dios? [bh] ex ¿Tiʼ tkuʼx toj Tyol Dios? [igw]. Juntl tbʼanel tqanil aju qa ma kubʼ chʼinset ambʼil in najbʼen kyiʼj taqikʼ Tyol Dios nim kyoklen in che jaw uʼjet toj jun seman ex tiʼj tnejel oklenj. Qo xnaqʼtzan kyiʼj qeju chʼixpubʼil lu ex tiʼjju in tzaj qʼamaʼn tiʼj tzeʼn tten che ikʼex qʼet qeju oklenj.

³ Aʼyeju taqikʼ Tyol Dios nim kyoklen. Aʼyeju erman at kyoklen tuʼn tikʼx qʼet oklenj lu kʼajbʼel kabʼe minut kyuʼn tuʼn tikʼx qʼet jun tbʼanel xnaqʼtzbʼil ex at tajbʼen aju in jatz kyoj taqikʼ Tyol Dios che kbʼel uʼjit toj seman aju. Tuʼn tex chikʼbʼet jun xnaqʼtzbʼil at tajbʼen kye qeju ateʼ toj Ja te Chmabʼil toj ambʼil bʼantni tiʼj ilxix tiʼj tuʼn tbʼaj qbʼinchaʼn qten. Aj tbʼaj jlu, ik tzeʼnx in bʼant, at qaq minut tuʼn ttzaj kyqʼoʼn kyyol qeju in che bʼin te 30 segundos teyele junjun tiʼjju tbʼanel sela toj kywitz tej xjaw kyuʼjin taqikʼ Tyol Dios. Tuʼn t-xi qqʼoʼn qyol toj 30 segundos moqa chʼixme nim toklen tuʼn qxnaqʼtzanxix ex tuʼn tkubʼ qbʼinchaʼnxix qten. Noqtzun tuʼnj, a jlu jun tbʼanel ambʼil tuʼn qaqʼunan ex, ax ikx, in tzaj tqʼoʼn jlu ambʼil tuʼn t-xi kyqʼoʼn txqantl erman kyyol ex tuʼn ttzaj kyqʼamaʼn aju tqanil ma che jyon tiʼj.

⁴ Tnejel oklenj. Ma tzʼok chʼinset ambʼil tuʼn tikʼx qʼet toj oxe minut moqa chʼixme aju oklenj tuʼn tjaw uʼjit junjun taqikʼ Tyol Dios, aju mas chʼin tqan jaʼlo. Aʼyeju in xi qʼet oklenj lu kye il tiʼj tuʼn tbʼaj kybʼinchaʼn kyten nim maj tukʼe tqʼajqʼajel kywiʼ ex il tiʼj tuʼn tok kyqʼoʼn kywiʼ tiʼj tuʼn tjaw uʼjit tukʼe tbʼanel tqʼajqʼajel kywiʼ ex tuʼn miʼn kykyaj weʼ, tuʼntzun kyjaw uʼjit txol yol toj tumel. Kykyaqil testigos de Jehová il tiʼj tuʼn tok tilil kyuʼn tuʼn tbʼant-xix kyuʼjin, tuʼnju a jlu at toklen tukʼilju qajbʼebʼil te Dios. Nimxix in qo tzalaj tuʼnju at nim kʼwaʼl toj Ja te Chmabʼil in bʼant-xix kyuʼjin. Ex in qo tzalaje kyiʼj mambʼaj tuʼnju in bʼaj kykʼuʼj tuʼn kyonin kyiʼj kykʼwaʼl tukʼe kʼujlabʼil tuʼn tbʼant-xix uʼj kyuʼn.

⁵ Tkabʼ oklenj. Aju oklenj lu ok kʼikʼex tqʼoʼn jun ermana ex kʼajbʼel jweʼ minut tuʼn. Il tiʼj tuʼn tyolin tiʼj xnaqʼtzbʼil kxel qʼoʼn te. Qa atz xjatz xnaqʼtzbʼil toj uʼj ¿Tiʼ tkuʼx toj Tyol Dios?, il tiʼj tuʼn tikʼx tqʼoʼn ikxix tzeʼn in nikʼ ex tuʼn tajbʼen kye txqantl, tuʼn tikʼx tqʼoʼn ik tzeʼn aj qyolin tiʼj Tyol Dios ex ik tzeʼn in bʼaj jatumel in qo ajbʼen. Qa atz xjatz toj juntl uʼj, il tiʼj tuʼn tbʼaj bʼinchet xnaqʼtzbʼil ex tuʼn kyjaw jyet taqikʼ Tyol Dios. Ax ikx, jaku che ajbʼen junjuntl taqikʼ Tyol Dios tuʼn aʼyeju at kyoklen tukʼil xnaqʼtzbʼil. Ok kjawil tjyoʼn aju qʼol xnaqʼtzbʼil alkye kʼonil tiʼj ermana.

⁶ Toxin oklenj. Aju oklenj lu kʼikʼex qʼet toj jweʼ minut ex jaku tzikʼx tqʼoʼn jun ermana moqa jun ermano. Qa jun ermana sex qʼonte, kʼelex tqʼoʼn ik tzeʼn tkabʼ oklenj. Qa ma txi qʼet te jun ermano ex qa aju xnaqʼtzbʼil atz in jatz toj junjuntl uʼj, kʼelex tqʼoʼn ik tzeʼn jun chikʼbʼabʼil toj Ja te Chmabʼil. Il tiʼj tuʼn tbʼaj tbʼinchaʼn erman aju xnaqʼtzbʼil ex tuʼn kytzaj tjyoʼn taqikʼ Tyol Dios at toklen tukʼil xnaqʼtzbʼil.

⁷ Jun akʼaj tten tuʼn tikʼx qʼet toxin oklenj. Qa atz xjatz aju xnaqʼtzbʼil toj uʼj ¿Tiʼ tkuʼx toj Tyol Dios?, ex qa ma txi qʼet te jun ermano, il tiʼj tuʼn tikʼx tqʼoʼn ik tzeʼn jun yekʼbʼil aj t-xnaqʼtzan kyukʼil toj tja toj ambʼil in xi qʼet te Jehová moqa ik tzeʼn jun yekʼbʼil tuʼn qex pakbʼal. Chʼixmi tkyaqil maj, kxel tqʼamaʼn qʼol xnaqʼtzbʼil alkye kʼonil tiʼjju in xnaqʼtzan ex alkye tten kʼikʼex tqʼoʼn. Aju kʼonil tiʼj ermano ax jun toj tja, moqa juntl ermano toj Ja te Chmabʼil. Toj yekʼbʼil jaku che ajbʼen junjuntl taqikʼ Tyol Dios aʼyeju at kyoklen tukʼil xnaqʼtzbʼil. At maj jaku txi qʼoʼn oklenj lu te jun ansyan ex jaku jaw tjyoʼn alkye kʼonil tiʼj ex alkye tten kʼikʼex tqʼoʼn. Tbʼanelxix aj tok qqʼoʼn qwitz tiʼj alkye tten in kubʼ kyyekʼun ansyan tzeʼn tten in xi qʼet tbʼanelxix xnaqʼtzbʼil tukʼil jun toj tja moqa tukʼil juntl ermano.

⁸ Kawbʼil. Kʼajbʼel kabʼe minut tuʼn qʼol xnaqʼtzbʼil tuʼn t-xi tqʼamaʼn qa tbʼanel soka aju oklenj tuʼnju in kʼamon xnaqʼtzbʼil ex tuʼn t-xi tqʼoʼn junjun onbʼil te, aju in jatz toj uʼj Benefíciese. Aj txi tqʼamaʼn ansyan qʼol xnaqʼtzbʼil alkye kʼikʼex qʼonte jun oklenj, mlay txi tqʼamaʼn jatumel in naqʼunan aju in kʼamon xnaqʼtzbʼil tuʼn tbʼant-xix tyolin. Noqtzun tuʼnj, aj tbʼaj junjun oklenj kxel tqʼamaʼn junjun tbʼanel yol teju in kʼamon xnaqʼtzbʼil ex kxel tqʼamaʼn jatumel saqʼunan. Ax ikx, kxel tchikʼbʼaʼn alkye tten xbʼant tuʼnju in kʼamon xnaqʼtzbʼil jatumel in naqʼunantoq moqa kxel tchikʼbʼaʼn toj tumel tiquʼn il tiʼj tuʼn tok tilil tuʼn tuʼn tbʼant chʼintl tuʼn.

⁹ Jaku kanet kyuʼn qeju in che kʼamon xnaqʼtzbʼil aju tajlal xnaqʼtzbʼil tuʼn tbʼant-xix qyolin kyoj t-xaq 79 a 81 toj uʼj Benefíciese. Aj tkubʼ bʼaj chmabʼil ex otoq tzikʼx oklenj tuʼnju in kʼamon xnaqʼtzbʼil, aju qʼol xnaqʼtzbʼil kbʼelex ttzʼibʼen toj tuʼj aju in kʼamon xnaqʼtzbʼil qa bʼaʼn moqa nya bʼaʼn soka tuʼn ex kxel tqanin te qa ma kubʼ tbʼinchaʼn junjun aqʼuntl at toklen tukʼil xnaqʼtzbʼil jatumel saqʼunan. Ax ikx jaku tzʼajbʼen ambʼil lu tuʼn, moqa juntl ambʼil, tuʼn t-xi tqʼamaʼn qa tbʼanel aju xbʼant tuʼn ex tuʼn t-xi tqʼamaʼn junjun kawbʼil jaku tzʼonin tiʼj. Nim toklen tuʼn tkubʼ kyximen kykyaqil qeju in che kʼamon xnaqʼtzbʼil qa aju in tzaj tqʼamaʼn qʼol xnaqʼtzbʼil kye kʼonil kyiʼj tuʼn kychʼiy toj kyokslabʼil (1 Tim. 4:15).

¹⁰ Qa at jun in kʼamon xnaqʼtzbʼil ma tzikʼ tiʼj ambʼil, aju qʼol xnaqʼtzbʼil moqa jun onil te kʼokel kyqʼajtzaʼn jun tqʼajqʼajel wibʼaj moqa kbʼel kyqʼajtzaʼn tibʼaj jun tiʼ tukʼil jun lápiz tuʼn t-xi yekʼet te qa ma kubʼ bʼaj ambʼil. Qa ikju, il tiʼj tuʼn tkubʼ bʼaj tuʼnju in kʼamon xnaqʼtzbʼil aʼyeju yol in chex tqʼamaʼn ex tuʼn tkuʼtz jatumel in che etz qʼoʼn chikʼbʼabʼil (jyonkuxa t-xaq 282, taqikʼ 4 toj uʼj Benefíciese).

¹¹ In xi qqʼamaʼne kye kykyaqil qeju in japun kawbʼil kyuʼn tuʼn tkux kytzʼibʼen kybʼi toj Xnaqʼtzbʼil tuʼn Tbʼant Qpakbʼan (jyonkuxa t-xaq 282, taqikʼ 6 toj uʼj Benefíciese). Aju xnaqʼtzbʼil in tzaj tqʼoʼn Xnaqʼtzbʼil tuʼn Tbʼant Qpakbʼan ma tzʼonin tiʼj ttnam Dios tuʼn t-xi qʼamet ex tuʼn t-xi xnaqʼtzet tbʼanel tqanil tiʼj Tkawbʼil Dios tukʼil qʼuqbʼil qkʼuʼj, tukʼil nim toklen ex tukʼil kʼujlabʼil. Nimxix in tzalaj Jehová tuʼnju in najbʼen quʼn aju xnaqʼtzbʼil in tzaj qʼoʼn qe tuʼn tjaw qnimsaʼn tbʼi (Sal. 148:12, 13; Is. 50:4).