Qqʼonk tilil tuʼn tbʼant-xix qpakbʼan: qyekʼunx kye qeju tzma in che xnaqʼtzan tuʼn tbʼant-xix kyxnaqʼtzan

¿Tiquʼn nim toklen? Tuʼn tchʼiy jun xjal toj tokslabʼil, nya oʼkx il tiʼj tuʼn t-xnaqʼtzan kyiʼj tnejil xnaqʼtzbʼil toj Tyol Dios, ax ikx il tiʼj tuʼn tnoj toj twiʼ ex toj tanmi tuʼn mastl xnaqʼtzbʼil (Heb. 5:12–6:1). Ax tok, il tiʼj tuʼn tok tilil quʼn tuʼn qxnaqʼtzan, tuʼnju at toklen jlu tukʼil aju tuʼn tkubʼ qmojbʼan aju o tzʼel qnikʼ tiʼj tukʼilju tzma in qo xnaqʼtzan tiʼj, ex tuʼn tel qnikʼ alkye tten tuʼn kyjapun quʼn (Prov. 2:1-6). Qa at kyxjel qeju tzma in che xnaqʼtzan tiʼj Tyol Dios, il tiʼj tuʼn t-xi kyxnaqʼtzan kyibʼ tuʼn tkanet tzaqʼwebʼil kyuʼn kyjunalx. Qa ma tzʼok tilil kyuʼn tuʼn tkubʼ kybʼinchan aju nel kynikʼ tiʼj, ok kʼonil kyiʼj aj kyok weʼ twitz nya bʼaʼn toj kyokslabʼil (Luc. 6:47, 48).

¿Alkye tten jaku bʼant?

Qʼamanxa qa nim toklen tuʼn qnaʼn Dios te Jehová tuʼn qtzaj tonin aj t-xi tzyet jun qxnaqʼtzbʼil tiʼj Tyol Dios (Juan 14:26; 1 Cor. 2:10).
Aj t-xi tzyet xnaqʼtzbʼil tuʼna tukʼil jun xjal, qʼamanxa te tuʼn tkubʼ tbʼinchan tten naʼmxtoq t-xi tkʼamoʼn t-xnaqʼtzbʼil tiʼj Tyol Dios. Jaku txi tyekʼuna te tuʼn kykubʼ t-sqiten junjun yol moqa junjun ximbʼetz nim kyoklen ex yekʼunxa toj tuʼja alkye tten in bʼant tuʼna.
Qʼamanxa te xjal in xnaqʼtzan tukʼila tuʼn ttzaj ttzaqʼweʼn xjel toj tex tyol. Qaninxa junjuntl xjel te aʼyeju nya ateʼkux toj uʼj.
Qʼamanxa teju in xnaqʼtzan tukʼila tuʼn tkubʼ tuʼjin Tyol Dios tkyaqil qʼij. Jaku kanet jun tajlal taqikʼ Tyol Dios toj jw.org aju jaku tzʼonin tiʼj tuʼn tel tnikʼ alkye taqikʼ Tyol Dios jaku che kubʼ tuʼjin. Il tiʼj tuʼn ttenxix tajbʼil tuʼn tuʼjin tiʼj Tyol Dios ex tuʼn tnaqʼet tiʼj, noqtzun tuʼnj, nim tbʼanel tzul te qa ma bʼant jlu tuʼn (Sal. 1:2, 3).
Yekʼunxa te xjal in xnaqʼtzan tukʼila tuʼn tajbʼen tuʼn aju KʼUBʼIL UʼJ TOJ INTERNET Watchtower moqa toj Onbʼil tuʼn kyxnaqʼtzan testigos de Jehová tuʼntzun kykanet tzaqʼwebʼil tuʼn kyiʼj qe t-xjel tiʼj Tyol Dios. Ax ikx jaku txi qyekʼun te tuʼn tel tnikʼ kyiʼj techel uʼj aʼyeju mas in che ajbʼen kyoj chmabʼil.

Qʼonka tilil tuʼn tbʼant jlu tuʼna toj jun xjaw:

Aj tkubʼ bʼaj chʼin xnaqʼtzbʼil moqa jun xnaqʼtzbʼil kyuʼne, qaninxa te xjal tuʼn ttzaj tqʼamaʼn toj chʼin yol aju ma tzʼel tnikʼ tiʼj toj xnaqʼtzbʼil. Qa mintiʼ jun xjal in xnaqʼtzan tukʼila jaʼlo, jaku jaw tjyoʼna junjun yol nim kyoklen toj jun taqikʼ Tyol Dios moqa toj jun taqikʼ te uʼj Aju Xqʼuqil. A jlu kʼonil tiʼja tuʼn telxix tnikʼa tiʼjju in kubʼ tuʼjina.