Qqʼonk tilil tuʼn tbʼant-xix qpakbʼan: Ojtzqinka tzeʼn tuʼn tajbʼen jw.org

TIQUʼN NIM TOKLEN. Tkyaqil uʼj in najbʼen quʼn te qʼol xnaqʼtzbʼil in qox kyiʼn toj jw.org. O che bʼaj bʼinchaʼn tal uʼj tuʼn qokx toj jw.org ex aju tal uʼj ¿Jatumel jaku kanet tzaqʼwebʼil kyiʼj nimaq qxjelbʼitz? tuʼn kyokx xjal toj qtembʼil te Internet. Jaku txi qsamaʼn jun uʼj at kyxol quʼj te qʼol xnaqʼtzbʼil, qa toj correo moqa toj jun enlace. Mas jaku tzʼajbʼen jlu aj qpakbʼan kye xjal junxitl kyyol. Ax ikx, at maj il tiʼj tuʼn kyxi qtzaqʼweʼn xjel aju mintiʼ in tzaqʼwet kyoj uʼj ateʼkx kyxol uʼj in che ajbʼen quʼn te qʼol xnaqʼtzbʼil. Pero qa ojtzqiʼn quʼn tzeʼnxix tuʼn tajbʼen qtembʼil te Internet, mas kbʼantel qpakbʼan.

TZEʼN JAKU BʼANT QUʼN

• 

  Jaku tzʼajbʼen «QE XNAQʼTZBʼIL TOJ TYOL DIOS» quʼn. Jun techel, tuʼn tyolina tukʼil jun mambʼaj in tzʼaj bʼaj tkʼuʼj tiʼj tzeʼn tuʼn kychʼiyset kʼwaʼl, jaku tzʼokxa toj QE XNAQʼTZBʼIL TOJ TYOL DIOS > MEJEBʼLEʼN EX JA XJAL.

• Jaku tzʼajbʼen «QE UʼJ» quʼn. Jun techel, qa in yolin jun kuʼxun tukʼil jun tukʼil toj tja xnaqʼtzbʼil ex taj tuʼn t-xi tyekʼin uʼj Tzaqʼwebʼil tiʼj 10 kyxjel qe kuʼxin te, jaku tzʼokx toj QE UʼJ > UʼJ EX NIMAQ UʼJ.

• Jaku tzʼajbʼen «TQANIL KYIʼJ TESTIGOS DE JEHOVÁ» quʼn. Jun techel, qa in yolina tukʼil jun tukʼila toj aqʼuntl ex taja tuʼn t-xi tqʼamaʼna aju nimen tuʼna toj chʼin ambʼil te, jaku tzʼokxa toj TQANIL KYIʼJ TESTIGOS DE JEHOVÁ > AʼYEJU XJEL MAS IN CHE TZAJ QANIN.

OTOQXI TZʼOK TKEʼYINA VIDEO OJTZQINKA TZEʼN TUʼN TAJBʼEN JW.ORG, XIMANA TIʼJ ALKYE KʼLOJ TIʼJ QTEMBʼIL TE INTERNET JAKU TZʼAJBʼEN TUʼNA AJ TOK WEʼYA KYWITZ JLU:

• Tuʼn qyolin tukʼil jun xjal mintiʼ in xi tniman qa at Dios.

• Tuʼn t-xi qqʼuqbʼaʼn tkʼuʼj jun xjal tzma in nikʼ toj jun nya bʼaʼn.

• Tuʼn qonin tiʼj jun erman o chewix toj tokslabʼil.

• Tuʼn t-xi qchikʼbʼaʼn jatumel in tzaj pwaq quʼn tuʼn tbʼant aqʼuntl twitz tkyaqil Txʼotxʼ.

• Tuʼn qonin tiʼj jun xjal tzajni toj juntl tnam aju taj tuʼn t-xiʼ kyoj chmabʼil aj tmeltzʼaj toj ttnam.