Tzalaja tiʼj tanqʼibʼila: qe akʼaj onbʼil tuʼn t-xi qyekʼin axix tok

Tbʼanelxix tuʼnju ya at jun akʼaj folleto ex jun libro tuʼn qqʼon xnaqʼtzbʼil. In xi qqanin te Jehová tuʼn ttzaj tkʼiwlaʼn qaqʼun aj tok tilil quʼn tuʼn qonin kyiʼj xjal tuʼn kyok te t-xnaqʼtzbʼen Jesús (Mt 28:18-20; 1Co 3:6-9). ¿Tzeʼn jaku che ajbʼen akʼaj onbʼil lu quʼn?

Tuʼnju mas in qo yolin tukʼil jun xjal aj t-xi qqʼoʼn xnaqʼtzbʼil te, il tiʼj tuʼn tbʼaj qchʼexpuʼn alkye tten in qo qʼon xnaqʼtzbʼil. Tuʼntzunju, lepeʼka kyiʼj nabʼil aj tbʼaj tbʼinchaʼn ttena ex aj t-xi tqʼoʼna jun xnaqʼtzbʼil.a

• Uʼjinktza xnaqʼtzbʼil ex che yoline kyiʼj xjel.

• Uʼjinktza qe texto jatumel in tzaj qʼamaʼn «kyuʼjinktze» ex tzʼonina tiʼj xjal tuʼn tel tnikʼ tiʼj xnaqʼtzbʼil in tzaj tqʼoʼn.

• Qʼonka qe video ex qaninxa qe xjel tkuʼx toj libro.

• Aj t-xi tqʼoʼna xnaqʼtzbʼil te jun xjal, qʼonka tilil tuʼn tkubʼaj jun xnaqʼtzbʼil tuʼna.

Aj tpakbʼana, jaku kyaj tqʼoʼna folleto te jun xjal tuʼntzun tel tnikʼa tiʼj qa taj tuʼn kukx t-xnaqʼtzan. (Qʼonka twitza tiʼj recuadro tkuʼx toj t-xaq 16 aju tok tbʼi, «Tzeʼn jaku kyaj qqʼoʼn folleto Tzalaja tiʼj tanqʼibʼila aj qyolin tnejel maj tukʼil jun xjal»). Qa ma kubʼaj t-xnaqʼtzbʼil xjal tiʼj folleto ex taj tuʼn kukx t-xnaqʼtzan, jaku kyaj tqʼoʼna libro te ex jaku txi tzyet tuʼn kyxnaqʼtzane toj xnaqʼtzbʼil kyaje. Qa in xi tqʼoʼna xnaqʼtzbʼil te jun xjal tukʼil alkyexku uʼj, jaku kyaj ttzaqpiʼna ex qʼonxa xnaqʼtzbʼil te tukʼil libro Tzalaja tiʼj tanqʼibʼila. Aya kbʼel ximente alkye xnaqʼtzbʼil kxel tzyet tuʼna tukʼil xjal.

OTOQXI TZʼOK TKEʼYINA VIDEO BʼAʼN TULENA TOJ XNAQʼTZBʼIL TIʼJ TYOL DIOS, TZAQʼWENXA QE XJEL LU:

• ¿Tiʼ kʼelel kynikʼ xjal tiʼj aj kyxnaqʼtzan tiʼj akʼaj libro?

• ¿Tiquʼn il tiʼj tuʼn t-xi qyekʼin video lu kye qeju tzma in xi tzyet tuʼn kyxnaqʼtzan?

• ¿Alkye junjun tiʼchaq jaku txi tqʼamaʼna te xjal tuʼn t-xi tbʼinchaʼn? (Qʼonka twitza tiʼj recuadro tkuʼx toj t-xaq 16, «Qe xnaqʼtzbʼil nim kyoklen ex aju kbʼantel aj tkubʼaj jun kʼloj xnaqʼtzbʼil»).