¿Tzeʼn jaku tzʼonin naʼj Dios tiʼja?

Attoq jun matij yabʼil tiʼj Pamela, tuʼntzunju jyon onbʼil kyukʼil aj qʼanil. Toj ax ambʼil naʼn Dios ex xi tqanin tipumal tuʼn tikʼx tuʼn. ¿Oninpe naʼj Dios tiʼj?

In tzaj tqʼamaʼn jlu: «Tzaj nim xobʼajil wiʼje tej woke toj tratamiento tiʼj cáncer. Pero tej nnaʼne Dios te Jehová, kubʼ nnaʼne bʼaʼn ex in ximane toj tumel. Kukx in kubʼ nnaʼne kʼixkʼoj, pero in nonin naʼj Dios wiʼje tuʼn miʼn ttzaj bʼajxix nkʼuʼje. Aj ttzaj kyqanin xjal tzeʼn atine, in xi nqʼamaʼne jlu kye: ‹Yabʼ atine, pero in chin tzalaje›».

Nya il tiʼj tuʼn ttzaj jun matij nya bʼaʼn qiʼj tuʼntzun qnaʼn Dios. Qkyaqilx qaj onbʼil aj qok weʼ twitz jun nya bʼaʼn, qa matij moqa chʼin. Pero ¿jakupe tzʼonin naʼj Dios qiʼj?

In tzaj tqʼamaʼn Tyol Dios jlu: «Qʼonkja qe tbʼisa tuj tqʼabʼ Qman, ate ktzajel qʼonte tipuna tuʼn tikʼx tuʼna, mlayx taqʼ ambʼil tuʼn tkubʼ tzʼaq aju xjal bʼaʼn niman te» (Salmo 55:22). ¡Tbʼanelxix qe yol lu! Pero ¿tzeʼn jaku tzʼonin naʼj Dios qiʼj? Qa ma qo naʼn Dios te Jehová ik tzeʼn tgan, kʼonil qiʼj tuʼn qex kywitz nya bʼaʼn (qʼonka twitza tiʼj recuadro «Aju tbʼanel in tzaj aj qnaʼn Dios»).

Aju tbʼanel in tzaj aj qnaʼn Dios

In kubʼ qnaʼn bʼaʼn

«Tkyaqil kymanxe te Dios tuj kynaʼj Diose; [...] Kyjaʼtzun kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin kyanmiye ex kyximbʼetze, tuʼnju at kymojbʼabʼl kyibʼe tukʼil Jesucrist» (Filipenses 4:6, 7). Qa ma txi qqʼamaʼn te Dios tiʼ in bʼaj qkʼuʼj tiʼj, kʼonil qiʼj tuʼn tkubʼ qnaʼn bʼaʼn ex kʼonil qiʼj tuʼn qximen toj tumel aj qok weʼ twitz jun nya bʼaʼn.

In ten qnabʼil

«Qa at jun kyxole atx taj tnabʼl, qaninx tnabʼl te Dios, ex ktzajel tqʼoʼn Dios tnabʼl; porke ate Dios nimxix in tzaj tqʼoʼn kye kykyaqil ex mintiʼ in ilin» (Santiago 1:5). Aj qikʼ toj jun ambʼil kwest, at maj mintiʼ in nel qnikʼ tiʼj tiʼ tuʼn tbʼant quʼn. Noqtzun tuʼnj, qa ma txi qqanin qnabʼil te Dios, jaku tzʼonin qiʼj tuʼn ttzaj qnaʼn qe nabʼil ateʼ toj Xjan Uʼj.

In nonin qiʼj ex in tzaj tqʼuqbʼaʼn qkʼuʼj

«Ate Dios in tzaj qʼonte nimxix qipumal, mya quʼnxqe» (2 Corintios 4:7). Tuʼnju a Jehová aju Dios at nimxix tipumal, jaku tzʼonin qiʼj tuʼn qex twitz alkyexku nya bʼaʼn moqa tuʼn kukx tikʼx quʼn (Isaías 40:29). In tzaj tqʼamaʼn Xjan Uʼj qa kukx in tzaj tqʼuqbʼaʼn Jehová qkʼuʼj toj tkyaqil yajbʼil qe (2 Corintios 1:3, 4).

JAKU TZʼONIN NAʼJ DIOS TIʼJA

Ax tok, mintiʼ in nok obligarina tuʼn Jehová tuʼn tnaʼna Dios te, pero tukʼil kʼujlabʼil in tzaj tqʼoʼn txokbʼil teya (Jeremías 29:11, 12). ¿Yajtzun qa naʼna Dios toj ambʼil ojtxe ex kubʼ tnaʼna qa mintiʼ tzaj tzaqʼweʼn tnaʼj Diosa? Miʼn tzaj bʼaj tkʼuʼja. Aʼyeju mambʼaj in che ximen kyiʼj kykʼwal, mintiʼ in xi kyqʼoʼn onbʼil kye ik tzeʼn in tzaj kyqanin ex toj ambʼil aj ttzaj kyqanin. Bʼalo in bʼant jlu kyuʼn tuʼnju at jun tumel mas tbʼanel tzeʼn jaku che onin kyiʼj. Noqtzun tuʼnj, aʼyeju tbʼanel mambʼaj kukx in che onin kyiʼj kykʼwal.

A Jehová mas tbʼanel mambʼaj at ex taj tuʼn tonin tiʼja. Qa ma ximana kyiʼj taqikʼ Tyol Dios ma qo xnaqʼtzan tiʼj ex qa ma kubʼ tbʼinchaʼna, tzul ttzaqʼweʼn Jehová qe tnaʼj Diosa (Salmo 34:15; Mateo 7:7-11).