¿Tiʼ jaku bʼant quʼn tuʼn miʼn ttzaj bʼajxix qkʼuʼj?

QA MA tzaj bʼaj qkʼuʼj, jaku kubʼ qnaʼn qa ya mintiʼ qipumal (Prov. 12:25). ¿Ope kubʼ tnaʼn teya jun maj qa in tzaj bʼajxix tkʼuʼja? ¿Atpe maj in kubʼ tnaʼna qa ya mlay bʼant jun tiʼ tuʼna? Qa ikju, nya oʼkx tiʼja in bʼaj jlu. Bʼalo at junjun qe in qo xqʼuqin tiʼj jun qfamiliar, o kyim jun toj qja, o tzaj jun nya bʼaʼn qiʼj tuʼn jun xitbʼil tuʼnx twitz txʼotxʼ moqa in qo ok weʼ twitz alkyexku juntl nya bʼaʼn. Tuʼn jlu jaku kubʼ qnaʼn siktleʼn ex bʼis. ¿Tiʼ jaku tzʼonin qiʼj tuʼn miʼn ttzaj bʼajxix qkʼuʼj?a

Aju techel kyaj tqʼoʼn aj kawil David qwitz, jaku tzʼonin qiʼj tuʼn miʼn ttzaj bʼajxix qkʼuʼj. Ok weʼ David twitz nim nya bʼaʼn, axpe ikx jakutoq kubʼ bʼyoʼn (1 Sam. 17:34, 35; 18:10, 11). ¿Tiʼ bʼant tuʼn David tuʼn miʼn ttzaj bʼajxix tkʼuʼj? ¿Tiʼ jaku bʼant quʼn tuʼn tel qkanoʼn tiʼj techel kyaj tqʼoʼn qwitz?

¿TIʼ BʼANT TUʼN DAVID TUʼN MIʼN TTZAJ BʼAJXIX TKʼUʼJ?

Ok weʼ David twitz nim nya bʼaʼn toj ax ambʼil. Jun techel, xi tjyoʼn aj kawil Saúl tumel tuʼn tkubʼ bʼyoʼn David, tuʼntzunju el oq twitz. Tej tmeltzʼaj David kyukʼil tsoldad toj jun qʼoj, otoq txi kyelqʼaʼn aj qʼoj qe tiʼchaq kye, otoq bʼaj kypatin kyja ex otoq chex qʼiʼn kyfamilia. ¿Tiʼ bʼant tuʼn David? In tzaj tqʼamaʼn Tyol Dios jlu: «E ok ten oqʼel kyuwxix wen max tejxi tel bʼaj kyipun». Nya oʼkxju, ax ikx in che yolintoq tsoldad «tuʼn tok kyxoʼn abʼj tiʼj» (1 Sam. 30:1-6). Tuʼn tkyaqil jlu, ok weʼ David twitz oxe nya bʼaʼn toj junx ambʼil. Tnejel, jakutoq tzʼok bʼinchaʼn nya bʼaʼn kyiʼj toj tja. Tkabʼin, e ok ten tsoldad qʼamalte tuʼn tkubʼ kybʼyoʼn. Ex toxin, in jyontoq Saúl tumel tzeʼn tuʼn tkubʼ bʼyoʼn David. Jaku txi qqʼamaʼn qa tzaj bʼaj tkʼuʼj David tuʼn tkyaqil jlu.

¿Tiʼtzun bʼant tuʼn David? Jun rat naj «ok qeʼ tkʼuʼj [...] tiʼj Qman aju Tdios». ¿Tzeʼn bʼant jlu tuʼn? Naqʼlitoq David tuʼn tnaʼn Dios tuʼntzun t-xi tqanin onbʼil te Jehová ex tuʼn t-ximen tiʼj tzeʼn otoq tzʼonin tiʼj toj tanqʼibʼil (1 Sam. 17:37; Sal. 18:2, 6). Ax ikx, el tnikʼ David tiʼj qa iltoq tiʼj tuʼn tjyon onbʼil tukʼil Jehová ex atzun jlu bʼant tuʼn. Tej ttzaj tzaqʼweʼn qe tnaʼj Dios, jun rat naj xi tbʼinchaʼn qe tiʼchaq ik tzeʼn otoq tzaj tqʼamaʼn Jehová te. Tuʼn jlu, tzaj kʼiwlaʼn David ex qe tsoldad, ex ya mintiʼ ok bʼinchaʼn nya bʼaʼn kyiʼj toj kyja ex ten juntl maj qe tiʼchaq kye (1 Sam. 30:7-9, 18, 19). ¿Mape tzʼel tnikʼa tiʼj oxe tiʼ bʼant tuʼn David? Naʼn Dios te Jehová tuʼn t-xi tqanin onbʼil te, ximen tiʼj tzeʼn otoq tzʼonin Jehová tiʼj toj tanqʼibʼil ex xi tbʼinchaʼn qe tiʼchaq ik tzeʼn otoq txi tqʼamaʼn Jehová te. ¿Tzeʼn jaku tzʼel qkanoʼn tiʼjju bʼant tuʼn David? Qo xnaqʼtzan tiʼj oxe tten.

QKANOʼMIL TIʼJ DAVID AJ TTZAJ BʼAJ QKʼUʼJ

1. Qo naʼn Dios. Aj ttzaj bʼaj qkʼuʼj tuʼn jun tiʼ, jaku qo naʼn Dios te Jehová tuʼn tel qnikʼ tiʼj tiʼ tuʼn t-xi qbʼinchaʼn. Qa ma tzʼel qpaʼn ambʼil tuʼn qnaʼn Dios te Jehová ex qa ma txi qqʼamaʼn te tkyaqilju in tzaj bʼaj qkʼuʼj tiʼj, kqebʼil qkʼuʼj tuʼn. Qatzun mlay qo naʼn Dios toj nimku ambʼil, oʼkx jaku txi qqʼamaʼn kabʼe yol te Jehová toj qanmi. Aj t-xi qqanin onbʼil te Jehová, ax ikx in kubʼ qyekʼin qa in nok qeʼ qkʼuʼj tiʼj ik tzeʼn te David. Tqʼama David jlu: «Aya kolol wiʼje, aya jun lugar te kolbʼil wibʼe ex tzoqpilte weye. Aya Ndiose ik ttena te weye ik tzaʼn jun pik in chin klete tuʼn» (Sal. 18:2). ¿Jakupe tzʼonin naʼj Dios qiʼj? In tzaj tqʼamaʼn jun precursora Kahlia tbʼi jlu: «In qeʼ nkʼuʼje aj nbʼaj naʼne Dios. Ex in nonin jlu wiʼje tuʼn tten nximbʼetze ik tzeʼn te Jehová ex in nonin wiʼje tuʼn tok qeʼ mas nkʼuʼje tiʼj». Jaku tzʼok qeʼ qkʼuʼj tiʼj qa jun oyaj naʼj Dios tuʼn Jehová ex in nonin qiʼj tuʼn miʼn ttzaj bʼajxix qkʼuʼj.

2. Bʼaʼn tuʼn qximen. Aj t-ximana tiʼjju o tzikʼ toj tanqʼibʼila, ¿in tzajpe tnaʼna jun ambʼil jatumel onin Jehová tiʼja? Aj qximen tiʼj tzeʼn o tzʼonin Jehová kyiʼj tmajen toj ambʼil ojtxe ex tzeʼn o tzʼonin qiʼj, in nok qeʼ mas qkʼuʼj tiʼj ex in chewix qanmi tuʼn (Sal. 18:17-19). In tzaj tqʼamaʼn jun ansyan Joshua tbʼi jlu: «O bʼaj nbʼinchaʼne jun lista kyiʼj nnaʼj Diose o che tzaj ttzaqʼweʼn Jehová. Iktzun tten jaku tzaj nnaʼne tiʼ xi nqanine te ex tzeʼn tzaj ttzaqʼweʼn nnaʼj Diose tojxix ambʼil mas bʼaʼn». Aj qximen tiʼj tzeʼn o tzʼonin Jehová qiʼj, in nonin qiʼj tuʼn tten qipumal ex tuʼn miʼn ttzaj bʼajxix qkʼuʼj.

3. Qbʼincham qe tiʼchaq. Naʼmxtoq t-xi qbʼinchaʼn jun tiʼ, nim toklen tuʼn qjyon onbʼil toj Tyol Dios (Sal. 19:7, 11). O tzaj kyqʼamaʼn nim erman qa aj t-xi kyjyoʼn mas tqanil tiʼj jun taqikʼ Tyol Dios, mas in nel kynikʼ tiʼj tzeʼn jaku kubʼ kybʼinchaʼn. In tzaj tqʼamaʼn jun ansyan Jarrod tbʼi jlu: «Aj in xi njyoʼne tqanil tiʼj jun taqikʼ Tyol Dios, mas in nel nnikʼe tiʼj. Iktzun tten in nel nnikʼe tiʼj tiʼ taj Jehová tuʼn ttzaj tqʼamaʼn weye, in che kuʼpin tyol toj wanmiye ex in nok tilil wuʼne tuʼn t-xi nbʼinchaʼne aju in tzalaj tiʼj». Aj t-xi qjyoʼn onbʼil tukʼil Jehová toj Tyol ex aj t-xi qbʼiʼn qe tkawbʼil, mas in bʼaj qbʼinchaʼn qten tuʼn miʼn ttzaj bʼajxix qkʼuʼj.

KʼONIL JEHOVÁ TIʼJA TUʼN MIʼN TTZAJ BʼAJXIX TKʼUʼJA

El tnikʼ David tiʼj qa iltoq tiʼj tuʼn tjyon onbʼil tukʼil Jehová tuʼn miʼn ttzaj bʼajxix tkʼuʼj. Ex xi tqʼoʼn chjonte te tuʼnju onin tiʼj. Tuʼntzunju tqʼama jlu: «Tuʼnju onin qine tuʼna, [...] chin okexe twi muro tok tiʼjele kytanmi». Ex tqʼamatl jlu: «Ate Dios in tzaj qʼonte wipune» (Sal. 18:29, 32). Bʼalo in kubʼ qximen qa ik qe nya bʼaʼn in qo ok weʼ kywitz ik tzeʼn jun muro, pero jaku qo ex kywitz tuʼn tonbʼil Jehová. Qa ma qo naʼn Dios te Jehová tuʼn t-xi qqanin onbʼil te, qa ma qo ximen tiʼj tzeʼn o tzʼonin qiʼj, ex qa ma txi qbʼinchaʼn qe tiʼchaq in tzalaj tiʼj, jaku tzʼok qeʼ qkʼuʼj tiʼj qa tzul tqʼoʼn qipumal ex tzul tqʼoʼn qnabʼil tuʼntzun tel qnikʼ tiʼj tiʼ jaku txi qbʼinchaʼn tuʼntzun miʼn ttzaj bʼajxix qkʼuʼj.