Qkanoʼmil techel kyiʼj anjel

1, 2. a) ¿Tiquʼn junxitl qo kywitz anjel? b) ¿Alkyeqe tiʼchaq in che bʼant quʼn ik tzeʼn kye anjel?

O QO oktz toj ttnam Jehová, aju ik tten in tzeʼn jun familia at kʼujlabʼil kyxol. Toj familia lu ateʼ qe erman twitz tkyaqil Txʼotxʼ ex nim millón anjel (Dan. 7:​9, 10). Junxitl qo kywitz qe anjel. Qo ximen tiʼj jlu, a qe anjel e kubʼ bʼinchaʼn tnejel kywitz qe xjal (Job 38:​4, 7). Ax ikx at mas kyipumal ex tzʼaqliqe, tuʼntzunju, mlayx qo ok ik tzeʼn kye tuʼnju aj il qo (Luc. 9:26).

² Maske junxitl qo kywitz qe anjel, at nim tiʼchaq in bʼant quʼn ik tzeʼn kye. Jun techel, ik tzeʼn kye anjel, jaku tzʼel qkanoʼn qe tbʼanel tmod Jehová. Ax ikx jaku kubʼ qximen qa qo ajbʼel te Jehová moqa miʼn. At junxichaq qmod ex at jun qbʼi ik tzeʼn kye anjel. Ex in bʼant junxichaq aqʼuntl quʼn toj ttnam Jehová. Ik tzeʼn kye anjel, ax ikx qe qaj tuʼn qajbʼen te Jehová (1 Ped. 1:12).

3. ¿Tiʼ xnaqʼtzbʼil jaku tzʼel qiʼn kyiʼj qe anjel in che ten tzʼaqli?

³ Ik tzeʼn ma tzʼel qnikʼ tiʼj at nim tiʼchaq in bʼant quʼn ik tzeʼn kye anjel, tuʼntzunju in tzaj qʼuqbʼaʼn qkʼuʼj tuʼn tbʼanel techel in kubʼ kyqʼoʼn ex in nel qiʼn tbʼanel xnaqʼtzbʼil kyiʼj. Toj xnaqʼtzbʼil lu, kʼelel qnikʼ tiʼj tzeʼn jaku tzʼel qkanoʼn kyiʼj anjel tuʼnju in kubʼ kyin kyibʼ, in kubʼ kyyekʼin kʼujlabʼil kyiʼj xjal, in nikʼx nya bʼaʼn kyuʼn ex in nok tilil kyuʼn tuʼn tten congregación saq.

¿TZEʼN IN KUBʼ KYIN KYIBʼ ANJEL?

4. a) ¿Alkye tten in kubʼ kyyekʼin anjel qa in kubʼ kyin kyibʼ? b) ¿Tiquʼn in kubʼ kyin kyibʼ anjel? (Salmo 89:7).

⁴ Aʼyeju anjel in che ten tzʼaqli twitz Jehová, in kubʼ kyin kyibʼ. Maske at nim kyojtzqibʼil, kyipumal ex kynabʼil, in xi kybʼinchaʼn aju in xi tqʼamaʼn Jehová kye ex mintiʼ in jaw kynimsan kyibʼ tiʼjju in bʼant kyuʼn (Sal. 103:20). Ax ikx mintiʼ in jaw kynimsan kyibʼ noq tuʼnju o txi tqʼoʼn Jehová kyipumal. In kubʼ kynaʼn nim tzalajbʼil aj tbʼant tajbʼil Jehová kyuʼn maske mintiʼ jun ojtzqilte kybʼi (Gén. 32:​24, 29; 2 Rey. 19:35).a Mintiʼ in xi kyqʼoʼn ambʼil tuʼn kyjaw nimsaʼn tuʼnju oʼkx Jehová at toklen tuʼn tjaw nimset. ¿Tiquʼn in kubʼ kyin kyibʼ anjel? Tuʼnju kʼujlaʼn Jehová kyuʼn ex in che respetarin te (kjawil uʼjit Salmo 89:7).

5. ¿Tzeʼn kubʼ tyekʼin jun anjel qa kubʼ tin tibʼ tej t-xi tkawin apóstol Juan? (Ax ikx qʼonka twitza tiʼj tilbʼilal).

⁵ Qo xnaqʼtzan tiʼj jun relato jatumel in tzaj tyekʼin qa in kubʼ kyin kyibʼ anjel. Toj abʼqʼi 96 ok tkeʼyin Juan jun anjel aju mintiʼ ojtzqiʼn tbʼi tuʼn toj jun witzikʼ (Apoc. 1:1). ¿Tiʼ tmod Juan kubʼ tyekʼin tej tok tkeʼyin anjel toj witzikʼ? Kubʼ ẍmeje twitz tuʼn tjaw tnimsaʼn. Pero nya bʼaʼn ela jlu toj twitz anjel, tuʼntzunju xi tqʼamaʼn jlu te: «Bʼintza, miʼn tbʼinchaya ikju; ax tmajen Dios qine ik tzaʼn teya [ . . . ]. Kʼuluna twitz Dios» (Apoc. 19:10). Tukʼil tyol kubʼ tyekʼin qa kubʼ tin tibʼ. Mintiʼ xi tqʼoʼn anjel ambʼil tuʼn tjaw nimsaʼn, tuʼntzunju, jurat naj xi tqʼamaʼn qa oʼkx Jehová tuʼn tjaw nimsaʼn. Axpe ikx mintiʼ kubʼ t-ximen qa mastoq nim toklen twitz Juan. Maske otoq tzikʼ nim ambʼil in najbʼentoq anjel te Jehová ex maske attoq mas tipumal twitz apóstol Juan, kubʼ tin tibʼ ex xi tqʼamaʼn jlu: «Ax tmajen Dios qine ik tzaʼn teya». E ajbʼen tbʼanel yol tuʼn anjel tej t-xi tkawin apóstol Juan. Bʼalo el tnikʼ tiʼj qa bʼant jlu tuʼn Juan, tuʼnju jaw labʼin tiʼjju ok tkeʼyin.

6. ¿Tzeʼn jaku tzʼel qkanoʼn kyiʼj anjel tuʼnju in kubʼ kyin kyibʼ?

⁶ ¿Tzeʼn jaku kubʼ qin qibʼ ik tzeʼn kye anjel? Aj tok tilil quʼn tuʼn tjapun qoklen toj ttnam Jehová ex nya tuʼn tjaw qnimsan qibʼ kywitz txqantl (1 Cor. 4:7). Ax ikx mintiʼ tuʼn tjaw qnimsan qibʼ noq tuʼnju o tzikʼ nim ambʼil in qo ajbʼen te Jehová moqa tuʼnju at jun qoklen. Ex qa ma tzaj qʼoʼn mas qoklen toj ttnam Jehová, bʼaʼn tuʼn tkubʼ qin qibʼ ex tuʼn qok te mans (Luc. 9:48). Ik tzeʼn kye anjel, ax ikx qe qaj tuʼn qajbʼen kye txqantl. Ex nya qaj tuʼn tkubʼ kynaʼn txqantl qa mas nim qoklen kywitz.

7. ¿Tzeʼn jaku kubʼ qyekʼin qa in kubʼ qin qibʼ aj t-xi qqʼoʼn jun consej?

⁷ Ax ikx il tiʼj tuʼn tkubʼ qin qibʼ aj t-xi qqʼoʼn tconsej jun erman. Ax ikx qe mambʼaj aj t-xi kyqʼoʼn consej kye kykʼwal. At maj il tiʼj tuʼn t-xi qqʼoʼn jun consej tiʼjju in bʼant kyuʼn. Toj tumel xi tqʼoʼn jun anjel tconsej Juan, ax ikx qe bʼaʼn tuʼn t-xi qqʼoʼn consej toj tumel tuʼntzun miʼn tkubʼ kynaʼn txqantl bʼis. Qa mintiʼ in jaw qnimsan qibʼ, kʼajbʼel Tyol Dios quʼn aj t-xi qqʼoʼn jun consej ex kbʼantel quʼn tukʼil kʼujlabʼil (Col. 4:6).

IN KUBʼ KYYEKʼIN ANJEL KʼUJLABʼIL KYIʼJ XJAL

8. a) Ik tzeʼn in tzaj tqʼamaʼn Lucas 15:​10, ¿tzeʼn in kubʼ kyyekʼin anjel qa kʼujlaʼn qe xjal kyuʼn? b) ¿Tiʼ aqʼuntl in bʼant kyuʼn anjel toj pakbʼabʼil? (Ax ikx qʼonka twitza tiʼj tilbʼilal toj).

⁸ Kʼujlaʼn qe xjal kyuʼn anjel, in nok kyqʼoʼn kyoklen ex in nel kynikʼ tiʼjju in bʼaj kyiʼj. In che jaw tzalaj anjel aj tajtz tiʼj tanmi jun aj il ex aj tmeltzʼaj tukʼil Jehová. Ax ikx aj tel tnikʼ jun xjal tiʼj axix tok ex aj tbʼant junjun chʼixpubʼil tuʼn tuʼntzun tajbʼen te Jehová (kjawil uʼjit Lucas 15:10). Ax ikx in che onin anjel qiʼj aj qpakbʼan (Apoc. 14:6). Maske mintiʼ in che pakbʼan anjel kye xjal, pero in che onin qiʼj tuʼn kykanet xjal kyaj tuʼn tel kynikʼ tiʼj Dios. Noqtzun tuʼnj, nya tkyaqil maj jaku txi qqʼamaʼn qa kyuʼn anjel in pon jun xjal toj ttnam Jehová. Tuʼnju jaku tzʼajbʼen xewbʼaj xjan tuʼn Jehová, tuʼn tonin kyiʼj xjal ex tuʼn tonin kyiʼj tmajen (Hech. 16:​6, 7). Maske ikju, nimxix in che onin anjel. Tuʼntzunju, jaku tzʼok qeʼ qkʼuʼj tiʼj qa che onil qiʼj aj qpakbʼan. (Qʼonka twitza tiʼj recuadro «Tzaj tzaqʼweʼn kynaʼj Dios»).b

9. ¿Tzeʼn jaku kubʼ qyekʼin qkʼujlabʼil kyiʼj xjal ik tzeʼn kye anjel?

⁹ ¿Tzeʼn jaku kubʼ qyekʼin qkʼujlabʼil kyiʼj xjal ik tzeʼn kye anjel? Aj tetz qʼoʼn tqanil toj congregación qa otoq meltzʼaj jun erman toj ttnam Jehová, in qo jaw tzalaj tiʼj ik tzeʼn in bʼant kyuʼn anjel. Bʼaʼn tuʼn tkubʼ qyekʼin qkʼujlabʼil tiʼj aj tmeltzʼaj tuʼntzun tkubʼ tnaʼn qa kʼujlaʼn quʼn (Luc. 15:​4-7; 2 Cor. 2:​6-8). Ax ikx jaku tzʼel qkanoʼn kyiʼj anjel aj tok tilil quʼn toj pakbʼabʼil (Ecl. 11:6). Ik tzeʼn kye anjel in che onin qiʼj aj qpakbʼan, ax ikx qe jaku txi qjyoʼn junjuntl tumel tuʼn qonin kyiʼj erman toj pakbʼabʼil. Jun techel, jaku qo ex pakbʼal tukʼil jun akʼaj publicador, tukʼil jun erman ma tijen moqa at jun yabʼil tiʼj.

10. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Sara?

¹⁰ ¿Yajtzun qa kwest tuʼn bʼant tkyaqilju qaj tuʼn bʼant quʼn toj pakbʼabʼil? Jaku txi qjyoʼn junjun tumel tuʼn qonin kyiʼj anjel toj pakbʼabʼil. Qo xnaqʼtzan tiʼjju bʼaj tiʼj Sara, jun ermana in nanqʼin atz India.c Tej otoq tzikʼ 20 abʼqʼi toklen te precursora tzaj jun yabʼil tiʼj ex ya mintiʼ jaw weʼ. Tzaj nim tbʼis tuʼn jlu. Pero noq tuʼn onbʼil xi kyqʼon erman te ex tuʼnju kukx uʼjin tiʼj Biblia chebʼe chebʼe kubʼ tnan bʼaʼn. Xi tjyoʼn junjuntl tumel tzeʼn tuʼn tpakbʼan. Tuʼnju ax ikx mintiʼ bʼant tuʼn tkubʼ qeʼ tuʼn tkubʼ ttzʼibʼin qe carta, oʼkx bʼant tuʼn tpakbʼan toj teléfono. Tuʼntzunju, xi tllamarin qe trevisita, atzun kye trevisita xi kyqʼamaʼn te alkye junjun xjal jakutoq che xnaqʼtzan tij Biblia. ¿Tiʼ tbʼanel tzaj tuʼn jlu? Tej tikʼ junjun xjaw ya ateʼtoq 70 xjal in che xnaqʼtzan tukʼil tiʼj Biblia. Ex mlaytoq bʼant tuʼn t-xi tqʼoʼn xnaqʼtzbʼil kye kykyaqil, tuʼntzunju, xi tqʼamaʼn kye junjun erman te congregación tuʼn kyonin tiʼj. Ex nim kyxol qe xjal lu ya in che pon kyoj chmabʼil. Jaku tzʼok qeʼ qkʼuʼj tiʼj qa nim in che tzalaj anjel aj kyonin kyiʼj erman in nok tilil kyuʼn tuʼn tkanet junjuntl tumel kyuʼn tuʼn kypakbʼan ik tzeʼn te Sara.

KUKX IN NIKʼX NYA BʼAʼN KYUʼN ANJEL

11. ¿Alkye tten jaku tzʼel qkanoʼn kyiʼj anjel tuʼnju in nikʼx nya bʼaʼn kyuʼn?

¹¹ O tzikʼ nim mil abʼqʼi in nikʼx nya bʼaʼn kyuʼn anjel, tuʼntzunju, in kubʼ kyqʼoʼn jun tbʼanel techel qwitz. O tzʼok kyqʼoʼn kywitz tiʼj tzeʼn o tzʼel tpan tibʼ Satanás ex junjun anjel tiʼj Jehová (Gén. 3:1; 6:​1, 2; Jud. 6). In yolin Biblia tiʼj jun anjel ikʼx nim nya bʼaʼn tuʼn tej tok tzoqpaj jun demonio tiʼj (Dan. 10:13). Ax ikx, atxix tej tten Adán ex Eva, o tzʼok kyqʼoʼn anjel kywitz tiʼj qa noq junjun xjal in kubʼ kyximen tuʼn kyajbʼen te Jehová. Maske in nok kyqʼoʼn kywitz tiʼj jlu, kukx in nok tilil kyuʼn tuʼn kyten tzʼaqli twitz Jehová, tuʼn kyajbʼen te tukʼil tzalajbʼil ex tuʼn tkyaqil kyanmi. Ojtzqiʼn kyuʼn qa kpol ambʼil jatumel kʼelel tiʼn Jehová tkyaqil nya bʼaʼn.

12. ¿Tiʼ kʼonil qiʼj tuʼn kukx tikʼx quʼn?

¹² ¿Tzeʼn jaku tzʼel qkanoʼn kyiʼj anjel tuʼnju kukx in nikʼx nya bʼaʼn kyuʼn? Ik tzeʼn kye anjel, ax ikx qe in nok qqʼoʼn qwitz tiʼj nya bʼaʼn moqa in qo el ikʼun. Pero ojtzqiʼn quʼn qa toj ambʼil mas bʼaʼn toj twitz Jehová kʼelel tiʼn tkyaqil nya bʼaʼn. Tuʼntzunju, «miʼn qo sikt tuʼn qbʼinchante aju bʼaʼn» ik tzeʼn kye anjel (Gál. 6:9). In tzaj ttziyen Jehová qa kʼonil qiʼj tuʼn tikʼx quʼn (1 Cor. 10:13). Ex jaku txi qqanin te tuʼn tonin qiʼj tukʼil xewbʼaj xjan, tuʼntzun tten qpasens ex tuʼn tkubʼ qnaʼn tzalajbʼil (Gál. 5:22; Col. 1:11). ¿Tiʼ jaku bʼant tuʼna qa in nok weʼya twitz ikʼbʼil? Qeʼk tkʼuʼja tiʼj Jehová ex miʼn tzaj xobʼa. Kukx ktel ttxlaja ex kʼonil tiʼja tuʼn kukx tikʼx tuʼna (Heb. 13:6).

IN CHE ONIN ANJEL TUʼN TTEN CONGREGACIÓN SAQ

13. ¿Tiʼ aqʼuntl in bʼant kyuʼn anjel toj mankbʼil tqʼijlalil? (Mateo 13:​47-49).

¹³ O txi tqʼoʼn Jehová jun aqʼuntl nim toklen kye anjel toj mankbʼil tqʼijlalil (kjawil uʼjit Mateo 13:​47-49). Tuʼnju in qo pakbʼan twitz tkyaqil Txʼotxʼ, nim xjal kyaj tuʼn tel kynikʼ tiʼj tbʼanel tqanil. Ateʼ junjun xjal in bʼant chʼixpubʼil kyuʼn, atzun junjuntl mintiʼ. O txi qʼoʼn kyoklen anjel tuʼn tel kypaʼn «qeju mya bʼaʼn kyxol qeju tzʼaqlxix». Iktzun tten in che onin tuʼn tten congregación saq. Qa at jun xjal in nel tpan tibʼ tiʼj ttnam Jehová, nya a t-xilen jlu qa mlayx meltzʼaj juntl maj ex qa mlayx tzaj jun nya bʼaʼn qxol. Noq tzeʼnxku, in nok tilil kyuʼn anjel tuʼn kyaqʼunan tuʼn kyten congregación saq.

14, 15. ¿Tzeʼn jaku tzʼel qkanoʼn kyiʼj anjel tuʼn tten congregación saq? (Ax ikx qʼonka twitza kyiʼj tilbʼilal).

¹⁴ ¿Tzeʼn jaku tzʼel qkanoʼn kyiʼj anjel tuʼn tten congregación saq? Aj tok tilil quʼn tuʼn tel qikʼun aju nya bʼaʼn ex tuʼn tchʼiy qamiwbʼil tukʼil Jehová. Ex in bʼant jlu quʼn aj tjaw qjyoʼn tbʼanel qamiw, aʼyeju in che onin qiʼj tuʼn qok laqʼeʼ ttxlaj Jehová. Iktzun tten in qo onin tuʼn tten congregación saq (Sal. 101:3). Ax ikx jaku qo onin kyiʼj erman tuʼn kyten tzʼaqli twitz Jehová. Jun techel, ¿tiʼ jaku bʼant quʼn qa o tzʼok qbʼiʼn qa at jun erman o kubʼ tbʼinchaʼn jun matij il? Tuʼnju kʼujlaʼn erman quʼn, qo yolil tukʼil tuʼn tyolin tukʼil jun ansyan. Qa mintiʼ ma bʼant jlu tuʼn, bʼaʼn tuʼn qyolin kyukʼil ansyan, tuʼnju qajbʼil tuʼn ttzaj tkʼamoʼn erman onbʼil tuʼntzun miʼn tnaj tamiwbʼil tukʼil Jehová (Sant. 5:​14, 15).

¹⁵ Bʼisbʼajilxix tuʼnju ateʼ junjun in kubʼ kybʼinchaʼn jun matij il ex il tiʼj tuʼn kyex qʼiʼn toj congregación. Aj tbʼaj jlu ya mintiʼ in nok qjunin qibʼ kyukʼil (1 Cor. 5:​9-13).d In nonin jlu tuʼn tten congregación saq. Qa mintiʼ ma tzʼok qjunin qibʼ kyukʼil, in kubʼ qyekʼin qkʼujlabʼil kyiʼj tuʼnju qaj tuʼn kymeltzʼaj juntl maj tukʼil Jehová. Ex aj tbʼant chʼixpubʼil kyuʼn, in qo tzalaj kyiʼj ik tzeʼn te Jehová ex qe anjel (Luc. 15:7).

16. ¿Alkye tten jaku tzʼel qkanoʼn kyiʼj anjel?

¹⁶ O tzaj tqʼoʼn Jehová jun tbʼanel qoklen tuʼn qaqʼunan junx kyukʼil anjel ex tuʼn tel qnikʼ tiʼj tkyaqilju in bʼant kyuʼn. Tuʼntzunju, bʼaʼn tuʼn tok tilil quʼn tuʼn tel qkanoʼn kyiʼj anjel tuʼnju in kubʼ kyin kyibʼ, in kubʼ kyyekʼin kʼujlabʼil kyiʼj xjal, in nikʼx nya bʼaʼn kyuʼn ex in nok tilil kyuʼn tuʼn tten congregación saq. Qa ma tzʼel qkanoʼn kyiʼj, jaku qo ten kyxol tfamilia Jehová aʼyeju che ajbʼel te te jumajx.