Bʼaʼn tuʼn tel qnikʼ tiʼj qa mintiʼ ojtzqiʼn tkyaqil quʼn

1. ¿Tzeʼn o qo kubʼ tbʼinchaʼn Jehová ex tiquʼn?

O QO kubʼ tbʼinchaʼn Jehová tuʼn qximen, tuʼn tel qnikʼ kyiʼj tiʼchaq ex tuʼn tkubʼ qbʼinchaʼn aju in nel qnikʼ tiʼj. ¿Tiquʼn o qo kubʼ tbʼinchaʼn ik tzeʼn jlu? Tuʼnju taj tuʼn tten qnabʼil aj tjaw qjyoʼn aju mas bʼaʼn aj qajbʼen te (Prov. 2:​1-5; Rom. 12:1).

2. a) ¿Tiʼ bʼaʼn tuʼn tel qnikʼ tiʼj? (Job 37:​23, 24; ax ikx qʼonka twitza tiʼj tilbʼilal). b) Tuʼnju mintiʼ ojtzqiʼn tkyaqil tiʼchaq quʼn, ¿tzeʼn in nonin jlu qiʼj?

² Maske o qo kubʼ tbʼinchaʼn Jehová tuʼn tel qnikʼ kyiʼj tiʼchaq, pero at nim tiʼchaq mintiʼ ojtzqiʼn quʼn (kjawil uʼjit Job 37:​23, 24). Qo ximen tiʼjju bʼaj tiʼj Job. Tej t-xi tqanin Jehová junjun xjel te, el tnikʼ tiʼj qa mintiʼ ojtzqiʼn tkyaqil tqanil tuʼn. Atzun jlu onin tiʼj Job tuʼn tten t-ximbʼetz toj tumel ex tuʼn tkubʼ tin tibʼ (Job 42:​3-6). Ax ikx qe bʼaʼn tuʼn tkubʼ qin qibʼ ex tuʼn tel qnikʼ tiʼj qa mintiʼ ojtzqiʼn tkyaqil tiʼchaq quʼn. Qa ma bʼant jlu quʼn, kʼonil qiʼj tuʼn tok qeʼ qkʼuʼj tiʼj qa tzul tyekʼin Jehová aju taj tuʼn tel qnikʼ tiʼj tuʼntzun tjaw qjyoʼn aju mas bʼaʼn (Prov. 2:6).

3. ¿Tiʼ kʼelel qnikʼ tiʼj toj xnaqʼtzbʼil lu?

³ Toj xnaqʼtzbʼil lu qo xnaqʼtzal kyiʼj junjun tiʼchaq mintiʼ ojtzqiʼn quʼn ex tiquʼn kwest jaku tzʼela toj qwitz. Ax ikx kʼelel qnikʼ tiʼj tiquʼn tbʼanel qa mintiʼ ojtzqiʼn tkyaqil quʼn. Aju qo xnaqʼtzal tiʼj, kʼonil qiʼj tuʼn tok qeʼ qkʼuʼj tiʼj Jehová, aju at nimxix tnabʼil, ex qa tzul tqʼamaʼn aju taj tuʼn tel qnikʼ tiʼj (Job 37:16).

MINTIʼ OJTZQIʼN QUʼN JTOJ TZUL XITBʼIL

4. Ik tzeʼn in tzaj tqʼamaʼn Mateo 24:​36, ¿tiʼ mintiʼ ojtzqiʼn quʼn?

⁴ (Kjawil uʼjit Mateo 24:36). Mintiʼ ojtzqiʼn quʼn jtoj tzul xitbʼil. Ax ikx tej tten Jesús tzalu twitz Txʼotxʼ mintiʼtoq ojtzqiʼn tuʼn «alkye qʼij ex alkye or» tuʼn tul xitbʼil.a Yajxitl, tqʼama kye t-apóstol qa oʼkx Jehová ojtzqilte jtoj che bʼajel junjun tiʼchaq (Hech. 1:​6, 7). Ya ojtzqiʼn tuʼn Jehová jtoj tzul tiʼn xitbʼil, atzun qe mintiʼ ojtzqiʼn quʼn.

5. ¿Tiʼ jaku kubʼ qnaʼn tuʼnju mintiʼ ojtzqiʼn quʼn jtoj tzul xitbʼil?

⁵ Ik tzeʼn tqʼama Jesús, mintiʼ bʼiʼn quʼn jteʼ ambʼil qo ayol tuʼn tul xitbʼil. Tuʼntzunju jakulo tzaj bʼaj qkʼuʼj, mas qa o tzikʼ nim ambʼil in qo ajbʼen te Jehová. Ax ikx jaku tzaj qbʼis qa in che xmayin qfamilia ex junjuntl xjal qiʼj tuʼnju naʼmx tul xitbʼil (2 Ped. 3:​3, 4). Jakulo kubʼ qximen, qa noqwit bʼiʼn quʼn alkye qʼij tzul xitbʼil, jakulo tzʼonin qiʼj tuʼn tten qpasens ex tuʼn tikʼx kyxmaybʼil xjal quʼn.

6. ¿Tiquʼn tbʼanel qa mintiʼ ojtzqiʼn quʼn jtoj tzul xitbʼil?

⁶ In tzaj tqʼoʼn Jehová ambʼil qe tuʼn tkubʼ qyekʼin qa in qo ajbʼen te tuʼnju kʼujlaʼn quʼn ex tuʼnju in noq qeʼ qkʼuʼj tiʼj, tuʼntzunju mintiʼ in tzaj tqʼamaʼn qe jtoj tzul xitbʼil. Qaj tuʼn qajbʼen te Jehová te jumajx ex nya oʼkx tuʼnju chʼix tul xitbʼil. Mas bʼaʼn qa mintiʼ ma qo ximen «tiʼj tqʼijlalil ok tul Dios», sino tiʼjju kbʼantel tuʼn aj tbʼaj xitbʼil. A jlu kʼonil qiʼj tuʼn qok laqʼeʼ mas ttxlaj Jehová ex tuʼn tok qeʼ qkʼuʼj tiʼj (2 Ped. 3:​11, 12).

7. ¿Alkyeqe tiʼchaq ojtzqiʼn quʼn?

⁷ Tbʼanel qa ma qo ximen tiʼjju ojtzqiʼn quʼn. Pero, ¿tiʼ ojtzqiʼn quʼn? Ojtzqiʼn quʼn qa xi tzyet bʼajsbʼil tqʼijlalil toj abʼqʼi 1914, tuʼnju in che kanet junjun profecía quʼn toj Biblia tiʼj jlu. Ax ikx ojtzqiʼn quʼn tzeʼn kʼokel qanqʼibʼil toj ambʼil lu. Tuʼntzunju, qʼuqli qkʼuʼj tiʼj qa chʼix «tul kanun ju nintz tqʼijlalil jwisi tuʼn Qman» (Sof. 1:14). Ax ikx ojtzqiʼn quʼn qa taj Jehová tuʼn t-xi qqʼamaʼn tbʼanel tqanil tiʼj Tkawbʼil kye kykyaqil xjal (Mat. 24:14). Ex in xi pakbʼet tbʼanel tqanil toj junlo 240 tnam ex toj mas te mil yol. Tuʼn kukx qpakbʼan tukʼil tzalajbʼil, nya il tiʼj tuʼn tel qnikʼ tiʼj «alkye qiʼj ex alkye or» tzul xitbʼil.

MINTIʼ OJTZQIʼN QUʼN TZEʼN KʼONIL JEHOVÁ QIʼJ

8. ¿Tiʼ t-xilen yol «mintiʼ bʼaʼn tuʼna alkye in tbʼinchaʼn Dios»? (Eclesiastés 11:5).

⁸ Jaku txi tqʼoʼn Jehová ambʼil tuʼn tbʼaj jun tiʼ moqa tuʼn tbʼant jun tiʼ tuʼn, noq tuʼn tbʼant aju tajbʼil. Pero, in tzaj tqʼamaʼn Biblia jlu: «Mintiʼ bʼaʼn tuʼna alkye in tbʼinchaʼn Dios» (kjawil uʼjit Eclesiastés 11:5). ¿Tiʼ kyxilen qe yol lu? Ximana tiʼj jlu: Toj ambʼil jaʼlo mintiʼxix in nel kynikʼ científico tiʼj alkye tten in chʼiy jun tal neʼ toj talbʼil ttxuʼ. Ax ikx qe at maj mlay tzʼel qnikʼ tiʼj tiquʼn in xi tqʼoʼn Jehová ambʼil tuʼn tbʼaj jun tiʼ moqa tiʼ kbʼantel tuʼn tuʼn tonin qiʼj (Sal. 37:5).

9. ¿Tiʼ kwest jaku tzʼela toj qwitz qa mintiʼ ojtzqiʼn quʼn tiʼ kbʼantel tuʼn Jehová tuʼn nonin qiʼj?

⁹ Tuʼnju mintiʼ ojtzqiʼn quʼn tzeʼn jaku tzʼonin Jehová qiʼj, kwest jaku tzʼela toj qwitz tuʼn tkubʼ qximen tiʼ kbʼantel quʼn. Ik tzeʼn tuʼn tkyaj qqʼoʼn junjun tiʼchaq tuʼn qpakbʼan mas moqa tuʼn qxiʼ pakbʼal toj juntl lugar jatumel nya nim erman ateʼ. Ex jakulo kubʼ qximen qa mintiʼ in tzalaj Jehová qiʼj, qa at maj mintiʼ in japun twiʼ qmeta, mintiʼ in qo ok bʼiʼn kyuʼn xjal toj pakbʼabʼil moqa in qo ok weʼ kywitz junjun tiʼchaq kwest aj qonin toj construcción.

10. Maske mintiʼ ojtzqiʼn quʼn tiʼ kbʼantel tuʼn Jehová, ¿alkyeqe tbʼanel qmod il tiʼj tuʼn tten?

¹⁰ Maske mintiʼ ojtzqiʼn quʼn tiʼ kbʼantel tuʼn Jehová, kʼonil jlu qiʼj tuʼn tten tbʼanel qmod ik tzeʼn tuʼn tkubʼ qin qibʼ. Ex in nonin qiʼj tuʼn ttzaj qnaʼn qa oʼkx Jehová ojtzqilte alkye mas bʼaʼn te qe (Is. 55:​8, 9). Ax ikx bʼaʼn tuʼn ttzaj qnaʼn qa tbʼanel kʼelel kykyaqil tiʼchaq qa ma tzʼok qeʼ qkʼuʼj tiʼj Jehová. Ex bʼaʼn tuʼn tjaw qnimsaʼn tbʼi qa tbʼanel in nok qpakbʼabʼil ex qa tbʼanel in nela jun qaqʼun toj ttnam (Sal. 127:1; 1 Cor. 3:7). Pero, qa at junjun tiʼchaq mintiʼ in che bʼant ik tzeʼn in kubʼ qximen, bʼaʼn tuʼn ttzaj qnaʼn qa in nel tnikʼ Jehová tiʼj jlu (Is. 26:12). Qa at junjun tiʼchaq mlay bʼant quʼn, bʼaʼn tuʼn tkyaj qqʼoʼn toj tqʼabʼ Jehová. Maske mlay bʼant jun milagr tuʼn Jehová tuʼn tonin qiʼj ik tzeʼn bʼant tuʼn toj ambʼil ojtxe, pero jaku tzʼonin qiʼj toj junjuntl tten (Hech. 16:​6-10).

11. ¿Alkyeqe tiʼchaq ojtzqiʼn quʼn?

¹¹ Bʼaʼn tuʼn ttzaj qnaʼn qe tiʼchaq ojtzqiʼn quʼn. ¿Alkyeqe tiʼchaq lu? Qa at nimxix tkʼujlabʼil Jehová, qa tzʼaqlixix ex at nim tnabʼil. In nok tqʼoʼn toklen aju in bʼant quʼn tiʼj ex kyiʼj erman, ex in qo tzaj tkʼiwlaʼn qa kukx in qo ten tzʼaqli twitz (Heb. 11:6).

MINTIʼ OJTZQIʼN QUʼN TIʼ KBʼAJEL JUNJUN QʼIJ

12. Ik tzeʼn in tzaj tqʼamaʼn Santiago 4:13 ex 14, ¿tiʼ mintiʼ ojtzqiʼn quʼn?

¹² (Kjawil uʼjit Santiago 4:​13, 14). Mintiʼ ojtzqiʼn quʼn tiʼ kbʼajel qiʼj junjun qʼij, tuʼnju «noq minabʼen in tzaj mya bʼaʼn» (Ecl. 9:12). Tuʼntzunju, mintiʼ bʼiʼn quʼn qa kjapunel aju in kubʼ qximen ex qa itzʼx qo tuʼn tkubʼ qbʼinchaʼn.

13. ¿Tiʼ jaku kubʼ qnaʼn qa mintiʼ ojtzqiʼn quʼn tiʼ kbʼajel qiʼj junjun qʼij?

¹³ Kwest jaku tzʼela toj qwitz qa mintiʼ ojtzqiʼn quʼn tiʼ kbʼajel qiʼj junjun qʼij. Bʼalo jaku tzaj bʼaj qkʼuʼj tiʼjju jaku bʼaj ex mlay qo tzalaj. Ax ikx jaku tzaj qbʼis aj qok weʼ twitz jun nya bʼaʼn mintiʼ ximen quʼn moqa mintiʼ in japun twi qximbʼetz (Prov. 13:12).

14. ¿Tiʼ kʼonil qiʼj tuʼn qtzalaj? (Ax ikx qʼonka twitza kyiʼj tilbʼilal).

¹⁴ Aj tikʼx nya bʼaʼn quʼn, in kubʼ qyekʼin qa in qo ajbʼen te Jehová tuʼnju kʼujlaʼn quʼn. Toj Biblia in che kanet junjun techel quʼn, aʼyeju in tzaj kyyekʼin qa mintiʼ tuʼn qayon tuʼn t-xqʼuqin Jehová qiʼj aj qok weʼ twitz jun nya bʼaʼn ex mintiʼ in tzaj tqʼamaʼn tiʼ kbʼajel qiʼj. Ojtzqiʼn tuʼn Jehová qa oʼkx jaku qo tzalaj qa ma qo jyon onbʼil tukʼil ex qa ma kubʼ qbʼinchaʼn aju tajbʼil, maske mintiʼ ojtzqiʼn quʼn tiʼ kbʼajel qiʼj junjun qʼij (Jer. 10:23). Aj t-xi qqanin onbʼil te Jehová aj tjaw qjyoʼn jun tiʼ, ik tten ik tzeʼn in xi qqʼamaʼn jlu te: «Qa tajbʼil Qajaw, ok qo anqʼil ex ok qbʼinchaʼ jlu ex qa juntl» (Sant. 4:15).

15. ¿Tiʼ ojtzqiʼn quʼn tiʼj ambʼil tzul?

¹⁵ Maske mintiʼ ojtzqiʼn quʼn tiʼ kbʼajel qiʼj junjun qʼij, pero ojtzqiʼn quʼn qa o tzaj ttziyen Jehová tuʼn qanqʼin te jumajx toj ambʼil tzul tzalu twitz Txʼotxʼ moqa toj kyaʼj. Ex qʼuqli qkʼuʼj tiʼj qa ax tok tyol ex qa ni jun jaku tzʼel qʼinte ambʼil te Jehová tuʼn tjapun twi tyol (Tito 1:2). In tzaj tqʼamaʼn Jehová jlu: «In nqʼoʼne tqanil atxix ojtxi tiʼj ju kbʼajel tuj tqʼijlalil tzul». O japun twi tkyaqilju o tzaj ttziyen Jehová ex kukx kbʼantel jlu tuʼn toj ambʼil tzul (Is. 46:10). Tuʼntzunju, qʼuqli qkʼuʼj tiʼj qa kukx qo okel tkʼujlaʼn Jehová (Rom. 8:​35-39). Ktzajel tqʼoʼn qnabʼil, ktzajel tqʼuqbʼaʼn qkʼuʼj, ax ikx kʼonil qiʼj aj qok weʼ twitz alkyexku nya bʼaʼn ex qo tzajel tkʼiwlaʼn (Jer. 17:​7, 8).

MLAY TZʼEL QNIKʼ TIʼJ JNIʼ OJTZQIʼN QO TUʼN JEHOVÁ

16. ¿Alkyeqe tiʼchaq ojtzqiʼn tuʼn Jehová qiʼj ex tiʼ in kubʼ qnaʼn tuʼn jlu?

¹⁶ (Kjawil uʼjit Salmo 139:​1-6). Ojtzqiʼnxix tuʼn Jehová tzeʼnxix qo, tiʼ in kubʼ qnaʼn ex tiʼ in kubʼ qximen. Ax ikx ojtzqiʼn tuʼn tiʼ in xi qqʼamaʼn, tiʼ tkuʼx toj qanmi ex tiquʼn in kubʼ qbʼinchaʼn junjun tiʼ. Tzaj tqʼama rey David qa in xqʼuqin Jehová qiʼj ex in qo tzaj tonin. ¿Tiʼ in kubʼ tnaʼna aj tel tnikʼa tiʼj qa in ximen Jehová tiʼja, aju Bʼinchalte tkyaqil ex at Nimxix tipumal? Tqʼama David jlu: «Nimxix nneʼla tnabʼla tuj nwitze, mlayx kanun nnabʼle tiʼj ex maʼ t-xilen» (Sal. 139:6).

17. ¿Tiquʼn kwest tuʼn tok qeʼ qkʼuʼj tiʼj qa ojtzqiʼnxix qo tuʼn Jehová?

¹⁷ Kwestlo jaku tzʼela toj qwitz tuʼn tkubʼ qnaʼn qa kʼujlaʼn qo tuʼn Jehová ik tzeʼn jun mambʼaj, tuʼnju alkye tten xqo jaw chʼiysaʼn, kyuʼn qkostumbr moqa tuʼnju nimentoq quʼn tej naʼmxtoq tel qnikʼ tiʼj axix tok. Ax ikx jaku kubʼ qnaʼn qa mintiʼ in ximen Jehová qiʼj ex qa ya mlay qo ok laqʼeʼ ttxlaj noq tuʼn jun il bʼant quʼn ojtxe. Atzun jlu kubʼ tnaʼn David (Sal. 38:​18, 21). Qa in nok tilil tuʼn jun xjal tuʼn tbʼant chʼixpubʼil tuʼn toj tanqʼibʼil, jakulo kubʼ t-xjelin jlu: «Qa in nel tnikʼ Dios wiʼje, ¿tiquʼn in tzaj tqanin tuʼn tel wikʼune qe tiʼchaq bʼaʼn in nela toj nwitze?».

18. ¿Tiquʼn nim toklen tuʼn tel qnikʼ tiʼj qa ojtzqiʼnxix qo tuʼn Jehová? (Ax ikx qʼonka twitza kyiʼj tilbʼilal).

¹⁸ Bʼaʼn tuʼn tok qeʼ qkʼuʼj tiʼj qa ojtzqiʼnxix qo tuʼn Jehová ex qa in nok tqʼoʼn twitz kyiʼj tbʼanel qmod. Ax ikx ojtzqiʼn tuʼn qa at maj in qo el txalpaj, pero in nel tnikʼ tiʼj qa in nok tilil quʼn tuʼn tkubʼ qbʼinchaʼn aju bʼaʼn, tuʼntzunju in qo ok tkʼujlaʼn (Rom. 7:15). Aj tel qnikʼ tiʼj qa ojtzqiʼn qo tuʼn Jehová, in nonin qiʼj tuʼn kukx qajbʼen te tukʼil tzalajbʼil.

19. ¿Tiʼ ojtzqiʼn quʼn tiʼj Jehová?

¹⁹ Qʼuqli qkʼuʼj tiʼj qa at nimxix tkʼujlabʼil Jehová (1 Juan 4:8). Aj ttzaj tqʼoʼn consej qe, in kubʼ tyekʼin qa kʼujlaʼn qo tuʼn ex qa taj tuʼn qanqʼin toj tbʼanel. Ax ikx tzaj tqʼoʼn Jehová Tkʼwal tuʼn tkyim tuʼn qpaj tuʼnju taj tuʼn qanqʼin te jumajx. Noq tuʼn chojbʼil lu, jaku qo ajbʼen te Jehová ik tzeʼn tajbʼil, maske at maj in qo el txalpaj (Rom. 7:​24, 25). Ax ikx ojtzqiʼn quʼn qa «ate Dios maʼ toklen twitz ju qanmi, ex ojtzqiʼn tkyaqil tuʼn» (1 Juan 3:​19, 20). Ojtzqiʼn tuʼn Jehová tiʼ at toj qanmi, tuʼntzunju qʼuqli tkʼuʼj tiʼj qa jaku txi qbʼinchaʼn aju tajbʼil.

20. ¿Tiʼ kʼonil qiʼj tuʼn miʼn ttzaj bʼaj qkʼuʼj tiʼjju mintiʼ ojtzqiʼn quʼn?

²⁰ Ik tzeʼn ma tzʼel qnikʼ tiʼj, in tzaj tqʼamaʼn Jehová qe aju taj tuʼn tel qnikʼ tiʼj. Tuʼntzunju, mintiʼ tuʼn ttzaj bʼaj qkʼuʼj kyiʼj tiʼchaq mintiʼ ojtzqiʼn quʼn, sino bʼaʼn tuʼn tok qqʼoʼn qwiʼ kyiʼj tiʼchaq mas nim kyoklen. Iktzun tten kbʼel qyekʼin qa in nok qeʼ qkʼuʼj tiʼj Jehová, aju at nim tnabʼil (Job 36:4). Maske mintiʼ in nel qnikʼ kyiʼj junjun tiʼchaq toj ambʼil jaʼlo, pero in qo tzalaj tuʼnju kukx kʼelel mas qnikʼ tiʼj Jehová toj ambʼil tzul (Ecl. 3:11).