Bʼaʼn tuʼn qyolin kyukʼil ansyan

1. ¿Tzeʼn o kubʼ tyekʼin Jehová qa kʼujlaʼn qe tmajen tuʼn?

IK TTEN Jehová ik tzeʼn jun pastor in nok tkʼujlaʼnxix qe trit. O che tzaj tlaqʼoʼn tuʼn tchkʼel Tkʼwal ex o txi tqʼoʼn kyoklen ansyan tuʼn kyxqʼuqin kyiʼj (Hech. 20:​28, TNM). Taj Jehová tuʼn tkubʼ kyyekʼin ansyan tbʼanel kymod kyukʼil trit. Tuʼntzunju, in xi kynimen ansyan Jesús aj t-xi kyqʼuqbʼaʼn kykʼuʼj trit moqa tmajen ex aj kyonin kyiʼj tuʼn kyten tzʼaqli twitz Jehová (Is. 32:​1, 2).

2. ¿Alqiʼj mas in ximen Jehová? (Ezequiel 34:​15, 16).

² In ximen Jehová tiʼj teyele junjun tmajen, pero mas kyiʼj qeju in tzaj nya bʼaʼn tiʼj kyamiwbʼil tukʼil. Tuʼntzunju in che ajbʼen ansyan tuʼn tuʼn kyonin kyiʼj (kjawil uʼjit Ezequiel 34:​15, 16). Pero, ¿tiʼ kbʼantel quʼn qa qaj onbʼil? Il tiʼj tuʼn qnaʼn Dios te Jehová ex tuʼn t-xi qqanin onbʼil kye «pastor ex xnaqʼtzal» toj congregación (Efes. 4:​11, 12).

3. ¿Tiquʼn kʼonil xnaqʼtzbʼil lu qiʼj qkyaqilx?

³ Toj xnaqʼtzbʼil lu qo xnaqʼtzal tiʼj alkye tten in che ajbʼen ansyan tuʼn Jehová tuʼn kyonin kyiʼj qeju chʼix tnaʼj kyamiwbʼil tukʼil. Kxel qqʼoʼn tzaqʼwebʼil kyiʼj xjel lu: ¿Toj alkye ambʼil kxel qqanin onbʼil kye ansyan?, ¿tiquʼn il tiʼj tuʼn tbʼant quʼn?, ex ¿tzeʼn jaku che onin qiʼj? Maske at jun tbʼanel qamiwbʼil tukʼil Jehová toj ambʼil jaʼlo, ax ikx kʼonil xnaqʼtzbʼil lu qiʼj tuʼn t-xi qqʼoʼn chjonte te Jehová tiʼj onbʼil in tzaj kyqʼoʼn ansyan qe ex alkye tten jaku txi qqanin onbʼil kye.

¿TOJ ALKYE AMBʼIL KXEL QQANIN ONBʼIL KYE ANSYAN?

4. ¿Tzeʼn in nel qnikʼ tiʼj qa atz yolin Santiago 5:14 a 16, 19 ex 20 tiʼj jun xjal chʼix tnaj tamiwbʼil tukʼil Jehová? (Ax ikx qʼonka twitza kyiʼj tilbʼilal).

⁴ Tzaj tchikʼbʼaʼn Santiago alkye tten in che ajbʼen ansyan tuʼn Jehová tuʼn kyonin qiʼj. Tqʼama jlu: «Qa at jun yabʼ kyxole, bʼaʼn tuʼn kytzaj txket qe anciano kyxol okslal» (kjawil uʼjit Santiago 5:​14-16, 19, 20). Toj texto lu atz yolin Santiago tiʼj jun xjal chʼix tnaj tamiwbʼil tukʼil Jehová. ¿Tzeʼn in nel qnikʼ tiʼj jlu? Tuʼnju mintiʼ tqʼama Santiago tuʼn ttzaj txkoʼn jun doctor, sino tuʼn kytzaj txkoʼn qe ansyan. Ax ikx tzaj tchikʼbʼaʼn qa in qʼanit aju xjal yabʼ aj tkubʼ najsaʼn til. Aju in bʼaj tiʼj jun xjal yabʼ, chʼixme axju in bʼaj tiʼj jun xjal chʼix tnaʼj tamiwbʼil tukʼil Jehová. Aj ttzaj yabʼil qiʼj il tiʼj tuʼn qxiʼ tukʼil jun doctor, tuʼn t-xi qqʼamaʼn te tiʼ yabʼil tok qiʼj ex tuʼn t-xi qbʼinchaʼn tkyaqilju tzul tqʼamaʼn qe. Ax ikx aj ttzaj jun nya bʼaʼn tiʼj qamiwbʼil tukʼil Jehová bʼaʼn tuʼn qyolin kyukʼil ansyan, tuʼn t-xi qqʼamaʼn kye tiʼ in bʼaj qiʼj ex tuʼn t-xi qbʼiʼn consej tzul kyqʼoʼn qe tukʼil Biblia.

5. ¿Tzeʼn jaku tzʼel qnikʼ tiʼj qa nya bʼaʼn taʼ qamiwbʼil tukʼil Jehová?

⁵ In tzaj tqʼamaʼn capítulo 5 te Santiago tuʼn t-xi qqanin onbʼil kye ansyan naʼmxtoq tnaj qamiwbʼil tukʼil Jehová. Ax ikx in tzaj tqʼamaʼn Biblia tuʼn tok qxqʼuqin qibʼ, tuʼnju jaku kubʼ qximen qa bʼaʼn taʼ qamiwbʼil tukʼil Jehová (Sant. 1:22). Atzun jlu bʼaj kyiʼj junjun okslal te Sardis, kubʼ kyximen qa bʼaʼntoq taʼ kyamiwbʼil tukʼil Jehová, pero xi tqʼamaʼn Jesús kye qa nyatoq bʼaʼn taʼ (Apoc. 3:​1, 2). ¿Tzeʼn jaku tzʼel qnikʼ tiʼj qa bʼaʼn taʼ qamiwbʼil tukʼil Jehová? Aj qximen tiʼj qa kukx in nok qkʼujlaʼn Jehová ik tzeʼn tej qbautisarin (Apoc. 2:​4, 5). Bʼaʼn tuʼn qximen kyiʼj xjel lu: «¿Kukxpe in chin tzalaje aj tjaw wuʼjine ex aj nximane tiʼj Biblia? ¿Kukxpe in chinxe kyoj kykyaqil reunión ex in bʼaj nbʼinchaʼne ntene kyiʼj? ¿Kukxpe in nok nqʼoʼne toklen predikasion? Moqa ¿mas in xi nnajsaʼne ambʼil tuʼn tten mas tiʼchaq weye ex kyiʼj saqchbʼil?». Aj qximen kyiʼj xjel lu, kʼelel qnikʼ tiʼj qa il tiʼj tuʼn tbʼant junjun chʼixpubʼil quʼn tuʼntzun miʼn tnaj qamiwbʼil tukʼil Jehová. Qa kwest tuʼn tbʼant chʼixpubʼil quʼn moqa o kubʼ qbʼinchaʼn jun tiʼ nya bʼaʼn in nela toj witz Jehová, bʼaʼn tuʼn t-xi qqanin onbʼil kye ansyan.

6. ¿Tiʼ il tiʼj tuʼn tbʼant tuʼn jun erman qa o kubʼ tbʼinchaʼn jun matij il?

⁶ Qa at jun erman ma kubʼ tbʼinchaʼn jun matij il aju jaku tzʼex qʼiʼn toj congregación tuʼn, il tiʼj tuʼn tyolin kyukʼil ansyan tuʼntzun tten juntl maj tamiwbʼil tukʼil Jehová (1 Cor. 5:​11-13). Pero oʼkx jaku kubʼ tnajsaʼn Jehová qil qa ma kubʼ qyekʼin tukʼil qbʼinchbʼen qa axix tok otoq tzʼajtz tiʼj qanmi (Hech. 26:20). Kbʼel qyekʼin jlu qa ma txi qqʼamaʼn kye ansyan qa otoq kubʼ qbʼinchaʼn jun matij il.

7. ¿Alkye junjuntl ax ikx kyaj tuʼn kyonin ansyan kyiʼj?

⁷ Nya oʼkx in che onin ansyan kyiʼj qeju o kubʼ kybʼinchaʼn jun matij il, sino ax ikx kyiʼj qeju chʼix tnaj kyamiwbʼil tukʼil Jehová (Hech. 20:35). Jun techel, tej naʼmxtoq tok tojtzqiʼna axix tok bʼalo in bʼajtoq droga tuʼna, in noktoq tqʼoʼna twitza tiʼj pornografía moqa in yaẍina. Bʼalo tuʼn jlu mas kwest tuʼn tkubʼ tiʼj jun tentación tuʼna. Pero bʼaʼn tuʼn ttzaj tnaʼna qa nya tjunalxa ata, tuʼnju jaku yolina tukʼil jun ansyan ex jaku txi tqʼamaʼna te tiʼ in bʼaj tiʼja. Kʼokel bʼiʼna tuʼn ex tzul tqʼamaʼn teya tiʼ chʼixpubʼil jaku bʼant tuʼna ex tzul tnaʼn teya qa kukx ktzalajel Jehová tiʼja qa ma nimana te (Ecl. 4:12). Qa in tzaj tbʼisa tuʼnju kukx in che ten nya bʼaʼn tajbʼila, kxel kyqʼamaʼn ansyan teya qa in tzalaj Jehová tiʼja tuʼnju in xi tqanina onbʼil. In tzaj tyekʼin jlu qa mintiʼ in nok qeʼ tkʼuʼja tiʼjxa ex qa taja tuʼn ttzalaj Jehová tuʼna (1 Cor. 10:12).

8. ¿Ilpe tiʼj tuʼn t-xi qqʼamaʼn kye ansyan tkyaqil maj aj qel txalpaj?

⁸ Nya il tiʼj tuʼn t-xi qqʼamaʼn kye ansyan tkyaqil maj aj qel txalpaj. Jun techel, qa ma tzaj nim qqʼoj ex in xi qqʼamaʼn jun yol te jun erman aju in tzaj tbʼis tuʼn. ¿Tiʼ jaku bʼant quʼn? Naʼmxtoq qyolin tukʼil jun ansyan, tnejel bʼaʼn tuʼn t-xi qbʼinchaʼn tiʼj nya bʼaʼn ik tzeʼn tqʼama Jesús (Mat. 5:​23, 24). Ax ikx bʼaʼn tuʼn t-xi qjyoʼn tqanil kyoj uʼj o che etz tuʼn ttnam Jehová tiʼj tzeʼn tuʼn qyolin toj tumel, tuʼn tten qpasens ex tuʼn tok qxqʼuqin qibʼ tiʼjju in xi qqʼamaʼn. Qatzun mintiʼ ma bʼant tiʼj nya bʼaʼn, jaku txi qqanin onbʼil kye ansyan. Tej mintiʼ kyaj bʼant tiʼj jun nya bʼaʼn tzaj kyxol Evodia ex Síntique, xi tqʼamaʼn Pablo te jun erman toj congregación tuʼn tonin kyiʼj. Ax jlu jaku bʼant tuʼn jun ansyan toj ambʼil jaʼlo aj ttzaj jun nya bʼaʼn kyxol erman (Filip. 4:​2, 3).

¿TIQUʼN KXEL QQANIN ONBʼIL KYE ANSYAN?

9. Maske in tzaj qchʼixwi, ¿tiquʼn il tiʼj tuʼn qyolin kyukʼil ansyan? (Proverbios 28:13).

⁹ Il tiʼj tuʼn tten qvalor tuʼn t-xi qqanin onbʼil kye ansyan qa o kubʼ qbʼinchaʼn jun matij il moqa kwest tuʼn tkubʼ tiʼj jun nya bʼaʼn quʼn. Mintiʼ tuʼn ttzaj qchʼixwi tuʼn t-xi qqanin onbʼil kye ansyan. ¿Tiquʼn? Tuʼnju aj qyolin kyukʼil ansyan in kubʼ qyekʼin qa qʼuqli qkʼuʼj tiʼj Jehová ex qa qajbʼil tuʼn qnimen te. Ax ikx in che ajbʼen ansyan tuʼn Jehová tuʼn tten jun tbʼanel qamiwbʼil tukʼil. Tuʼntzunju, bʼaʼn tuʼn t-xi qqanin onbʼil te Jehová qa chʼix qkubʼ tzʼaq toj jun il (Sal. 94:18). Ex qa o kubʼ qbʼinchaʼn jun matij il, il tiʼj tuʼn t-xi qqʼamaʼn kye ansyan ex tuʼn tkyaj qkolin il, tuʼntzun ttzaj qʼaqʼin tkʼuʼj Jehová qiʼj ex tuʼn tkubʼ tnajsaʼn qil (kjawil uʼjit Proverbios 28:13).

10. ¿Tiʼ jaku tzaj qiʼj qa ma kubʼ qewin qil?

¹⁰ Ik tzeʼn ma tzʼel qnikʼ tiʼj, kʼonil qiʼj qa ma txi qqanin onbʼil kye ansyan. Pero qa ma kubʼ qewin qil jaku tzaj mas nya bʼaʼn qiʼj. Qo ximen tiʼjju bʼaj tiʼj rey David: Tuʼnju kubʼ tewin til, tzaj nya bʼaʼn tiʼj tamiwbʼil tukʼil Jehová, tzaj tbʼis ex tzaj yabʼil tiʼj (Sal. 32:​3-5). Ik tzeʼn jun yabʼil, qa mintiʼ ma tzʼok tilil quʼn tuʼn tqʼanit mas jaku txi toj il. Chʼixme ax jlu jaku bʼaj qa ma kubʼ qewin qil ex qa mintiʼ ma txi qqanin onbʼil, jaku tzaj mas nya bʼaʼn tiʼj qamiwbʼil tukʼil Jehová. Tuʼntzunju in tzaj tqʼamaʼn Jehová qe tuʼn t-xi qqanin onbʼil kye ansyan tuʼn tten juntl maj qamiwbʼil tukʼil (Is. 1:​5, 6, 18).

11. ¿Tiʼ mas jaku tzaj qa ma kubʼ qewin qil?

¹¹ Ax ikx jaku tzaj nya bʼaʼn kyiʼj junjuntl qa ma kubʼ qewin qil. Ya mlay tzʼaqʼunan xewbʼaj xjan toj tumel toj congregación ex jaku naj mujbʼabʼil (Efes. 4:30). Tuʼntzunju qa ma tzʼok qbʼiʼn qa at jun erman toj congregación in kubʼ tbʼinchaʼn jun nya bʼaʼn, bʼaʼn tuʼn t-xi qqʼamaʼn te tuʼn tyolin kyukʼil ansyan. Pero qa ma tzikʼ ambʼil ex mintiʼ in yolin erman kyukʼil ansyan, jaku txi qqʼamaʼn kye. Tuʼnju qa ma mintiʼ ma txi qqʼamaʼn ax ikx qe at qpaj tiʼj til erman (Lev. 5:1). Qa kʼujlaʼn Jehová quʼn, kʼonil qiʼj tuʼn t-xi qqʼamaʼn axix tok. Iktzun tten qo onil tuʼn tten congregación saq ex tuʼn tten juntl maj tamiwbʼil erman tukʼil Jehová.

¿TZEʼN JAKU CHE ONIN ANSYAN QIʼJ?

12. ¿Tzeʼn in che onin ansyan kyiʼj qeju chʼix tnaj kyamiwbʼil tukʼil Jehová?

¹² In tzaj tqʼamaʼn Biblia kye ansyan tuʼn kyonin kyiʼj qeju chʼix tnaj kyamiwbʼil tukʼil Jehová (1 Tes. 5:14). Qa o tzaj nya bʼaʼn tiʼj tamiwbʼila tukʼil Jehová, bʼalo jaku tzaj kyqanin ansyan junjun xjel teya tuʼn tel kynikʼ tiʼj tiʼ in kubʼ t-ximana ex tiʼ in kubʼ tnaʼna (Prov. 20:5). Bʼalo nya fácil tuʼn tyolina kyukʼil ansyan tuʼnju in tzaj tchʼixwiya tuʼn t-xi tqʼamaʼna aju o bʼaj tiʼja. Pero jaku tzʼonina kyiʼj qa ma txi tqʼamaʼna tkyaqilju nya bʼaʼn in nok weʼya twitz ex miʼn tzaj bʼaj tkʼuʼja qa ma txi tqʼamaʼna jun yol nya toj tumel (Job 6:3). Nya jurat naj tzul kyqʼoʼn ansyan jun consej teya sino tnejel kʼokel bʼina kyuʼn tuʼntzun tel kynikʼ tiʼj tkyaqilju in bʼaj tiʼja (Prov. 18:13). Ojtzqiʼn kyuʼn ansyan qa in xi tiʼn ambʼil tuʼn kyonin tiʼj jun erman aj ttzaj jun nya bʼaʼn tiʼj, tuʼntzunju, at maj il tiʼj tuʼn kyyolin nim maj tuʼn t-xi bʼinchet tiʼj nya bʼaʼn.

13. Aj kynaʼn ansyan Dios ex aj ttzaj kyqʼoʼn consej qe tukʼil Biblia, ¿tzeʼn jaku tzʼonin qiʼj? (Ax ikx qʼonka twitza kyiʼj tilbʼilal).

¹³ Kʼokel tilil kyuʼn ansyan tuʼn miʼn t-xi kybʼinchaʼn jun tiʼ jaku kubʼ tnaʼna mas nya bʼaʼn tuʼn, sino che naʼl Dios tiʼja. Kxel qʼuqbʼaʼn tkʼuʼja tuʼn naʼj Dios tuʼnju at «nim tipumal». Ax ikx che onil ansyan tuʼn tok kyqʼoʼn aseyt tiʼja «tuʼnju at kyoklen tuʼn Qajaw» (Sant. 5:​14-16). Aj tyolin Biblia tiʼj «aseyt» atz in yolin tiʼj Tyol Dios. Tuʼntzunju kʼajbʼel Biblia kyuʼn ansyan tuʼn t-xi kyqʼuqbʼaʼn tkʼuʼja ex tuʼn tten juntl maj tbʼanel tamiwbʼila tukʼil Jehová (Is. 57:18). Kʼonil consej kxel kyqʼoʼn teya tuʼn kukx t-xi tbʼinchaʼna aju bʼaʼn. Aj kyyolin tukʼila kʼokel tbʼiʼna tqʼajqʼajel twi Jehová in tzaj tqʼamaʼn jlu teya: «Lu ju bʼe lu, kyxiʼye tuj» (Is. 30:21).

14. Ik tzeʼn in tzaj tqʼamaʼn Gálatas 6:​1, ¿tzeʼn in che onin ansyan kyiʼj qeju chʼix kykubʼ tzʼaq toj jun il? (Ax ikx qʼonka twitza kyiʼj tilbʼilal).

¹⁴ (Kjawil uʼjit Gálatas 6:1). Aju txol yol «qa at jun kyxole ma kubʼ tzʼaq tuj jun til» atz in yolin tiʼj jun xjal in nikʼ kyibʼaj tley Jehová ex mintiʼ in ten tnabʼil. In nonin kʼujlabʼil kyiʼj ansyan tuʼn tjaw kywabʼan xjal juntl maj «tuj chebʼa». Aju yol «wabʼan» atz tzajni tiʼj jun yol griego ex a t-xilen «tuʼn tbʼaj bʼinchet juntl maj». Ik tzeʼn tuʼn tbʼaj bʼinchet jun bʼaq otoq tzʼetz toj tlugar. In nok tilil tuʼn jun doctor tuʼn miʼn tkubʼ tnaʼn xjal kʼixkʼoj tuʼntzunju chebʼe in nokx tqʼoʼn bʼaq toj tlugar juntl maj. Chʼixme ax jlu in bʼant kyuʼn ansyan aj kyonin tiʼj jun erman, chebʼe in xi kyqʼoʼn consej te tuʼn miʼn tkubʼ tnaʼn mas nya bʼaʼn. Ax ikx in tzaj tqʼamaʼn Biblia jlu kye ansyan: «Ten kykwente kyiʼje», tuʼnju aj ilqe ex jaku che kubʼ tzʼaq toj jun nya bʼaʼn. Tuʼntzunju kʼokel kyxqʼuqin kyibʼ tuʼn miʼn tkubʼ kyximen qa mas tzʼaqliqe twitz erman in che onin tiʼj, kbʼel kyin kyibʼ ex kbʼel kyyekʼin qʼaqʼbʼil kykʼuʼj (1 Ped. 3:8).

15. ¿Tiʼ jaku bʼant quʼn aj qok weʼ twitz jun problem?

¹⁵ Jaku tzʼok qeʼ qkʼuʼj kyiʼj ansyan. Ojtzqiʼn kyuʼn qa mintiʼ tuʼn t-xi kyqʼamaʼn aju in bʼaj qiʼj kye junjuntl. Ax ikx o tzʼel kynikʼ tiʼj alkye tten tuʼn tajbʼen Biblia kyuʼn aj ttzaj kyqʼoʼn jun consej qe ex tuʼn kukx kyonin qiʼj tuʼn qex twitz nya bʼaʼn (Prov. 11:13; Gál. 6:2). Ax tok, junxitl kymod ansyan ex ateʼ junjun at mas kyojtzqibʼil kywitz txqantl. Pero jaku qo yolin tukʼil alkyexku aj qok weʼ twitz jun problem. Noqtzun tuʼnj, nya toj tumel tuʼn t-xi qqanin consej te teyele junjun ansyan noq tuʼn ttzaj qʼamaʼn qe qa bʼaʼn aju otoq kubʼ qximen. Nya qajbʼil tuʼn qok ik tzeʼn qeju oʼkx «kygan tuʼn kybʼinte junxitl yol» twitzju tuʼn t-xi kybʼiʼn «xnaqʼtzbʼil» tkuʼx toj Tyol Dios (2 Tim. 4:3). Aj qyolin tukʼil jun ansyan tiʼj nya bʼaʼn in tzaj qiʼj, jakulo tzaj tqanin qe qa ya o qo yolin kyukʼil junjuntl ansyan ex tiʼ consej tzaj kyqʼoʼn qe. Noqtzun tuʼnj, jakulo kubʼ t-ximen ansyan lu tuʼn t-xi tqanin onbʼil te juntl ansyan (Prov. 13:10).

¿TIʼ IL TIʼJ TUʼN TBʼANT TUʼN TEYELE JUNJUN QE?

16. ¿Tiʼ il tiʼj tuʼn tbʼant tuʼn teyele junjun qe?

¹⁶ In che xqʼuqin ansyan qiʼj ex in tzaj kyqʼoʼn consej qe, pero mintiʼ in tzaj kyqʼamaʼn tiʼ tuʼn tbʼant quʼn. Teyele junjun qe kbʼel tyekʼin tukʼil tyol ex tukʼil tbʼinchbʼen qa kʼujlaʼn Jehová tuʼn ex qa taj tuʼn tnimen te (Rom. 14:12). Kʼonil Jehová qiʼj tuʼn tjaw qjyoʼn aju mas bʼaʼn ex tuʼn qten tzʼaqli twitz. Tuʼntzunju, in che onin ansyan qiʼj tukʼil Biblia tuʼn tel qnikʼ tiʼj tiʼ t-ximbʼetz Jehová at ex teyele junjun qe kbʼel ximente tiʼ kbʼantel tuʼn. In nonin jlu qiʼj tuʼn tel qnikʼ «tiʼj alkyeju bʼaʼn ex alkyeju mya bʼaʼn» (Heb. 5:14).

17. ¿Tiʼ taj Jehová tuʼn tbʼant quʼn?

¹⁷ Nimxix in xi qqʼoʼn chjonte te Jehová tuʼnju in qo ok t-xqʼuqin tukʼil kʼujlabʼil ik tzeʼn in bʼant tuʼn jun pastor kyukʼil trit. Tzaj tsamaʼn Jehová Jesús, aju «bʼaʼn pastor», tuʼn qklet tuʼn ex tuʼn qanqʼin te jumajx (Juan 10:11). Ax ikx in che ajbʼen ansyan tuʼn tuʼn t-xqʼuqin kyiʼj erman toj congregación ik tzeʼn o tzaj ttziyen: «Che okel nqʼoʼne qe kawil [moqa ansyan] kyxole, aqeju in chin tzalaje kyiʼj, ex atzun qe che kawil kyibʼaje tukʼil nabʼl ex tukʼil ojtzqibʼl» (Jer. 3:15). Qa chʼix tnaʼj qʼuqbʼil qkʼuʼj ex qamiwbʼil tukʼil Jehová, mintiʼ tuʼn qtzaj xobʼ tuʼn t-xi qqanin onbʼil kye ansyan. Tuʼntzunju, tbʼanel tuʼn tajbʼen onbʼil lu quʼn aju in nok ik tzeʼn jun oyaj in tzaj tqʼoʼn Jehová qe.