XNAQʼTZBʼIL 6
¿Tiʼ in chʼexpaj aj tul itzʼji jun tal neʼ, moqa tal neʼẍ?
«Qe qkʼwaʼl jun qetzbʼil in tzaj tqʼoʼn Qman.» (Salmo 127:3)
Jaku che jaw tzalaj qeju tzma in che ok te tatbʼaj aj tul itzʼj jun tal neʼ, noqtzun tuʼnj, ax ikx jaku che kubʼ bʼaj tuʼn siktleʼn. Jakule che jaw labʼin tiʼj jniʼ ambʼil ex tiʼj jniʼ ipumalj in xi tiʼn tuʼn tok kykwentin jun tal neʼ. Ax ikx jaku tzaj nya bʼaʼn kyxol tatbʼaj qa mintiʼ ẍe ajlan ex qa mintiʼ sok kyxqʼuqin aju in kynaʼn. Kyjuʼtzun, kykabʼil il tiʼj tuʼn tbʼaj kychʼexpuʼn junjun tiʼ tuʼntzun tok kyxqʼuqin tal neʼ ex aju kymejebʼleʼn. ¿Tzeʼn jaku che onin qe kawbʼil ateʼkux toj Tyol Dios tuʼn kyex twitz jlu?
1 TZʼELX KYNIKʼE TIʼJ CHʼIXPUBʼIL TOJ KYANQʼIBʼILE
¿TIʼ IN TZAJ TQʼAMAʼN TYOL DIOS? «Aju xjal at tkʼujlalil at tpasens ex in tzʼeʼy tkʼuʼj tiʼj tukʼil; [...] mya noq oʼkx tiʼjx tok tkʼuʼj; mya txʼuʼj twiʼ, ex mintiʼ in xi tkʼuʼn qʼoj» (1 Corintios 13:4, 5). Aj tul tnejel tal jun xuʼj, chʼixmi tkyaqil maj oʼkx in xi tqʼoʼn twiʼ tiʼj tal. Noqtzun tuʼnj, jaku tnaʼ tchmila qa ma kyaj ttzaqpiʼna, tuʼntzunju, miʼn tzikʼ tnaʼl tuʼna qa ax ikx te taj tuʼn t-xi tqʼoʼna twiʼya tiʼj. Tukʼil pasens ex kʼujlabʼil, jaku txi tyekʼina qa at tajbʼen teya ex qa nim toklen toj twitza aju in bʼant tuʼn, tuʼn tonin tiʼja tuʼn tok xqʼuqit tal neʼ.
«Aqeye chmilbʼaj, atwit kynabʼle tuʼn kynajane kyukʼil kyxuʼjile.» (1 Pedro 3:7.) Qa tzma in noka te tatbʼaj, bʼaʼn tuʼn tel tnikʼa tiʼj jaʼlo qa chʼixmi tkyaqil maj kxel tqʼoʼn t-xuʼjila ambʼil tiʼj tal neʼ, ex at maj ksiktel moqa kybʼisul tiʼjju in bʼant tuʼn jaʼlo. Atlo junjun maj jaku jaw qʼojli tukʼila, noqtzun tuʼnj, miʼn jaw qʼojliya tuʼnju in tqʼamaʼn Tyol Dios: «Mas bʼaʼn qa mya jurat in qo jaw qʼojl twitzju tuʼn qok kyuw qkʼuʼj» (Proverbios 16:32). Tzʼelx tnikʼa tiʼj alkye mas bʼaʼn tuʼn tbʼant ex qʼonxa aju tajbʼil tukʼila (Proverbios 14:29).
¿TIʼ JAKU BʼANT TUʼNA?
Qa aya mambʼaj: Tzʼonina tiʼj tukʼila tuʼn tok t-xqʼuqina tal neʼ, axpe ikx te qonikʼen. Miʼn tzʼok tqʼoʼna nim ambʼil tiʼj junjuntl qe tiʼchaq tuʼntzun t-xi tqʼoʼna mas ambʼil te t-xuʼjila ex te tkʼwaʼla
Qa aya txubʼaj: Kʼamonxa onbʼil in tzaj tqʼoʼn tchmila teya tuʼn tok tkwentin tal neʼ. Qa mintiʼxix in bʼant tuʼn, miʼn tzʼok tena yolil nya bʼaʼn tiʼj, chebʼe yekʼunxa te, tzeʼn kyxel bʼinchet
2 KYJYOME TUMEL TUʼN TCHʼIY KʼUJLABʼIL KYXOLE
¿TIʼ IN TZAJ TQʼAMAʼN TYOL DIOS? «Kykabʼil che okel te junx» (Génesis 2:24). Ya oxe kybʼete jaʼlo, noqtzun tuʼnj, miʼn tzikʼ tnaʼl tuʼna qa aya ex aju tukʼila kukx «junx» qeye. Tzʼokx tilil kyuʼne tuʼn miʼn tchewix kykʼujlabʼile.
Aya xuʼjilbʼaj, qʼonxa chjonte tiʼjju onbʼil in tzaj tqʼoʼn tchmila. Aqeju yol te qʼobʼil chjonte jaku che ok te jun «qʼanbʼil» (Proverbios 12:18). Aya chmilbʼaj, qʼamanxa te t-xuʼjila qa nimxix tkʼujlalila tiʼj ex qa nim toklen toj twitza, ex qa nimxix in tzalaja tiʼjju in bʼant tuʼn, tuʼn tonin kyiʼj qe toj kyjaye (Proverbios 31:10, 28).
«Mya noq oʼkx tuʼn kyximane tiʼjju bʼaʼn te kyeye, ax ikx tuʼn kyximane tiʼj alkyeju bʼaʼn kye mastl.» (1 Corintios 10:24.) Kukx bʼinchama aju mas bʼaʼn te tukʼila. Kypaʼmile ambʼil tuʼn kyyoline ex tuʼn tkubʼ kybʼiʼn kyibʼe. Ex tiʼjju at toklen tuʼn kykubʼ kuẍeye miʼn kubʼ kyxkʼayin kyibʼe, ximana tiʼjju tajbʼil tukʼila. In tzaj tqʼamaʼn Tyol Dios jlu: «Miʼn kubʼ kyxkʼayin kyibʼe jun te juntl. Jaku bʼant ikju, pero otoq bʼant tiʼj kyuʼne» (1 Corintios 7:3-5). Tuʼntzun jlu, che yoline tiʼj jlu toj tumel. Qa ma ten tpasensa ex qa ma tzʼel tnikʼa tiʼj, a jlu kʼonil tuʼn tchʼiy kʼujlabʼil kyxole.
¿TIʼ JAKU BʼANT TUʼNA?
Miʼn tzikʼ tnaʼl tuʼna tuʼn tel tpaʼna ambʼil tuʼn ttena tukʼil tukʼila
Kyyekʼunxe qa at kykʼujlabʼile kyxole tukʼe junjun tal tiʼchaq, ik tzeʼn tuʼn t-xi tqʼoʼna jun uʼj moqa jun oyaj
3 KYXNAQʼTZANXE TAL NEʼ
¿TIʼ IN TZAJ TQʼAMAʼN TYOL DIOS? «Atxix tuj tneʼyila el tnikʼa tiʼj ju Xjan Tuʼjil, tuʼntzun jlu ma tzaj qʼoʼn tnabʼla tzaʼn tten tuʼn tkleta» (2 Timoteo 3:15). Bʼaʼn tuʼn tbʼaj kyximane tzeʼn tten kxel kyxnaqʼtzaʼne tal neʼ. Bʼaʼn tuʼn ttzaj tnaʼna qa nim jaku tzʼok toj twiʼ axpe ikx naʼmxtoq tul itzʼji. Jun techel, naʼmxtoq tul itzʼji in nel tnikʼ tiʼj tqʼajqʼajel twiʼya ex in tnaʼn aju in tnaʼna. Xnaqʼtzanxa tuʼn tuʼjin aj tul itzʼji, maske mintiʼ in nel tnikʼ kyiʼj yol, jaku tzʼonin tiʼj tuʼn ttzaj tgan tuʼn tuʼjin aj tchʼiy.
Miʼn kubʼ t-ximana qa tuʼnju tzma tal neʼ mlay yolina tukʼil tiʼj Dios. Naʼna Dios te Jehová twitz (Deuteronomio 11:19). Aj kysaqchane junx, yolina tiʼj junjun tiʼchaq o bʼant tuʼn Dios (Salmo 78:3, 4). Aj tchʼiy tkʼwaʼla moqa tala, kʼelel tnikʼ tiʼj qa nimxix kʼujlaʼn Jehová tuʼna, ax ikx te kʼelel tnikʼ tiʼj qa il tiʼj tuʼn tok tkʼujlaʼn Dios.
¿TIʼ JAKU BʼANT TUʼNA?
Qaninxa tnabʼla te Jehová tuʼntzun t-xi t-xnaqʼtzaʼna tkʼwaʼla moqa tala
Kukx naʼnxa qe ximbʼetz ex qe yol nim kyoklen te tal neʼ tuʼn tel naj tnikʼ kyiʼj ex tuʼn kykyaj toj twiʼ