Qe tqanil
1. In nel nikʼbʼaj tiʼj Nintz tnam Babilonia
¿Tiquʼn in xi qqʼamaʼn qa in nok «Nintz tnam Babilonia» te kyechel kykyaqil okslabʼil nya ax tok? (Apocalipsis 17:5). Qo xnaqʼtzan tiʼj oxe yekʼbʼil.
At tipumal twitz tkyaqil Txʼotxʼ. In tzaj qʼamaʼn qa qʼuqli tibʼaj «nim kyajlal» xjal, qe «nasyon» ex «in kawin kyibʼaj qe rey ateʼ twitz txʼotxʼ» (Apocalipsis 17:15, 18).
Mintiʼ in yolin kyiʼj nimaq aj kawil nix kyiʼj nimaq kʼaẍjel. In tzaj tqʼamaʼn Tyol Dios qa aj tkubʼ xiten «Nintz tnam Babilonia» kukx che tel «rey twitz txʼotxʼ» ex qe «kʼayil» (Apocalipsis 18:9, 15).
In bʼaj ttzʼilsaʼn tbʼi Dios. In tzaj qʼamaʼn qa ik tten ik tzeʼn jun xuʼj «jawni twitz kyukʼil xinaq», tuʼnju in nonin kyiʼj aj kawil tuʼntzun ttzaj qʼoʼn pwaq te ex junjuntl onbʼil (Apocalipsis 17:1, 2). In sbʼun kyiʼj xjal twitz tkyaqil Txʼotxʼ ex in nonin tuʼn kykubʼ bʼyoʼn nim xjal (Apocalipsis 18:23, 24).
Meltzʼaja toj xnaqʼtzbʼil 13, punto 6
2. ¿Toj alkye ambʼil tuʼn tul Mesías?
Kyaj tqʼamaʼn Tyol Dios qa kʼikʼeltoq 69 seman tuʼn tul Mesías (uʼjinktza Daniel 9:25).
¿Toj alkye ambʼil tzaj tzyet 69 seman? Tzaj tzyet toj abʼqʼi 455 tjaqʼ ambʼil qʼiʼn quʼn jaʼlo. Toj abʼqʼi aju, pon gobernador Nehemías toj tnam Jerusalén «tuʼn tjaw bʼinchet juntl maj tnam» (Daniel 9:25; Nehemías 2:1, 5-8).
¿Jteʼtoq ambʼil tuʼn tten 69 seman? Kyoj junjun profecía toj Biblia, in nok jun qʼij te techel jun abʼqʼi (Números 14:34; Ezequiel 4:6). Tuʼntzunju, jun seman, in nok te techel 7 abʼqʼi. Toj profecía lu, aqeju 69 seman in che ok te 483 abʼqʼi (in jaw multiplicarin 69 seman por 7 qʼij).
¿Toj alkye ambʼil e kubʼaj qeju 69 seman? Qa ma txi qajlaʼn 483 abʼqʼi tiʼj abʼqʼi 455 tjaqʼxi ambʼil qʼiʼn quʼn jaʼlo, in qo pon toj abʼqʼi 29 tiʼj ambʼil qʼiʼn quʼn jaʼlo.a Toj abʼqʼi aju, bautisarin Jesús ex ok te Mesías (Lucas 3:1, 2, 21, 22).
Meltzʼaja toj xnaqʼtzbʼil 15, punto 5
3. Junjun operación moqa qʼanbʼil jatumel in najbʼen chikʼ kyuʼn doctor
At maj, in najbʼen ax tchkʼel jun xjal kyuʼn doctor tuʼntzun tqʼanit, pero mlay tzʼok tkʼamoʼn jun okslal tkyaqil jlu tiʼj. Jun techel, mintiʼ in xi qqʼoʼn qchkʼel ex mintiʼ in xi qqʼoʼn ambʼil tuʼn t-xi kʼuʼt tuʼntzun tajbʼen toj jun operación (Deuteronomio 15:23).
Noqtzun tuʼnj, at junjun tumel in najbʼen chikʼ kyuʼn doctor ex jaku kubʼ t-ximen jun okslal qa kʼajbʼel tuʼn moqa miʼn. Jun techel, ik tzeʼn aj tetz jun examen tiʼj chikʼ, jun hemodiálisis, hemodilución moqa aj tajbʼen máquina tuʼn miʼn tnaj chikʼ, moqa aju circulación extracorpórea (bomba de derivación cardiopulmonar). Teyele junjun okslal kbʼel t-ximen tzeʼn kʼajbʼel tchkʼel aj tok jun operación tiʼj, aj tetz jun examen tiʼj moqa aj tjyon tiʼj jun qʼanbʼil. Junxitl tzʼaqʼunan teyele junjun doctor aj tbʼant jlu kyuʼn. Tuʼntzunju, nim toklen tuʼn tjyon jun okslal tqanil tiʼj tzeʼn kʼajbʼel tchkʼel kyuʼn doctor qa ma tzʼok toj jun operación, qa ma tzʼetz jun examen tiʼj moqa kʼokel jun qʼanbʼil tiʼj. Bʼaʼn tuʼn t-ximana kyiʼj xjel lu:
Qa ma tzʼex kyiʼn doctor nchkʼele tuʼn tbʼet tiʼjxi nxmilale ex qa ma kyaj weʼ tuʼn tbʼet toj jun ambʼil, ¿tzulpe tqʼamaʼn nnabʼile qa nchkʼele jlu ex qa nya il tiʼj ‹tuʼn tkubʼ qet twitz txʼotxʼ›? (Deuteronomio 12:23, 24).
Qa ma tzʼel qʼiʼn chʼin nchkʼele, qa ma kubʼ chʼexpuʼn chʼin ex qa ma tzʼaj meltzʼaj juntl maj toj nxmilale, ¿tzulpe tqʼamaʼn nnabʼile qa nya jun il jlu?
Meltzʼaja toj xnaqʼtzbʼil 39, punto 3
4. Aj tel kysepararin kyibʼ mejebʼleʼn
In tzaj tqʼamaʼn Tyol Dios qa mintiʼ tuʼn tel kypan kyibʼ kabʼe xjal ex qatzun ma bʼant jlu kyuʼn, mintiʼ in tzaj tqʼoʼn ambʼil kye tuʼn kykubʼ mojeʼ tukʼil juntl xjal (1 Corintios 7:10, 11). Noqtzun tuʼnj, ateʼ junjun okslal in kubʼ kyximen tuʼn tel kypan kyibʼ tuʼnju in che ok weʼ twitz junjun nya bʼaʼn ik tzeʼn jlu:
Qa nya taj tukʼil tuʼn t-xi tqʼoʼn gast toj tja: Nya taj chmilbʼaj tuʼn t-xi tqʼoʼn aju at tajbʼen kye toj tja, axpe ikx, mintiʼ in xi tqʼoʼn aju at tajbʼen kye junjun qʼij (1 Timoteo 5:8).
Qa ma tzʼok ten tukʼil bʼiyel tiʼj: Qa ma bʼant jlu tuʼn jun xjal, jaku tzaj tiʼn nya bʼaʼn tiʼj t-xmilal tukʼil, axpe ikx jaku kyim tuʼn (Gálatas 5:19-21).
Qa jaku tzaj tiʼn tukʼil nya bʼaʼn tiʼj tamiwbʼil tukʼil Jehová: Qa at jun chmilbʼaj moqa xuʼjilbʼaj in nel tiʼn ambʼil te tukʼil tuʼn miʼn tajbʼen te Jehová ex tuʼn miʼn kyjapun tkawbʼil tuʼn (Hechos 5:29).
5. Qe fiesta ex junjuntl ikʼsabʼil
Mintiʼ in che ten axix tok okslal kyoj fiesta nya bʼaʼn in che ela toj twitz Jehová. Pero teyele junjun okslal kʼokel lepeʼ tiʼjju in tzaj tqʼamaʼn tnabʼil xnaqʼtzaʼn maj tuʼn Tyol Dios tuʼn tkubʼ t-ximen tiʼ kbʼantel tuʼn. Ximana kyiʼj techel lu:
Aj ttzaj kyqʼamaʼn xjal felices fiesta teya. Bʼalo oʼkx jaku txi tqʼamaʼna «chjonte». Qatzun taj jun xjal tuʼn tel mas tnikʼ tiʼj, jaku txi tchikʼbʼaʼna te tiquʼn mintiʼ in kubʼ tikʼsaʼna fiesta.
Qa nya testigo de Jehová tchmila moqa t-xuʼjila ex in tzaj tqʼamaʼn teya tuʼn t-xiʼya waʼl kyukʼil toj tja toj jun fiesta. Qa in kubʼ t-ximana qa jaku txiʼya, jaku txi tqʼamaʼna te tukʼila qa mlay kubʼ tbʼinchaʼna aju in bʼant kyuʼn xjal.
Qa ma tzaj tqʼoʼn patrón chʼintl tpwaqa moqa jun bono teya aj tok jun fiesta. ¿Bʼaʼnpe tuʼn ttzaj tkʼamoʼna? Aya kbʼel ximente. ¿In kubʼpe t-ximen patrón qa at toklen bono tukʼil fiesta? ¿Moqa oʼkx taj tuʼn ttzaj tqʼoʼn chjonte tiʼj tbʼanel taqʼuna?
Aj ttzaj qʼoʼn jun regalo teya toj jun fiesta. Bʼalo jaku tzaj tqʼamaʼn xjal jlu teya: «Ojtzqiʼn wuʼne qa mintiʼ in kubʼ tikʼsaʼna fiesta lu, pero waje tuʼn t-xi nqʼoʼne jlu teya». Bʼalo oʼkx taj tuʼn tkubʼ tyekʼin tbʼanel tmod tukʼila. ¿Yajtzun qa in bʼant jlu tuʼn noq tuʼn toka toj prueba tuʼn moqa tuʼn tok tkeʼyin qa taja tuʼn ttena toj fiesta? Aj tel tnikʼa tiʼj jlu, aya kbʼel ximente qa tzul tkʼamoʼna regalo moqa miʼn. Noq tiʼxku kbʼantel quʼn, qaj tuʼn tkubʼ qnaʼn bʼaʼn ex tuʼn kukx qajbʼen te Jehová (Hechos 23:1).
Meltzʼaja toj xnaqʼtzbʼil 44, punto 1
6. Qe yabʼil jaku tzʼel kyiqen txqantl
Tuʼnju in che ok qkʼujlaʼn xjal, in nok qxqʼuqin qibʼ qa at jun yabʼil qiʼj tuʼntzun miʼn tel kyiqen txqantl. Atzun jlu in bʼant quʼn qa at jun yabʼil qiʼj moqa in kubʼ qximen qa otoq tzʼel qiqen jun yabʼil. Ex in bʼant jlu quʼn tuʼntzun t-xi qbʼiʼn texto lu: «Kykʼujlame qe kyukʼile ik tzaʼn kyeye in kykʼujlan kyibʼe» (Romanos 13:8-10).
¿Tzeʼn jaku txi qbʼiʼn qe yol lu? Qa at jun yabʼil qiʼj ex jaku tzʼel kyiqen txqantl, mlay che tzaj qchleʼn, mlay txi qqʼoʼn qqʼabʼ kye ex mlay txi qqʼoʼn jun kymaʼtz moqa kytzʼubʼ. Ax ikx, mintiʼ tuʼn ttzaj qqʼoj qa mintiʼ in tzaj qʼoʼn txokbʼil qiʼj tuʼn jun erman tuʼn qxiʼ tja tuʼnju taj tuʼn tok t-xqʼuqin qe toj tja. Qatzun naʼmx qbautisarin ex in pon ambʼil tuʼn qbautisarin ex at jun yabʼil qiʼj, il tiʼj tuʼn t-xi qqʼamaʼn te ansyan qʼol kyaqʼun kʼloj ansyan. Qa ma bʼant jlu quʼn, kbʼel kyximen ansyan tzeʼn qo bautisaril tuʼntzun miʼn tel kyiqen txqantl yabʼil. Ax ikx, qa in ximen jun ermano tuʼn t-xi tzyet tuʼn tyolin tukʼil jun ermana ex in kubʼ t-ximen qa tok jun yabʼil tiʼj, nim toklen tuʼn tetz tiʼn junjun examen tiʼj tchkʼel naʼmxtoq t-xi tzyet tuʼn tyolin. Qa ma bʼant jlu kyuʼn, in kubʼ kyyekʼin qa kʼujlaʼn qe txqantl kyuʼn ex qa nya oʼkx in che ximen kyiʼjx, sino ax ikx in che ximen kyiʼj txqantl (Filipenses 2:4).
Meltzʼaja toj xnaqʼtzbʼil 56, punto 2
7. Qe kʼaẍjel ex qe tiʼchaq at toklen tukʼil ley
Mlayxix tzaj nya bʼaʼn qiʼj qa ma kubʼ qtzʼibʼin jun uʼj aj t-xi qqʼoʼn pwaq te chʼex, axpe ikx qa tukʼil jun okslal (Jeremías 32:9-12). Bʼalo at maj jaku tzaj nya bʼaʼn kyxol kabʼe okslal tuʼn tpaj pwaq moqa kyuʼn junjuntl tiʼchaq. Qa ma bʼaj jlu, il tiʼj tuʼn t-xi kybʼinchaʼn tiʼj nya bʼaʼn kyjunalx ex mintiʼ tuʼn t-xi kyqʼoʼn nim ambʼil te.
Pero, ¿tzeʼn jaku txi kybʼinchaʼn tiʼj jun elqʼabʼil moqa tiʼj jun sbʼubʼil? (Uʼjinktza Mateo 18:15-17). Tqʼama Jesús qa il tiʼj tuʼn kybʼant oxe tiʼ lu:
Aj ttzaj nya bʼaʼn kyxol kabʼe xjal, kʼokel tilil kyuʼn tuʼn t-xi kybʼinchaʼn tiʼj nya bʼaʼn kyxolx (qʼonka twitza tiʼj versículo 15).
Qa mintiʼ ma kyaj nya bʼaʼn toj ttxolil, jaku txi kyqanin onbʼil te jun moqa te kabʼe erman o che chʼiy toj kyokslabʼil tuʼn kyten kyukʼil (qʼonka twitza tiʼj versículo 16).
Qa ma bʼant jlu kyuʼn ex mintiʼ in kyaj nya bʼaʼn toj ttxolil, toj ambʼil lu che jyol onbʼil kyukʼil ansyan (qʼonka twitza tiʼj versículo 17).
Noq tiʼxku ma bʼaj, mintiʼ tuʼn t-xi qiʼn jun erman twitz jwes tuʼnju jaku che yolin xjal nya bʼaʼn tiʼj Jehová ex tiʼj kʼloj okslal (1 Corintios 6:1-8). Noqtzun tuʼnj, atlo junjun tiʼchaq jaku txi bʼinchet kyiʼj kyoj jusgad, ik tzeʼn jun divorcio, alkye kʼokel responsable kyiʼj kʼwal, alkye tzul qʼonte twi kywa, qe seguro, qa ma kubʼ naj jun kʼaẍjel moqa qe tiʼchaq at kyoklen kyukʼil testamento. Qa at jun okslal ma txi tbʼinchaʼn kyiʼj tiʼchaq lu toj tumel kywitz jwes, mintiʼ in nikʼ tibʼajju in tzaj tqʼamaʼn Tyol Dios.
Ax ikx, qa at jun okslal ma txiʼ qʼol part twitz jwes tuʼnju otoq tzaj violarin jun xjal, otoq tzʼok ten jun xjal tiʼj jun tal kʼwal, otoq tzʼok bʼyoʼn jun xjal, otoq txi elqʼan nim pwaq ex qa otoq kubʼ bʼyoʼn jun xjal, mintiʼ in nikʼ tibʼajju in tzaj tqʼamaʼn Tyol Dios.
a Qa ma txi qajlaʼn tiʼj abʼqʼi 455 t.a.j. tuʼn qpon tiʼj abʼqʼi 1 t.a.j., at 454 abʼqʼi. Ex qa ma txi qajlaʼn tiʼj abʼqʼi 1 t.a.j. tuʼn tpon tiʼj abʼqʼi 1 a.j., at jun abʼqʼi tuʼnju mintiʼ abʼqʼi cero. Ax ikx qa ma txi qajlaʼn tiʼj abʼqʼi 1 a.j. tuʼn qpon tiʼj abʼqʼi 29 a.j., at 28 abʼqʼi. Tuʼntzunju, qa ma txi qsumarin 454 + 1 + 28, in tzaj tqʼoʼn jun tajlal te 483 abʼqʼi.