XNAQʼTZBʼIL 13
In bʼaj kytzʼilsaʼn nya ax tok okslabʼil tbʼi Dios
Qa kʼujlabʼil te Dios ex qa in tzaj kyqʼamaʼn okslabʼil qa in che ajbʼen te, ¿tiquʼntzun in kubʼ kybʼinchaʼn nim nya bʼaʼn? Toj chʼin yol, tuʼnju nya ax tok qe okslabʼil lu moqa nimbʼil. In bʼaj kytzʼilsaʼn tbʼi Dios tukʼil nya ax tok xnaqʼtzbʼil in xi kyxnaqʼtzaʼn ex tukʼil kybʼinchbʼen. ¿Alkye tten o bʼant kyuʼn? ¿Tiʼ in kubʼ tnaʼn Dios tuʼn jlu? ¿Ex tiʼ kbʼajel kyiʼj okslabʼil nya ax tok?
1. ¿Alkye tten o bʼaj kytzʼilsaʼn tbʼi Dios tukʼilju in xi kyxnaqʼtzaʼn?
O bʼaj kychʼexpuʼn nya ax tok okslabʼil «aju tyol Dios axix tok» ex in «xi kyniman aju nikʼaj yol» (Romanos 1:25). Jun techel, ateʼ nim okslabʼil mintiʼ in xi kyxnaqʼtzaʼn tbʼi Dios kye xjal. Atzunte Biblia in tzaj tqʼamaʼn tuʼn tajbʼen tbʼi Dios quʼn (Romanos 10:13, 14, TNM). Ax ikx, aj ttzaj jun nya bʼaʼn kyiʼj xjal, ateʼ junjun nejenel kye okslabʼil in xi kyqʼamaʼn qa tuʼn Dios in bʼaj jlu kyiʼj. Pero nya ax tok jlu tuʼnju mintiʼ in nok tbʼinchaʼn Dios nya bʼaʼn kyiʼj xjal (uʼjinktza Santiago 1:13). Bʼisbʼajil tuʼnju ateʼ nim xjal in nel kypan kyibʼ tiʼj Dios aj t-xi qʼamaʼn nya ax tok xnaqʼtzbʼil lu kye.
2. ¿Alkye tten o bʼaj kytzʼilsaʼn tbʼi Dios tukʼil kybʼinchbʼen?
Mintiʼ in kubʼ kyyekʼin nya ax tok okslabʼil tbʼanel kymod kyukʼil xjal ik tzeʼn te Jehová. In tzaj tqʼamaʼn Tyol Dios jlu: «Porke ma chmet nimxix til, ex ma tzaj tnaʼn Dios ju tbʼinchbʼen mya bʼaʼn» (Apocalipsis 18:5). Atxix ojtxe in nokx kyqʼon kyibʼ nya ax tok okslabʼil kyxol aj kawil, in che onin kyiʼj qʼoj ex in xi kyqʼamaʼn nya ax tok yol kyiʼj nim xjal moqa in xi kyqʼamaʼn tuʼn kykubʼ bʼyoʼn. Ateʼ junjun nejenel kye okslabʼil at nim tiʼchaq kye ex qʼinun qe. Tuʼn kukx kyten tiʼchaq lu kye, in xi kyqanin pwaq kye xjal ateʼ toj kyokslabʼil. In tzaj tyekʼin jlu qa mintiʼ ojtzqiʼn Dios kyuʼn. Tuʼntzunju, ¿tiquʼn jaku kubʼ qximen qa in che ajbʼen te Dios? (Uʼjinktza 1 Juan 4:8).
3. ¿Tiʼ in kubʼ tnaʼn Dios aj tok tqʼoʼn twitz tiʼjju in bʼant kyuʼn?
Qa nya bʼaʼn in nela kybʼinchbʼen okslabʼil nya ax tok toj twitza, mas nya bʼaʼn in nela toj twitz Jehová. Kʼujlaʼn qe xjal tuʼn, pero at nim tqʼoj kyiʼj nejenel kye okslabʼil tuʼnju in bʼaj kytzʼilsaʼn tbʼi ex in nok kybʼinchaʼn nya bʼaʼn kyiʼj xjal. In tzaj ttziyen Jehová qa chʼix kykubʼ tnajsaʼn okslabʼil nya ax tok ex ya mlay che ten juntl maj (Apocalipsis 18:8, 21).
QO JYON MAS TQANIL
Qo xnaqʼtzan chʼintl tiʼj tiʼ t-ximbʼetz Jehová at kyiʼj okslabʼil nya ax tok ex tiʼ o bʼant kyuʼn. Ax ikx, kʼelel qnikʼ tiʼj tiquʼn mintiʼ tuʼn tkyaj ttzaqpiʼna tuʼn t-xnaqʼtzana tiʼj Tyol noq tuʼn nya bʼaʼn kybʼinchbʼen okslabʼil nya ax tok.
4. Nya kykyaqil okslabʼil bʼaʼn in che ela toj twitz Dios
Ateʼ nim xjal in kubʼ kyximen qa kykyaqil okslabʼil bʼaʼn in che ela toj twitz Dios. Noqtzun tuʼnj, ¿axpe tok jlu? Kyuʼjinktze Mateo 7:13 ex 14, ex che yoline tiʼj xjel lu:
Ik tzeʼn in tzaj tqʼamaʼn Tyol Dios, ¿alkye bʼe in qox tiʼn toj chwinqlal?
Kyqʼonke kywitze tiʼj VIDEO ex che yoline tiʼj xjel lu:
¿In tzajpe tqʼamaʼn Biblia qa in chex tkʼamoʼn Dios kykyaqil okslabʼil?
5. Mintiʼ in kubʼ kyyekʼin nya ax tok okslabʼil tkʼujlabʼil Dios
O bʼaj kytzʼilsaʼn nya ax tok okslabʼil tbʼi Dios toj nimku tten, ex jun kyxol qe jlu ik tzeʼn aj kyonin kyiʼj nimaq qʼoj. Tuʼn tel kynikʼe tiʼj jlu, kyqʼonke kywitze tiʼj VIDEO. Yajxitl che yoline kyiʼj xjel lu:
¿Tiʼ kubʼ kyximen nim okslabʼil tuʼn tbʼant kyuʼn tej tok Tkabʼ Nimaq Qʼoj twitz Tkyaqil Txʼotxʼ?
¿Tiʼ t-ximbʼetza tiʼjju bʼant kyuʼn?
Kyuʼjinktze Juan 13:34, 35 ex 17:16. Yajxitl che yoline kyiʼj xjel lu:
¿Tiʼ in kubʼ tnaʼn Jehová aj kyonin okslabʼil kyiʼj nimaq qʼoj?
At kypaj okslabʼil nya ax tok tiʼj nim nya bʼaʼn o tzaj ex mintiʼ in kubʼ kyyekʼin tkʼujlabʼil Dios. ¿Alkyeqe nya bʼaʼn o tzʼok tqʼoʼna twitza tiʼj?
Mintiʼ o kubʼ kyyekʼin nya ax tok okslabʼil tkʼujlabʼil Dios.
6. Taj Dios tuʼn kyetz xjal kyoj okslabʼil nya ax tok
Kyuʼjinktze Apocalipsis 18:4 ex che yoline tiʼj xjel lu:a
Taj Dios tuʼn tonin kyiʼj xjal tuʼn kyetz kyoj okslabʼil nya ax tok tuʼntzun ya miʼn kykubʼ sbʼuʼn. ¿Tiʼ teya t-ximbʼetz tiʼj jlu?
7. Kukx ojtzqinka Dios axix tok
¿Kbʼelpe t-ximana nya bʼaʼn tiʼj Dios noq tuʼnju nya bʼaʼn o bʼant kyuʼn okslabʼil nya ax tok? Ximana tiʼj jun kʼwal mintiʼ in xi tbʼiʼn qe tbʼanel tconsej ttat, in nex toj ja ex in ten jun nya bʼaʼn tanqʼibʼil. Nya bʼaʼn in nela jlu toj twitz ttat. Tuʼntzunju, ¿jakupe tzʼok qqʼoʼn te tpaj tatbʼaj tkyaqilju o tzaj tiʼj tkʼwal?
¿Kbʼelpe qximen qa a Jehová at tpaj tiʼj tkyaqilju nya bʼaʼn o bʼant kyuʼn nya ax tok okslabʼil ex kjel qtzaqpiʼn tuʼn qxnaqʼtzan tiʼj Biblia?
AJU IN TZAJ KYQʼAMAʼN JUNJUN XJAL: «Kykyaqil okslabʼil tbʼanel qe tuʼnju axju in tzaj kyqʼamaʼn tiʼj Dios».
¿Axpe teya t-ximbʼetz?
Maske in tzaj kyqʼamaʼn nim okslabʼil qa in xi kyxnaqʼtzaʼn axix tok, ¿tiquʼn nya kykyaqil okslabʼil bʼaʼn in che ela toj twitz Dios?
TOJ CHʼIN YOL
O bʼaj kytzʼilsaʼn nya ax tok okslabʼil tbʼi Dios tuʼn kyxnaqʼtzbʼil ex tuʼn nya bʼaʼn kybʼinchbʼen. Tuʼntzunju, toj chʼintl ambʼil che kbʼel tnajsaʼn Dios.
Aju ma qo yolin tiʼj
¿Tiʼ t-ximbʼetza at tiʼjju o bʼant kyuʼn okslabʼil nya ax tok ex tiʼjju o txi kyxnaqʼtzaʼn?
¿Tiʼ t-ximbʼetz Jehová at kyiʼj okslabʼil nya ax tok?
¿Tiʼ kbʼantel tuʼn Dios kyiʼj okslabʼil nya ax tok?
OJTZQINKA CHʼINTL
Ateʼ nim okslabʼil nya bʼaʼn in che ela toj twitz Dios. Ojtzqinka kabʼe tiquʼn.
«¿In che oninpe kykyaqil okslabʼil qiʼj tuʼn qok laqʼeʼ ttxlaj Dios?» (Xnaqʼtzbʼil toj jw.org)
¿Tiquʼn taj Jehová tuʼn qkʼulin te kyukʼil txqantl ex nya qjunalx?
«¿Ilpe tiʼj tuʼn tten jun qokslabʼil?» (Xnaqʼtzbʼil toj jw.org)
Nyatoq qʼuqli tkʼuʼj jun pal tiʼj tokslabʼil. Pero mintiʼ el tiʼn jlu ambʼil te tuʼn tel tnikʼ tiʼj Dios.
«Kyaj ttzaqpiʼn jun pal tuʼn tok tchmon tibʼ toj Iglesia Católica» (¡Weʼktza!, febrero te 2015)
Atxix ojtxe o tzaj kyqʼamaʼn okslabʼil qa mintiʼ in ximen Dios kyiʼj xjal ex qa in nok tbʼinchaʼn nya bʼaʼn kyiʼj. Ojtzqinka jatumel tzaj tzyet oxe nya ax tok xnaqʼtzbʼil tiʼj Dios.
«In qo el kylaqʼbʼaʼn nya ax tok xnaqʼtzbʼil tiʼj Dios» (Aju Xqʼuqil, 1 te noviembre te 2013)