XNAQʼTZBʼIL 36
Qqʼamanx axix tok yol toj tkyaqil ambʼil
Qkyaqilx qaj tuʼn tkubʼ kybʼinchaʼn qamiw aju bʼaʼn ex tuʼn kyyolin tiʼj axix tok yol. Ax ikx te Jehová taj tuʼn tkubʼ kybʼinchaʼn tamiw aju bʼaʼn. Pero at maj kwest tuʼn t-xi qqʼamaʼn axix tok yol, tuʼnju ateʼ nim xjal in che sbʼun moqa in che engañarin kyiʼj txqantl. ¿Jakupe tzaj tbʼanel qe qa ma txi qqʼamaʼn axix tok yol toj tkyaqil ambʼil? Qa ikju, ¿tiʼ tbʼanel tzul qe?
1. ¿Tiquʼn nim toklen tuʼn t-xi qqʼamaʼn axix tok yol?
Aj t-xi qqʼamaʼn axix tok yol toj tkyaqil ambʼil, in kubʼ qyekʼin qa kʼujlaʼn Jehová quʼn ex qa in nok qqʼoʼn toklen. Ex bʼaʼn tuʼn ttzaj qnaʼn qa in nok tqʼoʼn Jehová twitz tiʼjju in kubʼ qximen ex tiʼjju in bʼant quʼn (Hebreos 4:13). Tuʼntzunju, ojtzqiʼn tuʼn qa in xi qqʼamaʼn axix tok yol ex nim toklen jlu toj twitz. In tzaj tqʼamaʼn Tyol Dios jlu: «Ikʼun tuʼn Qman qe xjal bʼinchal mya bʼaʼn; atzun qeju in kybʼinchaʼn tzʼaqlxix, at tmojbʼabʼl tibʼ kyukʼil» (Proverbios 3:32).
2. ¿Toj alkye ambʼil kxel qbʼinchaʼn aju bʼaʼn?
Tuʼn t-xi qbʼinchaʼn aju taj Jehová, nim toklen tuʼn qyolin tiʼj «axix tok [yol] kyukʼil txqantl» (Zacarías 8:16, 17). ¿Tiʼ t-xilen jlu? A t-xilen qa mintiʼ in xi qqʼamaʼn nya ax tok yol kye toj qja, kye qukʼil toj aqʼuntl, kye erman ex kye aj kawil. Aqeju tbʼanel xjal, mintiʼ in che elqʼan ex mintiʼ in che sbʼun kyiʼj txqantl (uʼjinktza Proverbios 24:28 ex Efesios 4:28). Ax ikx, in xi kychjoʼn impuesto kye aj kawil (Romanos 13:5-7). Kyjuʼtzun, qaj tuʼn tkubʼ qbʼinchaʼn bʼaʼn toj tkyaqil tten qanqʼibʼil (Hebreos 13:18).
3. ¿Tiʼ tbʼanel tzul qe qa ma txi qqʼamaʼn axix tok yol?
Aj tok kykeʼyin txqantl qa in xi qqʼamaʼn axix tok yol, in nok qeʼ kykʼuʼj qiʼj. Ax ikx, in nonin jlu qiʼj tuʼn tok qeʼ qkʼuʼj kyiʼj erman, tuʼn tten mujbʼabʼil qxol ik tzeʼn jun ja xjal ex tuʼn tten jun tbʼanel qximbʼetz. Qa ma kubʼ qyekʼin tbʼanel qmod, jaku tzʼonin jlu kyiʼj xjal tuʼn tel kynikʼ tiʼj «qa tbʼanilxix t-xnaqʼtzbʼil Dios aju Klol qe» ex jaku kubʼ kyximen junjun tuʼn kyajbʼen te (Tito 2:10).
QO JYON MAS TQANIL
Qo xnaqʼtzan tiʼj tiʼ jaku bʼant quʼn tuʼn t-xi qqʼamaʼn axix tok yol toj tkyaqil ambʼil ex tzeʼn jaku tzʼonin jlu qiʼj tuʼn tchʼiy qamiwbʼil tukʼil Jehová.
4. In tzalaj Jehová kyiʼj xjal axix tok che yolin
Kyuʼjinktze Salmo 44:21 ex Malaquías 3:16. Yajxitl che yoline kyiʼj xjel lu:
¿Tiquʼn nya toj tumel aj tkubʼ qximen tuʼn t-xi qqʼamaʼn nya ax tok yol? ¿Tiquʼn in kubʼ t-ximana jlu?
¿Tiʼtzulo kbʼel tnaʼn Jehová qa ma txi qqʼamaʼn axix tok yol, axpe ikx qa at maj kwest?
In che jaw tzalaj tatbʼaj aj t-xi kyqʼamaʼn kykʼwal axix tok yol kye. Ax ikx in jaw tzalaj Jehová aj t-xi qqʼamaʼn axix tok yol.
5. Qqʼamanx axix tok yol toj tkyaqil ambʼil
Ateʼ nim xjal in tzaj kyqʼamaʼn qa nya toj tumel aj t-xi qqʼamaʼn axix tok yol toj tkyaqil ambʼil, noqtzun tuʼnj, qo xnaqʼtzan tiʼj tiquʼn nim toklen tuʼn tbʼant quʼn. Kyqʼonke kywitze tiʼj VIDEO.
Kyuʼjinktze Hebreos 13:18 ex che yoline tiʼj tzeʼn jaku txi qqʼamaʼn axix tok yol...
kyukʼil toj qja.
toj aqʼuntl moqa toj tja xnaqʼtzbʼil.
ex toj junjuntl ambʼil.
6. In nonin qiʼj aj t-xi qqʼamaʼn axix tok yol
Jakulo tzaj nya bʼaʼn qiʼj aj t-xi qqʼamaʼn axix tok yol toj tkyaqil ambʼil, pero atzun mas tbʼanel tuʼn tbʼant quʼn. Kyuʼjinktze Salmo 34:12 a 16 ex che yoline tiʼj xjel lu:
Qa ma txi qqʼamaʼn axix tok yol, ¿tzeʼn jaku tzʼonin jlu qiʼj toj qanqʼibʼil?
Aj t-xi tqʼamaʼn chmilbʼaj ex xuʼjilbʼaj axix tok yol, in chʼiy kʼujlabʼil toj kymejebʼleʼn.
Aj t-xi kyqʼamaʼn aqʼunal axix tok yol, in nok qeʼ kykʼuʼj kypatrón kyiʼj.
Aj t-xi kyqʼamaʼn xjal axix tok yol, in che yolin aj kawil bʼaʼn kyiʼj.
AJU IN TZAJ KYQʼAMAʼN JUNJUN XJAL: «Mlay tzaj nya bʼaʼn qiʼj qa ma txi qqʼamaʼn jun nya ax tok yol».
¿In nelpe tikʼun Jehová tkyaqil nya ax tok yol? ¿Tiquʼn in kubʼ t-ximana jlu?
TOJ CHʼIN YOL
Taj Jehová tuʼn tkubʼ kybʼinchaʼn tamiw aju bʼaʼn toj tkyaqil ambʼil ex tuʼn t-xi kyqʼamaʼn axix tok yol.
Aju ma qo yolin tiʼj
¿Toj alkye ambʼil kxel qqʼamaʼn axix tok yol?
¿Tojpe tumel qa ma kubʼ qximen tuʼn t-xi qqʼamaʼn nya ax tok yol?
¿Tiquʼn nim toklen tuʼn t-xi tqʼamaʼna ax tok yol toj tkyaqil ambʼil?
OJTZQINKA CHʼINTL
¿Tzeʼn jaku che onin tatbʼaj kyiʼj kykʼwal tuʼn t-xi kyqʼamaʼn axix tok yol?
¿Tiʼ kʼiwlabʼil tzul kykʼamoʼn qeju in japun twi kyyol?
Bʼaʼn tuʼn tel tnikʼa tiʼj qa bʼaʼn tuʼn t-xi qchjoʼn impuesto maske nya toj tumel in najbʼen pwaq.
«¿Ilpe tiʼj tuʼn t-xi tchjoʼna impuesto?» (Aju Xqʼuqil, 1 te septiembre te 2011)
¿Tiʼ onin tiʼj jun xjal in sbʼun tuʼn tchʼexpaj tanqʼibʼil ex tuʼn tkubʼ tbʼinchaʼn aju bʼaʼn?
«El nnikʼe tiʼj qa tbʼanel te Jehová ex in kubʼ tnajsaʼn qil» (Xnaqʼtzbʼil toj uʼj Xqʼuqil)